བྱ་གཞུང་འཇམ་བྷེ།
༼ངས་ནུབ་ཕྱོགས་པའི་ཨ་མའི་དུས་ཆེན་སྲུང་བརྩི་ཞུ་མི་འདོད། དེ་ནི་ཨ་མར་ཡི་མ་རངས་པ་ཞིག་གི་བྱེད་སྟངས་སོ།༽
ཁ་སང་དྲ་ཐོག་ཏུ་བརྒྱུད་པའི་མི་ཐམས་ཅད་ཀྱིས་ཨ་མའི་དུས་ཆེན་གྱི་ཉིན་མོ་སྲུང་བརྩི་བྱེད་ཀྱིན་འདུག ཨ་མའི་དུས་ཆེན་ཉིན་མོ་སྲུང་བརྩི་འདི་ནི་ངེད་བོད་པ་ཚོར་མཚོན་ན་སྔར་མེད་གསར་ཏུ་དར་བའི་སྲོལ་ཞིག་རེད། བོད་པའི་སྤྱི་ཚོགས་སུ་སྔར་མེད་གསར་ཏུ་དར་བའི་སྲོལ་འདིའི་བརྒྱུད་རིམ་དང་ངོ་བོ་རྒྱབ་ལྗོངས་ཤེས་རྟོགས་ཡོད་མེད་ཐམས་ཅད་པོ་དུས་ཆེན་ཉིན་མོ་འདིར་འཇུག་གི་འདུག འོན་ཀྱང་། བྱམས་དང་སྙིང་རྗེ་ཡི་བདག་པོའི་ངེད་བོད་པ་ཚང་ལ་མཚོན་ནས་བཤད་ན། ནུབ་ཕྱོགས་པའི་སྲོལ་ལས་འགོ་ཐོག་མར་དར་བའི་ཨ་མའི་དུས་ཆེན་སྲུང་བརྩི་འདིའི་བརྒྱུད་རིམ་དང་རྒྱབ་ལྗོངས་སོགས་ནི་ཡི་ག་འཆུས་པ་དང་ཞེ་མེར་ལངས་པ་ཞིག་རེད།
ནུབ་ཕྱོགས་པ་རྣམས་ཤར་ཕྱོགས་པ་ནང་བཞིན་ཨ་མར་བྱམས་བརྩེ་དེ་ཙམ་མེད། དེ་ལ་བརྟེན་ནས་ནུབ་ཕྱོགས་པ་དག་གིས་རང་རང་གི་ཨ་མ་ན་རྒས་རྫི་རྡིབ་དང་རང་ལྕོགས་མི་ཐུབ་དུས། ཨ་མ་རང་ཁྱིམ་ནས་ཕྱིར་ཕུད་དེ་རྒན་གསོ་ཁང་དུ་བརྫངས་ནས་ཨ་མ་ལ་གྱེས་ཕྱག་good bye བསྟན་པ་རེད། དེ་ནས་བཟུང་སྟེ་ལོ་གཅིག་གི་ནང་ནས་ཉིན་གཅིག་ཨ་མའི་དུས་ཆེན་སུ་བརྩིས་ནས་ལན་གཅིག་ཨ་མར་ཐུག་འཕྲད་བྱེད་དེ་མེ་ཏོག་སོགས་ཀྱི་ལག་སྐྱེས་རེ་ཕུལ་རྗེས་རང་སར་ལོག་འགྲོ་བཞིན་ཡོད། ཡང་ནུབ་ཕྱོགས་པ་རེ་འགས་རྒན་གསོ་ཁང་དུ་ལུས་བའི་ཨ་མར་དངོས་སུ་ཐུག་འཕྲད་མི་བྱེད་པར་བཀྲ་ཤིས་བའི་ཤོག་བྱང་དང་མེ་ཏོག་རེ་བསྐུར་ཏེ། ལོ་གཅིག་གི་ནང་དུ་ཉིན་གཅིག་ཨ་མ་དྲན་གསོ་བྱེད་བཞིན་ཡོད། དེ་ལྟའི་བརྒྱུད་རིམ་ཞིག་ལས་ཨ་མའི་དུས་ཆེན་སྲུང་བརྩིའི་སྲོལ་འདི་གྲུབ་པ་ཞིག་རེད་འདུག