ང་རྒྱལ་གྱིས་མི་གཟུགས་ལ་ཁྱི་མགོ་མངོན་གྱིན་འདུག

སྙེ་ལྷའི་ཐུགས་སྲས།

 
གནའ་མའི་གཏམ་དཔེར། ང་རྒྱལ་གྱི་གོང་བུ་ལ། ཡོན་ཏན་གྱི་ཆུ་མི་ཆགས་ཟེར་བའི་གཏན་ཚིགས་འདི་ང་ཚོ་སུས་ཀྱང་བརྗེད་མི་ཉན། གཏན་ཚིགས་དེས་ང་ཚོ་མི་གཞི་ཚུལ་ལྡན་ཞིག་ཏུ་བསྒྲུབ་པའི་སྒྲུབ་བྱེད་རྣལ་མ་ཞིག་བྱེད་ཐུབ། ང་ཅིག་མིན་ན་སུ་ཅིག་ཡིན་སྙམ་པའི་རང་རློམ་ཆེན་པོ་འདི་འཁུར་ནས་སྤྱི་ཚོགས་ཞིག་གི་ནང་སྣེ་ཁྲིད་བྱེད་མཁན་ཁྱེད་ཀྱིས་གཞན་ལ་མཐོང་ཆུང་དང་ཁྱད་གསོད། ལྟོས་མེད་ངང་གནས་ཚུལ་གང་ཞིག་ཏུ་ཐག་བཅད་ཤག་ཤག་དང་གཞན་གྱི་བསམ་ཚུལ་དང་དགོངས་འཆར་ཀུན་ལ་བརྩི་མཐོང་མེད་པར་ཟུར་ཟ་དང་ཁྲེལ་དགོད་ངང་སྤྱི་དོན་རང་ཐག་རང་གཅོད་བྱེད་པའི་ང་རྒྱལ་འདིས་ཁྱེད་རང་ཉིད་མི་གྲལ་ནས་ཁྱི་གྲལ་ལ་འབུད་བཞིན་ཡོད།

རང་ཉིད་དང་བསམ་ཚུལ་མི་མཐུན་པ། ལྟ་བ་དང་ལངས་ཕྱོགས་མི་གཅིག་པ། རང་གི་སྣང་བ་ལ་འཐད་པོ་མིན་པའི་མི་ཞིག་གི་སྤྱི་དོན་ལ་འབད་པའི་ལྷག་བསམ་ལ་སྣང་ཆུང་དང་སྤྱི་ཕན་གྱི་ལས་དོན་གང་ཞིག་བརྩམས་ཀྱང་ངོ་རྒོལ་ལས་མཐོང་ཆེན་མི་བྱེད་པའི་གཡབ་ཆུང་དང་། སྐྱོན་འཚོལ་བྱེད་པའི་ང་མཁས་ང་འཇོན་སྒྲུབ་པའི་ང་རྒྱལ་འདིས་ཁྱེད་རང་ཉིད་མི་གྲལ་ནས་ཁྱི་གྲལ་ལ་འབུད་བཞིན་ཡོད། ཐུན་མོང་གི་དཀའ་སྤྱད་ལས་བྱུང་བའི་ལེགས་ཚོགས་ཀྱི་བྱ་བཞག་ཀུན་རང་ཉིད་ཀྱིས་འཇོན་རབས་དང་རང་ཉིད་ཀྱི་བཏང་རབས་བཤད་ནས་ས་འཕྱར་གནམ་འཕྱར་ངང་རང་ཉིད་མཐོར་བསྙེགས་ཀྱི་གྲགས་པ་བཙལ་འཚོལ་བྱེད་པའི་ང་རྒྱལ་འདིས་དོན་དངོས་ཐོག་རང་ཉིད་ཀུན་གྱི་སྣང་ངོར་མི་སྤགས་གྱོན་པའི་ཁྱི་ཞིག་ཡིན་པར་ར་སྤྲོད་བྱས་པ་ཞིག་ཡིན།

