(ཁ་བར་སྤྲོ་བའི་ལྗོངས་རྒྱུ་པར་གླེང་བའི་སེམས་ཚོར།)
འགར་ཚེ་རྒྱལ།
ས་སྒང་མཐོ་ས་ན་ཁ་བས་གཡོགས་ནས་ཡོད་པའི་རི་གྲོང་མཚར་པོ་དེ་ངའི་ཕ་ཡུལ་རེད།
དུས་རྒྱུན་ནས་ཁ་བ་འབབ་ཀྱིན་ཡོད་ལ།
འབབ་ཀྱིན་པའི་ཁ་བའི་ཆེ་ཆུང་ན་བྱ་རྒོད་ཀྱི་གཤོག་པ་ལྟ་བུ་ཡོད།
ས་དོག་མོ་ཆགས་དུས་ནས་ཁ་བའི་གོས་དཀར་གྱོན་པར་དགའ་ལ།
རི་མཐོན་པོ་འབུར་དུས་ནས་ཁ་བའི་དབུ་ཐོད་མནབས་པར་སྤྲོ།
ཕ་ཡུལ་གྱི་མི་ཚོས་ཁ་བའི་མཐུག་ཚད་འཇལ་ཞོར་ཁ་བར་སེམས་ཤ་གླན་ཡོད།
ཁ་བ་དང་ཁོ་ཚོ་སྐྱེས་དུས་ནས་རི་ལུང་དེའི་ཁ་མཐུན་ཞེ་མཐུན་ཡིན།
ཕྱི་རོལ་གྱི་ཁ་བ་མེད་ས་འདིར་ཉིན་མཚན་མེད་པར་ཉི་མ་མེ་རུ་གྱུར་འདུག་པས།
སེམས་པ་འདི་ག་དུས་ཡིན་ན་ཙད་པས་སྐམས།
ཁ་སང་ཕ་ཡུལ་ན་ཁ་བ་འབབ་ཀྱིན་པ་ཐོས་པས་ང་རང་ཚོད་ཚོད་ལ་ཁོང་འདར་བརྒྱབ།
ཚ་བ་ཆེ་ས་ནས་མི་ཚོགས་ཀྱིས་ཁ་བ་མི་འབབ་པར་སེམས་འཁྲལ་བྱེད་ཀྱིན།
བརྙན་འཕྲིན་ལས་འཛད་བཞིན་པའི་ཁ་བའི་འཁྱག་རོམ་ལ་བལྟས་ནས་ངུ་ཤུ་བརྒྱབ།
གཟས་ནས་གནམ་གྲུར་བསྡད་དེ་ཁ་བ་འབབ་ས་ཞིག་ལ་ཁ་བར་ལྟད་མོ་བལྟ་བར་བཞུད།
ཁ་བ་ཤོག་སྐྱ་ཙམ་ཞིག་གི་ཁུགས་ནས་ཚོད་ཚོད་ལ་འཕག་འཚག་རྒྱག་ཞོར།
ཁ་བ་དེ་ཁུག་མར་བླུགས་ནས་འཁྱེར་ན་བསམ།
ཁ་བ་དེ་གནམ་གྲུར་བཞག་ནས་བརྐུ་ན་འདོད།
ཁྱོད་ཚོ་ཁ་བར་སྤྲོའམ། ཁ་བར་སྤྲོ་ན་ངའི་ཕ་ཡུལ་དུ་སོང༌།
དེ་ན། ཁ་བས་གྲུབ་པའི་རི་ཚོགས་ཀྱིས་ཁྱོད་ཚོར་མགྲོན་བསུ་བྱེད།
ལྷབ་ལྷབ་ཏུ་འབབ་པའི་ཁ་བའི་མེ་ཏོག་གིས་ཁྱོད་ཚོར་སྐྱེལ་མ་བྱེད།
ཁ་བ་དེ་གནམ་འོག་གི་ཁ་བ་ངོ་མ་རེད།
ཁ་བ་དེ་མི་ཡུལ་གྱི་ཁ་བའི་གཞི་མ་རེད།
འོན་ཀྱང༌། ངའི་ཕ་ཡུལ་གྱི་ཁ་བ་ཁུག་མར་བླུགས་ནས་ནག་ནོག་བཟོས་མི་ཆོག
ངའི་ཕ་ཡུལ་གྱི་ཁ་བ་གནམ་གྲུར་བཞག་ནས་བཞུ་རུ་བཅུག་མི་ཆོག
ཁྱོད་ཚོ་ཁ་བར་སྤྲོའམ། ཁ་བར་སྤྲོ་ན་མགྱོགས་པོར་ངའི་ཕ་ཡུལ་དུ་སོང༌།
དེང་སྐབས་ངའི་ཕ་ཡུལ་ལ་ཁ་བ་འབབ་ཀྱིན་ཡོད་ལ།
འབབ་ཀྱིན་པའི་ཁ་བ་བྱ་རྒོད་ཀྱི་གཤོག་པ་བཞིན་ཤུགས་ཀྱིས་བསྙིལ་གྱིན་ཡོད།
ཤིན་ཏུ་ལེགས་རྩོམ་ཡིག་འདི་ཀློག་གིན་ཀློག་གིན་ངོ་མ་ཁ་བ་དྲན་བྱུང་། ཁ་བ་དང་བྲལ་བ་ནས་བཟུང་ཅི་འདྲ་ཞིག་སྐྱོ་ཨང་། ཁ་བ་དྲན་དུས་སེམས་པ་ཅི་འདྲ་ཞིག་ན་ཨང་།
ཁ་བའི་གྲོང་ཁྱེར་ནི་གངས་ཕྲུག་གི་ཕ་ས་རེད། མུ་མཐུད་ཁ་བའི་སྐོར་གླེང་རོགས་ཉན་ན་འདོད།
ཡ་ཡ། མུ་མཐུད་དུ་གླེང་འདོད་ཡོད། ཁྱོད་ཀྱི་སྒུག་ནས་བསྡོད་ཨ།
འགར་ཚེ་རྒྱལ་གྱིས།