གཅན་བཟོད་རྒྱམ།
——
ང་༡༩༩༧ ལོའི་དགུན་ཁར་རྒྱ་གར་དུ་ཐོག་མར་སྐྱབས་བཅོལ་དུ་འབྱོར་བ་ཡིན་ལ། ༡༩༩༨ ལོ་ནི་བཙན་བྱོལ་བོད་ཀྱི་ལོ་རྒྱུས་ཐོག་གི་གསུམ་བཅུའི་དུས་དྲན་ཛ་དྲག་ཤོས་དང་སྐད་གྲགས་ཆེ་ཤོས་དེ་ཡིན་ལ།
དཔའ་བོ་ཐུབ་བསྟན་དངོས་གྲུབ་ལགས་ཀྱིས་རང་ལུས་མེར་བསྲེགས་བཏང་བའི་ལོ་དེ་ཡང་རེད། སྐབས་དེར་ནི་དྷ་སའི་གསུམ་དུས་སྐབས་སྐད་འབོད་བྱས་དྲག་ནས་དྲན་པ་ཐོར་བས་སྨན་ཁང་དུ་བསྐྱལ་བ་དང་མགོ་ཐོག་ཏུ་ཆུ་ལྡུག་པ་སོགས་གསུམ་བཅུའི་དུས་དྲན་ནི་ཧ་ཅང་ཟང་ཟིང་ལང་ལོང་དང་། མི་ཚོའང་ཧ་ཅང་ངར་ཤུགས་ལྡན་པ། མི་འདི་ནི་ཁ་སང་གི་མི་དེ་ཨེ་ཡིན་ནམ་སྙམ་པའི་ངར་ཤིགས་ཤིག་ཀུན་པོར་འདུག
དེ་རྗེས་ནི་༢༠༠༨ ལོ་རེད། ལོ་དེའི་དྷ་སའི་གསུམ་དུས་སྲུང་གཙི་དང་འབྲེལ་ནས་མུ་མཐུད་ནས་དྷ་སའི་འཁོར་ཡུག་དེ་ནི་དངོས་གནས་ཟང་ཟིང་ལང་ལོང་ཅི་འདྲ་ཞིག་ཡིན་པ་ངས་བཤད་ཅི་ལ་དགོས། དེ་ནི་བོད་བསྟན་སྲིད་དང་ལྷག་པར་དུ་བོད་ནང་དུ་ཆོལ་གསུམ་སྤུན་ཟླ་བོད་མི་གང་མང་ཞིག་གིས་སྐུ་སྲོག་བཏང་བས་ལོས་ཡིན། སྐབས་དེའི་དྷ་སའི་རྣམ་པ་དེ་ང་ཚོ་ཚང་མའི་སེམས་སུ་ལྷང་ངེར་ལོས་ཡོད་སྙམ།
འོན་ཀྱང་ཁ་སང་གི་དྷ་ས་ལྟ་བུར་མཚོན་ན་བོད་ཀྱི་རྒྱལ་ས་གཉིས་པ་ཡིན་པ་ལ་སོགས་རྩོམ་འབྲི་བ་ཚོས་རྩོམ་ཡིག་གི་ནང་དུ་འབྲི་བ་ལས་གསུམ་དུས་ལྟ་བུའི་དུས་དྲན་ཁྱད་པར་བ་འདི་འདྲ་སྲུང་གཙི་བྱེད་པར་ཡོང་མཁན་ནི་ནམ་རྒྱུན་མེག་ལོར་སྲང་ལམ་དུ་གཉུག་མར་གནས་པ་ཚོ་དང་ལམ་འགྲམ་དུ་ཚོང་རྫས་ཙག་ཙིག་རེ་གཤམས་འདུག་པ་དེ་ཚོ་ལས། རྩོམ་པ་པོ་དེ་ཚོའང་མིག་གིས་མཐོང་ས་ན་མི་འདུག་ལ། གཞན་སྲིད་གཞུང་གི་ལས་བྱེད་ནི་བཅུ་གྲངས་ཞིག་ཀྱང་ཆིབས་བསྒྱུར་གནང་མི་འདུག་ལ། ང་ཚོའི་ལས་ཁུངས་ནས་སྐུ་ཚབ་ང་གཅིག་བུ་རེད་འདུག་སྙམ།
གཙུག་ལག་ཁང་ནས་མགོ་བཙུགས་པ་ནས་དྷ་ཤོལ་ཀ་ཅ་རིའི་སྣམ་བླུགས་ས་དེར་འགྲོ་བ་ནི་རྒྱུན་ལྡན་རང་བཞིན་གྱི་གསུམ་དུས་སྐབས་ཀྱི་འགྲོ་སྲོལ་ལམ་གོམས་སྲོལ་ཞིག་ཆགས་འདུག སྤྱིར་མི་ཚོགས་ཤིན་ཏུ་མང་མོད། གྲྭ་བཙུན་དང་སློབ་ཕྲུག་ཚོ་མེད་ཚེ། གསུམ་དུས་འདི་མཚམས་ཆད་པའམ་ཡང་ན་མི་བརྒྱ་སྐོར་ཞིག་ཀྱང་མེད་པ་ནི་ཁ་ཚོན་བཅད་ནས་བཤད་ཐུབ་ཀི
