རིག་འཛིན་མཚོ། བོད་འབྱོར།
ལོ་དུ་མའི་སྔོན་ནས་དམངས་ཀྱིས་ཐད་འདེམས་བྱས་པའི་བཀའ་ཁྲི་བཀའ་ཤག་ཏུ་ཕེབས་པ་ནས་བཟུང་༧གོང་ས་མཆོག་གིས་ཕྱེད་རྒན་ཡོལ་བྱས་ཡོད་ཅེས་ཐེངས་མང་གསུངས་པ་བཞིན། བཙན་བྱོལ་གཞུང་གི་ལས་གནས་ཆེ་ཕྲ་མང་པོ་ཞིག་བཀའ་ཁྲི་མཆོག་གིས་འབད་པས་སྒྲུབ་དགོས་པར་གྱུར་ཡོད་ལ། ཁོང་གིས་ཀྱང་རང་ཉིད་ལ་སྒོ་ཕྱེ་ཆོག་ཆོག་གི་བླ་བྲང་ཕར་ཞོག་སྡོད་ཤག་ཅིག་ཀྱང་བློ་ལ་མ་འཁོར་བར་དབུ་སྐྲའི་ཁ་མདོག་ཡོངས་སུ་བརྗེ་བའི་བར་དབུས་གངས་ཅན་སྐྱིད་གཤོང་ནས་འཛམ་གླིང་ཤར་ནུབ་ཀུན་ཏུ་གནས་པའི་བོད་པ་དག་གི་བདེ་སྡུག་ཆེད་དཀའ་བ་ཁྱད་བསད་ཀྱིས་འབད་པ་བྱས་ཡོད་ཁར། འཛམ་གླིང་མི་མང་གི་མིག་མདུན་དུ་རྒྱལ་ཁབ་མེད་པའི་བཀའ་ཁྲིའམ་ཐུན་མིན་གྱི་སྲིད་བློན་ཞིག་གི་སྣང་བརྙན་གསར་བཞེངས་བྱས་ཡོད། བཙན་བྱོལ་བའི་དཔལ་འབྱོར་དང་ཤེས་ཡོན་སྲིད་བྱུས་སོགས་ཀྱིས་ཤར་ནས་ཞོགས་ཇ་དང་ནུབ་ནས་གུང་ཇ་འཐུང་བཞིན་པའི་སྐུ་ངོ་འཇོན་པོ་མང་པོ་ཞིག་གི་འདོད་པ་ཐོག་ཏུ་མ་བབ་པའི་སྡུག་བསྔལ་དེ་ཚལ་བར་གཤགས་ནས་བོད་པ་ཚང་གི་གནས་བབ་དེ་འཛམ་གླིང་གི་ཉིན་སྲིབ་མཐའ་དག་ཀེར་སེ་ལངས་བཅུག་པ་དབྱིན་ཡིག་གི་སྙན་ཞུའི་འཚུབ་ཁ་བོད་ཡིག་ཏུ་བསྒྱུར་བ་སོགས་ནུས་པ་མི་དམན་པ་ཐོན་ཡོད་པ་ དེ་ལྟར་ན་ཡང་། ད་དུང་ཡང་བཙན་བྱོལ་སྤྱི་ཚོགས་ཁྲོད་དུ་ཡང་དབུ་མའི་ལམ་གྱི་གོ་བརྡ་གསལ་བོ་ཞིག་མ་འཕྲོད་པར་ལུས་པ་དེ་ནི་འདས་པའི་རིང་གི་གྱོང་གུད་ཆེ་ཤོས་དེ་ཡིན་རྒྱུ་རེད།
ད་ལོར་༧གོང་ས་མཆོག་གིས་དངོས་སུ་རྒས་ཡོལ་བྱས་པའི་སྐབས་འདིར་གཞིས་བྱེས་གཉིས་འཁོད་སེར་སྐྱ་ཡོངས་ཀྱིས་སེམས་ཁྲལ་འཕར་མ་ཞིག་བྱེད་དགོས་བྱུང་ཡོད་པ་དེ་ལྟར་ན་ཡང་། ཁོང་གིས་གསུང་དོན་བཞིན་གྱི་ཐག་གཅོད་དེ་དུས་རབས་དང་། རྒྱལ་སྤྱིའི་ཆབ་སྲིད་གང་ལ་བལྟས་ཀྱང་ལུགས་མཐུན་ཞིག་ཡིན་པ་མ་ཟད། འཛམ་གླིང་རང་བཞིན་གྱི་འཕེལ་འགྱུར་དང་། ལྷག་ཏུ་རྒྱ་ནག་གཞུང་གིས་བཤད་བཞིན་པའི་ཏཱ་ལའི་བླ་མ་སྐུ་སྒེར་གྱི་གནད་དོན་དེ་བོད་འབངས་ཡོངས་ཀྱི་གནད་དོན་དུ་བསྒྱུར་དགོས་པ་སོགས་དགོས་པ་ངེས་ཅན་ལ་གཞིགས་ནས་ཐད་གིས་བཅད་པ་ཞིག་ཡིན་སྟབས་ཁོང་གི་ངོས་དང་མི་མང་གི་ངོས་གང་ནས་བལྟས་ཀྱང་དུས་ལ་བབ་པ་ཞིག་རེད་མོད། ཟུར་ངོས་གཞན་ཞིག་ནས་བལྟས་ཡོང་ན་༧གོང་ས་མཆོག་གི་དབུ་མ་ཁྲིད་ཚེ་གཞུང་གི་སྲི་ཞུ་བ་བྱེད་འདོད་མེད་པའི་སྐུ་ངོ་རེ་ཟུང་གིས་ཁ་བཤད་ལག་ལེན་དུ་འགེལ་མི་ཐུབ་པའི་དཀའ་ངལ་ཞིག་ཀྱང་རང་བཞིན་གྱིས་སྤྲད་ཡོད། གཞན་ཡང་། སྲིད་འཛིན་གང་ཞིག་གིས་ལས་གནས་ལས་དགོངས་པ་ཞུས་སྐབས་ཡུལ་མི་ལ་འཇིགས་སྣང་སྤྲད་མྱོང་མེད་པའི་གནས་ཚུལ་ལ་རྒྱབ་ཀྱིས་ཕྱོགས་ཏེ། རྒྱལ་ཁབ་མེད་པའི་སྲིད་འཛིན་གང་དེས་ལས་གནས་ལ་ཞེན་ཆགས་ཅི་ཡང་མེད་པར་རྩིས་སྤྲོད་བྱས་པ་དེས་འཛམ་གླིང་རང་བཞིན་གྱི་ཧང་སངས་དགོས་པའི་གནད་དོན་ཞིག་ཏུ་གྱུར་ཡོད་པ་ནི་ཁོང་གི་ད་ལྟའི་བར་གྱི་གྲུབ་འབྲས་དང་གཟི་བརྗིད་ཀྱང་ཡིན་ལ། བཙན་བྱོལ་གཞུང་གི་འཇོན་ནུས་ལྷང་ལ་འབུད་པའི་གོ་སྐབས་ཤིག་ཀྱང་སྤྲད་པ་ཡིན།
འོན་ཀྱང་། བོད་མི་མང་གི་ངོ་ཚབ་མཚོན་པའི་སྤྱི་འཐུས་དང་བཀའ་ཤག་གིས་འགྲོ་ལུགས་སྒྲུབ་པ་ཙམ་མ་ཡིན་པར་དཔའ་ཞུམ་སྡར་མའི་ངང་ཚུལ་གྱི་རྣམ་པ་ཕྱིར་བསྟན་པ་དེས་ད་ལྟའི་བར་སྐྱབས་སའི་ཕ་ཞིག་དང་རེ་སའི་མ་ཞིག་གི་ཚུལ་དུ་གལ་ལ་ཐུག་པའི་གནད་དོན་མཐའ་དག་༧གོང་ས་མཆོག་གི་དབུར་གཡུག་ནས་ཡོང་བའི་ལངས་ཤོར་དང་སྒྱིད་ལུག་གི་རྣམ་པ་དེ་ཡང་གསལ་བོར་ཐོན་དུ་བཅུག་མ་ཟད། བར་བརྒལ་དུ་གྱུར་པའི་ལས་དོན་རེ་ཟུང་ལ་རང་ཤུགས་བཀོལ་ཏེ་རྟགས་ཐམ་བཀོད་པ་ཡང་ཡོང་གི་འདུག་པ་འདི་ནི། ཁྲིམས་ཀྱི་བབ་དང་སྤྱིར་བཏང་གི་གནས་ལུགས་ཀྱི་ཤེས་བྱ་དབེན་པ་མང་དག་ཅིག་གིས་ཆེད་ལས་མཁས་པར་དྲི་རྟོགས་བྱེད་པ་ཡང་བཞག་སྟེ་སྒམ་ཚུགས་བསྟན་དང་སྟོན་བཞིན་པ་ནི་ངེད་ཅག་གི་མིག་གི་ལྟ་ས་དང་རྣ་བའི་ཉན་སར་གྱུར་པའི་ཆ་ནས་བློ་ཕམ་ཡང་ཡང་སྐྱེ་ཡི་འདུག
