བཅར་འདྲི་བ། རྡོ་རྗེ་ཚེ་རིང།
(སྤྱི་ཚོགས་མེ་ལོང་ཚགས་པར་ལས་བཤུས།)
དྲི་བ། ཐོག་མར་ཁྱོད་རང་ངོ་སྤྲོད་དང་ལོ་རྒྱུས་མདོར་བསྡུས་ཤིག་གསུངས་རོགས།
ལན། ངའི་མིང་ལ་བསྟན་པ་དར་རྒྱས་ཟེར་བ་དང་ཕ་ཡུལ་ཨ་མདོ་མགོ་ལོག་གཅིག་སྒྲིལ་རྫོང་སོག་རི་ཡུལ་ཚོ་རྫ་ར་རུ་ཆེན་ཟེར་བ་ནས་ཡིན། ང་ཚོ་འབྲོག་པ་ཡིན་སྟབས་ཆུང་དུས་ནས་འབྲོག་ལས་བྱས་པ་དང་། རྗེས་སུ་དགོན་པ་ཞིག་ཏུ་སོང་ནས་ཅུང་ཙམ་བསྡད་པ་ཡིན། སྤྱི་ལོ༢༠༠༠ལོར་བཙན་བྱོལ་དུ་ཐེངས་དང་པོ་ཡོང་ནས་རྒྱ་གར་དུ་ལོ་གཅིག་ལྷག་ལ་བསྡད་པ་ཡིན། སྐབས་དེ་དུས་བོད་ཕྱི་ནང་ཕན་ཚུན་ལ་དེང་སང་ནང་བཞིན་དྲ་རྒྱ་སོགས་ལྟ་བུའི་རྒྱུད་ལམ་སྟབས་བདེ་བོ་མེད་པས་ང་རང་གི་ངོས་ནས་བཙན་བྱོལ་ནང་གི་ཡིག་ཆ་རེ་དང་༸གོང་ས་མཆོག་གི་བཀའ་སློབ་རེ་བོད་དུ་བཀྲམ་ཐུབ་ན་ཡག་པོ་འདུག་སྙམ་པའི་ཀུན་སློང་གིས་རྒྱུད་སྐུལ་ནས་༼མ་འོངས་བོད་ཀྱི་ཆབ་སྲིད་ལམ་སྟོན་༽དང་༼རྩ་ཁྲིམས་ལམ་སྟོན།༽༼བཙན་བྱོལ་བོད་ཀ ྱི་བཅའ་ཁྲིམས།༽༼ངོས་ཀྱི་ཡུལ་དང་ངོས་ཀྱི་མི་མང་།༽༼བཀའ་སློབ་སྙིང་གི་ནོར་བུ།༽ལ་སོགས་པའི་དེབ་གྲངས་༡༤༥དང་༼༸གོང་ས་མཆོག་གི་སྐུ་པར་༤༢༠༽ ༼བོད་ཀྱི་རྒྱལ་དར་ཆེ་ཆུང་གཉིས་ཀ་བསྡོམས་པའི་༢༠༩༽༼སྒྲ་ཐག་༧༽ ༼བརྙན་འཁོར་༣༽༼བོད་ཀྱི་ས་ཁྲ་༽སོགས་ཁྱེར་ཏེ་ཤར་གངས་པོ་བརྒྱུད་ནས་འགྲོ་སྐབས་མགོ་ལོག་དགའ་བདེའི་གྲོགས་པོ་འཕྲིན་ལས་རྒྱ་མཚོ་དང་ངེད་གཉིས་ཡོད། དེ་ནས་ཤར་གངས་པོ་ནས་ཕར་ཅུང་ཕྱིན་མཚམས་རྒྱ་ནག་གི་བྲག་དམར་དམག་སྒར་ཟེར་བའི་མཐའ་སྲུང་དམག་གིས་སྤྱི་ལོ་༢༠༠༡ལོའི་ཟླས་༢ཉིན་ང་རང་འཛིན་བཟུང་བྱས་པ་རེད། དེ་ནས་དིང་རི་ནས་གཞིས་ཀ་རྩེར་ཁྲིད་དེ་མངའ་རིས་བཙོན་ཁང་དུ་ཁྲིམས་ཐག་མ་བཅད་པར་ལོ་༡དང་ཉིན་༢༢ལ་སྡོད་དགོས་བྱུང་བ་རེད། དེ་ནས་འཕྲིན་ལས་རྒྱ་མཚོ་དང་ངེད་གཉིས་ལ་ལོ་༤དང་ཟླ༦གི་ཁྲིམས་ཐག་བཅད་ནས་གྲ་བཞིའི་བཙོན་ཁང་དུ་ཁྲིད་པ་རེད། ཡིན་ན་ཡང་། ངེད་གཉིས་མནར་གཅོད་འོག་ནས་ཁྱོན་བསྡོམས་ལོ་༤དང་ཟླ༡༠ལ་བཙོན་དུ་སྡོད་དགོས་བྱུང་པ་རེད། དེ་ནས་གྲ་བཞིའི་བཙོན་ཁང་ནས་ལོ་༣མ་ཟིན་ཙམ་གྱི་སྐབས་དེ་༢༠༠༥ལོའི་ཟླ་༤ཚེས་༡༢ཉིན་གྲ་བཞིའི་བཙོན་ཁང་གི་བཙོན་མ་ཡོངས་ཆུ་ཤུལ་བཙོན་ཁང་དུ་ཁྲིད་པ་རེད། དེ་ནས་ང་ཟླ་བ་༡༠དང་ཉི་མ་༡༨ལ་བསྡད་པ་ཡིན། སྤྱི་ལོ་༢༠༠༦ཟླ༠༣ཚེས་༡ཉིན་བཙོན་ཁང་ནས་གློད་གྲོལ་ཐོབ་མོད་ད་དུང་ཁྱོད་ལ་ལོ་༤དང་ཟླ་༦ནང་སྤྱི་ཚོགས་སྟེང་ཆབ་སྲིད་ཀྱི་འགན་དབང་འཕྲོག་པ་མ་ཟད། ཤོག་ལྷེ་གཅིག་གི་སྟེང་ཐེལ་རྟགས་བརྒྱབ་ཏེ་ཕྱེད་ཀར་བཏང་ནས་ཡ་གཅིག་ང་ལ་སྤྲད་པ་དང་ཡ་གཅིག་མགོ་ལོག་ཉེན་རྟོག་ཁང་དུ་བཏང་། ཁྱོད་རང་མགོ་ལོག་ཁུལ་གྱི་གསང་བའི་ཉེན་རྟོག་ཁང་དུ་སོང་ནས་ཟླ་རེར་ཐོ་འགོད་བྱེད་དགོས་པ་དང་གལ་སྲིད་དེ་ལྟར་མ་བྱས་ཚེ་ཡང་བསྐྱར་བཙོན་འཇུག་བྱེད་སྲིད་ཚུལ་སོགས་བཤད་ནས་ང་གློད་གྲོལ་བཏང་བ་རེད།
དེ་ནས་ང་མགོ་ལོག་ཏུ་སོང་ནས་ཁོང་ཚོས་བཤད་པ་ལྟར་ཉེན་རྟོག་ཁང་དུ་མ་སོང་བར་ཤར་རྒྱུགས་ཀྱིས་ཁྱིམ་གྱི་མ་རྒན་མའི་མདུན་དུ་བཅར་བ་དང་དེ་རུ་ཉིན་གསུམ་བསྡད་རྗེས་ཁྲི་འདུ་དང་རྔ་བ། རྨ་ཆུ་སོགས་སུ་འཁྱམས་བཞིན་ལོ་དེའི་ཟླ་༧པའི་ནང་༸གོང་ས་མཆོག་གི་མི་ཚེའི་མདུན་ལམ་ཀྱི་དེབ་བོད་ནང་ནས་ལག་སོན་བྱུང་བ་གང་སར་བཀྲམས་ཤིང་གྲོགས་པོའི་གྲོགས་པོ་བརྒྱུད་དེ་རོགས་རམ་དང་རྒྱབ་སྐྱོར་འོག་ནས་ལོ་ངོ་གཉིས་ལྷག་ལ་ས་ཆ་གང་སར་ཆབ་སྲིད་ཀྱི་ལས་ཀ་འདྲ་མིན་བྱས་པ་ཡིན། སྤྱི་ལོ༢༠༠༨ཀྱི་ལོ་འགོར་ང་ལ་རྔ་བའི་སྤྲུལ་སྐུ་ངོ་ཤེས་ཞིག་གིས་བརྡ་ཞིག་བཏང་དོན། ཁྱོད་ཉིད་ཀྱིས་ཅུང་གཟབ་གཟབ་མ་བྱས་ཚེ་རྔ་བ་ཉེན་རྟོགས་ཁང་གིས་ཁྱོད་ཉིད་རྩད་གཅོད་བྱེད་བཞིན་འདུག ལས་ཀ་དང་ཕ་ཡུལ་སོགས་སྐད་ཆ་འདྲི་བཞིན་འདུག་ཟེར་བས་ང་གང་མགྱོགས་ཀྱིས་རྒྱ་གར་ཏུ་ཡོང་བའི་ཐབས་ཤེས་བྱས་པ་ཡིན། མ་གཞི་ངས་མི་ཚེའི་མདུན་ལམ་གྱི་དེབ་ཕལ་ཆེར་གཅིག་སྟོང་ལྷག་ཅིག་དཔར་བཞག་ཡོད་པ་དེ་རིགས་ཧ་གོ་བར་དོགས་ནས། ང་རང་མགོ་ལོག་གི་ཡིན་པའི་ཐོབ་ཐང་དཔང་ཡིག་གཅིག་དང་། རྔ་བ་ནས་ཡིན་པའི་ཐོབ་ཐང་དཔག་ཡིག་གཅིག ཀན་ལྷོ་ནས་ཡིན་པ་གཅིག་བཅས་བཟོས་ཡོད་སྟབས། སྐབས་དེར་གཙོད་དུ་སོང་ནས་གྲོགས་པོ་བརྒྱུད་དེ་རུ་ལམ་ཡིག་བླངས་ཏེ་ལྷ་སར་ཡོང་བ་ཡིན། ང་ལྷ་སར་འབྱོར་དུས་སྤྱི་ལོ་༢༠༠༨ཟླ་༠༣པའི་ཚེས་༠༣ཡིན་པ་དང་ཡུན་རིང་མ་སོང་ཟླ་༠༣པའི་ཚེས་༡༠སྟེ་གསུམ་བཅུའི་དུས་དྲན་དུ་ཁེལ་སྟབས་བོད་མི་ཚོས་ཡར་ལངས་བྱས་པ་རེད། ཡིན་ན་ཡང་། སྐབས་དེར་ང་རང་དངོས་སུ་མ་འཕྲད་པས་མཉམ་ཞུགས་བྱ་ཐབས་མ་བྱུང་། ཚེས་༡༤ཉིན་གཞི་རྒྱ་ཆེ་བའི་ཡར་ལངས་བྱས་པ་རེད་དེ་དུས་ང་རང་དངོས་སུ་མཉམ་ཞུགས་བྱས་ནས་ཆུ་ཚོད་བརྒྱད་ཀྱི་རིང་དུ་ངོ་རྒོལ་སྐད་འབོད་བྱས་པ་ཡིན། ཚེས་༡༨ཉིན་ས་དེའི་དམག་མི་དང་ཉེན་རྟོག་པ་མཉམ་འབྲེལ་ཐོག་ང་རང་ཡང་བསྐྱར་འཛིན་བཟུང་བྱས་མོད་ང་ལ་ལམ་འགྲོ་ཡག་ནས་གྲ་བཞིའི་བཙོན་ཁང་ནས་ཆུ་ཤུལ་བཙོན་ཁང་དུ་མ་ཁྲིད་པར་དགུ་ཚ་བཙོན་ཁང་དུ་བཅུག་པ་དང་ཕལ་ཆེར་ཉིན་༡༨ཙམ་སྡོད་དགོས་བྱུང་པ་རེད། དེ་རུ་ང་ངོ་རྟགས་སོགས་ཟིན་མཁན་མེད་པ་ཤེས་ནས་ཁ་སང་གི་ངོ་རྒོལ་སྐད་འབོད་ནང་མཉམ་ཞུགས་བྱས་པ་གཏན་ནས་ཁས་མ་བླངས་པ་ཡིན། ཉིན་ཞིག་ཡར་ལངས་བ་རྣམས་རང་རང་གི་ཡུལ་གང་གི་ཡིན་པ་དེར་བསྐྱལ་རྒྱུ་བྱས་པ་ན་ང་རྔ་བའི་ཡིན་པར་ཐོ་འགོད་བྱས་པ་ཡིན། གང་ཡིན་ཟེར་ན། རང་ཡུལ་མཚོ་སྔོན་དུ་བཏང་བ་ཡིན་ན་ངའི་གྲོགས་པོར་སྐད་ཆ་དྲིས་ནས་ང་རང་རྩད་གཅོད་བཞིན་པ་ཐོས་པ་དང་ཕལ་ཆེར་ཐར་ས་མེད་པ་ཤེས་པས་ཡིན། དེ་ལས་རྔ་བ་རྫོང་ནས་ངའི་སྐོར་སྐད་ཆ་རེ་དྲིས་པ་ཙམ་ལས་པར་དང་ལོ་རྒྱུས་སོགས་གསལ་བོར་ཤེས་ཀྱིན་ཡོད་པ་མ་རེད། དེའི་སྟབས་ཀྱིས་ང་རང་ཚོ་མི་༧༦མཉམ་དུ་ཆུ་ཚོད་༤༧ཙམ་གྱི་རིང་མེ་འཁོར་ཞིག་ནང་ཟི་ཁྲོན་མེན་ཡང་བཙོན་ཁང་དུ་ཁྲིད་པ་རེད།བཙོན་ཁང་དེ་རུ་ཉིན་༡༦ཙམ་ལ་བསྡད་རྗེས་རང་རང་གི་རྫོང་དུ་རྩིས་སྤྲོད་བྱས་པ་རེད། རྔ་བ་རྫོང་གི་ཡིན་པ་ང་ཚོ་མི་༥མ་གཏོགས་མེད་སྟབས་རྫོང་རང་གི་མི་སྣ་ལེན་པར་མ་ཡོང་བར་མཛོད་དགེ་རྫོང་གི་མི་སྣར་དོན་བཅོལ་གྱིས་ང་ཚོ་མཉམ་དུ་ཁྲིད་ཡོང་རོགས་ལབ་ཡོད་པས་ང་ཚོ་མཛོ་དགེ་རྫོང་གི་གཉེན་རྟོག་པས་མཛོད་དགེ་རྫོང་གི་ཡིན་པ་ཚོ་དང་མཉམ་གཅིག་ཏུ་མཛོད་དགེ་རྫོང་དུ་ཁྲིད་ཡོང་ནས་ཕར་རྔ་བ་རྫོང་དུ་མ་བསྐྱལ་བར་ཐད་ཀར་གློད་གྲོལ ་བཏང་པ་རེད།
