གཡུ་དྲུག་དཀར།རྡ་ས།
ང་ཚོའི་སེམས་ཀྱི་ན་བུན་འདི་སློབ་ཁྲིད་ཀྱི་བར་བར་ནས་སྐབས་རེར་བགད་ཅིང་ལན་རེར་གཤེ་བའི་བྱིས་སྤྱོད་ལྟ་བུའི་རྣམ་འགྱུར་དེ་ཁོ་ནས་འཐིབས་སུ་བཅུག་པ་མིན་ཏེ།ངུ་མ་དགོད་ཀྱི་ཐུན་མོང་ལས་དབང་གི་རི་རབ་ཀྱི་རྩེ་དང་རྒྱ་མཚོའི་ཁ་ནས་ཡར་ཡར་ལ་འཁོར་བའི་བྱ་ལོང་གི་གཤོག་འགྱུར་ལས་ཀྱང་ཚོར་བ་ཡིན་ལ།ལྷག་པར་དུ་རྐང་ལམ་གཅིག་གི་འཕྲང་དང་འགག་ན་ལུས་ཡོད་པའི་འུ་ཚོའི་རྐང་རྗེས་ལ་ཕྱིར་མིག་བསྟབས་པའི་དྲན་ངོགས་ཀྱི་ན་ཟུག་གིས་བསླངས་སོ།།
ངའི་སྙིང་ཉེ་བའི་སློབ་མ་ཚོ།ཕྱི་རོལ་གྱི་མི་ཁ་རླུང་ཁ་ན་ཁོང་ཁྲོ་དང་མཚོན་ཆ་ཡི་རྟགས་ཐམ་གྱིས་རྒྱས་བཏབ་པའི་དྲག་སྤྱོད་རིང་ལུགས་པའི་ཚོགས་པ་ཞིག་ལྟར་སྐད་གྲགས་ཆོད་ཀྱང་།ནང་གི་ལྷས་ར་རུ་རང་གི་མེས་པོའི་གཤིས་རྒྱུད་ཀྱི་དཀར་པོའི་ཁ་དོག་ལེགས་པར་མནབས་པའི་གཡུང་མོ་ལུག་ཁྱུ་ཞིག་ལྟར་ལྷོད་ཅིང་འཇམ།ཁོང་ཚོའི་ཕྱི་ལུས་ཀྱི་ཤ་དར་ཞིང་ཁྲག་ཁོལ་བའི་གཟུགས་སྟོབས་ཀྱིས་མི་རྒན་མི་རྒན་ལྟར་མཐོང་ཡང་།ནང་སེམས་ཀྱི་རྩྭ་ཐང་ཧ་ཅང་ནེམ་ཞིང་རྩྭ་ལྗང་ལོ་མཉེས་གཤིན་གྱི་འཁྲི་ཤིང་ལགས་ན། ཁོང་ཚོ་ནི་ཆེན་པོ་ཆེན་པོ་འདྲ་ལ། ཆུང་ཆུང་ཡང་འདྲ་འོ།།
ངའི་སྙིང་ཉེ་བའི་སློབ་མ་ཚོ། འཚོ་བའི་རབ་གསལ་ལས་བསམ་གཞིག་གི་རྟ་ཁ་ཕྱོགས་དང་མཚམས་ཡར་མར་ལ་དཀྱུ་དུས། ནུབ་ཕྱོགས་ལ་དུངས་བ་ཟབ་ཅིང་དབྱིན་ཡིག་ལ་དགའ་བ་འདྲ་ཡང་།ཁོང་ཚོའི་ཤ་རུས་པའི་གསེང་ན་བོད་སྐད་བོད་ཡིག་ལ་དུངས་བའི་རྐང་སྣུམ་པོ་ཞིག་བཅུད་དུ་བལྟམས་པ་དེ་ནམ་ཡང་བཞུ་སྲིད་དམ།ཁོང་ཚོའི་ཞེ་བསམ་པའི་གཏིང་གི་བོད་མི་རིགས་དང་རིག་གཞུང་ལ་བཅིངས་པའི་བརྩེ་སེམས་ཀྱི་གངས་རི་དེ་ནམ་ཡང་འགྱེལ་སྲིད་དམ།