བློ་ཕམ་པ་ཞིག་ལ་བོད་རྒྱལ་ཡོངས་ཚོགས་ཆེན་ཞེས་པའི་ཆེན་པོ་དེ་ཡང་འདི་ག་ནས་གསར་འགྱུར་ཁ་ཟིན་སྣ་ཟིན་ཁྲོད་ནས་བལྟས་ན་འབྲས་བུ་དེ་ཙམ་ཆེན་པོ་བྱུང་མེད་པ་ནི། ༧གོང་ས་མཆོག་གིས་དང་ལེན་མ་བྱས་པའི་མཚན་གནས་སོགས་ཀྱིས་ཀྱང་ཤེས་ནུས་པ་འདི་ལྟར་ན་ཡང་། ད་ནས་རྡ་སའི་རི་ངོགས་ནས་འཇིག་རྟེན་སྐྱེ་འགྲོ་མཐའ་དག་གི་ཆེད་དུ་དབུ་སྐྲ་དཀར་བོར་གྱུར་ཅིང་རྒས་ཡོལ་གི་དུས་ལ་སླེབས་པའི་༧གོང་ས་མཆོག་དང་ཟམ་གདོང་བླ་མ་གཉིས་ཀྱིས་ཤུལ་ལུས་རྐུབ་སྟེགས་དེ་འགྲན་རྩོད་བྱེད་པ་ལས་བཟློག་སྟེ་ཕྱི་ནུར་བྱེད་བཞིན་པའི་རྣམ་པ་འདིས་ཀྱང་། མ་འོངས་བོད་ཀྱི་རྩ་དོན་སྒྲུབ་ཕྱོགས་ཐད་ལ་འཇིགས་སྣང་ཞིག་སྐྱེ་རུ་བཅུག་སོང་བ་མ་ཟད། གསར་དུ་བདམས་ཐོན་བྱུང་བའི་བཀའ་ཁྲི་མཆོག་ལ་རྒྱལ་ཁབ་རང་བཞིན་གྱི་སྐྱེས་འཕྲིན་དང་འཚམས་འདྲིའི་ཁ་པར་སོགས་སླེབས་པ་ཡང་གསར་ལམ་དུ་མ་བཏང་བ་མིན་ན་ཅི་ཡང་ཐོས་རྒྱུ་མེད་པ་འདི་ནི། ང་ཚོའི་མ་འོངས་པ་དེ་ཆེས་ཉམས་ཆུང་ཁེར་རྐྱང་གི་རྣམ་པའི་ཁྲོད་ནས་ལུས་རྒྱུ་ཡིན་པའི་སྔ་བལྟས་སུ་འགྲོ་ཡི་འདུག་སྙམ་པའི་སེམས་ཁྲལ་ཞིག་ཀྱང་ངང་གིས་ཡོང་གི་འདུག་པ་མ་ཟད། མ་འོངས་པའི་བཀའ་ཁྲི་ཁོང་གནས་བབ་ཅི་འདྲ་ཞིག་དང་མཚན་གནས་ག་འདྲ་ཞིག་གི་ངོས་ནས་འཛམ་གླིང་ཤར་ནུབ་ཏུ་འགྲུལ་བཞུད་བྱེད་དམ་སྙམ་པ་སོགས་ནི་བོད་དོན་འཛམ་གླིང་ཅན་དུ་བསྒྱུར་པའི་རྒྱ་ནག་གཞུང་གི་ཞེ་སྤོ་དེ་རང་བཞིན་གྱི་ཞི་འགྲོ་བའི་ཐེབས་སུ་མི་འགྱུར་བའི་ངེས་པ་མེད་པ་སོགས་རི་བོང་གནམ་རྡིབ་ཀྱི་སེམས་ཁྲལ་ཞིག་བློ་ཡི་དཀྱིལ་ནས་འདོར་ཐབས་མི་འདུག
སྲིད་སྟེགས་ཀྱི་ལས་ཀྱི་སྣེ་མོ་བ་དག་གིས་ཀྱང་རང་གི་རྣམ་དཔྱོད་བེད་སྤྱོད་རྒྱུའི་ཚབ་ཏུ་གནས་ཆུང་ཆོས་སྐྱོང་གི་ལུང་བསྟན་ལ་སྒུག་པ་དང་དགོན་པའི་སྒྲིག་སྲོལ་ལ་ཐག་ཉེ་བའི་གཞུང་གི་བྱེད་བབ་དག་དང་། ལྷག་པར་དུ་རྟགས་ཐམ་གསར་བའི་སྟེང་དུ་བདེན་པ་ཉིད་རྒྱལ་གྱུར་ཅིག་ཅེས་པ་ལྟ་བུའི་རྨོངས་རྟུལ་གྱི་ཁ་གཡང་འདི་ཙམ་རེ་ཡང་གཞུང་འབྲེལ་ཡིག་ངོས་སུ་བཀོད་པ་ཡང་གནས་ལུགས་ལས་གང་ཟག་ལ་རྟོན་པའི་ཕྱོགས་ཞེན་འཐེན་འཁྱེར་ཅན་གྱི་དཔོན་པོ་སྒམ་ཚུགས་ཅན་དག་དང་། གནད་དོན་ལ་མི་ཕྱོགས་པར་ལུང་ཚན་ལ་ཕྱོགས་ནས་ཚོགས་ཆེན་ཅམ་འཇོག་བྱེད་མཁན་གྱི་གང་ཟག་རྫོབ་པོ་དེ་དག་གི་སྤྱོད་བབ་ལས་མ་འདས་ཀྱང་། ད་ཐེངས་ཀྱི་ཚོགས་ཆེན་ཁྲོད་དེ་ལ་རྒྱལ་ཁ་ཐོབ་མི་འདུག་པ་དེས་སྤྱི་འཐུས་ནས་མི་བུ་གཞན་དག་གི་ཁྲོད་ན་སད་རྟོགས་ཅན་མང་བ་མཚོན་ནུས་པ་འདི་རེད་མོད། བློ་ཕམ་པ་ཞིག་ནི་སྐབས་གསར་བའི་སྤྱི་འཐུས་ཁྲོད་དུ་ཡང་མི་རབས་གསར་བ་རེ་འགའ་ལས་སླེབས་མེད་པ་དེ་ནི་མ་འོངས་པའི་སྤྱི་འཐུས་དག་གི་གནས་བབ་ཀྱང་ཚོད་དཔག་བྱེད་ཐུབ་པ་ལྟ་བུ་ཞིག་ཏུ་གྱུར་འདུག་པ་ལྟར། ༧གོང་ས་ཆེན་པོ་རྒས་ཡོལ་དང་འབྲེལ་ནས་སྲིད་སྟེགས་སྐྱ་བོས་འཛིན་དགོས་པའི་གྱུར་པའི་ལམ་ལུགས་ཡང་དག་པ་འདི་དང་འབྲེལ་ནས་མ་འོངས་པར་གྲྭ་སའི་དགེ་བཤེས་དག་སྲིད་ཀྱི་རྙོག་འཛིང་ཁྲོད་དྲུད་དེ་ཁོང་ཅག་གི་སེམས་ཁམས་ལ་ཕུ་དཀྲུག་འདའ་དཀྲུག་བྱས་ཏེ་ཉེས་པ་གསོག་བཞིན་པའི་ལས་འདི་ཡང་ཐག་ཇེ་རིང་དུ་བཏང་ནས་ཆོས་པ་ཆོས་པ་ཤ་སྟག་དང་། སྲིད་པ་སྲིད་པ་ཤ་སྟག་ཏུ་གནས་པར་བྱེད་དགོས་པ་ནི་སྐབས་བབ་ཀྱི་ཁ་ཚ་དགོས་གཏུགས་སུ་གྱུར་འདུག་པ་མ་ཟད། འདེམས་དབང་རྡབ་གཅིག་གིས་མཐོ་བའི་ཆོས་ལུགས་པ་དག་ལ་ཡང་འོ་རྒྱལ་ཐེངས་གཉིས་ལ་བཟོ་མ་དགོས་པ་རེད།
