སྤོབས་པ་མཐའ་ཡས།
སངས་རྒྱས་གཡུང་དྲུང་བོན་གྱི་བསྟན་པ་རིན་པོ་འདི་ཉིད་ཆེས་སྔ་མོའི་དུས་ནས་བོད་དུ་དར་ཞིང་མཁས་གྲུབ་ཀྱིས་སྐྱེས་ཆེན་རྣམས་ཀྱིས་དབུ་ཁྲིད་དེ་དགེ་འདུན་འདུས་པའི་ཚོགས་དང་དད་ལྡན་མང་ཚོགས་ཀྱིས་རྒྱབ་སྐྱོར་ཀྱིས་ད་ལྟའི་བར་དུ་མ་ཉམས་པར་གནས་ཡོད། འོན་ཀྱང་བཙན་པོ་སྲོང་བཙན་གྱི་དུས་སུ་ཞང་ཞུང་གི་སྲིད་དབང་གཡོ་ཐབས་ཀྱིས་བརླགས་ཤིང་ཐུབ་པའི་བསྟན་པ་བོད་དུ་དར་མགོ་ཚུགས་ཚུན་ནས་དངོས་ཤུགས་བརྒྱུད་གསུམ་ནས་བོན་དང་བོན་གྱི་ལུགས་འཛིན་པ་དག་ལ་སྙད་གཙེར་སྡང་ཟུག་གི་ཐབས་ལམ་འདྲ་མིན་བྱས་ཡོད། དཔེར་ན། གདོད་མའི་བོན་དང་གཡུང་དྲུང་བོན་གྱི་ཁྱད་པར་མ་ཕྱེས་པར་གདོན་གཟུགས་བོན་གྱི་བསྟན་པ་ཞེས་བསྣུབ་དགོས་པའི་སྲིད་ཅུས་མི་འདྲ་བ་ལག་བསྟར་བྱས་ཚུལ་གཏེར་མར་གྲགས་པའི་པདྨ་བཀའ་ཐང་དང་མཁའ་འགྲོ་ཡེ་ཤེས་མཚོ་རྒྱལ་གྱི་རྣམ་ཐར་སོགས་སུ་གསལ་བ་ལྟར་ཡིན།
འོན་ཀྱང་ལོ་རྒྱུས་ནི་ལོ་རྒྱུས་རང་རེད། འདས་ཟིན་པ་རེད། དེས་ང་ཚོར་ཕན་གནོད་གང་ཡང་མེད་པར་སྣང་ཡང་ལོ་རྒྱུས་ལ་སློབ་སྦྱོང་དང་རྗེས་དྲན་བྱ་རྒྱུ་ནི་སྤྱི་ཚོགས་ཀྱི་ད་ལྟའི་གནས་སྟངས་དང་མ་འོངས་པའི་མདུན་ལམ་གྱི་སྟེང་གི་ལེགས་ཉེས་བླངས་དོར་ཤེས་པའི་དགོས་པ་ཆེན་པོ་ཡོད། རང་རེ་ཆོས་སྲིད་ཀྱི་ལས་ཀྱི་སྣེ་མོར་གཏོགས་པ་དང་ཤེས་ཡོན་ཅན་གྱི་མདུན་གྲལ་ན་འགྱེངས་བ་ཚོས་མཐུན་འབྲེལ་དང་ཞི་བདེ། མཐོང་རྒྱ་ཅན་དང་དེང་རབས་དང་བསྟུན་དགོས་ཚུལ་སོགས་མ་ཎི་འདོན་འདོན་བྱེད་པའི་དུས་རབས་འདིའི་ནང་ཐབས་བརྒྱ་ཅུས་སྟོང་གིས་རང་རིགས་ནང་ཁུལ་གྱི་མཐུན་ལམ་དང་ཞི་བདེ་ནི་ས་ལམ་ཐམས་ཅད་ཀྱི་གཞི་དང་རྩ་བར་འཇོག་དགོས་པ་ལྟ་ཅི་སྨྲོས། དེའི་ཕྱིར་ང་ཚོས་དད་པ་དག་སྣང་ཟེར་བའི་མཐོ་ཞིང་གཉན་པའི་ཉམས་ལེན་དེ་མ་འཁྱོངས་ཀྱང་བོད་ཅེས་པའི་རིགས་རུས་སྐྱིད་སྡུག་གི་ཆར་གདུགས་གཅིག་གི་འོག་ན་འཚོ་བའི་ཤ་ཞེན་དང་འཇིག་རྟེན་མི་ཆོས་ཀྱི་ཡ་རབ་ལུགས་སྲོལ་ཙམ་དབང་བཙན་པར་བྱས་ནས་ཀྱང་གཡུང་དྲུང་བོན་གྱི་ལུགས་འཛིན་པ་དག་ལ་བརྩི་འཇོག་དང་བོན་གྱི་གནའ་དེང་གི་གནས་སྟངས་སྐོར་ལ་གཟུ་བོའི་དྲང་གཏམ་རེ་འཆད་རྒྱུ་དེ་ཡང་གལ་ཆེན་ཞིག་ལོས་ཡིན།
རང་རེའི་སྤྱི་ཚོགས་ལ་མཚོན་ན་སངས་རྒྱས་གཡུང་དྲུང་བོན་དང་སྟོན་པ་ཤཀྱ་ཐུབ་པའི་བསྟན་པ་གཉིས་འགལ་བ་ལྟག་སྤྲོད་ཅིག་ཏུ་ལྟ་བའི་ལུགས་སྲོལ་དེས་མི་རིགས་ནང་ཁུལ་གྱི་མཐུན་འབྲེལ་དང་ཆོས་ལུགས་པའི་མཐུན་ལམ་ཆིག་སྒྲིལ་ལ་གནོད་སྐྱོན་བྱུང་ཞིང་འབྱུང་བར་འགྱུར་བ་ཡིན་ནོ། གཡུང་དྲུང་བོན་གྱི་བཀའ་བསྟན་གླེགས་བམ་བཞི་བརྒྱ་ལྷག་ཅིག་བཞུགས་པ་དེ་ནི་གངས་ཅན་རིག་པའི་བང་མཛོད་ནང་གི་ཆེས་རྩ་བའི་ནོར་བུ་ཞིག་ཡིན་ཞིང་གཡུང་དྲུང་བོན་གྱི་དཔེ་རྙིང་དག་ལ་ལྟ་ྐློག་ལེགས་པོ་བྱེད་ཐུབ་ན་ལྟ་གྲུབ་ཀྱི་རིན་ཐང་གཅིག་པོ་མ་ཡིན་པར་བོད་ཀྱི་གནའ་བོའི་ལོ་རྒྱུས་དང་། སྐད་ཡིག རྩོམ་རིགས། ཡུལ་སྲོལ་གོམས་གཤིས་ཚུན་ལ་གོ་རྟོགས་གང་མང་ཞིག་སྐྱེད་ཐུབ་པར་གདོན་མི་ཟའོ། །
འདས་པའི་ལོ་རྒྱུས་ཀྱི་ནང་དུ་བོད་ཀྱི་བོན་པོ་ཚོས་ཆོས་ལུགས་ཚོགས་སྡེའི་འགལ་ཟླའི་གཉའ་གནོན་དང་གདུག་རྩུབ་ཀྱི་ལོ་ཟླ་རིང་པོ་ཞིག་བརྒལ་དགོས་བྱུང་། དུས་རབས་སྔོན་མའི་དཀྱིལ་ནས་བོད་ཀྱི་གནས་བབ་ལ་རྟ་རྒོད་ཀྱི་འགྲེ་ལྡོག་བརྒྱབས་པ་ལྟ་བུའི་འགྱུར་བ་བྱུང་རྐྱེན་གྱིས་ཆོས་སྲིད་རིག་གཞུང་གི་གནས་བབ་རླུང་གསེབ་ཀྱི་མར་མེའི་རྗེས་སུ་འགྲོ་བ་ཙམ་དུ་གྱུར་པ་དེ་ཡང་རྒུད་པའི་རྩ་བ་བཙལ་ན་ནང་ཁུལ་གྱི་ཚོགས་སྡེ་ཁག་མཐུན་འབྲེལ་དང་ཆིག་སྒྲིལ་མ་བྱུང་བ་དེ་རྐྱེན་རྩ་སྡུག་ཤོས་ཤིག་ཏུ་གྱུར་ཡོད། ནད་ནི་ཤེས་བྱ་ནད་ཀྱི་རྒྱུ་ནི་སྤང་བར་བར་བྱ། ཞེས་པ་ལྟར་ང་ཚོས་རྒུད་པའི་རྩ་བ་ནང་ཁུལ་མཐུན་འབྲེལ་ལེགས་པོ་མ་བྱུང་བར་ངོས་ཟིན་ན་ཅིས་ཕྱིར་ད་དུང་ཡང་བོན་པོ་ཚོར་མཐོང་ཆུང་དང་གཉའ་གནོད་གང་ཐུབ་བྱེད་པའི་བག་ཆགས་དེར་འགྱུར་བ་གཏོང་མི་འདོད་པ་རེད།
