ཆབ་མདོ་ངག་ཕུན།
ངུར་སྨིག་གར་གྱི་འཛིན་པ། །ཆོས་སྲིད་གཉིས་ཀྱི་ཐོག་ལ།།
མཁྱེན་རྒྱ་ཤིན་ཏུ་ཆེ་བའི། །སྐྱབས་རྗེ་ཟམ་གདོང་བླ་མ།།
བོད་དོན་གཉན་འཕྲང་སྐབས་སུ། །ཡོད་ཚད་བློས་བཏང་མཛད་ནས།།
ལྷག་བསམ་ཞུམ་པ་མེད་པའི། །བོད་དོན་ཕྱག་ལས་མཛད་ཡོད།།
ཝ་ན་གཙུག་ལག་སློབ་གྲྭ། །གསར་དུ་བསྐྲུན་པར་མཛད་ནས།།
ཆོས་དང་རིག་གཞུང་མི་ཉམས། །གོང་འཕེལ་རླབས་ཆེན་མཛད་ཡོད།།
སྤྱི་འཐུས་གཙོ་ཚོགས་མཛད་ནས། །བཙན་བྱོལ་བོད་མིའི་སྒྲིག་འཛུགས།
དེང་རབས་མཐུན་པའི་མང་གཙོ། །རྨང་གཞི་སྲ་བརྟན་མཛད་ཡོད།།
བོད་ཀྱི་རིག་གཞུང་རྩ་ཆེན། །མི་ཉམས་གོང་འཕེལ་ཡོང་ཆེད།།
དཔེ་སྟོན་སློབ་གྲྭ་བསྐྲུན་ནས། །བྱས་རྗེས་རླབས་ཆེན་འཇོག་ཡོད།།
བཙན་བྱོལ་བོད་མིའི་སྒྲིག་འཛུགས། །ཁེ་བཟང་མེད་པའི་ཚོང་ལས།།
བུ་ལོན་གནས་སུ་ལྷུང་བ། །དེ་དག་གནས་ལས་གྲོལ་མཛད།།
དེ་འདྲའི་བྱས་རྗེས་འཇོག་ཀྱང་། །བསམ་ཤེས་མེད་པ་མི་འགས།།
སྐྱོན་བརྗོད་བྱེད་ཁུལ་བྱས་རུང་།། །བྱང་སྟོང་ཁ་ཏ་སྒྲོག་མཚུངས།།
རང་རེའི་དོན་གཉེར་ཅན་ལ། །མདོ་སྔཌ་གཞུང་ལུཌ་མཐའ་དག།
བསྲེགས་བཅད་བརྡར་གསུམ་ངང་ནས། །དམར་ཁྲིད་མཛད་པ་སྐྱོང་མཛད།།
གངས་ཅན་མཁས་པའི་གཙུག་རྒྱན། །མཁས་དབང་ཟམ་གདོང་བླ་མར།།
སྐུ་ཚེ་ཡུན་རིང་བརྟན་པའི། །གསོལ་བ་སྙིང་ནས་འདེབས་སོ།།
དགུང་གྲངས་གྱ་གསུམ་ཕེབས་རུང་། །ངལ་བ་ལྷོད་མེད་ཐོག་ནས།།
ཆོས་རིག་མི་ཉམས་གོང་འཕེལ། །མཛད་པ་རླབས་ཆེན་སྐྱོང་མཛད།།
དེ་འདྲའི་བཀའ་དྲིན་ཅན་གྱི། །སློབ་དཔོན་ཟམ་གདོང་བླ་མར།།
གསོལ་བ་སྙིང་ནས་འདེབས་སོ། །སྐུ་ཚེ་ཡུན་རིང་བརྟན་སྨོན།།
ཞེས་པ་འདི་ནི་ས་མཐའ་སྤྲང་འཁྱམས་པ་ཆབ་མདོ་ངག་ཕུན་ཞེས་འདོད་པའི་ཕྱི་ལོ་ ༢༠༢༢/༡༡/༥ ཉིན་མོར་རིན་པོ་ཆེའི་སྐུ་ཡི་འཁྲུངས་སྐར་ལ་རང་ཉིད་བསོད་ནམས་བསགས་ཆེད་དུ་བྲིས་པའི་ཁུལ་ཞིག་ཡིན་ན་དེ་དོན་ཀློག་པ་པོ་རྣམས་ཀྱི་དགོངས་བཞེས་ཡོད་པ་མཛོད།