མདོར་དེད་ནས་བཤད་ན་ཨ་མ་རང་ཁྱིམ་ནས་ཕྱིད་ཕུད་དེ་རྒན་གསོ་ཁང་བསྐྱལ་རྗེས་གྱི་ལོ་གཅིག་གི་ནང་དུ་ལན་གཅིག་ཨ་མར་ཐུག་འཕྲད་བྱེད་པའི་ཉིན་མོ་ཞིག་བརྩི་སྲུང་བྱེད་པ་རེད།
སྲོལ་ལུགས་འདིའི་བརྒྱུད་རིམ་དང་རྒྱབ་ལྗོངས་འདི་དག་ནི་ཨ་མ་ལ་ཤ་གསེང་རུས་གསེང་ནས་བྱམས་བརྩེ་འགྱུར་ལྷད་མེད་པ་ཞིག་གི་གཤིས་ཀྱི་ངོས་ནས་བསམ་ན་ཤུན་དུ་ནས་མ་རངས་བའི་ཁྲེལ་མེད་ལུགས་མེད་ཞིག་ལས་མ་འདས། གནས་སྟངས་དང་བརྒྱུད་རིམ་འདི་འདྲ་ཞིག་གི་ཐོག་ནས་ཨ་མའི་ཉིན་མོ་སྲུང་བརྩི་དང་ཨ་མ་དྲན་གསོ་བ་ནི་ཨ་མ་ལ་ཡི་མ་རངས་པ་དང་བློ་མ་མོས་པའི་དན་རྟགས་ཤིག་ཅི་ལ་མིན། ངེད་བོད་པ་ཚང་གི་གཞོན་རབས་རྣམས་ཅལ་འདྲོགས་ལ་རྒྱུགས་ཆེ་ལ་དང་། ཨག་གསར་ལ་དགའ་དྲགས་པས་ནུབ་ཕྱོགས་པའི་གོམས་སྲོལ་དང་འགྲོ་ལུགས་གང་ཡིན་གྱི་བཟང་ངན་དང་སྐྱོན་ཡོན་བདེན་རྫུན་སོགས་ལ་གཟབ་ནན་གྱིས་མི་དཔྱོད་པར་ངེས་པར་ཡིན་ཤག་ཤག་གིས་རློམ་རྐྱང་བྱེད་པ་ནི། མི་རིགས་འདི་ཚུགས་ཐུབ་ཀྱིས་གནས་དཀའ་བའི་ཉེན་ཁ་ཞིག་ཏུ་མཐོང་།
དེར་བརྟེན། ངེད་བོད་པ་ཚང་གི་གཞོན་རབས་རྣམས་དབྱར་དགུན་སྟོན་གསུམ་གྱི་གནམ་གཤིས་བཞིན་དུས་ནས་དུས་སུ་འགྱུར་འགྲོ་བར་གཞིག་ན། མ་འོངས་བའི་ངེད་བོད་པ་ཚང་གི་ཨ་མ་རྣམས་ཀྱིས་ཀྱང་ནུབ་ཕྱོགས་པའི་ཨ་མ་དག་གི་ལས་དབང་བཞིན། རྒན་གསོ་ཁང་དུ་མིག་མཐར་མིག་མཆི་མས་ཁེངས་ཤིང་སེམས་པ་སྡུག་བསྔལ་གྱིས་གཟེར་ནས་སྐྱོ་ལྷང་ལྷང་ངང་། ཁེར་རྐྱང་གི་རི་དྭགས་བཞིན་ལོ་དང་ཟླ་བ་ཉིན་མ་དང་དུས་ཚོད་འུ་ཐུག་ཐབས་ཟད་ཀྱིས་བསྐྱལ་དགོས་པའི་དུས་ཤིག་སླེབས་མི་སྲིད་པའི་གདེང་ཚོད་སུ་ལ་ཡོད།