དེ་ནས་ང་རང་རྫོང་ཁག་ཁ་ཁ་ཡིན་པའི་མགོ་ལོག་འབྲོག་ཁུལ་ཁག་དུ་ཕྱིན་ནས་འཁྱམས་ཉུལ་གྱིས་དབྱར་ཟླ་གསུམ་རིང་རྫོགས་པར་བྱས་པ་ཡིན། ལོ་དེའི་སྟོན་ཁར་གྲོགས་པོ་དང་གཉེན་ཉེ་ཚོས་ཡར་མར་ཐབས་ཤེས་བྱས་ནས་ང་རང་རྒྱ་ནག་གྲོང་ཁྱེར་པེ་ཅིན་དང་ཧར་པེན་ལ་འཁྱམས་ཉུལ་གྱིས་ཕལ་ཆེར་སྟོན་དགུན་གཉིས་དེ་ལྟར་འདས་པ་རེད། ཞར་ཞོར་ནས་ནམ་རྒྱུན་ལྷ་སར་ཁ་པར་བཏང་ནས་ཐབས་ལམ་མང་པོ་བཙལ་བ་ཡིན། ལས་བཅོལ་བྱེད་སའི་གྲོགས་པོ་དེས་ཉིན་ཞིག་བཤད་རྒྱུར། ད་ལྟ་ཁྱོད་རང་ཡར་ལྷ་སར་ཡོང་བ་ཡིན་ན་འགྲིག་ས་རེད་ཟེར་བས། ང་ཧར་ཕེན་ནས་ཐད་གར་ཕ་ཡུལ་གྱི་ཨ་མ་ལགས་ཀྱི་སར་བཅར་ཙམ་གྱིས་ལྷ་སར་ཡོང་བ་ཡིན། དེ་རུ་ཉིན་མང་བོ་མ་འགོར་བར་ལྷ་ས་ནས་འགྲམ། འགྲམ་ནས་ནས་བལ་ཡུལ་སྣེ་ལེན་ཁང་བར་དུ་རྒྱ་སྒོར་༨༠༠༠སྤྲད་དེ་སྤྱི་ལོ་༢༠༠༩ལོའི་ཟླ་༠༡ཚེས་༢༩ཡས་མས་ཞིག་ལ་བལ་ཡུལ་སྣེ་ལེན་ཁང་དུ་འབྱོར་བ་དང་ཟླ་༠༢ཚེས་༡༦ཉིན་འདིར་རྡ་ས་དབུས་སྣེ་ལེན་ཁང་དུ་འབྱོར་བ་རེད། དེ་ནས་ང་རང་ཤེས་རབ་དགའ་ཚལ་སློབ་གླིང་དུ་བཏང་སྟེ་ད་ལྟ་ལོ་༢དང་ཟླ་༦གི་རིང་དུ་བོད་ཡིག་མཐར་ཕྱིན་དང་དབྱིན་ཇི་འཛིན་རིམ་བཞི་བ་བར་ཏུ་སློབ་སྦྱོང་བྱེད་ཁུལ་གྱིས་བསྡད་པ་ཡིན་མོད། ཁ་སང་༼རྐང་འཁོར་སྐོར་བསྐྱོད་ལས་འགུལ་༽དེས་རྐྱེན་གྱིས་སློབ་གླིང་དེ་ནས་མ་ཐོན་རང་ཐོན་བྱུང་པ་རེད། ད་ལྟ་རྡ་ས་མེག་གྷན་དུ་ཁང་པ་ཞིག་གླས་ནས་གནས་སྡོད་བྱས་ཡོད།
དྲི་བ། ཁྱོད་ཉིད་སྔོན་ཆད་རྒྱ་ནག་གི་བཙོན་ཁང་རིམ་པར་བརྒྱུད་པའི་ཕྱི་ནང་གི་དཀའ་སྡུག་དང་མནར་གཅོད་མང་པོའི་ཁྲོད་ནས་ད་ལྟ་ད་དུང་ཡིད་དུ་གསལ་བའམ་ཡང་ན་བརྗེད་པར་མི་འདོད་པ་གང་འདྲ་ཡོད་དམ།
ལན། རྒྱ་ནག་གི་བཙོན་དུ་ཚུད་པ་ན་རྡུང་རྡེག་གཏོང་རྒྱུ་དེ་ཡིན་ཡིན་པ་ཞིག་རེད། ཡིན་ན་ཡང་། ང་མཚོན་ན། ཕྱི་ལུས་པོར་ཉེས་རྡུང་བཏང་བ་དེ་རིགས་ལས་གློག་དབྱུག་གཞུས་པ་དེ་དཀའ་ངལ་འདྲ་ཞིག་རེད། ཉིན་མང་པོར་སྙིང་ཁམས་མི་བདེ་བ་དང་མགོ་བོ་ཡམ་ཡོམ་དུ་གྱུར་བ། རླུང་གཏོང་རྔུབ་བྱེད་པར་དཀའ་བ། ལུས་སྟོད་ཚང་མ་བསྡམས་བསྡད་ཡོད་པའི་སྣང་བ་དེ་སོགས་ཀྱིས་ད་དུང་དུའང་ལན་རེར་སྙིང་ཁམས་མི་བདེ་བ་བྱུང་གི་འདུག་ལ་དཀའ་ངལ་ཆེ་ཤོས་སུ་གྱུར་སྟབས་བརྗེད་མི་འདུག
དེ་མ་ཡིན་པའི་ཆ་ནས་ཁོང་ཚོའི་སྐད་ཆ་བཤད་སྟངས་ལས་གང་སྡུག་གང་གནོད་ཀྱི་སྐད་ཆ་ཁོང་ཚོས་བསམ་གཟས་ནས་ནང་གི་སེམས་གསོད་རྒྱུའི་ཆེད་དུ་སྙིང་དུ་གཟན་པ་དག་བཤད་ཀི་རེད། དཔེར་ན། ང་ཚོར་རྐང་ལྕགས་ལག་ལྕགས་ཚང་མ་བརྒྱབ་ཅིང་རྐང་མཐིལ་དང་མཇིང་བར་གློག་དབྱུག་བསྣུན་ཏེ་༼ད་ཁྱོད་རང་ཏཱ་ལས་སྐྱོབས་ཀྱིན་འདུག་གམ། ཏཱ་ལའི་ཁོ་རང་ཕྱི་རྒྱལ་དུ་སྐྱིད་པོ་བཏང་ནས་བསྡད་ཡོད་རེད། ཏཱ་ལའི་རྗེས་སུ་འབྲང་ན་གང་འདྲ་འདུག་༽ཟེར་བ་ལྟ་བུ་སོགས་མཚང་བྲུས་ཞིང་ངན་དམོད་བྱས་པ་རྣམས་ནང་སེམས་སུ་དངོས་གནས་གནོད་པར་གྱུར་སྟབས་རྩ་བ་ཉིད་ནས་བརྗེད་ཐབས་མེད་པ་ཞིག་རེད།
དྲི་བ། ཁྱོད་རང་རྒྱ་ནག་གི་བཙོན་ཁང་འདྲ་མིན་ལས་ཐར་ཏེ་འདིར་བཙན་བྱོལ་དུ་སླེབས་རྗེས་རང་ཉིད་ཀྱི་གཟུགས་པོར་རྟག་དཔྱད་འདྲ་བྱས་མྱོང་ངམ་དེང་སང་ལུས་པོའི་བདེ་ཐང་གང་འདྲ་ཡོད་དམ།
ལན། ངའི་གཟུགས་པོ་ཆ་ཚང་ལ་རྟག་དཔྱད་བྱེད་མྱོང་མེད། བཙོན་ཁང་དུ་ཡུན་རིང་མནར་གཅོད་མྱངས་བས་རྣ་ཅོག་གཅིག་གིས་ཁྱོན་ནས་གོ་གི་མི་འདུག མིག་ནས་མིག་ཆུ་མང་པོ་ཐོན་པ་དང་ཉི་འོད་ཆེ་སར་མིག་བརྩེ་ནས་མིག་གིས་ལྟ་མི་ཐུབ་པ་དེ་སོགས་བལ་ཡུལ་སྣེ་ལེན་ཁང་ནས་ཟླ༧གྱི་རིང་དུ་སྨན་བཅོས་བྱས་པ་ཡིན། ཡིན་ན་ཡང་། རྣ་ཅོག་ལ་ཁྱོན་ནས་བཅོས་ཐབས་མི་འདུག་ཟེར། ཤེས་རབ་དགའ་ཚལ་སློབ་གླིང་ནས་ཀྱང་སྨན་པར་ཐེངས་ཤིག་བསྟན་མོད་དེ་ག་རང་རེད།རྣ་ཅོག་གི་རྩ་ཞིག་བཀད་བཞག་ཡོད་པས་བཅོས་ཐབས་མི་འདུག་གསུངས་ལ། རྣ་ཅོག་ནང་དུ་འཇོག་རྒྱུའི་དངོས་པོ་རིན་གོང་ཆུང་ངུ་མ་ཡིན་པ་ཞིག་ང་ལ་སྤྲད་མོད། རྣ་ནང་དུ་བཞག་པས་ན་དེར་སྒྲ་ཆེ་དྲགས་ནས་སྐྱོན་ཤོར་མེད་པའི་རྣ་ཅོག་གཞན་པ་དེས་ཀྱང་མི་གོ་བར་གྱུར་འགྲོ་སྟབས་སྐྱོན་ཤོར་མེད་ས་དེའང་སྐྱོན་རེ་ཤོར་མི་འགྲོའམ་བསམ་ནས་ད་དུང་བདེ་སྤྱོད་གཏོང་གི་མེད། མིག་ལ་མིག་སྨན་རེ་གཏུགས་པ་ལས་གཞན་བཅོས་ཐབས་མི་འདུག་པས་མིག་སྨན་རེ་སྤྱད་ནས་བསྡད་ཡོད།
དྲི་བ། རྐང་འཁོར་སྐོར་བསྐྱོད་ཀྱི་ལས་འགུལ་དེ་ངོ་སྤྲོད་མདོར་ཙམ་གནང་རོགས་ཞུ།
