མྱི་ལྟིག
______ཚེ་འདིའི་བློས་ཐུབ་ཀྱི་གྲོགས་པོ་ཞིག་གཤེགས་པར་ཕྱིར་དྲན་བྱས་པ།
ཆོས་ཉིད་ལས་ཀྱིས་མཐའ་མར་འབྲལ་དགོས་པར།།
བདེན་པར་བཟུང་སྟེ་མགོ་བོ་དུད་དགོས་ཀྱང་།།
ན་སོ་སུམ་ཅུར་མ་བུད་ཐེམ་སྐས་ནས།།
འཆི་བདག་ནག་པོས་བདག་གི་ཚེ་གྲོགས་དྲུད།།
སྐྱོ་བའི་གཏམ་དུ་ཚིགས་བཅད་འགའ་འབྲིའོ།།
ང་ནི་ཁྱོད་ཀྱི་འདྲིས་པའི་གྲོགས་མཆོག་སྟེ།།
ཁྱོད་ཀྱང་བདག་གི་བརྩེ་གྲོགས་ཅི་ལ་མིན།།
འཛོམས་ཏེ་གྱེས་པའི་སྐབས་དག་དྲན་པ་ན།།
བགྲང་བྱ་བཅུ་ཙམ་འགོར་བ་མ་ཡིན་པར།།
ཁ་སང་དེ་རིང་གཉིས་ཀྱི་སྔ་རྗེས་འདྲ།།
ད་ནི་རང་སེམས་གསོ་བའི་ཐབས་སུ་དང་།།
འུ་གཉིས་ལོ་ལ་འགྲོགས་པའི་གཏམ་བརྗོད་ཁག །
ཉིད་ཀྱིས་ཕྱི་མའི་ཡུལ་ནས་བཀླག་པར་འཚལ།།
བཀླགས་རྗེས་འཛོམསཉ་པའི་སྣང་བ་འཆར་བར་ཤོག །
དེ་མཐུས་ཚེ་རབས་རྗེས་མར་འཛོམས་པར་ཤོག །
ཉིན་མོ་འཁྱམས་པ་མཚན་པོ་ཉུལ་བ་སོགས།།
མ་རབས་བརྩེ་བའི་འཁོར་ལོ་བསྐོར་བ་དང་།།
རང་གཉིས་ཚོད་ཀྱིས་ས་དེའི་བུ་མོ་ཚོ།།
ཉིན་བདལ་མཚན་བདལ་བྱས་ཏེ་འདྲོཊ་བསླངས་པ།།
དྲན་པའི་ངོས་ན་གསལ་གསལ་ཐིང་ཐིང་ཡིན།།
ཉིན་ཞིག་ཁྱོད་ཀྱི་ལག་འདོགས་དུས་ཚོད་དེ།།
ང་ལ་གཡར་ཏེ་མཚན་མོ་ཉུལ་ཏུ་སོང་།།
ཁྱིམ་མཚེས་བུ་མོའི་རུམ་ནས་ཞག་བསྡད་ཅིང་།།
ཐོ་རངས་སྐར་ཆེན་མཉམ་དུ་བྲོས་ཡོང་ཡང་།།
མཁྲིག་མའི་དུས་ཚོད་བུ་མོའི་འགྲམ་ནས་ལྷག །
སྟབས་ཀ་མ་ལེགས་བུ་མོའི་ཨ་མས་རྙེད།།
རྩད་གཅོད་བྱས་མཐར་ངོ་ཚ་ཁྱོད་ཀྱིས་ཉོས།།
ཁྱོས་ཀྱང་ཡིན་པའི་ཁུལ་གྱིས་དུས་ཚོད་བླངས།།
དེ་ལ་དགོངས་དག་ཅིག་ཀྱང་ཞུས་མེད་པས།།
དེ་རིང་གང་དུ་ཡོད་ཀྱང་བཟོད་གསོལ་ཞུ།།
ཚེ་འདིར་མི་ལུས་བླངས་ཏེ་འུ་གཉིས་འཕྲད།།
འཕྲད་པས་མ་ཚད་ཟབ་པའི་གྲོགས་སུ་གྱུར།།
ལས་སྔོན་ལས་སྨོན་སོགས་ནི་མི་ཤེས་ཏེ།།
ཚེ་འདིར་ཁྱོད་རང་རྙེད་པར་མགུ་ནས་ཡོད།།
ཚེ་རབས་ཀུན་ཏུ་གྲོགས་སུ་སྐྱེ་བར་ཤོག །
དཔུང་གཤིབ་བྱས་ཏེ་རང་སྣང་རི་ལ་སྤུར།།
ལྷན་གྲོས་བྱས་ཏེ་རི་ཡི་སྨན་ཆུང་བདས།།
ཡ་གའི་སྨན་ཆུང་མ་གའི་སྨན་ཤར་སོགས།།
རང་སེམས་རློན་སྟེར་འདོད་མེད་ཀྱང་རུང་།།
གསར་བུ་གཉིས་ཀར་བརྩི་རྒྱུ་བགྲང་རྒྱུ་ཡོད།།
