སད་ཀྱིས་བཅོམ་པའི་མེ་ཏོག།
ཡིད་སེམས་ཁྱེད་ལ་གཏད་པའི་ཡིད་ཆེས་རེ་རེ
མིག་ཟུང་ཁྱེད་ལ་ཕྱོགས་པའི་མིག་ཆུའི་རྡོག་པོ་རེ་རེ
རེ་བའི་དྲོད་མ་ཡལ་བའི་བྲང་གཞུང་ནས་བཞུད་སོང་།
སྤྲོ་སྣང་གི་མེ་ཏོག་གང་སར་བཞད་པའི་ངའི་སེམས་པ།
དུས་བཞིར་འཛུམས་མདངས་ཀྱིས་ཕྱུགས་པའི་ངའི་ངོ་གདོང།
ད་ཆ་མཇའ་མཚོན་བཞིན་ཆ་མེད་དུ་ཡལ་སོང།
སིལ་སྤོལ་རྩེད་ཐང་དུ་རྡབ་པའི་ཐག་སྒྲ་ཐོས་ཐེངས་རེར
ངེད་གཉིས་ཀྱིས་ཆེས་ཐོག་མར་ཆ་མི་ཚང་བའི་སྒྲུང་གཏམ་འདིར།
དབུ་འཁྱུད་འབྲི་བའི་ཉིན་མོ་དེ་དྲན།
དུས་ཀྱི་འགྱུར་འགྲོས་ནང་ནམ་ཡང་བརྗེད་མི་སྲིད་པ་ནི།
མཇལ་འཕྲད་ཀྱི་ཉིན་མཐའ་མར་ལྷག་པའི་འཁྲབ་ཚན་ཐུང་ངུ་དེ་ཡིན།
གནས་ཚུལ་དེ་སུ་ཞིག་ལ་ལྐོག་འགྱུར་ཞིག་ཡིན་མོད།
འོན་ཀྱང་ངེད་གཉིས་ལ་གསང་གཏམ་ཞིག་ག་ལ་ཡིན།
ལས་ལ་གང་བསྐོས་མ་རྟོགས། སྣང་བ་གང་ཤར་མེད།་ཅེས་པ་ཅི་མ་བདེན།
ལྷ་མོ་མཚོ་ ཁྱེད་མ་བརྗེད་ཅིག
ངའི་བདེ་སྐྱིད་ཀྱི་ཞིང་ས་སྐམ་པོ་དེ།
ད་ཆ་སྡུག་བསྔལ་གྱི་མྱ་ངམ་ཐང་ཞིག་ཏུ་འགྱུར་སོང།
ངས་ཁྱེད་ལ་བདེ་སྐྱིད་སྤྲོད་ངེས་ཡིན་་ཞིས་པའི་དམ་ཚིག་དེ་ནས།
ངས་ཁྱེད་ལ་བདེ་སྐྱིད་ཡོང་བར་སྨོན་ཆོག་་ཅེས་པའི་སྨོན་ཚིག་གཅིག་གིས་མཇུག་སྒྲིལ་སྐབས
ངོ་མ་བསམ་ཚོད་ལས་འདས་པའི་གནམ་ལྕག་གློ་བུར་བ་ཞིག་རེད་ཡ།
ལྷ་ཡུལ་གྱི་སྲས་མོ་ལྟ་བུའི་མི་ཚེ་འདི།
དྲིན་ཆེན་ཁྱེད་ཀྱིས་རྐྱེན་པས་
ད་ཆ་གློག་བརྙན་བཞིན་དུ་མཇུག་བསྒྲིལ་སོང།
སྙིང་གི་གཟེབ་ན་ཚུད་པའི་ཕུག་རོན་ཁྱེད་ལ་
ད་ཆ་རང་དབང་གི་གཤོག་བཟུང་ཐོབ་ཟིན་པས།
སྔར་གྱི་གནས་ཚུལ་རེ་རེར་རིན་ཐང་མེད་ཚེ།
ངས་ནམ་ཡང་དྲན་འཛིན་གྱི་བང་མཛོད་ལས་བསྐྱུར་ཆོག།
ངས་ནམ་ཡང་ཁྱེད་ལ་བདེ་སྐྱིད་ཡོང་བར་སྨོན་ཆོག།