ལན། ཉེ་སྔོན་སྤྱི་ལོ་༢༠༡༡ནས་༢༠༡༢ལོའི་བར་འདིར་བོད་ནང་གི་རྒྱལ་གཅེས་དཔའ་བོ་དཔའ་མོ་གང་མང་ཞིག་གིས་རང་ལུས་མེ་རུ་བསྒྲོན་ནས་ལས་འགུལ་སྤེལ་བ་དེ་ཚབས་ཆེན་པོ་དང། ཁྱབ་ཆེན་པོ། མིའི་བློ་ཡུལ་ལས་འདས་པ་ཞིག་རེད། དེ་ཡང་ཉིན་རེ་རེ་བཞིན་ཅིག་བསྲེགས་འདུག ཡང་གཅིག་བསྲེགས་བཞག་འདུག་ཅེས་ཡང་ཡང་རྣ་བས་གོ་ཡོང་དུས་དགོང་མོར་ཉལ་ཡང་གཉིད་མི་ཁུག་པ་དང་། ཉིན་དཀར་འཛིན་གྲྭར་སོང་ན་སེམས་མི་ཁུག་པས་སློབ་ཁྲིད་ཚང་མ་གནམ་གྲུ་བཏང་བསྡད་པ་ལྟ་བུ་ཞིག་རེད། དེ་འདྲའི་གནས་སྟངས་ཀྱི་འོག་ནས་ང་རང་ཉིད་ཡིན་ནའང་ལས་འགུལ་ཞིག་མ་སྤེལ་ན་འགྲིག་གི་མི་འདུག ལྷག་པར་རང་ཉིད་ཆབ་སྲིད་བཙོན་ཟུར་ཞིག་ཡིན་པ་དང་རང་དབང་ལུང་པར་སླེབས་རྗེས་གྲགས་འགུལ་ཅི་ཡང་མེད་པར་བསྡད་བཞག་ན་འགྲིག་གི་མི་འདུག་བསམ། མ་གཞི་འདིར་སོ་སོར་ཁེ་བཟང་ཞིག་མ་རག་ན་ལས་འགུལ་མི་སྤེལ་བའི་བཟོ་འདྲ་བོ་ཞིག་ཆགས་ཀྱིན་འདུག་པས་དེ་མི་འགྲིག་པར་སེམས། སོ་སོ་བཙན་བྱོལ་ཏུ་ཡོང་དགོས་བའི་དགོས་པ་རྒྱུ་མཚན་ལ་བསམ་བློ་ཅིག་བཏང་བ་ཡིན་ནའང་དངོས་གནས་དྲང་གནས་ཀྱི་དྲིན་ཆེན་ཕ་མ་དང་ནང་མི་ཡོད་ཚད་བློས་བཏང་ནས་ཡོང་དགོས་པ་དེའང་ང་ཚོ་ཆབ་སྲིད་ཀྱི་དོན་ཁོ་ན་ཡིན། མི་རིགས་འདི་དང་རྒྱབ་ཁབ་འདིའི་ཆེད་དུ་ཡིན་མ་གཏོགས་སོ་སོ་རང་གི་ཁ་ལ་ཟ་རྒྱུ་མ་རག་པ་དང་འཐུང་རྒྱུ་མ་རག་པའི་དོན་དག་ཞིག་རྩ་བ་ཉིད་ནས་མིན་སྟབས་འདིར་རང་དབང་ལུང་པ་ནས་ཁུ་སུམ་མེར་བསྡད་བཞག་ན་འགྲིག་གི་མི་འདུག་བསམ་པའི་ཀུན་སློང་ཞིག་གི་འོག་ནས་ལས་འགུལ་འདི་སྤེལ་རྒྱུ་དྲན་བྱུང་།དེ་ཡིན་ན་ཡང།ཐོག་མར་ང་ཚོའི་ལས་འགུལ་སྤེལ་རྒྱུ ར་མི་དེ་ཚོར་ངས་སྐད་བཏང་བཞག་པའམ་འབོད་སྐུལ་ཞུས་བཞག་པ་དེ་རྩ་བ་ཉིད་ནས་མིན། ཡིན་ན་ཡང་།ང་སྤྱིར་བཏང་གི་ཤེས་རབ་དགའ་ཚལ་སློབ་གླིང་ནས་ཆབ་སྲིད་ཀྱི་སྐོར་ནས་ཅིག་བཤད་འདུག་མཁན་དང་ལས་འགུལ་ཆུང་ཙག་རིགས་སྤེལ་འདུག་མཁན་དེ་ཡིན་སྟབས་མི་ཁ་ཤས་ཀྱིས་ཚོད་ལྟ་ཅིག་བྱེད་དགོས་པ་མིན་ནམ་ཟེར་བའི་སྐད་ཆ་བཤད་ཡོང་མཁན་ཧ་ཅང་མང་པོ་འདུག་པས། ངས་ཁོང་ཚོར་མི་ཁ་ཤས་ཡོད་ན་ང་ཚོས་མཉམ་དུ་སྤེལ་ན་འགྲིག་གི་རེད། མང་པོ་མེད་ན་དེ་འདྲ་རེད་ལབ་པ་ཡིན། རྗེས་སུ་མི་བདུན་བརྒྱད་ཅིག་ཡོད་རབས་ཟེར་བས་དེ་ཡིན་ན་ང་ཚོ་མཉམ་དུ་འདུས་ནས་གྲོས་ཤིག་བྱེད་དགོས་ཀྱི་རེད་ལབ་པ་ཡིན་ལ་སྐབས་དེར་མི་བཅུ་ཙམ་འདུག ང་ཚོས་གྲོས་གཞི་གཅིག་ཏུ་བཞག་ནས་མཉམ་རུབ་བྱས་ཏེ་ཚང་མ་ཁ་མི་འབྲལ་རྒྱུ་བྱས་པ་ཡིན། དང་ཐོག་ང་ཚོས་གྲོས་ཆོད་འདྲ་བོ་འདི་ནས་རྒྱལ་ས་ལྡི་ལི་བར་དུ་༼རྐང་འཁོར་སྐོར་སྐྱོད་༽དུ་འགྲོ་རྒྱུ་བསམ་བློ་འཆང་བ་ཡིན། དེ་ནས་ང་ཚོས་འཛིན་སྐྱོང་དུ་ཡར་ཞུ་བྱས་པ་དང་མི་བདུན་བརྒྱད་ཅིག་ལས་མི་འདུག ཡིན་ན་ཡང། འཛིན་སྐྱོང་གིས་ང་ཚོར་གསུང་དོན་ལས་འགུལ་དེ་འདྲ་ཞིག་ཡིན་ན་ཉིན་ནས་ཟླ་དགོས་ཀྱིན་འདུག་ལ་དེ་རིགས་ནི་སམ་བྷོ་ཊ་སྤྱི་ཁྱབ་འགན་འཛིན་ལ་ཡར་ཞུ་བྱེད་དགོས་པ་རེད་གསུང་པ་དང་ཤེས་རབ་དགའ་ཚལ་སློབ་གླིང་གི་སྒྲིག་གཞི་སོ་གཉིས་པའི་དོན་ཚན་སུམ་ཅུ་སོ་གཅིག་པར་འགལ་འདུག་པས། ལས་འགུལ་སྤེལ་མི་ཆོག་པའི་འགྲེལ་བཤད་ཉལ་ཁང་དོ་དམ་པས་བརྒྱབ་པ་རེད། ངས་སྐབས་དེར་སྲིད་དོན་གྱི་རིགས་ཟེར་བ་དེ་ང་ཚོ་བོད་པ་ཚོས་བོད་དོན་སྤེལ་མི་ཆོག་གསུངས་པ་ཡིན་རྒྱུ་མ་རེད་དེ། ད་གང་ལྟར་ཁྱད་པར་ཞེ་དྲག་མི་འདུག་ལབ་པ་ཡིན། དེ་རྗེས་འགྲོ་རྒྱུ་གཏན་ཁེལ་ཚར་དུས་སུ་ཁོ་མིན་ང་མིན་གྱིས་ཤུལ་དུ་ལྷག་པ་ང་ཚོ་མི་གསུམ་ལས་མི་འདུག ཡིན་ན་ཡང་། ང་ཚོ་འགྲོ་ཁར་འཛིན་སྐྱོང་ལ་སྐད་ཆ་ངོ་མ་དེ་སྔོན་མ་ནས་ག་རེ་བཤད་ཡོད་པ་རེད་དམ་ཟེར་ན། ང་ཚོས་ལས་འགུལ་འདི་མ་སྤེལ་ན་འགྲིག་གི་མི་འདུག་ལ་འདི་རྩ་བ་ཉིད་ནས་མ་སྤེལ་ཐབས་མེད་ཡིན་པས་ང་ཚོ་ཆུ་ཚོད་ཏག་ཏག་ཕྱིར་མ་སླེབས་པ་ཡིན་ན། ང་ཚོར་ཉིན་ཤས་ཀྱི་དགོངས་པ་ཅིག་སྤྲོད་རོགས་བསམ་ཤེས་ཞིག་གནང་རོགས། གལ་སྲིད་རྩ་བ་ཉིད་དུ་བསམ་གཞིག་བྱེད་ཐུབ་ཀི་མ་རེད་སློབ་གྲྭའི་སྒྲིག་གཞི་རེད་འགྲོ་དགོས་པ་རེད་ཟེར་ནའང་ང་ཚོར་རླུང་ལངས་རྒྱུ་དང་ཚིག་པ་ཟ་རྒྱུ་ཅི་ཡང་མེད། ང་ཚོ་དགེ་སློབ་བར་དུ་ནམ་ཡང་ཕན་ཚུན་དམ་ཚིག་གཙང་མ་ཡིན། དགེ་རྒན་དང་སློབ་མ་འདུ་ཤེས་བཟུང་ནས་གཅིག་གིས་གཅིག་ལ་འཁོན་སེམས་རྩ་བ་ཉིད་ནས་མ་འཛིན་རོགས་ཞེས་ནན་ནན་ཏན་ཏན་གྱིས་ཞུས་རྗེས་སློབ་གྲྭའི་གུང་གསེང་དང་སྟབས་བསྟུན་ཏེ་ང་ཚོ་མར་ལྡི་ལིེ་སོང་བ་ཡིན། དང་པོར་ང་ཚོ་འདི་ནས་ལྡི་ལིར་འགྲོ་རྒྱུ་བྱས་མོད་འདིར་རྐང་འཁོར་ཉོ་རྒྱུ་མ་རག་པས་ལྡི་ལི་ནས་འདིར་ཡོང་དགོས་ཁེལ་བ་རེད།
དྲི་བ། ཁྱེད་ཚོའི་རྐང་འཁོར་སྐོར་བསྐྱོད་ཀྱི་ལས་འགུལ་སྤེལ་བའི་རིང་དུ་རྒྱ་གར་མི་དམངས་དང་གསར་ལམ་ཁག་གིས་དོ་སྣང་གང་འདྲ་དང་ཁྱོད་ཚོའི་བཀྲམས་ཟིན་པའི་ཡིག་ཆའི་སྐོར་དེ་ཅི་འདྲ་ཞིག་ཡིན་ནམ།
ལན།དང་ཐོག་ལྡི་ལིར་བོད་ཀྱི་ལོ་སར་ཚེས་གཅིག་ཉིན་གསར་འགོད་གསལ་བསྒྲགས་ཤིག་སྐོང་འཚོག་བྱས་པ་ཡིན། དེ་ནས་ཕར་རྒྱ་ནག་གཞུང་ཚབ་ཁང་དུ་སོང་པ་ཡིན་ལ་དེར་བོད་པ་ཚོའི་ངོ་རྒོལ་སྐད་འབོད་བྱེད་བཞིན་པར་མཉམ་ཞུགས་བྱས་པ་དང་། དེར་གཞོན་ནུ་ཚོགས་པས་ངོ་སྤྲོད་བྱས་ཐོག་ང་ཚོའི་ལས་འགུལ་དང་དམིགས་ཡུལ་བརྒྱུད་ལམ་ཁག་ཏུ་གསལ་བོར་བསྒྲགས་པ་རེད། ལམ་ཁར་ང་ཚོས་རྒྱ་གར་དང་དབྱིན་ཇི་སྐད་མི་གོ་བ་དང་ས་ཆར་རྒྱུས་མེད་པས་དམིགས་བསལ་གྱིས་གསར་འགོད་གསལ་བསྒྲགས་བསྡུས་བའམ་སློབ་གྲྭ་ཁག་ཏུ་སོང་ནས་གཏམ་བཤད་བྱེད་པ་ལྟ་བུ་སོགས་མང་པོ་བྱུང་ཐུབ་ཡོད་པ་མ་རེད། ཡིན་ན་ཡང། ལམ་ཁར་ང་ཚོས་ཡིག་ཆ་དེ་བཀྲམས་ནས་ཡོང་སྟབས་མི་མང་གིས་དོ་སྣང་དང་ཧ་གོ་ཡོང་གི་འདུག དེར་ང་ཚོ་འགྲོ་དགོས་པའི་དགོས་པ་རྒྱུ་མཚན་ཚང་མ་ཡིག་ཆ་དེར་ཧིན་དྷི་དང་དབྱིན་ཇིའི་ཡི་གེ་གཉིས་ཀྱི་ཐོག་ཁ་གསལ་གོ་བདེ་བཀོད་ཡོད་པས་ང་ཚོས་འགྲེལ་བཤད་མང་པོ་བརྒྱག་དགོས་མི་འདུག ལྷག་པར་རྒྱ་གར་གྱི་ས་གནས་གསར་ཤོག་ཁ་ཤས་སྟེང་དུ་ང་ཚོ་ཐེངས་དུ་མར་བཀོད་སོང་། རྗེས་སུ་ང་ཚོ་ཅན་ལྡི་སྒར་ལ་འབྱོར་དུས་ང་ཚོས་གསར་འགོད་གསལ་བསྒྲགས་ཤིག་བསྐྱངས་པ་ཡིན། དེ་དུས་གཞོན་ནུ་ཚོགས་པའི་རོགས་རམ་འོག་ང་ཚོར་སྐད་སྒྱུར་ལ་སོགས་པའི་དཀའ་ངལ་ཅི་ཡང་བྱུང་མ་སོང་། ད་དུང་བོད་དོན་རྒྱབ་སྐྱོར་བ་༼ཨར་བན་ཏོ་ཀོ༽ཁྲིམས་རྩོད་པ་ཆེན་མོ་ཁོང་དང་མཇལ། ཁོང་གིས་གསུང་དོན་ངས་བོད་དོན་ལ་རྒྱབ་སྐྱོར་བྱས་ནས་ལོ་བཅུ་ཟིན་སོང་ཟེར་བ་དང་བཀའ་སློབ་གཟབ་རྒྱས་གནང། དེ་ནས་ཡར་ཡོང་ནས་པཎ་ཇབ་མངའ་སྡེའི་ནང་འབྱོར་དུས་ཁོང་ཚོར་ཧ་ལས་པའི་དོ་སྣང་ཆེན་པོ་འདུག ལྷག་པར་ང་ཚོའི་སྐོར་བསྐྱོད་ཀྱི་ཉིན༡༧ནང་དུ་རྒྱབ་སྐྱོར་རམ་དོ་སྣང་ཆེ་ཤོས་དེའང་ཁོང་ཚོ་རེད་ལ་སྤྱི་ཟླ་༠༣པའི་ཚེས་༡༠ཉིན་འདིར་རྡ་ས་ག་ཅ་རིའུ་ནས་དུས་དྲན་སྲུང་རྩིའི་ཉིན་མོར་མི་མང་རྣམས་ཀྱི་ངོ་རྒོལ་སྐད་འབོད་དང་སྟབས་བསྟུན་ནས་མཇུག་སྡོམ་བརྒྱབ་ཏེ་ལས་འགུལ་དེ་མཇུག་གྲུབ་པར་བྱས་པ་ཡིན།
དྲི་བ། ལམ་ཁར་དཀའ་ངལ་ཆེ་ཤོས་དེ་ག་རེ་འདྲ་ཞིག་འཕྲད་སོང་།
ལན།རེད་རེད།ལམ་ཁ་རུ་དཀའ་ངལ་ཆེ་ཤོས་དེ་སྐད་བརྡ་མི་འཕྲོད་པ་དེ་རེད། དཔེར་ན། མི་ཁ་ཤས་ཀྱིས་སྐད་ཆ་འདྲི་བ་དང་ད་དུང་དེའི་སྐོར་ཤེས་འདོད་ཡོད་མཁན་ཚོར་ང་ཚོས་བསྒྲགས་གཏམ་གྱི་ཡིག་ཆ་རེ་སྤྲད་ནས་བཏང་བཞག་པ་མ་གཏོགས་འགྲེལ་བཤད་གསལ་བོ་ཞིག་རྒྱག་མ་ཐུབ་པ་དེ་ང་ཚོའི་ངོས་ནས་དཀའ་ངལ་ཆེ་ཤོས་འདྲ་བོར་ཆགས་སོང་།
དྲི་བ། གསུམ་བཅུའི་དུས་དྲན་ཉིན་མོར་ག་ཅ་རིའུ་ནས་ཁྱོད་རང་ཚོས་མཇུག་སྡོམ་བརྒྱབ་པ་དེ་རང་ཉིད་ཀྱི་འདོད་བློ་ཁེངས་པ་ཞིག་བྱུང་སོང་ངམ།
ལན། ཉིན་དེར་ཚོགས་པ་ལྔས་བཀོད་སྒྲིག་འོག་ནས་ངོ་རྒོལ་སྐད་འབོད་པ་རྣམས་དེར་འཛོམས་ཡོད་པ་དང་ང་ལའང་སྐར་མ་ཁ་ཤས་རིང་སྐད་ཆ་བཤད་རྒྱུའི་གོ་སྐབས་ཤིག་སྤྲོད་རོགས་ཞུས་ནས། ངས་ང་ཚོ་མི་གསུམ་གྱི་ཚབ་བྱས་ཏེ་སྐད་ཆ་ཉུང་ངུ་ཞིག་བཤད་པ་ཡིན། ངས་དང་པོར་ལས་འགུལ་འདི་སྤེལ་དགོས་པའི་དགོས་པ་རྒྱུ་མཚན་མང་པོ་འགྲེལ་བཤད་བྱེད་རྒྱུ་མིན་སྔོན་མར་ཡང་བརྒྱུད་ལམ་ཁག་ཏུ་ཐེངས་ཤིག་ཞུས་ཟིན་པ་རེད། བོད་པ་ནང་ཁུལ་ལ་ལྷག་པར་ཞུ་དགོས་པ་ཞིག་མ་རེད་ཚང་མས་མཁྱེན་གསལ་རེད། ངས་འབོད་སྐུལ་གཉིས་སྟེ་འཛམ་གླིང་འདིར་དོན་ངོ་མར་ཁ་ཡོད་ལག་ཡོད་ཀྱི་གཉོམ་ཆུང་དང་དྲང་བདེན་ལ་ལྟ་རྟོག་བྱེད་མཁན་མཉམ་འབྲེལ་རྒྱལ་ཚོགས་ཟེར་བ་ཞིག་ཡོད་པ་ཡིན་ན་བོད་དོན་ལ་ངེས་པར་དུ་ཁ་ཞིག་གྲགས་རོགས་ཞུ་ཞེས་དང་། བཙན་བྱོལ་མི་དམངས་ཚོས་མི་རེ་ངོ་རེས་འགན་འཁྲི་ཞིག་ཁུར་བསྡད་ནས་ལས་འགུལ་ཆེ་མ་ཆུང་གསུམ་སོ་སོས་གང་འཇོན་པ་ཞིག་སྤེལ་དགོས་ཀྱི་འདུག་མ་གཏོགས་ང་ཚོ་དུས་ལ་མ་སླེབས་པ་ཞིག་མ་རེད་ཅེས་ཞུས་པ་དང། ཁ་སང་ཅན་ལྡི་སྒར་ནས་སྐུ་ཞབས་ཨར་བན་ཏོ་ཀོ་ཡིས་གསུང་དོན། ངས་བོད་དོན་རྒྱབ་སྐྱོར་བྱས་ནས་ལོ་བཅུ་ཟིན་ཡོད་ལ་དེའི་རིང་དུ་རྒྱ་ནག་གི་ཅ་ལག་གཅིག་ཀྱང་ཉོ་མྱོང་མེད། ཁྱོད་རང་ཚོའི་བོད་པ་ལ་མཚོན་ན། རྒྱ་ནག་ལ་ཁ་གཏད་གཅོག་གི་ཡོད་རེད། ངོ་རྒོལ་བྱེད་ཀི་ཡོད་རེད། ཡིན་ན་ཡང། རྒྱ་ནག་གི་ཅ་ལག་བེད་སྤྱོད་གཏོང་གི་ཡོད་རེད། དེ་ག་རེ་རེད་ད་ལྟ་རྒྱ་ནག་དཔལ་འབྱོར་གྱི་སྟེང་ནས་འཛམ་གླིང་འདིར་ཚད་མཐོན་པོར་ཆགས་ཀྱི་ཡོད་རེད། གལ་སྲིད་ཁྱོད་ཚོ་བོད་པ་ཚང་མས་རྒྱ་ནག་གི་ཅ་ལག་གཅིག་ཀྱང་མ་ཉོས་པ་ཡིན་ན་རྒྱ་ནག་ལ་ཏན་ཏན་གནོན་ཤུགས་ཤིག་ཐེབས་རྒྱུ་རེད་ཟེར་བ་ལྟ་བུ་ང་ཚོས་ངེས་པར་དུ་བསམ་བློ་གཏང་དགོས་ཀྱི་འདུག་ཅེས་པའི་སྐད་ཆ་དེ་བཤད་པ་ཡིན། མཇུག་སྡོམ་ལེགས་གྲུབ་བྱས་པར་དམིགས་བསལ་ཐུགས་རྗེ་ལེགས་གསོལ་ཞུ་ས་གཅིག་གཞོན་ནུ་ཚོགས་པ་དང་། གཉིས་པ་ང་ཚོ་སློབ་ཕྲུག་གསུམ་གྱིས་སྲིད་དོན་ལས་འགུལ་སྤེལ་བས་སློབ་གྲྭ་ནས་རྩ་དགོངས་བཏང་བའི་གསལ་བསྒྲགས་སྦྱར་བ་ན་ཤེས་རབ་དགའ་ཚལ་སློབ་གླིང་གི་དགེ་སློབ་མི་གྲངས་༢༩༥ཙམ་གྱིས་རང་གི་མཚན་རྟགས་བཀོད་ནས་ང་ཚོར་རྒྱབ་སྐྱོར་བྱས་པར་གྲུབ་འབྲས་མ་ཐོན་ཡང་རང་ངོས་ནས་དགའ་ཚོར་ཆེན་པོ་དང་ཡིད་འགུལ་ཐེབས་ཡོད་པས་ཁོང་ཚོར་ངོ་མར་བཀའ་དྲིན ་ཆེ་ཞུས་པ་ཡིན།
དྲི་བ། ང་ཚོ་བཙན་བྱོལ་བ་ཚོས་རང་དབང་ལུང་བ་འདི་རུ་ལས་འགུལ་སྤེལ་ཕྱོགས་ལ་ཁྱོད་རང་ཉིད་ཀྱིས་ཅི་འདྲ་བསམ་གྱིན་ཡོད།
ལན། སྤྱིར་ལས་འགུལ་ཞེ་ན་མི་འདྲ་བ་རབས་དང་རིམ་པ་ཡོད་པ་རེད་ལ་དགོས་པ་རེད་བསམ་གྱིན་ཡོད། ཡིན་ན་ཡང་། ང་ཚོ་སྤྱིར་བཏང་གི་འདིར་བཙན་བྱོལ་ནང་ནས་བྱེད་སྟངས་ཤིག་སྟེ། རྒྱ་ནག་ལ་ཕོག་ཐུག་འགྲོ་གི་རེད་ཅེས་འཛེམ་བསྡད་ཡོད་པ་མང་པོ་ཞིག་འདུག ང་རང་གིས་བསམ་ན། དེ་འཐབ་རྩོད་བྱེད་མཁན་གྱི་རིགས་ཤིག་གི་ཆ་ནས་བསམ་ན་ངོ་ཚ་དགོས་པ་ཞིག་རེད་བསམ་གྱིན་ཡོད། ཕར་ཕྱོགས་དགྲ་བོས་ང་ཚོ་ལ་ག་ཚོད་བཙན་འཕྲོག་གཉའ་གནོན་བྱས་ནའང་ད་དུང་དགྲ་བོར་ཕོག་ཐུག་གཏོང་ཉན་གི་མ་རེད་ཟེར་བ་དེ་ནི་ཅི་ཡང་མ་རེད་ལ་ང་ཚོས་ཕོག་ཐུག་གཏོང་ཡང་ཐུབ་གི་མ་རེད་བསམ་གྱིན་ཡོད། གཏང་ཐུབ་ན་གཏོང་དགོས་པ་རེད། ཁ་སང་ང་ཚོའི་ཤེས་རབ་དགའ་ཚལ་སློབ་གླིང་གི་སློབ་སྤྱིསགསུངས་དོན། རྒྱ་ནག་གིས་འདི་ཆབ་སྲིད་སློབ་གྲྭ་ཞིག་རེད་ཟེར་གྱིན་ཡོད་རེད་སོགས་ང་ཚོས་དེ་མ་ཡིན་པ་བཟོས་དགོས་པ་རེད་མདོག་མདོག་དང་ཐ་ན། ཁ་སང་ང་ཚོ་རྩ་དགོངས་བཏང་བའང་གོང་གི་སྐད་ཆ་དེ་དང་འབྲེལ་བ་མིན་ནམ་ང་རང་གིས་བསམ་པ་ཡིན། དེ་རིགས་ནི་ང་རང་གིས་བསམ་ན་བསམ་བློ་གཏང་དགོས་ས་ཞིག་མ་རེད་ལ། མ་ཟད་འདི་གའི་བོད་མིའི་སྒྲིག་འཛུགས་གཞུང་གིས་ཐབས་ཤེས་རྩལ་སྤྲུག་གིས་བོད་ནང་གི་གཞིས་བཞུགས་བོད་པ་ཚོར་ལས་འགུལ་སྤེལ་སྟངས་སྐོར་ལམ་སྟོན་གནང་ན་འགྲིག་གི་རེད་བསམ་གྱིན་ཡོད།ང་ཚོས་འཛམ་བུ་གླིང་འདིར་ཕྱི་གསལ་ནང་གསལ་གྱིས་བརྒྱུད་ལམ་ཁག་ནས་གང་ཐུབ་ཅི་ཐུབ་ཀྱིས་ལམ་སྟོན་བྱས་ན་ཕན་གི་རེད་བསམ་ལ་ནུས་པའང་ཆེ་རྒྱུ་རེད་བསམ་གྱིན་ཡོད། ལྷག་པར་བོད་ཀྱི་གཞི་རིམ་མང་ཚོགས་ནང་དུ་རྩོམ་པ་པོ་དང་མཁས་པ་དག་གིས་ལྟད་མོར་བལྟས་ནས་མི་སྡོད་པར་ལམ་སྟོན་བྱེད་རྒྱུ་གལ་ཆེན་པོ་རེད། ན་ནིང་ནས་ད་ལོའི་བར་དུ་བོད་ནས་མི་༣༠ཙམ་གྱི་རང་ལུས་མེར་སྲེག་གི་ལས་འགུལ་སྤེལ་བ་རེད། དེར་ང་ཚོའི་བསམ་བློ་བཏང་ནས་སོང་ན། རྒྱལ་སྤྱིའི་སྒང་ནས་དོ་སྣང་ཅུང་བྱེད་ཀྱིན་ཡོད་པ་དེའང་ཁོང་ཚོའི་སྙིང་སྟོབས་དང་གཟི་བརྗིད་རེད་མ་གཏོགས་ང་ཚོས་མཁས་དབང་ཚོ་དང་རྩོམ་པ་པོ་ཚོས་འཇོན་བཞག་པ་ཞིག་མ་རེད། དེ་བས་ངེས་པར་དུ་མཁས་དབང་དང་རྩོམ་པ་པོ་དག་ལྐོག་ཏུ་ཡིབ་ནས་མི་སྡོད་པར་གཞི་རིམ་མང་ཚོགས་ལ་སྣེ་ཁྲིད་ལམ་སྟོན་བྱེད་རྒྱུ་ཧ་ཅང་གལ་ཆེན་པོ་རེད་བསམ་གྱིན་འདུག
