ཐོར་རྒོད་པ་སྤྱན་ཆབ།
བསམ་གཞིག་ཞིག་གིས་ཁོམ་ལོང་གཏན་ནས་མི་སྟེར་པས།
རང་ཉིད་ཀྱི་ཕྱི་ནང་དང་བཅས་པར་རྩིས་ལེན་བྱ་ཐབས་བྲལ་ཡང་།
ཆུ་ཚོད་ཀྱི་ཅུང་སྒྲས་ང་རང་གཉིད་ལས་བསླངས་བ་ན།
དེ་རིང་ནི་ངའི་ཕ་ཡུལ་ཀྱི་ལོ་སར་རེད་འདུག
མིའི་རིགས་ཀྱི་ཧ་ཧ་ཧོ་ཧོ་འདིས་གློག་ཀླད་ཀྱི་པང་ངོས་བཀང་པས།
མིག་ལམ་གྱི་ལོ་སར་ལོ་སར་ཞེས་པའི་འདྲ་རིས་དང་སྐད་ཆ་དེ་དག་ཀྱང།
མཐོང་བར་མི་སྤོབས་ཤིང་མི་སྙན་པའི་ཨག་སྐད་ཅིག་དང་འདྲ་བར།
ངའི་སེམས་ངོགས་ནས་རིང་དུ་ཆས་ཡོད་འདུག
ཕྱིར་འདང་ཞིག་གིས་ལོ་ངོ་ཉི་ཤུའི་ལོ་སར་དེ་དག་རུམ་ན།
ལྷན་འཛོམས་ནི་ཅི་འདྲའི་དཔག་པར་དཀའ་པའི་བཟི་ཁ་ཞིག་གམ།
གྱེས་བྲལ་ཡང་ཅི་འདྲའི་གསབ་དུ་མེད་པའི་ནག་ཉེས་རིགས་ཤིག་ཡིན་ནམ།
ངའི་ཕ་མ་དང་མིང་སྲིང་ཚོའི་ལོ་སར་ཁོ་ནའི་བདེ་དྲོད་ཡོད་ཚད།
ཐ་ན་ང་གཅིག་པུས་ཁ་ཆག་སྣ་རལ་དུ་བཏང་པའི་ངེད་ཚང་གི་གོ་ཁ་དྲོན་མོ་དེ།
ཕ་ཡུལ་ནས་ཁ་པར་ཡོང་ཐེངས་རེ་རེར་ཕ་ལོ་འཇམ་ཅག་གེར།
ཕ་ཡུལ་ནས་ཁ་པར་ཡོང་ཐེངས་རེ་རེར་མ་ལོ་ངུ་ཤུམ་ཤུམ།
ཕ་ཡུལ་ནས་ང་རང་ལ་བསམ་དུས།
ང་ནི་གོ་ལ་གཞན་ཞིག་གི་མཆེ་སྡེར་ན་འཚོ་བར་སྙམ་ལ།
ངས་མི་ཡུལ་གྱི་མཛེས་པ་དང་སྙན་འཇེབས་ཇི་ལྟར་གླེང་ནའང་།
ཁོང་ཚོ་ཚོད་ཚོད་དུ་ངུས་འགྲོང་རང་ཁོ་ན་དྲན་ནས་ངུས་འགྲོ
ངའི་ཕ་ཡུལ་དང་ཕུ་ནུ་མིང་སྲིང་ཚོ།
བར་ཐག་གི་སྒྱུ་འཕྲུལ་དེས་གདུང་བ་ཇི་ལྟར་བཞག་ནའང།
གློག་རྡུལ་གྱི་དུས་རབས་འདིས་གཉའ་གནོེན་ཇི་ལྟར་ལྕི་ནའང།
ནམ་ཞིག་ཕ་ཡུལ་གྱི་ཆུ་གློག་བཞིན་དུ།
ང་ཚོའང་དྲ་ངོས་སུ་ལངས་ནས་དྲ་ངོས་སུ་གོམས་པར་འགྱུར་རོ།།
ལན་རེར་ངུ་སྐད་དེར་ཧ་ཅང་ཉན་པར་སྤྲོ་ཞིང་།
ལན་རེར་ངུ་སྐད་དེས་རང་ཉིད་ཡོངས་སུ་བཅིངས་ཡོང་བས།
དེ་རིང་ཡང་ཁ་པར་གྱི་སྐུད་སྣེ་ནས་ང་ཚོ་མཉམ་དུ་ཐེངས་ཤིག་འདར་དགོས་བྱུང་།
2011.02.02
*གོང་གི་པར་དེ་ཁ་སང་གི་༼Rockགཞས་ཚིག་༽དེར་བསྐུར་པ་ཡིན་ལགས།