རང་ཉིད་གནམ་བསྐོས་ཀྱི་འགོ་པ་ཞིག་ཡིན་སྙམ་པའི་ང་རྒྱལ་འདིས་རང་འོག་གི་ལས་དོན་གང་ཞིག་ཏུ་འཕྱར་གྲུ་མཉམ་འདེགས་གནང་མཁན་གྱི་མི་སྣ་དེས་ནོར་འཆུག་ཏོག་ཙམ་གྱི་ཆེད་དུ་ཁ་གདངས་སྣ་གཉེར་ངང་ངན་སྨད་དང་ངན་གཤེ་གང་བྱུང་གང་ཐོན་བྱེད་པའི་གཡང་ནོར་ལ་རྡོག་ཐོ་ཞུ་བའི་དཔེ་བཞིན་ཆེན་པོར་རློམ་པ་ཁྱེད་ཀྱི་ང་རྒྱལ་འདིས་རང་ཉིད་སླར་ཡང་མི་གྲལ་ནས་ཁྱི་གྲལ་ལ་གཡུག་བཞིན་ཡོད། སྔར་སོང་རྫ་མ་གཅིག་ནས་ཟས་མཉམ་ཟས་དང་ཁྲོན་པ་གཅིག་ནས་ཆུ་མཉམ་འཐུང་བྱས་མྱོང་བའི་མི་ཞིག་ལས་དབང་གིས་བྲལ་ནས་དེ་རིང་ཁྱེད་ཀྱི་འགྲམ་ཏུ་དཀའ་ངལ་ཅི་ཞིག་ལ་རེ་བ་ཞུ་རུ་ཡོང་དུས། ཁྱེད་ཀྱིས་ཁྱད་གསོད་དང་སྣང་ཆུང་ངང་དང་ལེན་བྱེད་རྒྱུ་ལྟ་ཞོག མི་འདི་རྒྱབ་ལོགས་པ་དང་ངན་པ་གནམ་འཕྱར་བྱེད་བཞིན་མི་དེའི་སྐྱོན་གནད་འབའ་ཞིག་ལ་མཛུབ་མོ་བཙུགས་ནས་གཞན་ལ་མིག་དཔེ་སྟོན་པའི་ཚུལ་གྱིས་ངན་བཤད་བྱེད་པའི་ང་རྒྱལ་འདིས་རང་ཉིད་མི་གྲལ་ནས་ཕུད་ཟིན་པའི་ཁྱི་གུ་ཆུང་ཆུང་འདི་རང་ཡིན་པའི་ཟུག་ངོམ་བྱེད་བཞིན་ཡོད།

གནས་ལུགས་དང་རྒྱུ་མཚན་ལ་མི་བལྟ་བར་ཨུ་ཚུགས་དང་ཧམ་པ་ཁོ་ནས་མཐའ་གཅིག་ཏུ་རང་ལ་ཡོད་པའི་དབང་ཤུགས་ངོམ་ནས་གཞན་དེའི་དོན་མཐུན་དོན་ཡོད་ཀྱི་སྐད་ཆ་རྣམས་རྣ་རྒྱབ་ཀྱི་ལྷག་པར་བསྐུར་ནས་མཐའ་གཅིག་ཏུ་རང་གིས་གང་བཤད་པ་རྣམས་དང་ལེན་བྱེད་བཅུགས་པའི་ང་རྒྱལ་འདིས་རང་ཉིད་མི་སྤགས་གྱོན་པའི་ཁྱི་རྒན་བཙན་པོ་ཞིག་ཡིན་པ་ཀུན་ལ་ཤེས་སུ་བཅུགས་ཀྱིན་ཡོད། དེས་ན་ཁྱེད་ཉིད་མི་རྣལ་མ་ཞིག་བྱེད་འདོད་ན་ང་རྒྱལ་ལ་འབྲེལ་འདྲིས་མི་གནང་རོགས།།