དྲི་བ། གོང་ཞུས་ཁྱོད་ཚོའི་རྐང་འཁོར་སྐོར་བསྐྱོད་ཀྱི་ལས་འགུལ་དེའི་རྐྱེན་གྱིས་ཁྱོད་རང་སློབ་གྲྭ་ནས་མ་ཐོན་རང་ཐོན་བྱུང་པ་ལ་ཁྱོད་ཀྱིས་ད་ལྟ་གང་འདྲ་ཞིག་དྲན་གྱིན་འདུག
ལན། ང་རང་ཚོ་སློབ་གྲྭ་ནས་ཐོན་དགོས་བྱུང་བའི་དོན་དག་དེའང་སྤྱི་ཚོགས་སྟེང་གླེང་སློང་འདྲ་མིན་སྣ་ཚོགས་བྱེད་ཀྱིན་ཡོད་ནའང། དོན་ངོ་མར་བཤད་ན་བོད་གཞུང་མང་གཉིས་ཀྱི་མི་སུ་ཞིག་ཡིན་ནའང་དེ་འགྲིག་འདུག་ཏག་ཏག་རེད་གསུང་མཁན་ཧ་ལམ་མེད་པའི་ཚོད་རེད། དཔེར་ན། དུས་བབ་ཀྱི་ཟིན་བྲིས་སུ་གསར་འགྱུར་ཞིག་སྤེལ་ཡོད་པ་རེད་ལ་དེར་རིག་པ་འདོན་མཁན་མི་ཉི་ཤུའི་ནང་ཞིག་ཡོད་པ་ཚོར་བསམ་བློ་བཏང་བ་ཡིན་ནའང་ང་ཚོ་རྩ་དགོངས་བཏང་བཞག་པ་དེ་ཏག་ཏག་རེད་ཟེར་མཁན་གཅིག་ཀྱང་བྱུང་མ་སོང་། ཡིན་ན་ཡང་། ང་ཚོས་སློབ་སྤྱི་མཆོག་ལ་སྐད་ཆ་ངོ་མ་དེ་སྔོན་མ་ནས་ཞུས་ཟིན་པ་གོང་དུ་གསལ། དེ་ནས་དགེ་སློབ་ཚོས་མཚན་རྟགས་བསྡུས་ནས་ཁོང་ལ་ཡར་ཞུ་བྱེད་སྐབས་ཁོང་གིས་གསུང་དོན། ཁྱོད་ཚོས་ཡར་སྙན་ཞུ་སོགས་གང་དུ་ཞུ་ན་ཞུས་དང་། གལ་སྲིད་ཁོ་རང་ཚོ་སློབ་གྲྭར་ཡོང་པའི་ཉིན་མོ་ཞིག་ཡོད་ན་དེ་དུས་ངས་རྩ་དགོངས་ཞུ་རྒྱུ་ཡིན་ཞེས་བཀའ་བཙན་པོ་གསུངས་འདུག
དེ་ཡིན་པས་དགེ་སློབ་ཡོངས་ཀྱི་སེམས་པ་གང་འདྲ་ཞིག་ཆགས་ཡོད་ན་བསམ་ནས།ང་རང་ཚོའི་དཀའ་ཁག་ལ་མ་བལྟས་པར་༼སྤྱིར་བཏང་ང་ཚོ་སློབ་ཕྲུག་གསུམ་ཡིན་པའི་ཆ་ནས་དངུལ་གྱི་དཀའ་ཁག་ཧང་སང་བ་འཕྲད་སོང་། ང་རང་ལ་མཚོན་ནའང་བུ་ལོན་བཞག་ནས་སོང་བ་ཡིན་ལ། ཐ་ན་རྐང་འཁོར་རེ་ལ་ཧིན་སྒོར་༩༠༠༠རེད། ད་འདིར་འབྱོར་དུས་སློབ་གྲྭར་འཛུལ་མ་ཆོག་པ་ཡིན་ན་ཡང་དེ་རུ་དཀའ་ངལ་ཐོལ་བ་ཞིག་རག་སོང་བ་རེད། དཔེར་ན་ཕྱི་ལ་ཐོན་ན་འཁོར་བ་ཆུང་ཆུང་ཞིག་འཛིན་དགོས་པ་རེད་ལ་ཁང་གླ་ཆུ་རིན་གློག་རིན་སོགས་ལ་དེང་སང་དཀའ་ངལ་འཕྲད་དང་འཕྲད་བཞིན་པ་ཡིན། ཡིན་ན་ཡང་།༽ང་ཚོས་ཁ་དར་༥༠༠ཙམ་ཉོས་ནས་མར་ཤེས་རབ་དགའ་ཚལ་སློབ་གླིང་དུ་ཕྱིན་པ་དང་དགེ་སློབ་ཡོངས་ལ་ཁ་དར་བསྒྲོན་ཅིང་ད་དུང་ཁྱོད་ཚོ་དགེ་སློབ་ཚོའི་བར་ལ་འདུ་ཤེས་འདྲ་མིན་རེ་མ་འཛིན་རོགས་དགེ་སློབ་ཀྱི་དམ་ཚིག་གཙང་མ་དེ་ང་ཚོའི་ཆེད་དུ་མ་སླད་རོགས་ཞུས་ནས་ཡོང་བཞག་པ་ཡིན།
སྐུ་ངོ་ལགས་ཁོ་རང་དང་ངོ་ཐུག་ནས་སློབ་གྲྭའི་སྒྲིག་ཁྲིམས་ནང་སྲིད་དོན་སྤེལ་མི་ཆོག་ཟེར་བ་དེ་བོད་ཀྱི་རྩ་དོན་རྩོད་མི་ཆོག་ཟེར་བ་ཨེ་ཡིན་ན། གལ་སྲིད་དེ་ལྟར་ཡིན་ན་ང་འདི་ནས་སྡོད་འདོད་མི་འདུག་ལ་སྡོད་ཐབས་ཀྱང་ཡོད་པ་མ་རེད། ང་མ་གཞི་འདིར་བཙན་བྱོལ་དུ་ཡོང་དགོས་དོན་ཡང་བོད་ཀྱི་རྩ་དོན་རྩོད་མི་ཆོག་པའི་ཁོར་ཡུག་ཅིག་ནས་མ་བཟོད་པ་ཁོ་ན་ཡིན་པ་ལས་དམིགས་ཡུལ་གཞན་༼དཔེར་ན། སློབ་སྦྱོང་གི་ཆེད་དང་། བླ་མར་མཇལ་ཕྱིར་དང་། གནས་མཇལ་ལ་སོགས་པ་དམིགས་ཡུལ་༽ཅི་ཡང་མེད། དེའི་ཕྱིར་ང་རང་བོད་ཀྱི་རྩ་དོན་རྩོད་མི་ཆོག་པའི་ཁོར་ཡུག་ཅིག་ནས་བསྡད་ན། ལས་རྒྱུ་འབྲས་ལ་ཡང་འགྲོ་གི་མ་རེད། ངས་བོད་ཀྱི་རྒྱལ་གཅེས་དཔའ་བོ་དཔའ་མོ་གང་མང་ཞིག་གི་ལག་པའི་ནང་ལག་པ་བཞག་ནས་དམ་བཅའ་མང་པོ་བཞག་ཟིན་ཡོད་པས་ང་རང་རྩ་བ་ཉིད་ནས་འདིར་སྡོད་སྲོལ་ཡོད་པ་མ་རེད་ཅེས་ཐོན་པ་ཡིན། ཡིན་ན་ཡང་།
སྐུ་ངོ་ལགས་ལའང་ཁྱོད་སྐུ་རླུང་མ་ལངས་ཐུགས་རྒྱལ་མ་བཞེངས་དུས་ནམ་ཡང་ང་རང་ཁྱོད་ཀྱི་སློབ་མ་ཞིག་ཡིན་ལ་ངས་ཁྱོད་ལ་དགེ་རྒན་དངོས་ཤིག་གི་འདུ་ཤེས་འཛིན་ནི་རེད། མ་གཏོགས་འདི་སྒྲིག་གཞི་ཞིག་གི་སྟེང་ནས་འགྲོ་བཞིན་པས་དུས་ནམ་ཞར་ལ་ང་ཚོའི་བར་ལ་འཁོན་སེམས་མ་འཛིན་རོགས། ང་ཚོའི་འདི་ནས་ཅིག་ཅིག་མུག་མུག་མང་པོ་ཞིག་བཤད་ནས་དགེ་སློབ་མང་པོའི་འཆམ་མཐུན་དཀྲུག་པ་ཡིན་ན། དེ་ནི་ང་རང་ཚོར་ཕན་རྒྱུ་དེ་མ་ཡིན་པར་རྒྱ་ནག་ལ་དགོས་རྒྱུ་དེ་བཟོས་པ་ཡིན་པས་ང་ཚོས་ཕྱོགས་ཁག་མཐུན་སྒྲིལ་བྱེད་དགོས་འཆམ་པོ་བྱེད་དགོས་རེད་ཅེས་དང།ང་རང་ནི་བོད་ཀྱི་རྩ་དོན་གྱི་ཆེད་དུ་ཤེས་རབ་དགའ་ཚལ་སློབ་གླིང་ནས་རྩ་དགོངས་བཏང་བ་སྟེ་བོད་ཀྱི་ལས་ཀ་བྱེད་མཁན་གྱི་བོད་པ་བོད་པས་རྩ་དགོངས་བཏང་བར་བསམ་ན་རྒྱ་མི་ཚོར་ངོ་ཅུང་ཙམ་ཚ ་ཡང་། ང་ཚོ་བཙན་བྱོལ་སྤྱི་ཚོགས་འདིར་གཅིག་སྒྲིལ་དེ་ཧ་ཅང་གལ་ཆེན་ཆགས་བསྡད་ཡོད་པ་དང་ལྷག་པར་ང་རང་གཅིག་སྒྲིལ་གྱི་འདུག་ཤེས་འཛིན་མཁན་ཞིག་ཡིན་པས་དེ་ཅི་སྐྱོན་ང་ནི་ནང་ཁུལ་དཀྲུག་ཤིང་བྱེད་པ་ལས་བོད་རང་གིས་སྤྲད་པའི་གྱོང་ཟ་བཞིན་གཉོམ་ཆུང་གི་ཆུ་འཐུང་ནས་བསྡད་ན་འགྲིག་གི་བསམ་ཏེ་ཁྱོད་ཉིད་ལའང་རྙོག་དྲ་རྩ་བ་ཉིད་ནས་བཤད་གི་མེད་ཅེས ་ཞུས་པ་ཡིན།
ངོ་མར་བཤད་ན་བོད་མི་རིགས་ཀྱི་རྩ་དོན་རྩོད་མི་ཆོག་སའི་ཁོར་ཡུག་ཅིག་ནས་གནས་ཐུབ་ན་ནི་རང་ཉིད་དྲིན་ཆེན་ཕ་མ་དང་ནང་མི་མིང་སྲིང་ཚོའི་འཁྲིས་ནས་བསྡད་ན་ཅི་འདྲའི་སྐྱིད་པོ་ཡོད་པ་རེད། ཡིན་ན་ཡང་། ང་ཚོའི་བཙན་བྱོལ་སྤྱི་ཚོགས་ནང་ལ་འདི་འདྲའི་སྒྲིག་གཞི་བཟོས་པ་ལ་ང་རང་ཆབ་སྲིད་བཙོན་ཟུར་ཞིག་གིས་ངོས་ནས་ཧ་ཅང་བློ་ཕམ་ཆེན་པོ་ཡོད།
