ལྷ་རྩེའི་ཁུ་བྱུག
ཁ་རྩང་མཁན་ཆེན་དགའ་དབང་ཚང་གིས་བཀའ་སློབ་ཅིག་ཏུ་སོ་སོའི་ལས་ཀ་དེ་སྔོན་མའི་བག་ཆགས་དང་། ད་ལྟའི་རྐྱེན་ལ་བརྟེན། མི་གཅིག་གིས་འཇོན་པ་དེ་གཅིག་གིས་མི་འཇོན་ཞིང་། གཅིག་ཤོས་དགའ་བ་དེ་གཅིག་ཤོས་དགའ་བའི་ངེས་པ་མེད་པའི་བསྐོར་ནས་གསུངས་སོང་། བཀའ་སློབ་གནང་སའི་འཕྲིན་ཕྲིན་ཚོགས་པ་དེ་ནི་དབྱར་གནས་ཚང་ཟེར་བའི་དྲྭ་ཚོམས་ཆུང་ཆུང་ཞིག་གི་ནང་ལ་རེད། དེ་རུ་མཆེད་གྲོགས་རྙིང་པ་སྐྱ་སེར་སེམས་མཐུན་ཁ་ཤས་ཡོད་པ་ཞིག་ཡིན།
ཁོང་གིས་མི་ཚེ་འདིར་བྱས་རྗེས་ཤིག་ངེས་པར་འཇོག་དགོས་པ་དེའང་སོ་སོའི་དགའ་ཕྱོགས་ཉག་གཅིག་ལ་བསྟུན་དགོས་གསུངས་པའི་དཔེར་མཚོན་ནང་དུ། མཆེད་གྲོགས་སྨན་པ་ཉི་ཤར་གསོ་རིགས་ལ་དགྱེས་པ་བཞིན་བོད་སྨན་ལ་བསླབས་ཏེ། ད་ཆར་རླབས་ཆེན་གཞན་ཕན་འབྱུང་བའི་བསྐོར་དང་། མཆེད་གྲོགས་མཁན་པོ་དཔའ་བརྟན་ལགས་ནི་དགེ་ལས་སྙིང་རྗེ་ལ་གོམས་པ་བཞིན་རྒས་པ་གསོ་བའི་བྱམས་བརྩེའི་འགྲོ་དོན་བསྐོར་དང་། མཆེད་བདེ་ལེགས་ཕུན་ཚོགས་ཀྱི་དྭ་ཕྲུག་སློབ་གྲྭའི་དགེ་ཕན་བསྐོར་ནས་གསུངས་སོང་།
དེ་དང་བསྟུན་ཕྲན་གྱིས་རང་ཉིད་ལ་བྱུང་བའི་བརྒྱུད་རིམ་ལན་གཅིག་བསྔོགས་དུས། ངས་མི་ཡུལ་དུ་བྱས་རྗེས་ཅི་ཡང་བཞག་མི་འདུག ད་དུང་འཇོག་རེ་ཡང་མི་འདུག རེད། ང་ལ་དགའ་ཕྱོགས་ལས་ཀའི་དམིགས་ཡུལ་མེད་པ་རེད་དམ། ངའི་དགའ་ཕྱོགས་དེས་མི་ལ་ཕན་པའི་བྱ་བ་འཇོན་མེད་པ་རེད། ཡོད་ཆོག་ཅིང་། ཡིན་ངེས་པའི་མི་སོ་སོའི་ཐོད་པའི་རི་མོའི་ལས་ཀ་ཚང་མ་དེས་འགྲོ་བ་མི་ལ་ཕན་བདེ་བསྐྲུན་ཐུབ་མིན་ཅི་རིགས་ཡོད་ཁར་ད་དུང་མི་ལ་ལའི་ལས་ཀས་རང་ཉིད་ལྟོ་རྒྱབ་ཐག་ཆོད་མིན་ཐེ་ཚོམ་ཅན་མང་པོ་ཡོད་ངེས།
ང་ནི་གཉིས་པའི་རིགས་སུ་གཏོགས་འདུག དགའ་ཕྱོགས་ལས་ཀ་བཟང་ངན་དེ་ཡང་སྔོན་མའི་བག་ཆགས་དང་། ད་ལྟའི་རྐྱེན་ལ་རག་ལས་ཕྱིར་བཅོས་བསྒྱུར་ཐུབ་པ་ཤིན་ཏུ་དཀའ་མོར་སྣང་།