ངེད་བོད་པ་ཚང་གི་ཨ་མ་རྣམས་སྔོན་ནས་ད་ལྟའི་བར་རང་རང་ཕྲུག་གུ་རྣམ་པས་གཡས་སྐྱོར་གཡོན་སྐྱོར་དང་། དེ་དག་གི་འགྱུར་ལྷད་མེད་པའི་བྱམས་བརྩེ་དྲོད་མོའི་རུམ་ཁུང་ལས་ལུས་སེམས་ཡ་ཡོ་མེད་པའི་བརྟན་བརླིང་བག་ཕབ་ངང་འཛུམ་ཤིག་ཤིག་གིས་ངེད་བོད་པ་ཚང་གི་ཨ་མ་རྣམ་པའི་མི་ཚེ་མཐར་སོན་འགྲོ དེར་བརྟེན། ངའི་གཤིས་ཀྱི་ངོས་ནས་བཤད་ན་ནུབ་ཕྱོགས་པས་ཨ་མར་དྲིན་གསོ་བའི་སྲོལ་{ ནུབ་ཕྱོགས་པའི་དུས་ཆེན} འདི་ནི་ངེད་བོད་པ་ཚང་གི་སེམས་སུ་འཇགས་མི་རུང་བའི་སྲོལ་ཞིག་ཏུ་མཐོང་།
ཨ་མའི་བྱམས་བརྩེ་དང་ཨ་མའི་བཀའ་དྲིན་ནི་དྲ་བའི་བརྒྱུད་ལམ་ཁག་ཏུ་ཨ་མའི་བྱམས་བརྩེ་མཚོན་པའི་པར་རིས་འདྲ་མིན་དང་འདུ་ཚོར་གྱིས་སྟོང་བའི་རྩོམ་ཡིག་ཐན་ཐུན་ཞིག་འདམས་བཀོད་དང་བརྒྱུད་བསྐུར་བྱེད་པ་ཙམ་གྱིས། ཨ་མའི་དྲིན་དྲན་པ་དང་དྲིན་གསོབ་པར་བསམ་ན་ཁྱོད་ཀྱི་སེམས་པའི་ཟབ་ས་ནས་ཨ་མ་འཁྲུངས་མེད་པ་མངོན་པར་རྟོགས། ཁྱོད་ཀྱི་སེམས་པའི་ཟབ་སར་ཨ་མའི་བྱམས་བརྩེ་དང་དུང་ཞེན་རྣམ་མ་ཞིག་འཁྲུངས་ཡོད་ན་དེ་དག་ནི་ཕྱིའི་བརྙན་གཟུགས་སུ་བཀོད་པ་དང་ངག་གི་དབྱངས་རྟ་རུ་གྱེར་བས་མཚོན་མི་ཐུབ་པ་དང་གསོབ་མི་ཐུབ་པ་ངེས་པར་ཤེས་དགོས།
ང་ཚོའི་སེམས་སུ་འཇགས་པའི་ཨ་མའི་བྱམས་བརྩེ་དང་བཀའ་དྲིན་ནི་གཟུགས་རྡུལ་གྱིས་གྲུབ་པའི་སྣང་བརྙན་ཞིག་མ་རེད། སེམས་ཀྱི་གཤིས་ལུགས་སུ་འཐིམས་པའི་ཡལ་དུ་མེད་པ་དང་བསུབ་ཏུ་མེད་པའི་ནམ་མཁའ་རུ་བཀོད་པའི་ཆེས་ཡིད་དུ་སྡུག་པ་ཞིག་རེད། དེར་བརྟེན། ཐེག་པའི་ཆེན་པོའི་གཞུང་ལུགས་ལས་མཁའ་མཉམ་འགྲོ་བའི་དོན་དུ་རྫོགས་པའི་བྱང་ཆུབ་གྱི་སེམས་ཁྱད་པར་ཅན་བསྐྱེད་པའི་སྐབས་སུ་ཡང་། མར་ཤེས་པ། དྲིན་དྲན་པ། དྲིན་གཟོ་བ་ལ་སོགས་པའི་རྒྱུ་འབྲས་མན་ངག་བདུན་གྱི་སྒོ་ནས་རྫོགས་པའི་སངས་རྒྱས་རྣམས་ཀྱི་ཐུགས་དང་པོ་སྐྱེད་ཚུལ་གསུང་གི་ཡོད། དེ་ལྟར་འགྲོ་བ་སེམས་ཅན་ཐམས་ཅད་རང་གི་ཨ་མར་འདུ་ཤེས་པ་དང་དེའི་དྲིན་པ་ལ་སོགས་པའི་སྒོ་ནས་སེམས་བསྐྱེད་ཚུལ་གསུངས་དགོས་པའི་རྒྱུ་མཚན་ཡང་། ཨ་མ་ནི་འགྲོ་བ་རིགས་དྲུག་ཐམས་ཅད་ཀྱི་སེམས་ཀྱི་ཟབ་སར་འཁྲུངས་པ་ཡོད་པ་དང་། སེམས་སུ་ཆེས་ཡིད་དུ་འོང་བ་ཞིག་གི་ངོ་བོར་འཐིམས་ཡོད་པས། སྐྱེ་དགུ་ཐམས་ཅད་མར་འདུ་ཤེས་པ་དང་དེའི་དྲིན་དྲན་པ་སོགས་ཀྱི་སྒོ་ནས་རྫོགས་པའི་བྱང་ཆུབ་ཏུ་ཐུགས་སྐྱེད་ན། བསྐྱེད་པ་མྱུར་བ། བསྐྱེད་པ་ཟབ་པ། བསྐྱེད་པ་གསལ་བ། བསྐྱེད་པ་བརླིང་པ་སོགས་ཀྱིས་དགོས་མཚན་ཆེན་པོ་ཡོད་པའི་སྟབས་ཡིན་པར་བསམ།
དེར་བརྟེན། ང་ཚོའི་སེམས་སུ་ཨ་མ་ནི་ཆེས་རླབས་ཆེ་བ་ཞིག་དང་ཆེས་བླ་ན་མེད་པ་ཞིག་གྱུར་ཡོད། དེ་ཡང་ཐེག་པ་ཆེན་པོའི་གཞུང་ལུགས་ཀྱི་ཤུགས་རྐྱེན་ཞིག་ཏན་ཏན་ཐེབས་ཡོད་པར་བསམ། རྒྱུ་མཚན་དེ་དག་གིས་ང་ནུབ་ཕྱོགས་པའི་ཨ་མའི་དུས་ཆེན་གྱི་སྲོལ་འདི་ལ་མོས་མཐུན་ཡེ་ནས་མེད། ང་མཚོན་ན་ཨ་མའི་དུས་ཆེན་སྲུང་བརྩི་ནི་མི་ཚེ་མཐའ་ཟད་མ་བར་དུ་བྱེད་དགོས་པ་ལས་ནུབ་ཕྱོགས་པ་བཞིན་ཉིན་གཅིག་ལ་དེ་ལྟར་བྱེད་པས་འདོད་བློ་གཏད་ནས་མི་ཚིམས། ང་ཚོ་ཚང་མ་དྲིན་ཆེན་ཨ་མ་ལ་སེམས་སེམས་པའི་གཏིང་ནས་ཤ་རུས་པའི་གསེང་ནས་བློ་ཉེ་ན། ཉིན་མ་སུམ་བརྒྱ་དྲུག་བཅུར་ཨ་མའི་དུས་ཆེན་སྲུང་བརྩི་དགོས་པ་ལས་ལོ་ཟླ་འགས་དྲིན་མི་གསོབ། དེ་ཡང་དྲིན་ཆེན་ཨ་མ་ལ་བཀྲ་ཤིས་བའི་ཤོག་བྱང་དང་ཁ་བཏགས་མེ་ཏོག་སོགས་ཁྲ་ཁྲ་ཟང་ཟིང་གིས་མཆོད་པ་བཤམས་མི་དགོས། ཉིན་མ་རེ་