སྐྱོ་བྲག་དགའ་དབང་།
འཇིག་རྟེན་ན་གཅེས་པ་རང་སྲོག་ཡིན་ཕྱིར། རང་ཉིད་ཀྱི་ལུས་བཟང་ངན་གང་ལྟར་ཡང་སེམས་ཅན་ཡིན་ནོ་ཅོག་གིས་སོ་སོའི་སྲོག་མགོ་ཐོན་ཐབས་ལ་ཉིན་མཚན་ལྷོད་མེད་ཀྱིས་འབད་པ་བྱེད་ཀྱིན་ཡོད་ཅིང། རང་ཉིད་འཆི་བ་ནི་རང་ལ་བྱུང་བའི་ལས་ཀྱི་ཐ་མ་ཡིན་པས་ན། ཕ་རོལ་དགྲ་སྡེ་འཇོམས་པའི་མཐར་ཐུག་ཀྱང་གསོད་པ་ཡིན་ལ། ཁྲིམས་ཀྱི་ཉེས་པ་མཐར་ཐུག་ཀྱང་སྲོག་ཁྲིམས་གཅོད་པ་ཡིན། འཆི་བ་ལ་བསམ་ན་དཀའ་ངལ་གཞན་པ་ནི་ཆུང་ངུར་མཐོང་གི་ཡོད། གལ་སྲིད་འཆི་བ་ལ་མི་འཇིགས་ན་གཞན་གང་ལའང་སྐྲག་དགོས་པ་མེད་དེ། སྐྲག་ས་ཚང་མའི་མཐར་ཐུག་ནི་འཆི་བ་ཡིན་པ་རེད། རོགས་ཕན་གྱི་ནང་ནས་ཆེ་ཤོས་ཀྱང་འཆི་བའི་འཇིགས་པ་ལས་ཐར་བའི་རོགས་པ་བྱས་པ་ཡིན་ཏེ། མ་ཤི་ན་འཇིག་རྟེན་འདིའི་གསོན་ངོགས་ཀྱི་ལས་ཀ་ཆེ་ཆུང་ལེགས་ཉེས་ག་རེ་ཡིན་ནའང་བྱེད་དུ་ཡོད་ཅིང་། ཤི་ཟིན་ན་བཟང་ངན་གྱི་ལོ་རྒྱུས་ཚང་མའི་མཇུག་རྫོགས་པ་རེད།
འཆི་བ་ནི་རང་གཞན་ཚང་མ་ལ་གཡོལ་དུ་མེད་པའི་འཇིགས་ཉེན་ཆེ་ཤོས་དེ་ཡིན་ཕྱིར་གཏན་མེད་བྱ་རུ་མེད་ནའང་། གནས་སྐབས་མ་ཤི་ཙམ་བྱུང་བའང་གསོན་པའི་བདེ་སྐྱིད་ཐམས་ཅད་ཀྱི་གཞི་རྩར་ཤེས་པས་རང་གཞན་ཡུན་གནས་ཀྱི་ཐབས་སུ་སྐྱེས་བུ་དམ་པ་རྣམས་འབད་པ་སྟེ། རང་ཉིད་འཚོ་ཐབས་སུ་སྨན་དཔྱད་རིམ་གྲོ་སོགས་བྱེད་པ་དང་། གཞན་པའི་འཚོ་ཐབས་སུ་ཤ་དང་སྲོག་གཅོད་སྤོང་བ་དང་། ཚེ་ཐར་གཏོང་བ་སོགས་བྱེད་ཀྱི་ཡོད།
ངས་ཀྱང་ཆུང་དུས་གཞན་གྱི་ཚོར་བ་བདེ་སྡུག་གི་སྐོར་ལ་བསམ་གཞིག་རྩ་བ་ནས་མི་ཤེས་པས་སེམས་ཅན་གཉོམ་ཆུང་ཚོ་གསོད་པ་ལ་དགའ་ཞིང་བྱ་བྱིའུ་དང་རི་བོང་གླ་བ་སོགས་འགའ་ཤས་གསོད་མྱོངས་ཀྱང་ཡོད་མོད། ན་ཚོད་སྨིན་པ་ན་མཐོང་ཐོས་རྒྱ་ཆེ་རུ་སོང་ཞིང་ལྷག་ཏུ་བླ་མ་དགེ་བའི་བཤེས་གཉེན་དུ་མ་ཞིག་གི་དྲུང་ནས་ནང་ཆོས་ཀྱི་ཤེས་ཡོན་སློབ་གསོ་གང་མང་ཐོབ་པའི་བཀའ་དྲིན་ལ་བརྟེན་ནས་རིམ་པར་སྲོག་གཅོད་དང་དམར་ཟས་སྤོང་བ་ལ་བསླབས་ཤིང་། གཞན་པ་འཚོ་གནས་ཡོང་ཐབས་ཀྱང་གལ་ཆེན་ཡིན་པ་སེམས་ལ་གསལ་བོར་ངེས་ནའང་ནུས་པས་འདངས་པ་ཞིག་མ་བྱུང་།
