ང་ལ་དགོས་རྒྱུ་རང་འགོ་ཐོན་ཙམ་མིན།།

རེ་སྨོན།

 
ང་ལ་དགོས་རྒྱུ་རང་འགོ་ཐོན་ཙམ་མིན།།
བོད་ཀྱི་སྐད་ཡིག་ཤེས་པའི་བུ་ཞིག་དགོས།།
སྐད་ཡིག་སྤུས་དག་ཤེས་པའི་བུ་ཞིག་དགོས།།
ཕ་ལས་བུ་ཕྲུག་ལྷག་པའི་བུ་ཞིག་དགོས།།

ང་ཡི་རེ་བ་ཤེས་ཡོན་ཡོད་ཙམ་མིན།།
བོད་གཤིས་ཁྲག་ལ་ཁྱབ་པའི་བུ་ཞིག་རེ།།
ཡ་རབས་སྲོག་རྩར་འཛིན་པའི་བུ་ཞིག་རེ།།
བོད་མིའི་ཞབས་འདྲེན་མེད་པའི་བུ་ཞིག་རེ།།

ང་ཡི་སྨོན་ལམ་ལུས་སེམས་བདེ་ཙམ་མིན།
སྡིག་ཉེས་དུག་བཞིན་བལྟ་བའི་བུ་རུ་སྨོན།
དགེ་ལེགས་གསེར་བཞིན་མཐོང་བའི་བུ་རུ་སྨོན།
མདོར་ན་གཞན་ཕན་ཅན་གྱི་བུ་རུ་སྨོན།

མཆན། བུ་ཞེས་པ་ནི་རྗེས་ལུས་ཅན་གྱི་མི་རིགས་ཀྱི་བསམ་ཚུལ་ལྟར། བུ་ཕོ་མཆོག་ཏུ་འཛིན་པ་ལྟ་བུ་མ་ཡིན་པར་བོད་ཀྱི་རིག་གཞུང་ནང་ཕོ་མོ་གཉིས་ཀར་འཇུག་པ་ཇི་བཞིན་གོ་བ་བྱས་སོ།