དྲི་བ། ཉིད་ཀྱིས་བཅར་འདྲི་འདི་དང་ལེན་བྱས་པར་ཐུགས་རྗེ་ཆེ་ཞུ་བ་དང་གོ་སྐབས་འདི་བརྒྱུད་ནས་སྤྱི་ཚོགས་སུ་ཅི་ཞིག་ཞུ་བསམ་ཡོད།
ལན། གོང་ཞུས་བཞིན་མི་རེ་ངོ་རེ་བྱས་ནས་ང་ཚོ་འདིར་སྐྱབས་བཅོལ་དུ་ཡོང་དགོས་ཁེལ་བའི་རྒྱུ་མཚན་ག་རེ་རེད། ང་ཚོ་འདིར་བརྩེ་བའི་ཕ་མ་དང་ནང་མི་ཡོད་ཚད་བློས་བཏང་སྟེ་ཡུལ་གྱར་བྱས་ནས་སྡོད་དགོས་པའི་རྒྱུ་མཚན་ག་རེ་རེད། སོ་སོས་སོ་སོར་དྲི་བ་བཏང་བསྡད་ནས་བོད་མི་རིགས་དང་རྩ་དོན་གྱི་ཆེད་དུ་གཅེས་པའི་སྲོག་བློས་གཏོང་མི་ཐུབ་མོད། ནུས་པ་གང་ཡོད་པ་དེ་འདོན་དགོས། དཔེར་ན། ཁ་སང་ཅིག་གིས་གསུང་བ་བཞིན་མི་ཡོད་པའི་མི་གཏང་དགོས། རྒྱུ་ཡོད་པའི་རྒྱུ་གཏང་དགོས། ཐབས་དང་ཤེས་རབ། བློ་དང་བརྩོན་པ་སོགས་སུ་ལ་ཡོད་ན་དེས་བཏོན་ནས་ཆོལ་གསུམ་གཅིག་སྒྲིལ་བྱས་ཏེ་ལས་འགུལ་ལྷོད་གཡེང་མ་བྱས་པར་ང་རང་ཚོའི་མི་རིགས་འདིའི་ཆེད་དུ་མི་རིགས་རང་ཤི་དགོས་པ་རེད་ལ། མི་རིགས་རང་གིས་འཐབ་རྩོད་བྱེད་དགོས་པའི་འགན་འཁྲི་འཁུར་དགོས་པ་རེད་མ་གཏོགས་མཉམ་འབྲེལ་རྒྱལ་ཚོགས་དང་ཨ་རི་ཞེས་པས་བོད་རང་བཙན་ཟེར་བ་ཞིག་གཞན་ནས་བླངས་ཏེ་ང་ཚོར་སྤྲོད་རྒྱུ་ཞིག་རྩ་བ་ཉིད་ནས་ཡོད་པ་མ་རེད།
ང་རང་ཉིད་ཡིན་ནའང་། འགན་འཁྲི་དེ་ཁུར་བསྡད་ནས་ཅི་འཇོན་གང་འཇོན། ལྷག་བསམ་རྣམ་དག་གིས་མི་ལོ་༡༢རིང་དུ་བོད་ཀྱི་རྩ་དོན་གྱི་ཆེད་དུ་མཉམ་ཞུགས་དང་དཀའ་ངལ་མང་པོ་གདོང་ལེན་བྱས་པ་ཡིན་ལ་ད་དུང་རང་གི་མགོ་རུས་སྐམ་པོ་ས་ལ་མ་བཞག་པར་དུ་བོད་ཀྱི་རྩ་དོན་རྩོད་པར་བྱེད་པའི་དམ་བཅའ་བརྟན་པོ་ཡོད། དེ་ནས་འདིར་ཁོ་དབུ་མ་རྩོད་མཁན་རེད་དང་ང་རང་བཙན་རྩོད་མཁན་ཡིན་ཟེར་བ་ལྟ་བུའི་རྩོད་པ་རྒྱག་པའི་དུས་ཚོད་མ་རེད། དེ་བཞིན་ཆོས་ལུགས་གྲུབ་མཐའ་དང་ཆོལ་གསུམ་བར་རྩོད་པ་བྱེད་པའི་དུས་ཚོད་དེ་མ་ཡིན་པར་རྒྱ་དང་བོད་ཀྱི་འཐབ་རྩོད་ཀྱི་དུས་ཚོད་དེ་ཡིན་པས་དེའི་སྟེང་དུ་རིག་པ་སྒྲིམ་རྒྱུ་དང་ཆིག་སྒྲིལ་བྱེད་རྒྱུ་དེ་ཧ་ཅང་གལ་ཆེན་རེད། སྤྱིར་ན་ཆིག་སྒྲིལ་གྱི་འདུ་ཤེས་ལག་ལེན་བསྟར་རྒྱུ་དེ་ཧ་ཅང་དཀའ་ལས་ཁག་པོ་རེད་འདུག དཔེར་ན། ང་ཚོའི་༼ཡུམ་སྐད་གཅེས་སྐྱོང་ཚོགས་པ་༽ས་རུ་བརྡབ་པ་དང་དེང་སང་ང་རང་ཉིད་ཀྱི་སློབ་སྦྱོང་གི་གོ་སྐབས་ཡོངས་རྫོགས་ཤོར་བ་ལྟ་བུ་རེད་མོད། ཡིན་ན་ཡང་། ད་དེ་རིགས་རྩོད་པ་བརྒྱབ་ནས་མི་འདུག་པར་ཚང་མས་བསམ་ཤེས་བྱས་ནས་ཁ་ནས་ནམ་ཡིན་ཡང་རྒྱལ་བ་རིན་པོ་ཆེ་ཟེར་ནས་མི་སྡོད་པར་ཁོང་གི་དགོངས་པའི་དམིགས་ཡུལ་གཙོ་བོ་གང་ཡིན་ཤེས་དགོས་པ་དེ་གལ་ཆེན་རེད། ༸སྤྱི་ནོར་༸གོང་ས་མཆོག་གིས་ཀྱང་སྐྱིད་སྡུག་ལེགས་ཉེས་ཅི་བྱུང་ཡང་།ཆོལ་ཁ་གསུམ་པོ་མགོ་དང་མཇིང་བ་བཞིན་དུ་འབྲལ་ཐབས་མེད་པའི་ཆིག་སྒྲིལ་དགོས་རྒྱུ་དེ་ངའི་རྩ་བའི་དམ་བཅའ་ཡིན།ཞེས་གསུང་བ་བཞིན་ང་ཚོ་བོད་པ་ཚོས་རྒྱལ་བ་རིན་པོ་ཆེ་ཁོང་གི་བཀའ་བསྒྲུབ་མི་བསྒྲུབ་དེ་ང་ཚོ་རང་གི་ལག་ན་ཡོད་པས་ན་ང་ཚོའི་དགོས་མཁོ་མེད་པའི་རྩོད་རྙོག་ ཡོད་ཚད་དོར་ནས་བོད་མི་ཚང་མའི་ཆིག་སྒྲིལ་གྱི་འདུ་ཤེས་འཛིན་རོགས་ཞེས་རེ་སྐུལ་ཞུས་པ་ཡིན།
དྲ་བ་དོ་དམ་པ་ལགས་་་ངས་བཅར་འདྲི་དང་ལྷན་དུ་འདྲ་པར་༢བཏང་མོད་འདིར་ནག་གསུབ་བྱས་ཡོད་པ་ག་རེ་ཡིན་ནམ།རབ་ཡིན་ན་ཡར་འཇུག་བྱེད་རོགས་ཞུ།
བསྟན་པ་དར་རྒྱས་ལགས། ཁྱེད་རང་གི་གསུངས་ཚུལ་དེ་ལ་བལྟས་ན་དངོས་གནས་སེམས་ཤུགས་ཅན་དང་ལས་འགུལ་ཡང་མང་པོ་སྤེལ་འདུག་པས་ཐུགས་རྗེ་ཆེ་ཞུ་རྒྱུ་དང་། གང་ལྟར་ང་ཚོ་བོད་མི་རྩམ་བཟན་ཚང་མས་ལས་འགན་ཡིན་པས་མ་འོངས་པ་ཡང་ཁྱེད་ཀྱི་སེམས་ཤུགས་མ་ཆགས་པར་གང་ཐུབ་ཡོང་བའི་རེ་བ་ཞུ།
ཕོ་རྒོད་ངར་མ་ཞིག་གི་ཚུགས་ཀ་ཡོད་གི །དཀའ་ངལ་ལ་མ་འཛེམས་པར་ཡིག་ཆ་མང་པོ་ཞིག་ས་གནས་ས་ཐོག་ཏུ་བཀྲམས་པ་དང་བོད་ཀྱི་རྩ་དོན་གྱི་ངོ་བོ་གསལ་བཤད་བྱས་པ་སོགས་ལ་བཅོས་མིན་སེམས་ཀྱིས་བསྔགས་བརྗོད་ཞུ། ༼ང་ཚོ་སློབ་ཕྲུག་གསུམ་གྱིས་སྲིད་དོན་ལས་འགུལ་སྤེལ་བས་སློབ་གྲྭ་ནས་རྩ་དགོངས་བཏང་བའི་གསལ་བསྒྲགས་སྦྱར་བ་ན་ཤེས་རབ་དགའ་ཚལ་སློབ་གླིང་གི་དགེ་སློབ་མི་གྲངས་༢༩༥ཙམ་གྱིས་རང་གི་མཚན་རྟགས་བཀོད་ནས་ང་ཚོར་རྒྱབ་སྐྱོར་བྱས་པར་གྲུབ་འབྲས་མ་ཐོན་ཡང་རང་ངོས་ནས་དགའ་ཚོར་ཆེན་པོ་དང་ཡིད་འགུལ་ཐེབས་ཡོད་པས་ཁོང་ཚོར་ངོ་མར་བཀའ་དྲིན་ཆེ་ཞུས་པ་ཡིན།༽སོག་སྒར་སློབ་གྲྭའི་ལས་བྱེད་དག་གིས་བོད་ཀྱི་རྩ་དོན་སྣང་མེད་དུ་བཞག་ནས་སྒྲིག་གཞི་གཙོ་བོར་བཟུང་བ་བློ་ཕམ་གྱི་གནས་རེད། བོད་ནང་གི་གདན་ས་གྲྭ་ཚང་ཁག་གི་སློབ་ཕྲུག་རྣམ་པ་དང་མི་རིགས་ཀྱི་ལ་རྒྱ་ཡོད་པའི་བོད་ཀྱི་དཔའ་བོ་དཔའ་མོ་རྣམས་ཀྱིས་བོད་ཀྱི་རྩ་དོན་གྱི་ཆེད་དུ་གཅེས་བའི་ལུས་སྲོག་བློས་བཏང་ནས་རྒྱ་གཞུང་ལ་ངོ་རྒོལ་བྱེད་ཕོད་ན། རང་དབང་ལུང་བར་ཡོད་པའི་ལས་བྱེད་དེ་དག་གིས་སྒྲིག་གཞི་ལ་ཁ་གཡར་ནས་བོད་ཀྱི་རྩ་དོན་གྱི་ཆེད་དུ་ལས་འགུལ་སྤེལ་མཁན་སློབ་ཕྲུག་རྣམས་ཕྱིར་ཕུད་བཏང་བར་བོད་མི་མང་པོར་བློ་ཕམ་བྱུང་འདུག་པའི་གནས་ཚུལ་བཅས། དམིགས་བསལ་ཤེས་རབ་དགའ་ཚལ་སློབ་གླིང་གི་སློབ་མ་ཚོ་ནི་བོད་ནས་གསར་དུ་འབྱོར་བ་ཤ་སྟག་ཡིན་པ་དང་ཆབ་སྲིད་བཙོན་པ་ཡང་རེ་ཟུང་ཡོད་པ་དང་། དཀའ་ངལ་ཞིག་གི་འོག་ནས་སྐྱབས་བཅོལ་དུ་ཡོང་བ་ལ་བཙན་བྱོལ་བོད་མིའི་སྒྲིག་འཛུགས་ཀྱི་ངོས་ནས་གཟིགས་སྐྱོང་ཡག་པོ་གནང་དགོས་པ་ནི་གལ་ཆེ་ཞིང་། ཁོ་ཚོ་ལ་འཚོ་བའི་དཀའ་ངལ་ཡོད་པ་མཐོང་གསལ་རེད།
བསྟན་པ་དར་རྒྱས་ཀྱི་ལོ་རྒྱུས་འམ་དྲི་བ་དྲི་ལན་འདི་ཀློག་སྐབས་དངོས་གནས་ཁྱད་མཚར་པོ་ཅིག་འདུག