རེ་ལ་ཨ་མའི་ཆེད་དུ་ཚོགས་གསོག་སྒྲིབ་སྦྱང་ལ་འབད་པ་དང་གཞན་ལ་རེམ་འདེགས་དང་རོགས་སྐྱོར་སོགས་ཀྱི་བྱ་བཟང་དོན་བཟང་རེ་སྒྲུབ་ཐུབ་ན་དེ་ལས་ལྷག་པའི་ཨ་མའི་དུས་ཆེན་སྲུང་བརྩི་ཞིག་མེད། འདི་ངེད་བོད་པ་ཚང་གི་ཨ་མའི་དུས་ཆེན་སྲུང་བརྩི་བྱེད་ལུགས་རྣལ་མ་དེ་ཡིན། །
༢༠༡༦/ ༥/ ༨ ཉིན་ལ་བྱ་གཞུང་འཇམ་བྷེ་ནས།
ཁྱོད་བྱིས་པ་ཞིག་རེད།
འཇམ་བྷེས་བཤད་པར་བརྒྱ་ཆ་བརྒྱ་བདེན་པ་རེད། ད་དུང་ཨ་མའི་དྲན་གསོ་ཉིན་མོ་ལ་མང་པོ་ཅིག་གུང་སེང་རེད་ཟེར་ནས་ལས་ཀ་འགྲོ་མ་དགོས་ཟེར་དགའ་ཚོར་ལས་ཨ་མའི་ཆེད་དུ་བཀྲིན་དྲན་གསོ་དང་ཅི་མི་འདུག་གདའ། ནུབ་ཕྱོགས་པའི་ལུགས་སྲོལ་ལ་ཞེན་ཡུལ་དེ་འདྲ་རེད།
ནུབ་ཕྱོགས་ཡུལ་ན་ཕ་མ་དང་བུ་ཕྲུག་བར་ལ་བརྩེ་བ་དང་བློ་ཐག་ཉེ་བོ་དེ་ཙམ་མེད་པ་ཕལ་ཆེར་བདེན་པ་རེད། ཡིན་ཡང་དེ་ནི་བུ་ཕྲུག་གཅིག་པོའི་ལན་པ་མ་ཡིན། ཕ་མས་སོ་སོའི་བུ་ཕྲུག་བསྐྱངས་སྟངས་ཀྱིས་ཀྱང་རེད་འདུག འཇམ་བྷེ་ནས་བཤད་པ་ལྟར་སོ་སོའི་བུ་ཕྲུག་གིས་ཨ་མ་ཁྱིམ་ནས་ཕུད་པ་བདེན་པ་མ་རེད། ནུབ་ཕྱོགས་ཡུལ་ན་སོ་སོའི་ཕྲུག་གུ་རང་ལོ་བཅོ་བརྒྱད་ལོན་ཚེ་ཕ་མ་མཉམ་དུ་འདུག་སྲོལ་མེད་པ་དེ་རེད། དེའང་ཁ་ཅིག་ཕ་མས་སོ་སོའི་ཕྲུག་གུ་ཕྱི་ལ་ཕུད་པ་རེད། ཁ་ཅིག་ཕ་མ་མཉམ་དུ་འདུག་འདོད་མེད་པར་ཕྱི་ལ་ཐོན་པ་རེད། ཤེས་དགོས་རྒྱུ་གཅིག་ལ་ནུབ་ཕྱོགས་ཕྲུག་གུ་ཚོས་ཕ་མ་དང་རྒན་རབས་ཀྱི་བསླབ་བྱ་ལ་ཉན་འདོད་མེད། དེའི་སྟོབས་ཀྱིས་ཕ་མ་དང་རྒན་རབས་པ་ཚོས་ཀྱང་དེ་མ་བྱེད་འདི་བྱོས་ཟེར་བའི་བསླབ་བྱ་ཧ་ལམ་མེད་པ་འདྲ་བོ་རེད། །
