སྐྱོ་བྲག་དགའ་དབང་།
བདག་གིས་སྤྱིར་མི་ཚེའི་གནས་བབས་ཀྱི་ཤེས་བྱ་གཙོར་འདོན་བྱས་པ་ཞིག་བྲིས་པར། ཨ་ནེ་ལགས། ཨ་ནེ་ལགས། ཞེས་པ་ལྔ་བཅུ་ཐམ་པ་ཡོད་པ་ལ་བརྟེན་ནས། ཨ་ནེ་ལྔ་བཅུ་པ། ཞེས་བཏགས་ཏེ་གཡུ་ཞུན་དྲ་བར་བཏང་བ། སྤྱི་ལོ་༢༠༡༠ ཟླ་༤ ཚེས་༡༡ ཉིན་བཀོད་འདུག་པར་ལབ་གླེང་ཅི་ཡང་མ་བྱུང་།
རྗེས་མ་སྐད་འཕྲིན་(WeChat) ཁྱབ་གདལ་དུ་ཕྱིན་པའི་བྱ་སླར་བརྟེན་ཏེ་འགའ་ཤས་ཤིག་གིས་ང་ནག་པོར་སྒྱུར་བའི་རེ་དམིགས་ཡིན་སྲིད་པ་ལྟ་བུས། ཨ་ནེ་ལྔ་བཅུ་པ་བཅད་གཏུབ་དང་གསར་སྣོན་གྱིས་གང་སར་བརྒྱུད་སྐུར་བྱེད་ཀྱི་ཡོད་པ། ན་ནིང་ངའི་ལས་རོགས་ཕྱག་མཛོད་དང་། འགན་འཛིན། མཁན་པོ་དག་གི་སྐད་འཕྲིན་དུ་བསླེབས་ནས་ཇི་ལྟར་ཡིན་མིན་བཀའ་འདྲི་གནང་གི་འདུག་པར་ངས་གཡུ་ཞུན་དྲ་བའི་ཁ་བྱང་འདི་ http://youshun12.com/?p=2727 ཕུལ་བ་ཡིན།
ད་ལོར་ནི་བོད་ནས་འཇམ་སེང་ཞུ་བ་ཞིག་གིས་ཨ་ནེ་ལྔ་བཅུ་པའི་མགོ་མཇུག་དུམ་སྒྲིག་བྱས་པ་ཞིག་དྲ་འཕྲིན་དུ་བཟོས་ནས་སྐད་འཕྲིན་སོགས་སུ་མང་པོས་བསྐུར་འཇོག་བྱེད་ཀྱི་ཡོད་འདུག ངས་ཡིག་ཐོག་ཏུ་བཀོད་དེ་དྲ་བར་བཏང་བ་དེ་ནས་ཐུན་མོང་གི་ལོངས་སྤྱོད་དུ་གྱུར་ཟིན་པས་བསྐུར་འཇོག་དང་དགག་སྒྲུབ་གང་བྱེད་རང་མོས་རེད། བསམ་འཆར་ཅི་ཡང་བཤད་དུ་མེད།
འོན་ཏེ་བསྐུར་འཇོག་གནང་མོས་ཡོད་ན་ཆ་ཚང་བའམ། ཡང་ན་ལུང་དྲངས་པ་ནི་ལུགས་མཐུན་ཡིན་མོད། དཀྱུས་བཀོད་ཡིན་ཁུལ་ལྟ་བུས་མགོ་མཇུག་དུམ་སྒྲིག་བྱས་པས་ཅི་ཞིག་ཕན་གྱི་ཡོད་དམ། ཧོར་ཁོང་བྱས་པ་དག་ལའང་གོ་དོན་ནི་མི་དམན་པ་ཡོད།
བྱ་སྤྱོད་འདི་རིགས་མཐོང་བ་ན་གནའ་དུས་ཕེབས་པའི་མཁས་པ་དག་གི་གསུང་རབ་ཕྱོགས་ཐ་དད་ཀྱི་མ་དཔེ་གང་མང་གཤིབ་བསྡུར་བྱ་ཆོག་པའི་དག་གཙང་བདག་གཉེར་བྱེད་པོ་ཚོའི་ཤེས་རབ་དང་གཟབ་ནན་ལ་སེམས་གཏིང་ནས་དགའ་དད་སྐྱེ་ཡོང་གི་གདའ་འོ། །