ངའི་དགའ་ཕྱོགས་སམ། ཡང་ན་ལྷན་སྐྱེས་ཀྱི་གཤིས་ཀ་ནི། མདོ་མེད། འཁྱམ་པོའི་ལས་ཀ་འབའ་ཞིག་ལས། འཇིག་རྟེན་འདི་ན་ཕྱོགས་གང་ཐད་ནས་གླེང་རིན་ཡོད་པའི་བྱ་བ་སྣེ་གཅིག་འཇོན་མེད་པར་རྟོགས། ལོ་ཆུང་དུས་ཐོས་བསམ་སྐབས་སུ། ཐོས་པ་མ་བྱས་རི་མོ་སྣ་ཚོགས་བྲིས་ཤིང་། གླིང་བུ་འབུད་ལ་དགའ། རི་མོ་དང་གླིང་བུ་ཆེད་སྦྱོང་ལས་ཀ་ཡང་མེད་ལ། རིག་གནས་ཀྱི་ཡོན་ཏན་ཡང་མེད།
དེ་མཚམས་དགོན་པའི་བཅས་ཕྱག་ལེན། ཐིག་རྡུལ་ཚོན། འབུད་བརྡུང་དཀྲོལ་གསུམ་སྐབས་སུ། གྲོང་ཉུལ་དུ་འཕྲུལ་རྟ་ཉོས། སྒྲ་སྙན་བརྡུང་བར་དགའ། དུས་དེབ་ཉོས་ཤིང་ཚགས་པར་བལྟས། དེའི་དུས་ཆེད་སྦྱོང་ལས་ཀ་ཚང་མ་འཐུས་ཤོས་སུ་སོང་། ད་ཆར་གཏོར་མ་ར་རྔ་ཙམ་ཡང་བཅའ་མི་ཤེས་ཁར་ཤེས་བྱ་གཞན་དག་ཀྱང་བོད་ཡིག་དག་མ་ཞིག་ཀྱང་འཇོན་གྱིན་མེད།
རི་དང་མཚམས་སྒྲུབ་ལ་ཅུང་ཙམ་མོས་ཀྱང་། ཐེངས་ལྔ་ལ་རི་ལ་སོང་ཡང་། བཤད་གྲྭས་ཐེངས་ལྔ་ལ་རི་ལས་བསྣུར། རང་གིས་ཀྱང་མ་ཎི་མ་བཏོན་རྩོམ་ཉོག་འབྲི་ལ་དགའ། བྲིས་པ་ཀུན་སེང་རྡོར་དྲ་བ་སོགས་ཀྱི་ངོས་སུ་སྤེལ། འདྲེས་མ་དྲན་པའི་དུས་དེབ་སེང་གེ་གནམ་མཆོང་ཟེར་བ་ཞིག་བཀྲམས། དེ་དུས་ངའི་དྲི་མ་ངན་པས་སྐྱོ་བྲག་གི་བན་ཆུང་མང་པོ་བློ་ལོག་པར་ཁྲིད་པའི་ཞྭ་མོ་དགུ་བརྩེགས་དང་། བླ་མ་དགོན་པའི་ཞབས་འདྲེན་གྱི་ཉེས་པ་ཉོས་པ་ལས་གང་ཡང་མ་འཇོན།
མཆེད་པོ་མཁས་པ་ཚོས་གཞུང་འགྲེལ་ནས་ཆོ་གའི་བར་དུ་ངོ་མཚར་བའི་བསྟན་བཅོས་མང་དུ་བརྩམས་ཤིང་འཇིག་རྟེན་ཁམས་སུ་ལེགས་སྐྱེས་སུ་ཕུལ་དུས། ང་ནི་གང་སར་འཁྱམས་ཤིང་། གླུ་པ་ཕོ་མོ་ཤེས་མེད་མང་པོ་ལ་གླུ་ཚིག་རིན་མེད་ཤ་སྟག་བྲིས་ཤིང་གཡེངས། འཇིག་རྟེན་ལ་མཁོ་བའི་བྱ་བཟང་དང་། རང་ལ་འོས་པའི་ལས་ཀ་ཅི་ཡང་མ་འགྲུབ། ད་ཆར་མཆེད་པོ་རྣམས་པས་བརྩམས་པའི་གཞུང་འགྲེལ་དག་གོ་བ་ལོན་པ་ལྟ་ཅི་སྒྲ་དག་མོས་ཀློག་ཀྱང་དཀའ་བའི་གནས་སུ་ལྷུང་།