ཉེ་ཆར་ངས་བོད་ནང་གི་བོད་ཡིག་དྲྭ་རྒྱ་ཞིག་ལས་འདྲ་པར་ཞིག་མཐོང་བྱུང་། དེ་ནི་བོན་ཀྱི་གཟུངས་སྔགས་རྩ་བ་ཆེ་ཤོས་ཤིག་ཏུ་བརྩི་བ། མ་དྲི་མ་ལེ་ས་ལེ་འདུ། འམ། མ་དྲི་མ་ཡེ་ས་ཡེ་འདུ། ཞེས་པ་དེ་ཚོ་རེད། ཁོང་ཚོས་གཟུངས་སྔགས་དེ་རྡོ་ལ་བསྐོས་ནས་ཕྱག་སྐོར་བྱེད་སྲོལ་ཡོད་པ་ཐུབ་བསྟན་པ་ཚོས་མ་ཎི་པདྨེ་རྡོ་ལ་བརྐོ་སྟངས་དང་གཅིག་མཚུངས་ཡིན། ཡིན་ན་ཡང་རྡོ་བརྐོས་གཟུངས་སྔགས་དེ་ཚོའི་སྟེང་དུ་ཁྲམ་རིས་ཤ་སྟག་བྲིས་འདུག དེ་ནི་ཐུབ་བསྟན་པ་ཚོས་བོན་ཆོས་ལ་མི་དགའ་བ་རྒྱུ་མཚན་དུ་བྱས་ནས་དེ་ལྟར་བྱས་པ་རེད་འདུག ང་ཚོས་གཞན་དབང་གི་དཀའ་སྡུག་འདིའི་འོག་དུ་རང་གི་ཆོས་དང་རིག་གཞུང་གནས་ཐུབ་མིན་གྱི་དཀའ་ངལ་འཕྲད་ཡོད་སྐབས་བོད་མི་ལ་ལས་ནང་ཁུལ་གྱི་ཆགས་སྡང་ཙམ་རྒྱུ་མཚན་དུ་བྱས་ནས་གང་ཐུབ་ཐུབ་གྱིས་ནང་གི་མགོ་བོ་རྡུང་བ་མཐོང་སྐབས་དངོས་གནས་སྐྱོ་བའི་ཤུགས་རིང་གི་རྒྱུན་དང་འགྲོགས་པའི་མིག་ཆུ་རྡོག་པོ་རེ་རེ་བཞིན་ངའི་འཁུར་ཁུག་ནས་འདྲིལ་བྱུང་།
རང་རེའི་ྐླད་པའི་གུར་ཁྱིམ་གྱི་ནང་དུ་བོན་པོ་ཞེས་དྲན་སྐབས་ལུས་ངག་གི་འབྲེལ་འདྲིས་གཞན་ལྟ་ཞོག མིག་གི་མཐོང་སར་སླེབས་ཀྱང་འཇིགས་ཡེར་རེར་འགྲོ་བའི་སྲོལ་རྒྱུན་དྲི་མ་ཅན་ཞིག་དུས་རབས་ནས་དུས་རབས་བརྒྱུད་གཏིང་ཟབ་ནས་ཟབ་ཏུ་ཕྱིན། དོན་དུ་ང་ཚོ་འཇིགས་དགོས་ས་དེ་བོན་དང་བོན་པོ་མ་ཡིན་ཞིང་རང་རེ་བོན་པོ་ལ་འཇིགས་པའི་བག་ཆགས་འཇིགས་སུ་རུང་བ་དེས་ང་ཚོ་སྤྱི་སྒེར་ཚང་མའི་མགོ་བོ་རྡུང་བཞིན་འདུག ཕྱིའི་བཙན་འཛུལ་གྱིས་ང་ཚོ་གཙེས་བཞིན་པ་ངོས་ཟིན་དགོས་ལ་དེ་ལས་ཐར་ཐབས་བྱེད་དགོས་ལ། རང་གི་སྤྱི་ཚོགས་ནང་དུ་ཆོས་སྲིད་ཚོགས་སྡེ་གཅིག་གི་གཅིག་ལ་གཉའ་གནོན་དང་སྡང་ཟུག་གི་བྱ་སྤྱོད་བག་ཆགས་སུ་འཇགས་པ་དེ་ཚོ་ནི་ཕྱིའི་བཙན་འཛུལ་དང་གཅིག་ཏུ་མཚུངས་པའི་ལྟ་སྟངས་ཀྱིས་ངོས་འཛིན་དང་མཐར་སྐྲོད་བྱ་རྒྱུ་དེ་ནི་བོད་ཀྱི་མི་རབས་གསར་པས་སྣང་མེད་དུ་ནམ་ཡང་འཇོག་མི་རིགས་སོ།
སྤོབས་པ་མཐའ་ཡས།