ངའི་སྙིང་ཉེ་བའི་སློབ་མ་ཚོ།ཁ་སང་ཕ་ཡུལ་ལ་ཕྱིར་ལྟ་བྱེད་བཞིན་ལམ་ལ་བུད་ཅིང་དེ་རིང་དྲན་གདུང་གི་མིག་ཆུ་་འཕོ་བཞིན་ས་མཐའ་འདིར་གསར་དུ་འབྱོར་བ་ཤ་སྟག་ཡིན་ཞིང་། གཞུག་ཕྱོགས་ད་དུང་གང་ཞིག་ལ་འགྲོ་དགོས་པར་འདོད་དེ། སྐད་བརྡ་འཕྲོད་དང་མི་འཕྲོད་ཀྱི་བར་ན་དཔྱ་ཁྲལ་ལག་དེབ་བཟོ་བ་ནས་དེབ་སེར་བོ་བཟོས་མ་གྲུབ་བར་ལ་དཀའ་སྡུག་གི་གོམ་པ་མང་པོ་མང་པོ་ཞིག་སྤོ་བཞིན་གདའ་ཡང་།ཡིན་རིང་ཞིག་ལ་རྒྱ་གར་དང་བལ་ཡུལ་ནས་ལྷག་འདུག་མཁན་དེ་དག ཞིབ་ཏུ་བལྟས་ན་ཕལ་ཆེར་ངའི་སྙིང་ཉེ་བའི་སློབ་མ་ཚོ་ཡིན་ངེས།
ངའི་སྙིང་ཉེ་བའི་སློབ་མ་ཚོ། འཛམ་གླིང་འདིའི་འཚོ་བ་དང་ལོ་ཚད་ལ་མཚུངས་རྟགས་མི་འབབ་པའི་མི་ལས་ངན་ཚོ། ལོ་ཚད་ཀྱིས་ཡར་ཡར་ལ་འཐེན་ཞིང་། འཚོ་བའི་ན་ཚོད་མར་མར་ལ་འབབ་ཀྱིན། སེམས་ཁོང་ལ་བྲེལ་ཤ་ལངས་བཞིན། ས་ཆ་རེ་ནས་སླར་ཡང་བུས་པ་རེ་རེར་བཙའ་བཞིན་འགྲོ་བཞིན་ཡོད།ཁོང་ཚོའི་མི་ཚེ་འདི་ལྟར་བརྡབ་གསིག་གི་ཁྲོད་ནས་ལྷག་དགོས་ན།ནམ་ཞིག་ལ།གང་ཞིག་ནས།ཁོང་ཚོས་རང་གི་འཚོ་བ་དང་མི་ཚེ་ཟེར་བ་དེའི་དབུ་ཁྱུད་ཡར་བསླང་དགོས་སམ། ཡང་ན། ཁོང་ཚོས་རྒས་གཉེར་དེ་ད་དུང་བྱིས་དུས་ཀྱི་རྩེད་ར་ཡིན་དགོས་སམ།
ངའི་སྙིང་ཉེ་བའི་སློབ་མ་ཚོ།ཆེན་པོ་ཆེན་པོ་ཚོས་ཁ་ཚོན་པོའི་ནང་ནས་བོད་གཞིས་བྱེས་གཉིས་ཀྱི་དབར་ན་གསེར་འོད་ལམ་ལམ་དུ་འཕྲོ་བའི་ཟམ་པ་ཡིན་ཟེར་ཞིང་། དེ་བས་ཁོང་ཚོར་ཆེས་གལ་ཆེ་བ་དང་། ཁོང་ཚོས་ཆེས་གཅེས་སུ་འོས་པའི་མི་ནི་ངའི་སྙིང་ཉེ་བའི་སློབ་མ་ཚོ་ལས་གཞན་སུ་ཡང་མེད་ཟེར་ཡང། ཁོང་ཚོའི་སྤྱན་ལམ་ན་ངའི་བུ་བུ་མོ་ཚོ་གར་ཡང་མེད་ཅིང་།ཁོང་ཚོའི་ཕྱག་དྲོན་མོའི་ཕྱི་ནང་ན་ངའི་ཚོང་རྫས་ཤིག་ལས་ཅིཡང་མིན་ལ།ཁོང་ཚོའི་ཐུགས་རྒྱ་མཚོའི་ཀློང་ན་ངའི་ཤ་དར་ཁྲག་དར་གྱི་སྟག་ཤར་སྨན་ཤར་ཚོ་མི་སྙིགས་ཤིག་ལས་ཅི་ཡང་མིན་ཨང་།
སྙིང་ཉེ་བའི་སློབ་མ་ཚོ།ས་མཐའ་ནས་ངའི་བྲང་ཁོག་ལ་འབྱར་བའི་རྡོ་འཁྱག་ཡིན།མི་མཐའ་ནས་ངའི་མིག་ནང་ཟུག་པའི་ཚེར་མ་ཡིན།