ངས་ངོ་ཤེས་པའི་ལས་བྱེད་ཚང་གི་བྱིས་པ་གཉིས་ཀྱི་ལག་ཏུ་རྒྱལ་དར་ཆུང་ཆུང་རེ་བཟུང་སྟེ་གསུམ་དུས་སྐད་འབོད་དུ་ཡོང་འདུག་པ་མ་ཟད། རྒྱ་བོད་དབྱིན་གསུམ་གྱི་ལམ་ནས་སྐད་འབོད་སྣ་ཚོགས་བྱེད་ཤེས་ཀྱི་འདུག ངས་ནི་ཁོང་གཉིས་ཀྱི་རྗེས་འབྲངས་ཤིང་ཁོང་གཉིས་ལ་ཡིད་སྨོན་ནམ་སྙིང་རྗེ་བའི་ཚོར་བ་གནོན་མི་ཐུབ་པ་ཞིག་ཀྱང་སྐྱེས་བྱུང་། ངས་བསམ་གཟས་ནས་”ཁྱོད་གཉིས་ལ་རོགས་པ་མེད་དམ།” ཞེས་དྲིས་པར། “པ་ལ་ཨ་མ་ལ་གཉིས་ནང་ན་བསྡད་འདུག” ཟེར། ང་སྙིང་ལངས་བཞིན། འཛགས་རོ་དེ་གཉིས་ཀྱིས་བྱིས་པ་གཉིས་སྐད་འབོད་དུ་བཅུགས་རྗེས་ཤུལ་ན་ག་རེ་བྱེད་ཀྱི་ཡོད་ན་སྙམ་ནས་ཁོང་ཁྲོ་ཡང་ལངས་བྱུང་། ངས་ཁོ་གཉིས་ལ་”ལོ་རྗེས་མ་ཡང་སྐད་འབོད་དུ་ཡོང་དགོས་པ་རེད། ཤུགས་རྒྱབ་ནས་སྐད་འབོད་བྱོས་ལོ།” ཞེས་སྙིང་ཉེ་བའི་ངང་ནས་བཤད་མོད།
ང་རང་ཆེས་ཡ་མཚན་པའི་སྐད་ཆ་ཞིག་ནི། བྱིས་པ་ཆུང་བ་དེས་ཟེར་ན། “ང་ཀོད་ལེ་ཅི་college ཐོན་ཚར་ན་སྐད་འབོད་ལ་འགྲོ་དགོས་པ་མ་རེད་ཟེར། ཇོ་ཇོ་རང་ཀོད་ལེ་ཅི་ལ་མ་སོང་ངམ”ཟེར། ང་ཧང་སངས་བཞིན་”ཁྱོད་ལ་སུས་ཟེར་གི་འདུག”ཅེས་དྲིས། “པ་ལ་ཨ་མ་ལ་གཉིས་ཀྱིས་ཟེར་གིན་འདུག”ཟེར། སྐབས་དེར་ངས་སེམས་སུ། “ཨོ། ད་ནི་གསུམ་བཅུའི་དུས་དྲན་སྲུང་གཙི་བྱེད་ཆེད་སྐད་འབོད་དུ་འགྲོ་བར་ཡང་འདི་འདྲ་བསམས་མཁན་འདུག་ཨང་”སྙམ་བཞིན་མུ་མཐུད་ནས་ཁོང་གཉིས་དང་ལྷན་དུ་སྐད་འབོད་བྱེད་བཞིན་སོང་བ་ཡིན།
རྐང་པ་སར་འབབ་གི་ཡོད་མེད་ཀྱང་མ་ཤེས། བྱིས་པ་གཉིས་ནི་ང་ལས་སྐད་འབོད་བྱེད་པར་ངར་ཤུགས་ལྡན་ཞིང་སྤྲོ་སྣང་འདྲ་ཞིག་འདུག་ལ། ང་ནི་དེ་ལས་ལྡོག་སྟེ་སྐད་ཤུགས་ཆུང་ལ་སྐད་འབོད་བྱེད་མི་འདོད་པ་དང་། ཉོབ་སྣང་ཞིག་ཀྱང་འདུག་པ་ལས། བྱིས་པ་དེས་བཤད་པ་བདེན་ཨང་ཡང་སྙམ་པ་བྱུང་སྟེ། ད་ནི་རང་ཉིད་ཀྱང་གསུམ་དུས་སྲུང་གཙི་བྱེད་ཆེད་སྐད་འབོད་དུ་འགྲོ་བའི་རྒན་ཡོལ་ཞུ་རན་འདུག་པ་ཡང་ཤེས་སོང་། ང་དང་འདྲ་བའི་མི་གང་མང་ཞིག་གིས་སྔ་ས་ནས་རྒན་ཡོལ་ཞུས་ཏེ་རང་ཁྱིམ་དུ་ལྷོད་ལྷོད་ངང་བསྡད་འདུག་པ་རེད་མོད། འོན་ཀྱང་བྱིས་པ་དེས་བཤད་པ་བདེན་དུ་ཆུགས་ཀྱང་། ང་ནི་ཀོད་ལེ་ཅི་ལ་སོང་མ་མྱོང་བས་ངའི་མི་ཚེའི་ནང་དུ་གསུམ་བཅུའི་དུས་དྲན་ལ་རྒན་ཡོལ་ཞུ་ས་ཞིག་ཡོད་རེ་བྲལ་སོང་ལ། ང་དུས་ནས་དུས་སུ་མེག་ལོར་ན་གཉུར་མར་གནས་པ་ཚོ་དང་ལྷན་དུ་བོད་ཀྱི་མགོ་ཐོག་གི་སྡུག་འདི་མ་སེལ་བར་དུ་གསུམ་དུས་སྐད་འབོད་བྱེད་དུ་ཀ་ཅ་རི་ལ་འགྲོ་དགོས་པའི་སེམས་ཐག་བཅད།
༢༠༡༠།༣།༡༡ཉིན།
ཧ་ཧ། college ཅི་སོ་ཟེར་གི་འདུག
ཨ་རོག་རྗེས་མ་སྐད་འབོད་ལ་འགྲོ་དུས་སྐད་ཤུགས་ཆེན་པོ་རྒྱོགས་ཨ།
ཕ་མ་དེ་གཉིས་ཟངས་གདོང་བློ་བཟང་ལ་མ་ཞེད་པ་བུ་ཕྲུག་གཉིས་སྐད་འབོད་གཏང་བ་དེ་ཡག་པོ་རེད་ མ་ཏོག་བཀའ་བློན་ཁྲི་པ་ཟངས་གདོང་རིན་པོ་ཆེའི་ རྒྱ་མའི་གསང་ཉུལ་རེད་ཟེར་བའི་ཉེན་ཁ་ཡོད་ནི་རེད་ད་
ཕ་མ་དེ་གཉིས་ཀྱིས་སྐད་ཆ་དེ་ལྟར་བཤད་ཕོད་པ་ཨང་།ངོ་མ་མི་རིགས་ལ་ཤ་ཞེན་མེད་པ་རང་རེད།སོ་སོར་ས་མཐའ་སྡོད་དགོས་པའི་རྒྱུ་མཚན་དེ་ཡང་མི་ཤེས་མཁན་དེ་འདྲ་དུད་འགྲོ་གླང་ལྟ་བུ་རང་རེད་ཨང་།
ཐེངས་འདིའི་སུམ་ཅུའི་དུས་དྲན་ཉིན་གཅན་བཟོད་ངེད་གཉིས་མཉམ་པོར་བསྡད་ཡོད་མོད། འོན་ཀྱང་ང་ལ་སུམ་ཅུའི་དུས་དྲན་ལས་སེམས་འགུལ་ཐེབས་པ་ཞིག་བྱུང་སོང་། གང་གིས་ཟེར་ན། སྤྱིར་ན་གཅན་བཟོད་ངེད་གཉིས་འགྲོགས་འདྲིས་རྒྱུས་ལོན་ཡོད་པའི་བློས་ཐུབ་གྲོགས་པོ་ཞིག་མིན་ཡང་། སྐབས་དེར་རང་དབང་མེད་པའི་གཅན་བཟོད་ཀྱི་མིག་ཆུའི་ཐིགས་ཕྲེང་དེས་ངེད་གཉིས་བློས་ཐུབ་ཀྱི་གྲོགས་པོ་ལྟ་བུར་གྱུར་སོང་ཡང་། ངས་གང་འདྲ་ཞིག་བྱས་ནས་ཁོང་ལ་སེམས་གསོ་བྱེད་སྟངས་མི་ཤེས་པ་མ་ཟད་ཐ་ན་ཁ་བརྡ་ཞིག་ཀྱང་བྱེད་མ་ཐུབ་པ་དེ་ནི་དེའི་ཉིན་གྱི་གནོང་འགྱོད་ཀྱི་གནས་ཤིག་ཆགས་སོང་།