མཆེད་པོ་གཞན་དག་རི་ལ་བཞུགས་ཤིང་། སྒྲུབ་དཔོན་མཛད། སྒྲུབ་ཁང་བཞེངས། སྒྲུབ་པོ་ལ་འཚོ་བའི་ཡོ་བྱད་སྦྱར་བ་སོགས་ངོ་མཚར་དགེ་བའི་ཕྱག་ལས་དང་མཛད་འཕྲིན་ཉི་འོད་ལྟར་རྒྱས་དུས། འཁྱམ་པོ་ངས་རི་ལ་ཁང་པ་ལག་ངར་ཙམ་ཞིག་བཅས། ནང་ལ་བྱི་བའི་ཚང་མལ་དང་ཁ་ཟས་སུ་ཡིག་ཧྲུལ་ཡོད་ཚད་སྤུངས། རང་ཉིད་དབྱར་དགུན་ནོར་བའི་ས་མཐར་འཁྱར་བ་ལས། སྒོམ་སྒྲུབ་ལས་ཀ་ཅི་ཡང་མ་འཇོན།
ད་ཚོད་མཆེད་པོ་སྐྱ་སེར་གཞན་དག་ཚོས་མ་འོངས་པར་འཆར་གཞི། སྒྲིག་བཀོད། ཁེ་ལས། སློབ་གྲྭ་ནས་ཐོས་བསམ་སྒོམ་སྒྲུབ་དང་འགྲོ་ཕན་སོགས་ཀྱིས་མི་ཚེ་མང་པོའི་བྱ་བཟང་དང་། གནས་མཐར་ཀུན་ཏུ་དགེ་ལེགས་ཀྱི་གཞི་འདིང་བཞིན་པའི་སྐབས་སུ། ང་ནི་དེ་རིང་གི་ལྟོ་རྒྱབ་ལས། སྔ་བསམ་ཕྱི་འདིང་། བྱ་བ་འདི་དང་དམིགས་ཡུལ་གན་ཟེར་བ་ཅི་ཡང་མེད་པས། བསྟན་པ་འགྲོ་བའི་ལས་ནི་རི་ཆུ་སྟོང་གི་ཕར་ནང་ལ་ལུས་ཡོད།
ཐ་ན་གཉེན་ཉེ་ནང་མི་ཚོས་ས་ཕྱོགས་གང་དུ་ཡོད་ཡག་པོ་མི་ཤེས་པའི་འཁྱམ་པོ་ཡང་དག་པ་དེ་ནི་ཁོ་བོ་ཡིན་འདུག འདི་ཡང་དགའ་ཕྱོགས་དང་། ལས་དང་བག་ཆགས་ཀྱིས་ཡིན་ངེས། ཡིན་ནའང་། མིས་གླེང་ཕྱོགས་ཡག་བཙོག་ཇི་ལྟར་བགྱིས་པ་དང་། བགྱིད་པ། བགྱི་བར་ངེས་མོད། ཆོས་དང་མི་རིགས་ལ་ཞབས་འདྲེན་ཅི་ཡང་བྱས་མ་མྱོང་ལ། ད་དུང་བྱ་བརྩིས་ཀྱང་མེད། ཡིན་ངེས་ལམ་འདི་ལས་སྔར་ལྟར་ཤར་བསྐྱོད་ལས། བཅོས་བསྒྱུར་བྱ་ཐུབ་པའི་རེ་བ་ཡོད་པ་མི་འདྲ། རེ་དོགས་ཀྱང་མི་འདུག སེམས་ནི་ཧ་ཅང་གིས་སྐྱིད། འཆི་བའི་སྐབས་སུ་སྤུས་གཙང་གིས་འཆི་བ་ལས། ཆགས་ཞེན་དགོས་པ་འཇིག་རྟེན་ན་རྡུལ་ཙམ་ཡང་ལུས་རྒྱུ་མེད་པས། བློ་ནི་བདེ་བོ་རང་འདུག་གོ།། །།
2016 04 15
བྱ་རྡོ་ཐོག་ནས་འཕུར་བ་རང་རེད་འདུག་གདའ་་་་་་ངོ་མཚར་ཆེ།