ལོ་འདིར་ངོ་ཤེས་གྲོགས་པོ་དག་གིས་གུ་ཡངས་དང་ངལ་གསོའི་ཆེད་དུ་ཐེ་ཝན་དང་ཧོང་ཀོང་དུ་ཡོང་དགོས་པའི་སྐུལ་མ་དང་རོགས་ཕན་གནང་བ་དྭང་ལེན་ཞུས་ཏེ་བག་ཡངས་སོས་དལ་གྱི་སྤྲོ་འཆམ་བགྱིད་པ་ན་གང་ཐོབ་པ་དག་གིས་འབྲི་གཡག་རྣམས་ཚེ་ཐར་བཏང་བ་ཡིན།
ང་ལ་ཐོབ་པའི་སྒོར་མོ་དག་ནི་གཏོང་བ་ལ་གོམས་པའི་སྦྱིན་བདག་རྣམས་ཀྱིས་སོ་སོའི་བློ་ཡིས་ལྕོགས་ཚོད་རེ་བྱིན་པ་རྣམས་བེད་སྤྱོད་གཏན་ནས་མ་བྱས་པར་བསགས་པ་ཙམ་ལས། བསྟན་འགྲོ་གང་རུང་རེའི་ཆེད་དུ་ཡིན་རབས་ཀྱིས་སློང་མོ་བྱས་པའི་སྒོར་མོ་གཅིག་ཀྱང་མེད་ལ། འགའ་རེས་རོགས་རམ་དགོས་སམ་ཞེས་དྲིས་པ་དག་ལའང་དགོས་ཞེས་ལབ་པ་གཅིག་ཀྱང་མེད། དེས་ན་ང་ལ་བྱུང་བའི་སྒོར་མོ་དག་ནི་དྭགས་པོ་རིན་པོ་ཆེས། ཤུགས་ལ་བྱུང་ན་དངོས་གྲུབ་ཡིན་པས་མི་སྤང་། ཞེས་གསུངས་པ་ལྟ་བུར་ཆ་འཇོག་བྱས་ནའང་རུང་བར་སྙམ།
ངས་ཉོས་པའི་འབྲི་གཡག་དག་ནི་ངའི་ནང་མིའི་སྒོ་ཟོག་ཚོ་རེད། གང་ཡིན་ཟེར་ན། ངའི་ནང་མི་ཕ་མ་རྒས་འཁོགས་དང་སྤུན་སྲིང་རྣམས་འཁྱག་ལྟོགས་ཀྱིས་མ་ཤི་བ་ནི་ང་ཚོའི་ནང་གི་སྒོ་ཟོག་ཚོའི་བཀའ་དྲིན་རེད་ལ། ང་ཚོའི་ནང་མི་ཡོངས་ཀྱི་ཕ་མ་ལྟར་གྱུར་པ་སྒོ་ཟོག་དག་གི་སྲོག་དབུགས་ལེན་དགོས་མ་ཐུག་ཙམ་བྱུང་ནའང་ཡག་པོ་རེད་སྙམ་པའི་བསམ་ཚུལ་བྱུང་ཞིང་། བློ་སྦྱོང་ལས་ཀྱང་། ལེན་པའི་གོ་རིམས་རང་ནས་བརྩམ། ཞེས་གོ་རིམ་གྱི་ཐོག་མ་རང་ནས་རྩོམ་དགོས་པར་གསུངས་ཡོད།
སྤྱིར་བཏང་ངའི་ནང་མི་རྣམས་སྡིག་པ་ལ་འཛེམ་ཟོན་མེད་པ་ཞིག་མིན་ནའང་། དཔལ་འབྱོར་གྱི་ཡོང་སྒོ་ཞན་ཅིང་ནང་མི་མང་པོའི་འགྲོ་སོང་ཆེ་ཐོག །དམར་ཟས་ཟ་བ་གོམས་ལོབས་སུ་སོང་བས། སྒོ་ཟོག་བཤའ་བ་དང་བཙོང་པ་སོགས་བྱ་དགོས་ཐུག་གི་ཡོད་པ་རེད།