ས་མཚམས་ཆུ་མཚམས་དཀའ་བའི་སྡེ་མཚམས་ཀྱི།།
ཁྱོད་བཟང་ང་བཟང་མེད་པའི་རི་སྡེ་ན།།
ཁྱོད་ལ་ཞི་མོ་སྣང་བར་འགྲོ་ནི་ཞིག །
ང་ལ་ང་ཡི་ཚོད་ཀྱི་དྲན་ཤིང་ཞིག །
དེད་ཅིང་དྲིས་ན་ཚིག་གཅིག་བཤད་མ་མྱོང་།།
ལྐོག་ཏུ་གཞན་གྱི་ཆུང་མའི་གོང་ཁ་འཐེན།།
རྟག་ཏུ་ནོར་རྫི་ཞི་མོའི་སྐེ་རགས་བཤིགས།།
གཞན་དང་རོང་བས་གོ་ན་ཡ་མཚན་ཡང་།།
འབྲོག་པའི་གནའ་སྲོལ་དེ་ལ་མཚར་དོན་མེད།།
ཁྱོད་དང་འུ་གཉིས་གཞན་ལ་སྐྲག་དོན་ཅི།།
གཞན་གྱི་ཆུང་མའི་རུམ་ཁ་ཚ་སོབ་སོབ།།
ཕྱུགས་རྫི་ཞི་མོའི་བརྩེ་འདང་འོད་འཁྱུག་འཁྱུག །
ཡུལ་དེའི་སྨན་ཤར་ཀུན་པོ་ཁུ་སིམ་སིམ།།
ཁྱོད་དང་ང་གཉིས་མཚན་མོ་གྲུང་རིག་རིག །
དགའ་ལྡན་ལྷ་ཡི་གནས་ཀྱང་ཡུལ་དེར་ཡོད།།
སྡུག་གཏམ་བཤད་ན་འབྲི་རྒྱུ་མང་དུ་མཆིས།།
དྲན་སྲོལ་བྲིས་ན་དེ་བས་རབ་ཏུ་མང་།།
གང་ལྟར་ཇི་ལྟར་ཚིགས་བཅད་འདི་དག་གིས།།
ཁྱོད་ཀྱང་མཉེས་ཤིང་ང་ཡང་ཆེས་སྐྱིད་པས།།
གཤེགས་པའི་གྲོགས་ལ་སྙིང་གི་གཏམ་དུའོ།།
ངའི་ཚེ་སྟོད་ལ་འཕྲད་ཅིང་སླར་ཡང་ཚེ་སྟོད་ལ་བྲལ་བའི་ཤ་དར་ཁྲག་དར་གྱི་མགོ་ལོག་དར་ལག་གི་ཚེ་སྤུན་**འཁོར་བགེགས་ཀྱིས་བཀྲོངས་པར་རེབ་གོང་མགར་རྩེ་ཡི་གྱི་ན་བ་མྱི་ལྟིག་གིས་རྒྱ་གར་བྱང་ཕྱོགས་ངྷ་རམ་ས་ལའི་ཉེ་འགྲམ་དཔལ་ལྡན་སྟོད་རྒྱུད་གྲྭ་ཚང་གི་དཔེ་མཛོད་དུ་སྐྱོ་གདུང་གིས་བྲིས་པ་དགེ་ལེགས་སུ་གྱུར་ཅིག་གུ ༢༠༡༤། ༡༡། ༠༡ ཉིན་བྲིས་ཤིང་༡༢ པའི་༡༨ ཉིན་བཅོས།
ཆུང་གྲོགས་རྗེས་དྲན་འདྲ་ཞིག་བྲིས་ཡོད་ཀི་་་་
གསེར་གྱི་མྱི་འདྲ་ཞིག་ཡོད་པ་དེ་ག་འདྲ་འདྲ་ཞིག་ཡོད་མེད་མི་ཤེས་ཀྱང་། གྲོགས་པོ་གསེར་འདྲ་བ་ཞིག་ཡོད་ན། དེ་ནི་འདི་ཕྱི་གང་ན་ཡོད་ན་ཡང་། ཡང་ཡང་དྲན་དགོས་བ་ཞིག་ལོས་ཡིན། ཨོ་མ་ཎི་བདྨེ་ཧཱོུཾ།
བཟའ་ཚང་བར་གྱི་གྱོད་འདྲེ་བུ།
སྡེ་འདབ་རུ་ཁའི་རྐུན་འདྲེ་བུ།
འཁང་རྫུན་བར་གྱི་ཁྲམ་འདྲེ་བུ།
མ་བཟང་མོ་ཞིག་ལ་མི་དགོས་བུ། ཧ་ཧ་ཧ།
ཡུམ་ཟིག་གོ་ནོ། ཁྱོད་རང་ཧོ་མྱུག་ལ་སོང་ནས་ཧོ་སར་གི་འཇུག་ནོ་དག་ཞིང་གོ་དེ་རེད་མོ། ཁག་མེད་ཀི བུ་མོས་མེ་ཏོག་ལེན་མཁན་དྲན། བུ་ཡིས་མེ་ཏོག་སྟེར་ས་དྲན་ཟེར་ནི་རེད།