ངའི་ལྟ་སྟངས་ཤིག བསེ་རུ།

བོད་ནང་གི་རང་ལུས་མེར་སྲེག་གཏོང་མཁན་ཕལ་ཆེ་བས་༸གོང་ས་མཆོག་བོད་ནང་གདན་ཞུ་གནང་དགོས་གསུངས་ཡོད་པའི་ཐད་བསམ་ཚུལ་གང་ཡོད་དམ་ཞེ་ན། 

ཁོང་རྣམས་ཀྱི་སྙིང་སྟོབས་དང་བློས་གཏོང་ལྷན་དུ་དགོས་འདུན་དང་ཕུགས་རེ་གང་མང་ཞིག་ཡོད་ཀྱང་། དེ་དག་གི་འབྲས་བུ་ཐོན་དང་མི་ཐོན་ནི་ཕྱོགས་གཅིག་རྐྱང་པས་སྒྲུབ་ཐུབ་ཐབས་བྲལ་བ་ཞིག་ཡིན་པ་ནི་འཇིག་རྟེན་ཀུན་གསལ་རེད། ངའི་བསམ་པར་ད་ལྟའི་བོད་ནང་མེར་སྲེག་གི་ལས་འགུལ་དེ་བཞིན་རིམ་པར་རྒྱུན་སྲིང་བྱས་ཏེ་བོད་མི་བརྒྱ་ཕྲག་བརྒལ་བ་དུས་གཅིག་ཏུ་མེར་སྲེག་ལས་འགུལ་སྤེལ་ཏེ་དོན་རྐྱེན་དེའི་ནང་དུ་འདས་གྲོངས་སོང་ནའང་། ༸གོང་ས་མཆོག་བོད་དུ་གདན་འདྲེན་ཞུ་ཐུབ་ཀྱི་རེད་ཅེས་ནམ་ཡང་བརྗོད་མི་ཐུབ་ལ། བོད་ཀྱི་བདེན་མཐའ་སེལ་ཏེ་གཞིས་བྱེས་ལྷན་འཛོམས་ཡོང་ངེས་རེད་ཅེས་ནམ་ཡང་བརྗོད་མི་ཐུབ། འོན་ཀྱང་། ཇི་སྲིད་༸གོང་ས་མཆོག་བོད་དུ་ཞབས་སོར་འཁོད་ཐུབ་པ་ཞིག་དང་། གཞིས་བྱེས་ལྷན་འཛོམས་མ་བྱུང་བ་དེ་སྲིད་དུ་བོད་མིའི་ལས་འགུལ་འདི་ཡང་རྒྱ་མཚོའི་རྦ་རླབས་བཞིན་ནམ་ཡང་འཇགས་མི་སྲིད།  མདོར་ན། བོད་མིའི་སྒྲིག་འཛུགས་ཀྱི་མངོན་འདོད་ལ་བོད་མི་ཡོངས་ཀྱིས་ཡིད་ཆེས་ངེས་རྙེད་མ་བྱུང་བ་དང་གཅིག བོད་མིའི་ཆབ་སྲིད་ཀྱི་ལྟ་གྲུབ་འགལ་ཟླ་གཙང་སེལ་མ་བྱུང་བ་དང་གཉིས། རྒྱ་ནག་གཞུང་ཕྱོགས་ནས་གཉིས་ཕན་དབུ་མའི་ལམ་སྲིད་བྱུས་ལ་ཡིད་ཆེས་ངེས་རྙེད་མ་བྱུང་བ་དང་གསུམ་བཅས་མ་བྱུང་བ་གསུམ་གྱི་གནད་དོན་ཇི་སྲིད་ཐག་མ་ཆོད་པ་དེ་སྲིད་དུ་ང་ཚོའི་བདེན་མཐའ་ནམ་ཡང་གསལ་མི་སྲིད། དེར་བརྟེན། སྤྱི་བྱེའི་ཆབ་སྲིད་འཕོ་འགྱུར་གནས་བབ་ལ་དབྱེ་ཞིབ་དང་། བདེན་དོན་འཐབ་རྩོད་ཀྱི་ཐབས་ལམ་གསར་འཚོལ། གཞིས་བྱེས་བོད་མིའི་འབྲེལ་ལམ་རྒྱུན་སྲིང་སོགས་ཀྱི་ཐོག་རྣམ་དཔྱོད་ཀྱི་བློ་མིག་སྲིངས། བསམ་གཞིགས་ཀྱི་བློ་རྒྱ་སྐྱེད། སྙིང་སྟོབས་ཀྱི་གོ་ཁྲབ་གྱོན་ཏེ། ཀུན་གྱིས་རིག་པ་སྒྲིམས་ཤིག་ཅེས་ཞུ་རྒྱུ་ལས་མ་འདས། །