ཆང་སྐྱེས།
རིན་ཆེན་སྣ་ཚོགས་རྒྱན་གྱིས་མ་སྤྲས་ཤིང་།།
དཀར་དམར་མཚོན་གྱིས་ངོ་གདོང་མ་བྲིས་ཀྱང་།།
ཡིད་འཕྲོག་ལྷ་མོའི་ལང་ཚོ་འཇོ་སྒེག་ཅན།།
སེམས་ཀྱི་བུ་མོ་སྙིང་ལ་ལྷག་ཏུ་སྡུག།
བཅུ་དྲུག་ལང་ཚོ་སྒེག་པའི་ན་ཆུང་མའི།།
གོམ་པའི་འདེཊ་འཇོག་དལ་མོའི་ཧྲག་བར་ནས།།
འཛུམ་པའི་སོ་ཕྲེང་དཀར་མོ་འོད་དུ་འཚེར།།
སྲེད་པའི་མྱོས་བུམ་གཉི་ག་ལྡེམ་ལྡེམ་གཡོ།།
བདག་སེམས་དབང་མེད་ཤོར་བའི་བརྩེ་ལྡན་མ།།
ལྷ་ཡི་བུ་མོ་ས་ལ་བབས་པ་འདྲ།།
ཡིད་འོང་སྟོང་གིས་སྨིན་པའི་ལང་ཚོ་ལ།།
ཇི་ལྟར་བལྟས་ན་སྙིང་ལ་དེ་ལྟར་སྡུག།
རྨི་ལམ་མེ་ཏོག་གླིང་གི་སྒེག་ལྡན་མ།།
ཀླུ་ཡི་སྲས་མོ་མཚོ་ལས་བྱུང་བ་འདྲ།།
འགྲོ་ཞོར་འཛུམ་གྱིས་ཕྱུག་པའི་ཟུར་མིག་དེ།།
བདག་སེམས་བུང་བ་འགུག་པའི་ལྕགས་ཀྱུ་ཞིག།
བརྩེ་ཆེན་སྙིང་གི་བུ་མོ་འདང་ཆེན་མ།།
ག་དུས་ཡིན་ཡང་སེམས་ཀྱི་དམར་དམར་བོ།།
དུང་སེམས་རྒྱ་མཚོ་འོ་མའི་གཏིང་རིམ་ནས།།
ཁྱོད་ནི་བྱུ་རུ་དམར་པོ་རྡོག་རྡོག་ཅིེག།
བདག་གིས་ཁྱེད་ལ་བྲིས་པའི་སྙན་ངག་འདི།།
སྡེབ་སྦྱོར་ཚིག་གིས་སྒྲིག་པའི་མགུལ་རྒྱན་མིན།།
བརྩེ་བ་ཁྱེད་ལ་ཤོར་བའི་དུང་བ་ཡང་།།
གཡོ་སྒྱུ་རྫུན་གྱིས་བསླུ་བྲིད་དེ་བས་མིན།།
སྐྱེས་བ་འདི་ཡི་རིང་ལ་འུ་གཉིས་ཀ།
མཉམ་དུ་འཛོམ་པའི་སྐལ་བ་མེད་སོང་རུང་།།
བདག་གིས་ཁྱེད་ལ་བཅངས་བརྩེ་བ་ནི།།
ནམ་ཡང་མི་འགྱུར་རྡོ་རྗེ་བྲག་རི་ཡིན།།
ཆང་སྐྱེས་ལགས་ནས་བྲིས་པའི་དགའ་གཞས་འདི་གང་ལེགས་བྲིས་གནང་འདུག་།
ཡིན་ཡང་མཛེས་མ་ཞིག་གི་བྲིས་དོན་རྣམས་རྟོགས་མཁན་མང་ལོས་ཡོད་མི་ཤེས་།
གལ་སྲིད་མཛའ་གཞས་ཀྱི་གོ་དོན་ཅི་ཡང་མ་ཤེས་ན་་་དོན་མེད་རེད།