ང་རང་ཕ་བོང་ཞིག་ཡིན་ན་བསམ་བྱུང་།

སེམས།

 
༡༽ ང་རང་ས་སྲོད་ཅིག་ཏུ་བསྡད་དེ།
འཆར་ཡན་ནང་བཞིན་གྱི་འཇིག་རྟེན་ཞིག་བཟོ་འདོད།

ང་ལ་རས་ཡུག་གཅིག་ལས་མེད་ཀྱང་ཆོག་ལ།
ཟླ་བ་དང་སྐར་མ་ཟེར་བའང་ཐ་སྙད་ཙམ་དུ་ཟད་ཀྱང་རུང་།
ངས་འོད་སྣང་ཟེར་བ་དེ་ཅི་ཞིག་ལས་གྲུབ་པ་མ་ཤེས་ཀྱང་།
མུན་པ་གྱོན་ཏེ་འཇིག་རྟེན་ཞིག་བརྒལ་འདོད།

༢༽ གོམ་པ་སྤོ་ཉེས་ཤིག་གིས།
ཡང་ན་བསམ་བློ་འཁྱེར་སྟངས་ཤིག་གིས།
ང་རང་གཅིག་པུ་སོང་ནས།
ཆེས་ཐག་རིང་གི་གནམ་མཐར་ཧད་ནས་བསྡད་འདོད།

དེ་ནི་དོན་དག་ཅི་ཡང་མ་བྱུང་བ་དང་འདྲ་ལ།
ཅི་ཡང་འབྱུང་རྒྱུ་མེད་པ་དང་ཡང་འདྲ།

༣༽ ཁྱེད་ཀྱིས་སྐད་ཆ་དེ་མ་བཤད་ནའང་།
ཡང་ནའང་ངའི་སྐད་ཆ་དེ་མ་གོ་ནའང་།
གྲང་རླུང་གི་ཐེམ་པ་ཞིག་གིས་ང་ལ་བསྒུགས་ནས་ཡོད་ཨང་།

ང་རང་བགྲོད་འགྱུར་གྱི་ལམ་ཁ་དེ་དག
དབེན་ཐིང་ཐིང་གི་མཚན་མོ་ཞིག་ལྟར།
དོན་དག་ཅི་ཡང་མི་འབྱུང་བ་ནང་བཞིན་ང་ལ་བསྒུགས་ནས་ཡོད་ཨང་།

༤༽ ཁྱེད་རང་གཅིག་པུས་མཚན་མོ་ཞིག་བཟོས་ཏེ།
སྐར་མ་མ་སྒྲིག་སྔོན་ནས་མུན་པ་རྫོགས་སོང་ཟེར་ན།
ཡང་ན་ཁྱེད་ཀྱིས་བཏང་བའི་ཀོ་གྲུ་དེ།
གཙང་འགྲམ་དུ་མ་སླེབས་བར་དུ་འཐོར་སོང་ཟེར་ན།

སྐབས་སྐབས་སུ་མཚན་མོ་བུད་སོང་ན་ཡང་།
མུན་པ་སྔར་བཞིན་གནས་ན་སྙམ་ཨང་།

༥༽ ཅི་ཞིག་ལ་དུས་ཚོད་དེ་ཏག་ཏག་ང་ལ་སྟབས་ཁེལ་སོང་བ་རེད་དམ།
ལྟོས་དབང་ཡིན་པར་ཆ་བཞག་ནའང་།
མུན་པ་སྲབ་མོ་བབས་པའི་སྔ་ནུབ་ཅིག་ཡིན་ན་ཅི་ལ་མི་ཆོག་གམ།

ཆུ་ཚོད་ཀྱིས་ང་ཚོ་ཁྲིད་ནས་འདིར་སླེབས་དུས།
ངས་ཅི་ཡང་ཤེས་མི་འདོད།
མཐའ་ན་ཤེས་ཡོད་པ་དག་ཀྱང་བརྗེད་སོང་ན་བསམ་བྱུང་།

༦༽ གློ་བུར་གློ་བུར་དུ་ང་རང་ཕ་བོང་ཞིག་ཡིན་ན་བསམ་བྱུང་།

གཙང་འགྲམ་གྱི་ཕ་བོང་ཞིག་ཡིན་ན།
རླབས་ཀྱིས་རྡེག་ཅིང་རླུང་བུས་བྲབས་ནའང་།
ན་ཟུག་དང་ཐག་རིང་སར་ཁུ་སིམ་མེར་གནས་ཆོག་ཨང་།

2015/7/27/ལ།