གཞན་ཡང་། གཞུང་རྙིང་པས་སྐྱེད་བསྲིང་བྱས་པའི་ན་གཞོན་དག་ནི་བོད་ཡིག་བརྡ་དག་ཙམ་ཡང་སྦྱོང་བའི་གོ་སྐབས་མ་བྱུང་བར་འཛམ་གླིང་ཤར་ནུབ་རྒྱལ་ཁབ་མང་དག་ཏུ་འཁྱམས་དགོས་བྱུང་ཡོད་པ་དེ་ལྟར་ཁོང་ཚོ་ལ་བོད་དོན་ཀྱི་སེམས་ཤུགས་ཙམ་ཡོད་པ་ལས་བོད་པའི་གཤིས་ཀ་རྣལ་མ་ཞིག་ཡོད་པར་ངོས་འཛིན་བྱེད་ཐུབ་ཀྱི་མི་འདུག་པས། གཞུང་གསར་བའི་མ་འོངས་ལངས་ཕྱོགས་ཀྱི་ངོས་ནས་ཀྱང་རང་རིགས་གཞོན་སྐྱེས་དག་ལ་རྨ་འབྱིན་མི་བྱེད་པའི་རེ་བ་ཡོད་པ་མ་ཟད། ཁོང་ཚོས་བོད་པ་རང་གི་གནས་བབ་བོད་ཡིག་གཙོ་བོར་བྱས་ཏེ་ཤེས་ཐུབ་པ་ཞིག་དང་། ཁོང་ཚོ་ལ་བོད་པ་རང་གི་སེམས་ཁམས་གྲུབ་པར་བྱེད་དགོས་པ་འདི་གཙོ་བོ་ཡིན་པ་ནི་ཀུན་གྱིས་ཤེས་གསལ་ལྟར་རེད། སྔར་ལོ་བོད་ཁམས་ཡོངས་ནས་རྒྱའི་དྲག་དམག་གི་མཆེ་བར་ནས་བྱིས་པ་ལོ་དགུ་ནས་ཉེར་ལྔའི་བར་གྱི་སློབ་ཕྲུག་མང་པོ་ཞིག་འདུག་མ་ཐུབ་པ་ཡང་རང་གི་སྐད་དང་ཡི་གེ་མེད་བརླག་ཏུ་གཏོང་རྒྱུའི་སྲིད་བྱུས་དེ་སེམས་ནས་མ་བཟོད་པར་རང་སྲོག་འབེན་བཙུགས་ཀྱིས་སྐད་འབོད་བྱས་པ་ནི། རྡ་ས་ནས་དགོད་འཛུམ་དང་བཅས་པའི་མར་མེ་ཁྲོམ་སྐོར་དང་ཕྱོགས་ཀུན་ནས་མཚུངས་པ་མིན་ལ། སྐབས་དེ་དུས་ཀྱང་དེ་ག་ལས་གདུང་སེམས་མཉམ་སྐྱེད་མཚོན་ཕྱིར་དུ་མར་མེ་ཁྲོམ་སྐོར་དང་ངོ་རྒོལ་སྐད་འབོད་རེ་བྱས། ནང་གི་གནས་ཚུལ་གསར་ལམ་དུ་བཏང་བ་དེས་ཆོག་པར་བྱེད་པ་ལས། རྒྱ་ནག་གཞུང་གིས་ཀྱང་ཚུར་ང་ཚོའི་བཙན་བྱོལ་གཞུང་ལ། ང་ཚོར་དགག་པ་རྒྱག་རྒྱུ་ལས་དེ་གའི་བོད་ཕྲུག་གཞོན་ནུ་དག་ལ་བོད་ཡིག་བོད་སྐད་དག་མོ་ཞིག་ཁྲིད་ཨེ་ཐུབ་ལ་ལྟོས་ཞེས་ལབ་པའི་དབང་དུ་བཏང་ན། རང་དབང་གིས་འཚོ་བཞིན་པའི་བཙན་བྱོལ་བ་ཚོས་ལན་ཅི་ཞིག་འདེབས་སྲིད་དམ་སྙམ་ན་ང་བོད་པ་ཞིག་གི་ངོས་ནས་ཤ་འདར་བ་ཞིག་རེད། གནས་བབ་འདིས་བོད་ནང་གི་གཞོན་སྐྱེས་མང་པོ་ཞིག་ལ་ཞེན་པ་ལོག་པར་བྱས་ཡོད་པ་ནི་སྔར་ལོའི་སློབ་ཕྲུག་ཚོའི་སྐད་འབོད་ཀྱི་རྗེས་སུ་སྤེལ་བའི་རྩོམ་ཡིག་དག