མི་གཅིག་གི་ཐོབ་ཐག་ལག་འཁྱེར་གསུམ་ཙམ་བཟོས་སྐོར་དང་། ལས་ཀ་མང་པོ་ཞིག་བྱས་སྐོར། ཡང་སྐྱར་བཙོན་དུ་ཚུད་ཀྱང་ཐར་ཚུལ་ལ་བསམ་བློ་གཏང་ན་རྒྱལ་ཁབ་མང་པོས་ཞེད་སྣང་དང་དོ་སྣང་ཆེ་སྐྱེས་བྱེད་ཡུལ་གྱི་རྒྱ་གཞུང་ལ་ཞེད་སྣང་བྱེད་དགོས་དོན་མི་འདུག ལོ་རྒྱུས་འདི་ལ་དཔྱད་ཞིབ་ཡག་པོ་ཞིག་བྱས་ཚེ། ཡང་ན་ནི་ཁོང་གི་བརྗོད་དོན་ལ་རྫུན་ཚིག་མང་པོ་ཡོད་ངེས། དེ་མིན་ན་སྟོབ་ཆེན་ཡིན་ཞེས་བརྗོད་མཁན་གྱི་དགྲ་བོ་རྒྱ་དམར་དེ་དོན་དངོས་སུ་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་
སྲ་མཁྲེགས་ལྕགས་དང་མཚུངས་བའི་བུ་རྒོད་ཅིག་རེད། དེ་རང་གི་གངས་ཅན་པ་ལ་དགོས་པའི་མི་རེད་འདུག གཞོན་ནུ་ཚོགས་པ་འམ་བོད་བཙན་སློབ་མའི་ཚོགས་པ་ལྟ་བུ་ཞིག་གིས་གསོ་སྐྱོང་དང་གནང་རྒྱུའི་རེ་བ་ཡོད།
བསྟན་པ་དར་རྒྱས་ཀྱི་སྙིང་སྟོབས་རྗེས་སུ་ཡི་རངས་ཞུ། གཞན་གསོག་སྒར་རྒན་གསོ་ཁང་གི་འགོ་བྱེད་ཚོར་ངོ་རྒོལ་ཡོད།
སློབ་མའི་བསམ་དོན་བོད།།སློབ་སྤྱིའི་བསམ་དོན་ཁྲིམས
བསྟན་པ་དར་རྒྱས་ཀྱིས་བོད་སྤྱིའི་རྩ་དོན་ཆེད་ལས་འགུལ་སྤེལ་བར་རྗེས་སུ་ཡི་རངས་ཡོད། གསོག་སྒར་སློབ་གྲའི་སློབ་སྤྱིས་ཁོང་གསུམ་པོ་སློབ་གྲའི་ཁོངས་ནས་ཕྱིར་ཕུད་གནང་བར་བློ་ཕམས་དང་ངོ་རྒོལ་ཡོད། གལ་སྲིད་ཁོང་གསུམ་པོ་ཡང་བསྐྱར་ཤེས་ཡོན་སློབ་སྦྱོང་གི་གོ་སྐབས་རེ་གནང་ཐུབ་པའི་རེ་བ་ཡང་ཅི་ཆེ་ཡོད།
དངོས་གནས་མི་ཟེར་ན་འདི་འདྲ་དགོས། སྙིང་སྟོབས་དང་ལྷག་བསམ་ཧ་ལས་པ་རེད། འདི་ལྟ་བུའི་མི་བཟང་པོ་རེའི་འདུན་ལམ་དང་སློབ་སྦྱོང་གི་གོ་སྐབས་འཕྲོག་པ་ནི་ཀླ་ཀློའི་བྱ་སྤྱོད་ལས་ཅི་ཡིན། སོག་སྒར་སློབ་གྲྭའི་སློབ་སྤྱི་ནས་ངེས་པར་དུ་ལས་གནས་ནས་དགོང་པ་ཞུ་དགོས། མི་ཁྱོད་ལྟ་བུ་གཅིག་ཡིན་རུང་མེད་དགོས།
ཤེས་རབ་དགའ་ཚུལ་གླིང་གི་སློབ་སྤྱི་དེ་བོད་ལ་མི་དགའ་མཁན་ཞིག་ཡིན་པ་གསལ་བོ་རེད། བསྟན་པ་དར་རྒྱས་ལགས། ལས་ཡོད་ན་ལམ་ཡོད་ཟེར་བའི་དཔེ་བཞིན་ཁྱེད་ཀྱི་སྡུག་རུས་རྒྱོབ་དང་ལམ་འགྲོ་ཡོང་གི་རེད། ངའི་སྔོན་ལས་ཁྱེད་ལས་སྡུག་གི་འདུག
སྤྱིར་བཏང་སློབ་གྲའི་སྒྲིག་གཞི་ལ་གཞིར་འཛིན་དགོས་སྟབས་སློབ་སྤྱི་ལ་ཐུགས་ཁག་མེད་མོད། ཡིན་ན་ཡང་སློབ་སྤྱིས་སྒྲིག་གཞི་དེའི་གོ་དོན་དང་། སྒྲིག་གཞི་ནང་གི་ཆབ་སྲིད་དང་འབྲེལ་བའི་ལས་ཀ་བྱས་ན་སློབ་གྲ་ནང་སྡོད་ཆོག་གི་མ་རེད་ཟེར་བའི་ཚིག་རྗོད་དེ་གནད་དོན་ག་རེའི་ཆེད་དུ་བཞག་ཡིན་པ་གསལ་པོ་ཤེས་དགོས་པའི་གནད་དོན་གཅིག་རེད། གསོག་སློབ་འདི་ནི་བོད་ཀྱི་རྩ་དོན་དང་བོད་མིའི་ཆེད་དུ་བཙུགས་པ་ཞིག་ཡིན་སྟབས་བོད་ཀྱི་རྩ་དོན་ཆེད་ལས་འགུལ་སྤེལ་མཁན་ལ་དམིགས་བསལ་གནང་དགོས། དམིགས་བསལ་མ་གནང་རུང་སློབ་གྲའི་ཁྲིམས་དང་སྒྲིག་གཞི་གང་དང་ཡང་མི་འགལ།་ ཆབ་སྲིད་ཀྱི་ལས་ཀ་བྱས་ན་ཟེར་བ་དེ་བཙན་བྱོལ་ནང་གི་ཆོལ་ཁ་དང་ཚོགས་པ་འདྲ་མིན་གྱིས་རྒྱུད་བསྐུལ་དང་ཤན་ཞུགས་འོག་ནས་སློབ་ཕྲུག་ཁོངས་སུ་ཆབ་སྲིད་ཀྱི་ཚོགས་པ་འདྲ་མིན་བཙུགས་ཏེ་འོས་བསྡུ་བྱས་པ་དང་། གསོག་སློབ་གི་སློབ་ཕྲུག་ཡིན་བཞིན་དུ་གོང་གི་ཚོགས་པ་དེ་དག་གི་ཁོངས་སུ་ཚོགས་མི་དང་ཚོགས་པའི་འགན་འཁུར་བཅས་བྱེད་མི་ཆོག་པའི་དོན་ལ་གོ་དགོས་པ་ལས་བོད་སྤྱི་པའི་ཆབ་སྲིད་རྩ་དོན་དེ་ལ་གོ་རྒྱུ་མེད། གལ་སྲིད་དེ་ལ་གོ་དགོས་ན། ཆབ་སྲིད་དང་འབྲེལ་བའི་ལས་ཀ་བྱས་ན་སློབ་གྲ་ནང་སྡོད་ཆོག་གི་མ་རེད་ཟེར་བ་དེ་སྐྱག་རྫུན་སྐྱག་ནག་རེད། དེ་ཞིབ་པར་ཤེས་འདོད་ན་བདེ་སྲུང་བཀའ་བློན་དངོས་གྲུབ་ལགས་དང་སྔོན་གྱི་སློབ་སྤྱི་བྱམས་པ་ལགས་ལ་བཀའ་མོལ་ཞུས་ན་གསལ་པོ་ཆགས་ཀྱི་རེད། མ་གཞི་སློབ་སྤྱི་ལ་ཤེས་ཡོན་གྱིས་མ་འདངས་ན་དཀའ་ངལ་དེ་འདྲ་འཕྲད་རྒྱུ་ཡིན་པ་ཉག་གཅིག་རེད། རྗེས་སུ་ཕྱག་ལས་ག་རེ་གནང་ན་ཐག་གཅོད་མ་བྱས་སྔོན་ནས་གནད་འགག་ཤེས་མཁན་དང་ཉམས་མྱོང་ཡོད་མཁན་ལ་བཀའ་མོལ་ཞུ་དགོས་རེད།་ མ་གཞི་སྔར་གྱི་སློབ་སྤྱི་བྱམས་པ་ལགས་ཀྱང་ཁྱེད་རང་ལས་ཤེས་ཡོན་དམན་པ་ཡོད་རེད།་ཡིན་ན་ཡང་དེ་འདྲའི་སྐབས་སུ་བཀའ་མོལ་ཞུ་གི་རེད།
ཁྱོད་ཕ་བཟང་གི་བུ་ཞིག་རེད། རང་གི་དོན་དུ་མ་རེད་བོད་སྤྱི་ཡི་དོན་དུ་རེད། སྐུ གཟུགས་ལ་བདག་གཅེས་གནང་རོགས། ལས་དང་ལམ་གཏན་གཏན་ཡོད་རེད་། སེམས་ཤུགས་མ་ཆག་ཕ་བཟང་བུ།
བསྟན་པ་དར་རྒྱས་ལགས་ཀྱི་སྙིང་སྟོབས་རྗེས་སུ་ཡིད་རངས་ཡོད།
གསོག་སྒར་གྱི་འགན་འཛིན་ཐག་གཅོད་དེ་ལ་ངོ་རྒོལ་ཐ་གཅིག་ཏུ་བྱ་དགོས།
ངེས་ཚོ་ཆབ་སྲིད་ཀྱི་སྐྱབས་བཅོལ་བ་ཡིན་པ་ལས་དེ་མིན་གང་གི་ཡང་སྐྱབས་བཅོལ་བ་མིན།
དེ་ང་ཚོས་ངེས་པར་འཛིན་ཐོབ་པ་བྱ་དགོས།
དྲི་བ་ཞིག་འདྲི་འདོད་བྱུང་། དེང་རི་ནས་མར་གཞིས་ཀ་རྩེ་ལ་ཁྲིད་ནས་ཡང་ཡར་མངའ་རིའི་བརྩོན་ཁང་ལ་ག་འདྲ་ཁྲིད་པ་རེད། རྒྱ་གཞུང་གིས་བགོ་སྟེང་ལ་སོང་ན་གཞིས་ཀ་རྩེ་དང་མངའ་རི་གཉིས་ས་ཁུལ་ཁ་ཁ་མ་རེད་དམ། དེང་རི་ནི་གཞིས་ཀ་རྩེའི་མངའ་ཁུངས་སུ་ཡོད་པ་དང་ས་ཁྲ་ལ་བལྟས་ན་ཡང་དེང་རི་ནས་གཞིས་རྩེ་ལ་སོང་དེ་ནས་སླར་ཡར་ཡར་མངའ་རིའི་ཕྱོགས་ལ་བཙོན་འཇུག་བྱེད་ཚུལ་འདི་མགོ་འཐོམ་དགོས་བ་ཞིག་འདྲ།
