—ཆབ་ཆ་ལྗང་ལོ།
དབུ་རྩེ་མཐོན་པོ། ངའི་སྐྱེས་ལྷ་བློན་པོ་གསེར་ཆེན།
དབུ་རྩེ་ན། སྨུག་པ་རབ་རིབ།
རབ་རིབ་ཀྱི་སྨུག་པའི་གསེབ་ན་ལོ་ངོ་སྟོང་ཕྲག་གི་སྤྲིན་གྱི་ཕོ་ཉ་འོད་ཀྱིས་འཚེར།
ད་དུང་། རྔམ་བརྗིད་ཀྱིས་འགྱིང་བའི་གནམ་སྔོན་པའི་ཀ་བ་ལྟར།
མི་རབས་གསར་བའི་གཞོན་ནུའི་སྙིང་སྟོབས་ཇི་བཞིན་གཏན་དུ་མཐོ།
ངའི་སྐྱེས་ལྷ། བློན་པོ་གསེར་ཆེན།
རི་འདབས་ན་ཤྭ་བ་ཡུ་མོའི་རྐང་ལམ་ཕྲ་མོས་ཐང་ཆེན་པོ་རྨ་ཁ་བཟོས།
ཤ་ཁྲག་ལ་རྔམ་པའི་བདེ་མྱུར་གྱི་སྤྱང་ཚོགས།
ཡང་བསྐྱར། ཡུ་མོ་ཚོས་ཁྲག་ལ་བསྒྲེས།
འཇིག་རྟེན་གྱི་ཀློང་ནས། འཚོ་བ་ཞིག རླུང་གི་གཤོག་པ་ཅན།
ད་དུང་། རྒྱུ་འབྲས་ཏེ།
ཉི་མ་སེར་པོ་དབུ་རྩེ་ནས་ཤར་དུས །
རྒྱུན་ལྡན་ལྟར། རི་འདབས་ན་གན་རྐྱལ་དུ་ལོག་པའི་ཤྭ་་བ་ཡུ་མོ།
གཏན་དུ་གར་སོང་ཆ་མེད་དུ་གྱུར།
དེ་ནི་ལས་འབྲས་ཤིག
ངའི་སྐྱེས་ལྷ། བློན་པོ་གསེར་ཆེན།
རི་རྩེ་མཐོན་པོའི་རྔམ་བརྗིད་ཁོ་ན།
ད་དུང་། མཚེར་བ་རི ། མ་ཧཱ་དེ་ཝ །
ཁྲི་ཤོར་རྒྱལ་མོ་བློའི་རྒྱབ་རི་སྨུག་པོ།
གསེར་མིག་ཉ་ཆུང་སེམས་ཀྱིས་གཏད་ས་ཕོ་བྲང་དཀར་པོ །
སྐྱེས་ལྷ་བློན་པོ་གསེར་ཆེན །
འཛམ་གླིང་ཡང་རྩེ་ནས་གྲགས་པའི་མགར་བསྟན་པའི་ཕ་གཞི་དྲོན་མོ །
རི་གསུམ་གྱི་རྩེ་ན་ཤེལ་དཀར་གྱི་ཁ་བཏགས་དལ་བུར་སྐྱོད་ནས།
མེས་པོ་ཚོ ། བོར་སོང་རུང་། བརླག་སོང་རུང་།
དབུ་རྩེ་འདིའི་བང་རིམ་ན་གཏན་དུ་འཚོ་འདོད།