སྐྱེས་ཆེན་དམ་པའི་མཛད་འཕྲིན་ནམ་མཁའ་བཞིན་དུ་ཁྱབ་ཡོད་།
གངས་ལྗོངས་བསྟན་འགྲོའི་དོན་དུ་ཡོད་ཚད་བློས་གཏོངགནང་ཡོད་།
བཙན་བྱོལ་སྒྲིག་འཛུགས་དོན་དུ་ལམ་སྟོན་གསེར་ཟམ་བཙུགས་ཡོད་།
རྒྱལ་སྤྱིའི་ཆབ་སྲིད་མཐུན་པའི་མང་གཙོ་བསྲ་བརྟན་བཙུགས་ཡོད་།
རྒྱལ་བའི་བཀའ་དགོང་སྒྲུབ་ཕྱིར་ཉིིན་མཚན་སྐུ་ལས་སྐྱོན་ཡོད་།
དགོན་པ་གྲཱ་ཚང་བླ་གྲང་ཟེར་བའི་མིང་ཙམ་ཁོང་ལ་མེད་པ་།
གྲཱ་ཀྱང་དཀྱུས་མའི་མཚན་གྱིས་སྙན་གྲགས་འཛམ་གླིང་ཁྱབ་ཡོད་།
སྐུ་ཚེ་མཛད་འཕྲིན་རྒྱས་པའི་མཆོག་གསུམ་དཔང་པོར་བཞག་ནས་།
སྐུ་ཚེ་ཡུན་རིང་བརྟན་པའི་སྨོན་ལམ་ཁྲི་ཕྲག་ཞུས་ཡོད་།
དང་པོ་ཝར་ཎར་སློབ་སྤྱིའི་མིང་ཐོག་ཆོས་བརྒྱུད་ཕན་ཚུན་དབྱེན་ལ་སྦྱོར།
གཉིས་པ་སྤྱི་ལྷན་ཚོགས་གཙོའི་མིང་གིས་ཁམ་པ་ནང་ཁུལ་འཁྲུག་ལ་སྦྱོར།
གསུམ་པ་བཀའ་བློན་ཁྲི་པའི་འགྱིང་གིས་གཞུང་གི་ཡོང་འབབས་ཕུང་ལ་སྦྱོར།
བསམ་བཞིན་ཕུང་སྦྱོར་བྱེད་གཏེ་དེ་ཉིད་སྲིད་འདིར་བཞུགས་ལས་ཕེབས་ན་བཟང་།
ག་ལེར་ཕེབས།།
ལེགས་སོ་ལེགས་སོ་བྲིས་པ་བཟང་།།
དང་བ་ཆེན་པོས་བྲིས་པ་བཟང་།།👍
ངན་ནོ་ངན་ནོ་སྙད་འདོགས་ངན།།
ཕྲག་དོག་ཆེན་པོས་སྙད་འདོགས་ངན།།👎
རང་ཉིད་བློས་བཏང་མཛད་ནས།། རྒྱལ་བའི་བཀའ་བཞིན་བསྒྲུབ་ཡོད།།
དེ་འདྲའི་སྐྱེས་བུ་ཞིག་ལ། །བདག་གིས་སྙིང་ནས་བསྟོད་དོ།།
ཕྱི་དཀྲུག་ནང་དཀྲུག་བྱས་དུས།
བློས་བཏང་ཕྲན་བུ་བྱེད་དགོས།
བློས་བཏང་མིང་གི་འོག་ནས།
ནང་ཁུལ་ཏག་ཏག་བཟོས་ཡོད།།
ང་ཚོའི་མི་རིགས་ཆེད་དུ། །ན་ཚོད་སྨིན་པའི་དུས་ནས།།
ཡོད་ཚོད་བློས་བཏང་མཛད་ཡོད། །རླབས་ཆེན་མིན་སུ་ཡིན།།
ནོར་བཅོས།
ང་ཚོའི་མི་རིགས་ཆེད་དུ། །ན་ཚོད་སྨིན་པའི་དུས་ནས།།
ཡོད་ཚོད་བློས་བཏང་མཛད་ཡོད། །རླབས་ཆེན་མིན་ན་སུ་ཡིན།།