བསྟན་པ་དར་རྒྱས་ལགས་ལ་སྡུག་སེམས་མཉམ་དུ་ཞུ།། མ་གཞི་སྤྱི་ཚོགས་མེ་ལོང་གི་ཚག་པར་ཟེར་བ་དེ་ལ་ཞེ་གྲགས་ཡིད་ཆེས་མེད་ཡིན་ན་བསྟན་པ་དར་རྒྱས་ཟེར་བ་དེ་ལ་དོ་སྣང་མ་བྱས་རང་བྱས་རེད་གང་ཡིན་ཟེར་ན་བོད་ཀྱི་རྩ་དོན་ཆེད་དུ་དམིགས་པའི་སློབ་གྲྭ་ཞིག་གི་ནང་ནས་བོད་ཀྱི་རྩ་དོན་ཆེད་དུ་ངལ་རྩོལ་བྱས་པས་སློབ་གྲྭ་ཡི་བསྒྲིགས་གཞི་ནས་འགལ་ཟེར་བ་དེ་ནི་མི་སྲིད་པ་ཞིག་རེད། བསྟན་པ་དར་རྒྱས་ཁྱོད་ཀྱིས་བཤད་པ་དེ་ཕྱི་གསལ་ནང་གསལ་དངོས་གནས་དྲང་གནས་རེད་པས་གར་སྲིད་ཁྱོད་ཀྱིས་བཤད་པ་དེ་བདེན་པ་ཡིན་ན་ཁྱོད་རང་ལྷ་སའི་གྲ་གཞི་བཙོན་ཁང་ནས་བཏང་བས་ཁྱོད་རང་ཕ་ཡུལ་གྱི་ཉེན་རྟོག་པ་ལ་གང་བྱས་ནས་རྩིས་མ་སྤྲད་པ་ཡིན་ནམ་ཁྱོད་ཀྱིས་ཉིན་ཐོ་མ་འགོད་པས་ཁྱོད་རང་ཉེན་རྟོག་པས་ཅི་ལ་མི་འཛིན་པ་ཡིན་ནམ་ཁྱོད་ཀྱིས་ཕ་ཡུལ་ནས་ཡུལ་མི་ཡི་ཐོབ་ཐང་ལག་དེབ་ས་གནས་མི་འདྲ་བ་གསུམ་དེ་ག་འདྲ་བྱས་ནས་བཟོས་པ་ཡིན་ཁྱོད་རང་ཉེ་རྟོག་པ་ཡིས་དོགས་སྤྱོད་བྱེད་བཞིན་དུ་ཁྱོད་རང་ལྷ་ས་ནས་ཁྱབ་སྲིད་ཀྱི་མི་འཛིན་བཟུང་བྱེད་ནས་ཕ་ཡུལ་ལ་ཕྱིར་རྩིས་སྤྲོད་དུས་ཉིན་རྟོག་པ་ཡིས་ཅི་ལ་བརྩེས་ལེན་་མི་བྱེད་པ་ཡིན་ནམ་གང་བལྟར་ཁྱོད་རང་སློབ་གྲྭ་ནས་བོད་ཀྱི་རྩ་དོན་ཁྱེད་དུ་རྐང་འཁོར་སྐོར་སྤྱོད་དུ་སོང་ནས་ཕྱིར་འབུད་བྱད་ཡོད་པ་དངོས་ཡོད་རེད་དེ་ནི་ཆེས་མི་འུས་པ་ཞིག་དང་ཐིར་དྲགས་པའི་སྐྱོད་ཆ་རང་རེད། མ་གཞི་བལྟ་བ་མཁྲིགས་འཛིན་བྱེད་ཉེན་རྒྱ་ནག་གི་གཞུང་འཛིན་བ་གཅིག་པོ་མིན་གོང་ས་མཆོག་གིས་དམངས་གཙོ་ཆེད་དུ་ནུས་ཤུགས་ག་ཚོད་གནང་ན་ཡང་སྐུར་བར་འོས་པའི་རང་གཞུང་བོད་མི་བསྒྲིགས་འཛུག་པ་ལ་ཡང་མི་ཉུང་བ་ཞིག་ཡོད་ངེས་པར་དུ་ཐུགས་བསམ་གཏོང་དགོས་པའི་དུས་ལ་བབ་ཡོད།
བསྟན་པ་དར་རྒྱས་ལགས་སེམས་ཤུགས་མ་ཆགས་དང་ཁྱེད་ལ་ལམ་འགག་ཅིག་རག་ངེས་རེད།
ཁྱེད་ནི་འཇོན་མཐོང་ཅན་ཞིག་ཡིན་འདུག་པས་ང་ཚོ་ལ་དགོས་པ་དེ་རིགས་རེད།
སྔར་གྱི་ལོ་རྒྱུས་ཁ་ཤས་ཐད་ལ་དམིགས་གསལ་འགྲེལ་བཤད་རྒྱག་རོགས་ཞུ།ཁྱེད་དང་མཉམ་དུ་སློབ་གྲྭ་ནས་ཕུད་པའི་མི་གཉིས་དེ་གང་ན་ཡོད་རེད།
འདིར་མིང་དང་ད་ལྟའི་གནས་སྟངས་སོགས་མི་འགོད་པའི་རྒྱུ་མཚན་གང་རེད།
་
བསྟན་པ་དར་རྒྱས་ལགས་ཁྱེད་ཀྱིས་བོད་དོན་ཆེད་དུ་དཀའ་ཁག་དེ་ཙམ་བརྒྱུད་པ་བླ་མེད་བཀའ་དྲིན་ཆེ་ཞུ་རྒྱུ་ཡིན། གསོག་སྒར་སློབ་གྲྭའི་དགེ་རྒན་གྱིས་བསམ་ཤེས་མ་ཐོབ་པར་ཕྱིར་འཕུད་བཏང་བ་བློ་ཕམ་ཡོད། ཁྱེད་ལ་གོང་གི་དྲྭ་གྲོགས་དག་གིས་ཕུལ་བའི་དྲི་བ་ལན་ཞིག་དང་།
ཁྱེད་དང་མཉམ་དུ་ཕུད་པའི་སློབ་ཕྲུག་གཉིས་ཀྱི་མིང་དང་ད་ལྟའི་གནས་སྟངས་སོགས་འདིར་མི་འགོད་པའི་རྒྱུ་མཚན་གང་ཡིན་ནམ།
ཁྱེད་ནི་འབུར་དུ་ཐོན་པའི་དཔའ་རྒོད་ཞིག་རེད་། འོན་ཀྱང་ལག་ཁྱེར་བཟོ་སྟང་་་་་་་་་་་་་་་་་་་་བཟོ་སྟང་། ང་ཚོའི་བདེན་པ་འཚོལ་བའི་དུས་སྐབ་རེད་།
ཁྱོད་ཀྱིས་མགོ་ལོག་གཅིག་སྒྲིལ་རྫོང་ཟེར་བའི་ཚིག་འདི་བེད་སྤྱོད་བྱེད་པ་ནས་བཟུང་རྒྱ་ནག་གི་བོད་ལ་དབང་བསྒྱུར་བྱེད་པ་ངོས་ལེན་བྱས་བ་རེད། མགོ་ལོག་གཅིག་སྒྲིལ་རྫོང་ཟེར་བ་འདི་སུས་བཏགས་པ་རེད?
རག་ཕྱག་རྡོར་ལགས་་་་་་་་ཁྱོད་ཉིད་སྤྱི་ཚོགས་མེ་ལོང་ལ་ཡིད་ཆེས་ཡོད་མེད་རྩ་བ་ཉིད་ནས་བཤད་ཀྱིན་མེད་ལ་་་འདི་ཉིད་སྤྱི་ཚོགས་ཀྱི་བདེ་སྡུག་གླེང་སའི་གསར་ཤོག་ཅིག་ཡིན་ཙ་ན། ཁྱོད་ཁོ་ནར་་ཡིད་ཆེས་ཡོད་པས་ཡོད་གོ་ཅི་ཡོད་ལ་མེད་པས་མེད་གོའང་ཅི་ཡོད་་་་་གང་ལྟར་བཅར་འདྲི་འདི་བྱེད་མཁན་ང་ཡིན་ལ་ཚགས་པར་དུ་འགོད་མཁན་ཡང་ང་ཡིན།ད་དངུ་ཁ་བརྡ་དྲ་བར་སྐུར་མཁན་ཡང་ང་ཡིན་པས་་་དེའི་ཕྱོགས་ནས་་ཉིད་ཀྱི་དགོངས་ཚུལ་གསུངས་རོགས།
མང་ཙམ་ཤོད་མྱུང་ཙམ་འུར་།
ཨའའའ་འགྲིག་ལམ་དེར་་་་རྐང་པ་རློན་པ་ལྷམ་ལ་མི་འགྲོ་།མཇེ་མགོ་སྐམ་པོ་སྟུ་ལ་མི་འགྲོ་།སློབ་མས་སློབ་མ་གསད་ན་ཉེས་ཆད་མེད་།བོད་པས་བོད་དོན་བྱས་ན་ཁྲིམས་འགལ་ཞིག་་་་ཅི་ཡིན་ན་་་དཀོན་མཆོག་གསུམ་ཨཨཨ་ཅི་ཤེས་
དྲ་ལྟ་ཚང་མས་བསྟན་པ་དར་རྒྱས་ལགས་ལ་རོགས་རམ་གནང་བ་ཐུགས་རྗེ་ཆེ། སོག་སྒར་སློབ་གྲྭའི་སློབ་སྤྱི་དེ་རྒྱ་མི་དམར་པོའི་ཕྱག་རོགས་ཞིག་མིན་ནམ། ངོ་མ་གནས་ལུགས་མེད་ཁུ།
དེ་མིན་གོང་ནས་དྲ་འབུ་ཞིག་གིས་རྒྱ་ན་གི་སྤྱི་དམངས་ལག་ཁྱེར་སྐོར་ལ་དོགས་པ་ཟ་བ་དེ་ཁག་མེད་ཀྱང་། དེང་སང་རྒྱ་ནག་གི་ལས་ཁུངས་གང་ས་གང་ན་སྤྱིང་ཀི་མང་སྤྱིང་ཀི་ལ་ཤ་དམར་པོ་མང་པོ་བསྟན་ན་སྤྱིང་ཀི་ཤ་མི་ཟ་མཁན་རྩ་བ་ནས་མེད། དཔེ་དེ་བཞིན་ལག་འཁྱེར་རྫུན་མ་གང་ནས་ཡིན་ན་བཟོ་ཐུབ། དི་མོས་ཟིག་ཡིན་ཐ།
བསྟན་དར་ཁྱོད་ཀྱི་གོང་བརྗོད་ལས་དོན་རྣམས་བྱས་ཡོད་ན་ལེགས། ཡིན་ནའི་གོང་བརྗོད་ཚིག་མང་པོ་ཞིག་ལ་བསམ་བློ་ངེས་བརྟན་བཏང་ན་ཡིད་ཆེད་རྩ་བ་ནས་སླེབས་ཀྱི་མི་འདུག ཁྱོད་གཅིག་པོར་ཡིད་མ་ཆེད་པ་མ་ཡིན། དེང་སྐབས་ཁྱེད་ཀྱི་བརྗོད་ཚིག་དང་འདྲ་བའི་རྫུན་རྩོམ་མང་དྲག་པས་སོ།
ཐོར་རྒོད་པ་སྤྱིན་ཆབ་ལགས་་་་་་་་་་་་་་ཁྱོད་རང་སུ་ཡིན་ངས་ངོ་ཤེས་ཀྱི་མེད་གང་བལྟར་ཁྱོད་ཀྱིས་བཅར་འདྲི་བྱས་པ་དང་ཚགས་པར་དུ་འགོད་པ་ད་དུང་ཁ་རྡ་ཡི་དྲ་བར་བཀོད་ཡོད་ན་ང་ལ་ཅི་གང་ཡང་བསམ་འཆར་མེད་ང་སྔོན་མ་རྡ་སར་བསྡད་མྱོང་མཁན་ཞིག་ཡིན་རྡ་སར་གནས་སྟང་བསྐོར་ལ་ང་ལ་རྗེས་རྒྱ་ཆེན་པོ་ཡོད་སྤྱི་ཚོགས་མེ་ལོང་ཟེར་བ་ཚགས་ཤོག་དེ་ནི་སྟོང་གསུམ་འོར་སྒྲ་ཆེན་པོ་དང་དོན་དངོས་དང་མཐུན་པ་དངོས་གནས་དྲང་གནས་འགོད་མཁན་ནི་ཆེས་དཀོན་པས་ཐ་ན་ང་ལ་ཡང་སུན་སྣང་སྐྱེ་མྱོང་ཡོད།།
སློབ་མའི་བསམ་དོན་བོད། སློབ་སྤྱའི་དམིགས་ཡུལ་ཁྲུམས། ཀྱེ་མ་ཧོ། སློབ་སྤྱིའི་ལགས།
སློབ་སྤྱིའི་ལགས། ཁྱེད་ཀྱི་ནམ་ཡང་རྩ་བའི་དམ་བཅའ་དེ་ཤོར་མི་ཉན།
མཐའ་མི་འཆོལ་བའི་མི་དེས་རང་ས་ནང་རང་སྡོད་མི་ཐུབ་པ་བཟོས་ནས་གཞན་ཡུལ་དུ་འབྱོར་ནའང་ཁུངས་འཆོལ་གྱི་ཡོད་པ་མ་རེད། ད་དུང་བོད་མི་རིགས་དང་བོད་རྩ་དོན་བཤད་རྒྱུ་ཕ་རོལ་སྤང་འགལ་རེད། ཅིས་བྱས་ན་བུ་ལོན་གྱིས་ལྐོག་རུལ་དུས་གཞི་ནས་ངོ་རྒོལ་བྱས་ཁུལ་ཡིན་རྒྱུ་རེད་བསམ་གྱི དེ་མིན་སློབ་སྤྱི་ནས་གནས་དབྱུངས་བཏང་མི་སྲིད། གང་ལྟར་ཡིད་མཆེས་མེད།།