་ལས་རྟོགས་ལོས་ཐུབ། དེ་བས། གལ་སྲིད་གཞིས་བྱེས་གཉིས་ཀའི་ངོས་ནས་ཕན་ཚུན་འབྲེལ་བ་བྱེད་བདེ་བའི་གོ་སྐབས་ཤིག་ཡོད་ཚེ་གཞིས་བྱེས་གཉིས་ཀྱང་ཕྱོགས་འགལ་དུ་མི་འགྱུར་བའི་ངེས་པ་མི་འདུག་སྙམ་པའི་བློ་འཚབ་ཅིག་ཀྱང་ངང་གིས་སྐྱེ་ཡོང་གི་འདུག
མདོར་ན། བོད་དོན་ནི་རང་ལ་བརྟེན་ནས་སྒྲུབ་དགོས་པ་དང་། དེའི་འབྲས་བུ་ཡང་རང་ཅག་ལ་བརྟེན་ནས་ཐོབ་དགོས་པ་ནི། ད་ལྟའི་ལི་བྷེ་ཡ་དང་། དེ་སྔའི་ཤར་ཊི་མོག་སོགས་ལ་བལྟས་ན་ཟུར་བལྟས་ལེབ་མཐོང་སུ་ཡོད་པ་ལྟར། སླད་མར་རང་ཅག་གིས་ཀྱང་མཐོ་བ་རྒྱལ་ཁབ་ཀྱི་གནད་དོན་ནས་དམའ་བ་རང་གི་ལྟོ་གོས་ཚུན་ཆད་གཞན་བརྟེན་གྱིས་བསྐྱལ་རྒྱུའི་བསམ་བློ་རྩ་བ་ནས་བོར་ཏེ། གང་ཟག་རང་རང་གི་ནུས་ཚོད་བཞིན་གྱི་བྱ་བ་དག་བསམ་པ་རྣམ་དག་དང་བློ་ཐག་རྦད་ཆོད་ཀྱིས་སྒྲུབ་ནུས་ཚེ་བོད་གངས་ཅན་གྱི་ཞལ་རས་དངོས་མ་དེ་མཐོང་ཐུབ་རྒྱུར་སོམ་ཉི་མི་དགོས་སོ།།
གསལ་བཤད། འདི་ནི་ང་རང་སྒེར་གྱི་བསམ་བློ་གཏོང་སྟངས་ཙམ་ཡིན་པ་ལས་གཞིས་པ་ཡོངས་ལ་ཁྱབ་ཐུབ་པའི་ངེས་པ་གཏན་ནས་མེད་ལ། རྩོམ་ཡིག་འདི་འབྲེལ་ལ་གནད་དོན་ཅི་ཡོད་ང་རང་སྒེར་གྱི་བྱས་པ་ལས་གཞན་སུར་ཡང་ཐེ་གཏོགས་མེད་དོ།།
ཞེས་རིག་འཛིན་མཚོས་༢༠༡༡ལོའི་ཟླ་༥པའི་ཚེས་༢༧ཉིན་ཨ་མདོ་ནས་གུས་པ་ཆེན་པོས་ཕུལ།
དྲིན་ཆེན་མ། ད་ནས་བཟུང༼གཞུང༽ཟེར་བ་ཞིག་ཡོད་ནི་མ་རེད། ཡག་བཤད་ལྟར་ན༼སྒྲིག་འཛུགས༽དང་བཙོག་བཤད་བྱས་ན༼རུ་ཚོགས༽རེད། ད་བསྟོད་པ་རྒྱབ་ནས་འདུག་རན་ཞིག་རེད་དམ།
སྒྲིག་དར། སྒྲིག་གླུ།
རིག་འཛིན་མཚོ་ལེགས།
ཁྱེད་ཀྱི་བརྗོད་ཚིག་དག་སྙན་ཅིང་འཇེབས་པ་དང་། དོན་དག་གསལ་བ། ཡིད་ལ་བབས་པ་ཞིག་བྲིས་པར་་རྗེས་སུ་ཡི་རང་།