ཏྲེ་ཧོར་བྱམས་པ་རིན་ཆེན། རྒྱབ་སྐྱོར་གནང་བ་བཀའ་དྲིན་ཆེ། མ་ཟད་ངེད་དག་གི་འདོད་ཕྱོགས་དང་བསམ་སྟངས་གཅིག་ཏུ་འབབ་གི ངས་ཀྱང་གཞོན་རབས་རྣམ་པ་རང་རང་གི་སྲོལ་རྒྱུན་དགོས་ཉིང་འདོད་ཞེན་མེད་པར་ཕྱི་གླིང་བའི་གོམས་སྲོལ་སོགས་ལ་ཅལ་འདྲོགས་དང་ཧོར་རྒྱུགས་བྱེད་སྟངས་དེ་དག་ནོར་འཕྱུག་ཆེན་པོ་ཉིད་དུ་སྒྲོགས་བཞིན་ཡོད།
རྟ་བདུན་དབང་པོས་བསམ་ཚུལ་གསུངས་བར་བཀའ་དྲིན་ཆེ། ངས་བཤད་འདོད་པ་དེ་ངེད་བོད་པ་ཚང་ལ་ཕ་མ་གཉེར་སྐྱོང་དང་བྱམས་པས་གཅེས་སྟངས་སོགས་གོམས་སྲོལ་ཧ་ཅང་གི་ཡག་པོ་ཚད་མེད་ཞིག་ཡོད་པས་དེ་དག་ལས་ཕ་མའི་དྲིན་གསོབ་བ་དང་དྲིན་དྲན་པ་མཆོག་ལས་ནུབ་ཕྱོགས་པའི་གོམས་སྲོལ་ངན་པ་དེར་འཇུག་དགོས་དོན་མི་འདུག་ཟེར་བ་དེ་ཡིན།
ནུབ་ཕྱོགས་པའི་ལུགས་སྲོལ་རྣམས་ཨེ་ཡག་ཀི་ཨ། ཕ་མ་རྒས་ཁར་རྒས་གསོ་ཁང་ནང་སྐྱེལ་ནས་ལོ་རེར་བལྟ་ཙམ་ཡོང་། ག་དུས་ཤི་ན་སྙམ་ནས་ཕ་མའི་རྒྱུ་ནོར་ལ་བརྐམ་འདོད་མཁན་མང་པོ་མཐོང་རྒྱུ་ཡོད་ལ། ལྷག་པར་དུ་ནུབ་གཞོན་གྱིས་ལད་འདོད་ལྟར་ཕ་མའི་བགོ་ལབ་ཉན་མི་འདོད་པ་དེང་སང་བོད་མིའི་ནང་ཤན་ཆེ་རུ་སོང་གི་ཡོད་པའི་རྟགས་ཉེ་བའི་ཆར་སུད་སི་ནང་དུ་བོད་པའི་ཕ་གཅིག་གིས་རང་གི་ཕྲུ་གུ་ལ་བསླབ་བྱ་རྒྱག་པ་སོགས་ཀྱི་རྐྱེན་པས་ཕྲུ་གུ་དེས་ཕ་ཁྲིམས་ཁང་ནང་སྐྱེལ་ཡོད་པ་རེད། ད་ལྟོས་དང་ཡག་མོ་ཨེ་འདུག་གམ།
ཏྲེ་ཧོར་ལགས། སུད་སུ་ཕ་དེ་ཁྲིམས་ཁང་ལ་ཇི་ལྟར་ཚུད་པ་རེད། རང་གི་བུ་ལ་བསླབས་བྱ་རྒྱབ་པ་ཙམ་གྱིས་ཁྲིམས་ཁང་ལ་ཚུད་ཀྱི་མ་རེད་སྙམ། དེའི་སྐོར་གསལ་བྱེད་ཅིག་གནང་རོགས་ཞུ། །
ཏྲེ་ཧོར་བྱམས་པ་རིན་ཆེན་ལགས། སུད་སི་ནང་ཨ་ཕས་བུ་ཕྲུག་ལ་བསླབ་བྱ་རྒྱབ་པ་རྐྱེན་གྱིས་བུ་ཕྲུག་དེས་ཨ་ཕ་ཁྲིམས་ཁང་དུ་སྐྱེལ་ལུགས་བཀོད་པ་དེ་འདྲ་ཅང་ཨེ་ཡིན། ངས་བསམ་པར་རྒྱུ་མཚན་གཞན་ཞིག་ཡོད་པ་ངེས་པ་ཡིན། ཕྱི་རྒྱལ་གྱི་ཁྲིམས་གཏུགས་བྱ་རྒྱུ་ལས་སླ་པོ་མེད་པ་རེད་གདའ། རྒྱུ་མཚན་ཤོད་དགོས་པ་ལས་རང་སྣང་གང་དྲན་ཞུ་གཏུགས་བྱ་ཐབས་མེད་པ་མ་ཟད། ཁྲིམས་ཁང་ནས་ཀྱང་ཁས་ལེན་རྒྱུ་དཀའ་མོ་རེད།