ད་དུང་ངས་སྒོར་ཟོག་མང་པོ་ཞིག་གི་ཚེ་སྲོག་བསླུ་ཐུབ་མེད་པ་ནི་ངའི་སྒོར་མོའི་གྲངས་ཚད་ཀྱིས་མ་འདངས་པ་ཡིན་ཕྱིར་གནས་སྐབས་ཅི་བྱ་བྲལ་ཏེ་འབྱུང་ཆར་བྱ་ཐུབ་པའི་རེ་སྨོན་གྱི་ངང་དུ་མ་བཞག་རང་བཞག་བྱུང་།
གཞན་དིང་སང་བོད་ཡུལ་དུ་ཚེ་ཐར་བཏང་བ་ཕལ་མོ་ཆེ་བདག་མེད་དུ་ལུས་པས་རྐུན་མ་དང་གཅན་གཟན་གྱིས་གང་མགྱོགས་བཟའ་འགྲོ་བའི་དཀའ་ངལ་ཞིག་ཡོད་པ་སྐྱོབ་ཆེད་ཚེ་ཐར་བཏང་བ་རྣམས་མ་ཤིའི་བར་དུ་ང་ཚོའི་ནང་མིས་བདག་སྐྱོང་བྱས་ཏེ། ཚེ་ཐར་གྱི་འབྲི་གཡག་ལས་བྱུང་བའི་སྤུ་དང་འོ་མ། གསར་སྐྱེས་ཀྱི་བེའུ་ཆ་ཚང་ང་ཚོའི་ནང་མི་ལ་བདག་པའི་ཁ་ཆད་བྱས་ཤིང་། གལ་ཏེ་ཤི་བ་དང་གཅན་གཟན་གྱིས་ཟོས་པའི་ཤ་རུས་དང་ལྤགས་པ་ལོངས་སུ་སྤྱོད་རུང་ཡིན་ན་བེད་སྤྱོད་གང་ཞིག་བྱ་བར་འདོད་ཀྱང་མི་རུང་བ་མེད་པ་རེད།
གཡུང་དྭགས་ཀྱི་རིགས་རྣམས་ཚེ་ཐར་བཏང་སྟེ་རི་སྟོང་དུ་མངགས་ཤེས་པ་ཙམ་གྱིས་ཁོ་ཚོ་བདེ་སྐྱིད་ལྡན་པའི་འཚོ་གནས་ཤིག་ཡོང་གི་མེད་པ་ནི་དིང་གི་བོད་ཡུལ་སྟོད་སྨད་ཀྱི་ཚེ་ཐར་བདག་མེད་ཚོའི་འཆི་རྐྱེན་ངན་པ་ལས་ཤེས་ཀྱི་ཡོད་ཕྱིར། མ་འོངས་པར་ཡང་ངས་མུ་མཐུད་དེ་ང་ཚོའི་ནང་མི་ལ་ཚེ་ཐར་བདག་སྐྱོང་གི་རོགས་རམ་གནང་བའི་བརྔན་པ་གང་ལྕོགས་རེ་སྤྲོད་དགོས་པ་ནི་ང་རང་གིས་བྱས་པའི་ལས་ཀའི་འགན་འཁྲི་ཡིན་པ་ཤེས་ཀྱི་ཡོད།
ང་ལ་སྒོ་ཟོག་དྲིན་ཆེན་རྣམས་གཏན་གྱི་བདེ་བ་ལ་འགོད་ཐུབ་པའི་ནུས་པ་ཞིག་མེད་ནའང་། གཞན་པའི་ཚེ་སྲོག་ལ་མཐོང་ཆེན་གྱིས་དྲིན་ལན་ལོག་འཇལ་མིན་ཙམ་དུ་བདག་པོའི་སྲོག་ཁྲིམས་ལས་ཐར་པ་ཞིག་བྱས་ཁུལ་རེད་ལ། ཚེ་ཐར་བཏང་བ་དག་དུད་འགྲོ་རྨོངས་པའི་ལུས་སུ་ཡོད་ཕྱིར་འཚོ་བའི་བདེ་སྐྱིད་ཆེན་པོ་ཞིག་ཡོད་དཀའ་ནའང་རང་ཉིད་ཀྱི་ཚེ་མཐའི་བར་གསོན་པོར་གནས་ཆོག་པའི་སྐལ་བ་ཙམ་བྱུང་བ་རེད། གང་ལྟར་ཡ་རབས་ཀྱི་སྤྱོད་པ་ལ་འཇུག་པའི་གོ་སྐབས་ཕྲན་བུ་བྱུང་བས་སེམས་པ་གཏིང་ནས་དགའ་ཡོད་དོ། །
ཚེ་ཐང་ལ་ཁ་བཀལ་ཏེ་ད་དུང་སྒོར་མོ་མང་ཙམ་རག་ན་ཡག་པོ་འདུག ནང་མིར་བཏང་ཆོག་གི་རེད་དོ།།
རིགས་པ་ཡག་པོ་གཏང་འགི རང་གི་ཟོག་རང་གིས་ཉོ། ཧཧཧ