ཚིག་འགའ་རེ་དག་ཆ་བདག་གི་འདོད་པ་དང་མི་མཐུན་པ་རེ་ཡོད་ཀྱང་། གནས་སྐབས་བཏངས་སུ་བཞག འོན་ཀྱང་། མ་ཟད་ཅེས་པའི་སྔོན་དུ་ལ་དོན་འབྲི་དགོས་པ་བོད་སྤྱིའི་སྐད་དུ་མ་ཉམས་པར་སྲོལ་གཟུང་དགོས། དཔེར་ན། ཐོན་དུ་བཅུག་མ་ཟད། སོང་བ་མ་ཟད། ཡོད་པ་མ་ཟད། འདུག་པ་མ་ཟད། རིམ་པ་བཞིན་འདི་ལྟར། ཐོན་དུ་བཅུག་ཏུ་མ་ཟད། སོང་བར་མ་ཟད། ཡོད་པར་མ་ཟད། འདུག་པརམ་ཟད། ཅེས་སོ།
རིགས་བཟང་མ་གནད་ལ་འཁེལ་ནི་ཞིག་བཤད་འདུག འོ་ཀྱང་རྟོགས་པ་སྐྱེ་ནི་ཞིག་ལ་བཤད་སྟེང་གཤོབ་སྟེང་གང་ལ་བསྟས་ཀྱང་བོད་འབྱོར་རྩོམ་ཡིག་ཞིག་ཏུ་མི་སྣང་ངོ་།
བོད་འབྱོར་རྩོམ་ཞིག་ཡིན་པ་དོགས་པ་ཆེ་མོད་གལ་སྲིད་ཡིན་ཚེ་བཙན་བྱོལ་བོད་མི་ཚོ་ལ་ལམ་སྟོན་གནང་གིན་འདུག ད་བཙན་བྱོལ་བ་ཚོ་ཚར་འདུག
(ད་དུང་ཡང་བཙན་བྱོལ་སྤྱི་ཚོགས་ཁྲོད་དུ་ཡང་དབུ་མའི་ལམ་གྱི་གོ་བརྡ་གསལ་བོ་ཞིག་མ་འཕྲོད་པར་ལུས་པ་དེ་ནི་འདས་པའི་རིང་གི་གྱོང་གུད་ཆེ་ཤོས་དེ་ཡིན་རྒྱུ་རེད།)
བཙོན་བྱོལ་སྤྱི་ཚོགས་ཀྱིས་དབུ་མའི་ལམ་གྱི་གོ་དོན་རྟོགས་མེད་ལ་རྟོགས་འདོད་ཀྱང་མེད། ༧གོང་ས་མཆོག་གིས་ཡེ་ཤེས་དབྱིངས་དཔྱད་ཀྱིས་ཐག་གཅོད་དང་། བཀའ་ཕེབས་སོགས་མང་ཚོགས་ཀྱིས་ཡར་ལྡོག་དཀའ་བའི་ཚིག་མང་པོ་ཞིག་སྲིད་དོན་པ་ཚོས་བེད་སྤྱོད་ཀྱིས་ཁ་བཀག་ཐབས་དང་། སྟབས་བདེ་པོས་ཐག་གཅོད་ཐབས་གནང་བཞིན་པ་འདི་རེད། སྔོན་ནས་ད་ལྟའི་བར་དུ་དམངས་གཙོའི་ལམ་ལ་གོམས་པ་ཆེར་མེད་པའི་རྐྱེན་དེའམ་གནས་ཚུལ་གཞན་ཞིག་གང་ལྟར་ཡང་། རང་ཐག་རང་གི་གཅོད་ཐུབ་པའི་གོ་སྐབས་དེ་༧གོང་ས་མཆོག་གིས་མར་གནང་ཡང་མི་མང་གིས་ད་དུང་ཆ་ཚང་བ་ཞིག་བླངས་ཐུབ་མེད་པ་རེད།
ལྷ་བཟང་ཚེ་རིང་གིས་གསུངས་པ་ལྟར་ཀུན་གྱིས་དམ་བཅའ་རེ་བཞག་ན་ཕན་པ་ཆེ་གལ་སྲིད་གཞུང་ཞེས་བསྒྱར་ན་་་བོད་མི་མང་བོས་སྔོན་བཙན་བྱོལ་གཞུང་ལ་ཁྲལ་བྱིན་ཡོད་ཀྱང་མ་འོངས་པ་ན་སྤྱིན་མཁན་ཉུང་ཉུང་ཡིན་་་བཙན་བྱོལ་གཞུང་མང་གཙོ་མིན་པ་གསར་བོ་རེད་་་གྲོགས་པོ་ཚོ་རིག་ན་ཁས་མ་བླང་ན་་་ཅི་བྱ།