ང་ལ་རྨི་ལམ་ཞིག་ཡོད།

གླིང་གཅེར་བུ།

 
༡༽ ང་ལ་རྨི་ལམ་ཞིག་ཡོད་། སང་ཉིན་གྱི་བོད་ནི་ཆོས་སྲིད་སྣ་མང་གིས་གྲུབ་ཀྱང་ལྟ་ཚུལ་དང་འདོད་ཚུལ་སྣ་མང་མཉམ་གནས་ཐུབ་སའི་དཀྱེལ་ཡང་བའི་ཚོགས་སྤྱི་ཞིག་ཆགས་ན་འདོད་ཡོད།

༢༽ ང་ལ་རྨི་ལམ་ཞིག་ཡོད། སང་ཉིན་གྱི་བོད་ནི་ཆོས་ལུགས་གྲུབ་མཐའ་དང་ཆོལ་ཁའི་ཆགས་སྡང་འཐེན་འཁྱེར་ལས་ཡོངས་སུ་གྲོལ་ཏེ་སྤུས་གཙང་བའི་འཚོ་གནས་ཤིག་ཆགས་ན་འདོད་ཡོད།

༣༽ ང་ལ་རྨི་ལམ་ཞིག་ཡོད། སང་ཉིན་གྱི་བོད་ནི་ཆོས་ཆོས་ས་དང་སྲིད་སྲིད་ས་ནས་སྐྱོང་བའི་ཁེ་གཙང་བའི་རིག་གནས་ཀྱི་ཞིང་ས་ཞིག་ཆགས་ན་འདོད་ཡོད།

༤༽ ང་ལ་རྨི་ལམ་ཞིག་ཡོད། སང་ཉིན་གྱི་བོད་ནི་གཞན་གྱི་བརྙས་བཅོས་དང་བཙན་འཛུལ་གྱི་རྩ་ཁྲིམས་ལ་མགོ་འབུལ་མཁན་དེ་མ་ཡིན་པར། རང་ཉིད་ཀྱི་ཁེ་དབང་དང་བདག་དབང་གི་ཕྱིར་དུ་དགྲ་བོར་གདོང་སྟོན་ཐུབ་མཁན་ཞིག་ཆགས་ན་འདོད་ཡོད།

༥༽ ང་ལ་རྨི་ལམ་ཞིག་ཡོད། སང་ཉིན་ནས་བོད་མི་རེ་རེའི་རྣམ་ཤེས་ཀྱི་ཕྱི་ནང་གསང་གསུམ་ལ་རང་དབང་གི་བླ་སྲོག་ཞུགས་ཏེ་གཏན་དུ་རང་བཙན་གྱི་ལམ་ལ་སྐྱོད་ན་འདོད་ཡོད།

༦༽ ང་ལ་རྨི་ལམ་ཞིག་ཡོད། སང་ཉིན་ནས་བཟུང་བོད་མི་སུ་ཞིག་གིས་ཀྱང་བོད་ཀྱི་འདས་ཟིན་པའི་དོན་དངོས་བདེན་ཐུབ་ཀྱི་ལོ་རྒྱུས་ལ་ཀུ་རེ་མི་རྩེད་པའི་སྙིང་ཕུར་བརྡབ་ན་འདོད་ཡོད།

༧༽ ང་ལ་རྨི་ལམ་ཞིག་ཡོད། སང་ཉིན་ནས་བཟུང་བོད་མི་ཀུན་གྱིས་རང་ཉིད་ཀྱི་ཁྲག་རྩའི་སྦུབས་སུ་རྒྱུ་བའི་སྐད་དང་ཡི་གེར་སེམས་བསམ་པའི་འཇུག་ན་འདོད་ཡོད།

༨༽ ང་ལ་རྨི་ལམ་ཞིག་ཡོད། སང་ཉིན་གྱི་བོད་ནི་ལྐོག་གྱུར་དང་ལྷ་འདྲེའི་འཐབ་རྩོད་ལས་ཡོངས་སུ་ཐར་ནས་ཡོད་ཚད་ཀྱིས་རང་དབང་དང་མང་གཙོ་འདྲ་མཉམ་གྱི་ཐོབ་ཐང་ལ་ལོངས་སུ་སྤྱད་ན་འདོད་ཡོད།

༩༽ ང་ལ་རྨི་ལམ་ཞིག་ཡོད། སང་ཉིན་གྱི་བོད་ནི་ཁ་འཐོར་ཡ་འཐོར་གྱི་གནས་བབ་ལས་གཅིག་ཏུ་བསྒྲིལ་ཏེ་བདེ་སྐྱིད་ལྡན་པའི་ཁྱིམ་གཞིས་ཤིག་བསྐྲུན་ན་འདོད་ཡོད།

༡༠༽ ང་ལ་རྨི་ལམ་ཞིག་ཡོད། སང་ཉིན་ནས་གངས་རིའི་ཞིང་ཁམས་ཡོད་ཚད་གངས་སེང་རྒྱལ་དར་གྱིས་ཁེབས་ཤིང་ཕུན་ཚོགས་སྡེ་བཞིའི་རྒྱལ་གླུ་བོད་མི་ས་ཡ་དྲུག་གིས་མགྲིན་བརྒྱ་གདངས་གཅིག་གིས་དབྱངས་སུ་གྱེར་ན་འདོད་ཡོད།

གླིང་གཅེར་བུ། ༢༠༡༦/༡/༢༣/