རྟ་བདུན་དབང་པོ་དང་ཛ་ཆུ་ཁའི་ཕོ་ཉ་གཉིས་ནག་ཁུང་ནང་ཡིབ་མ་སྡོད། དངོས་སུ་ཐོན་ཤོག་དང་ངས་ཁྱོད་གཉིས་ལ་ར་སྤྲོད་གཏོང་ཆོག་་་་་་དེ་མིན་དབྱེན་སྦྱོར་བ་རྣམས་ལ་གསལ་བཤད་དགོས་པ་མི་འདུག་གོ།
ཏྲེ་ཧོར་བྱམས་པ་རིན་ཆེན་ཟེར་བ་འདིས་རང་ལ་མོས་མཐུན་མེད་པའི་མཆན་བཏབ་མཁན་ཡོད་ཚད་ལ་༼ནག་ཁུང་ནང་ཡིབ་མ་སྡོད། དངོས་སུ་ཐོན་ཤོག་ གདོང་དང་གདོང་ཐུག་དགོས༽ཞེས་བརྗོད་འདུག་ རིག་པས་དཔྱད་ནས་ཁ་གཏད་མ་ཐུབ་ཙང་གྲི་བཏོན་དགོས་བསམ་གྱི་ཡོད་པ་མ་རེད་དམ་།
ཧཧཧཧ་་་་ཀ་བ་ཚེ་རིང་་་་་མིང་དང་ཕྱག་ལས་གཉིས་ཀ་མཚུངས་འདུག་་་་བདེན་རྫུན་དཔྱད་པ་ལ་དང་པོ་མི་ངོ་ཤེས་དགོས་གལ་ཆེ་དྲན། མི་ཚང་མ་ང་ལ་མོས་མཐུན་དགོས་ཟེར་མ་མྱོང་། རིག་པས་དཔྱད་ཨེ། མུན་ནག་ལྐོག་མདའ་འཕེན་རྒྱུ་ལ་རིག་པས་ག་འདྲ་སེ་དཔྱད་དགོས་སམ། གྲི་བཏོན་དགོས་སར་ཅིག་ལ་སླེབས་སོང་ན་རྔན་པ་ཕུལ་རྐྱང་ཡིན་གདའ། གཞན་སྨྱོན་པ་ནི་མ་རེད། དཀྲུག་ཤིང་ནི་རྒྱག་དགོས་མེད།
ཧཧཧ ཀ་བ་ཚེ་རིང་ལགས་ཀྱི་གསུང་པ་བདེན་ནོ། ཏྲེ་ཧོར་བྱམས་པ་རིན་ཆེན་ཟེར་བ་འདི་ལ་བདེན་བརྫུན་གནས་ཚུལ་གང་ཡིན་ཐད་རྒྱུ་མཚན་བཀོད་ནས་བགྲོ་གླེང་བྱ་རྒྱུའི་རྣམ་དཔྱོད་ལྡན་མིན་ཁོང་གི་མཆན་ནས་གསལ་པོ་ཤེས་ཐུབ། རང་ཉིད་ནས་ཀླད་པ་དཀྲུག་སྟེ་ཁ་གཏད་བཅག་མ་ཐུབ་དུས་སྡིགས་བསྐུལ་བྱ་རྒྱུ་ལས་འདས། སྐྱེ་བོ་དེ་འདྲའི་རིགས་ལ་ངས་རྩོད་པ་མི་རྒྱག། དུས་ཚོད་འཕྲོ་བརླག་ལས་ཕན་ཐོག་གང་ཡང་མེད།