བོན་གྱི་སྐོར་ལ་བོད་ཀྱི་སྤྱི་ཚོགས་ནང་དགྲ་གཉེན་གྱི་འགལ་བ་ཆེ་ཚུལ་དེ་འདྲ་ཨེ་ཡིན། ང་ལ་གྲོགས་པོ་གཉིས་ཡོད། ཁོང་གཉིས་དགེ་ལུགས་པའི་གྲྭ་པ་རེད། ཁོང་གཉིས་ཕ་བོན་པོ་རེད། འདི་འདྲ་མང་པོ་མཐོང་མྱོང་། ཡང་ལན་གཅིག་པཎ་ཆེན་རིན་པོ་ཆེ་སྐུ་གོང་མ་བོད་ཀྱི་ས་ཆ་ག་གེ་མོ་ཞིག་ཏུ་ཕེབས་དུས་ཆིབས་བསུ་བྱས་སོང་། དེར་སྔགས་པ་དང་བོན་པོ། དགེ་ལུགས་པ་སོགས་ཐོབ་ཐང་སྐལ་བ་འདྲ་མཉམ་གྱི་ཐོག་ནས་ཕེབས་བསུའི་གྲ་སྒྲིག་རྒྱ་ཆེན་པོ་བྱས་སོང་། ང་ལ་ཡང་བོན་གྱི་སྐོར་ལ་བསམ་ཚུལ་མང་ཙམ་ཡོད། རིམ་གྱིས་ཞུ་ཆོག
མ་གཞི་ནས་ཁྱོད་འདི་ཆི་མོ་གཟིག་རེད། ཁྱོད་འབྲས་ལྗོངས་བློན་པོ་ལ་ཐུག་མྱོང་མཁན། གསར་འབྱོར་བ་ཡིན་ཟེར་ནས་ལ་དྭགས་ལ་བསྐྱོད་མྱོང་མཁན། ཕྱག་གཉིས་པ་དང་མཉམ་དུ་ཆེན་པོ་ཧོར་གྱི་སྐོར་ལ་རྩོད་པ་བྱེད་མཁན། ད་ནི་བོན་གྱི་སྐོར་བསམ་ཚུལ་འདི་འདྲ་མཁན། གང་ལྟར་བན་བོན་མཐུན་དགོས་ཟེར་སའི་ད་ལྟའི་ལྟ་གྲུབ་དེའི་ཐོག་ན་བན་བོན་ལ་ཁྱད་པར་གང་ཡང་མི་འདུག ཡང་ཁྱེད་ཀྱིས་གཟིགས་ཡོད་མིན་མི་ཤེས་མོད་འཇུ་མི་ཕམ་པས་ཀྱང་གཤེན་རབ་ལ་སངས་རྒྱས་དངོས་ཀྱི་འདུ་ཤེས་དང་བཅས་ཕྱག་འཚལ་འདུག དེ་ཙམ་ཡིན།
ད་དུང་གཡུང་དྲུང་བོན་ལ་གཟུངས་སྔགས་རྩ་ཆེ་བ་འདི་འདྲ་ཡོད། ཨ་ཨོ་མ་ཧྲུ། ཨ། ཨ་དཀར་ས་ལེ། འོད་ཨ་དབྱངས་ཨོ་འདུ། ཟེར་བ་ལྟ་བུ་མང་པོ་ཡོད། སྔགས་འདི་སྐྱེ་སྒོ་སྐོར་ལ་རེད། བན་བོན་གཉིས་ཀྱི་འགལ་བ་དང་། བོན་གྱི་རིག་གཞུང་གི་སྐོར་རྗེས་སུ་འབྲི།
སྤོབས་པ་དྲིན་ཆེན་མདུང་ཁ་ནང་ལ་བསྐོར། ཅིག་དཀྲུགས་ཨེ་ཐུབ་ཀི་ལྟོས། ཡེ་ཤེས་དང་ཁྱོའི་གྲངས་ཀི་འཇོན་ནོ་དེ་ཡིན། གནའ་རབས་ནས་དེ་རིང་བར་ད་ལྟའི་གནས་བབ་འདི་འདྲ་ཡག་པོ་ཞིག་བྱུང་མྱོང་མི་འདུག་པ་ཁྱོས་ཀྱང་ལོས་ཤེས། དེ་ཡང་༧གཙོ་བོ་ཁོང་གི་ཐབས་མཁས་ཐུགས་རྗེས་རེད། བྱས་ཙང་ད་ལོ་བོད་ནང་དུ་ངོ་རྒོལ་སྐབས་བོན་པོའི་གྲ་བ་ཞིག་གིས་མི་མང་གི་སྣེ་འཁྲིད་བཞིན་༧གོང་ས་མཆོག་བོད་ལ་ཕེབས་དགོས་ག པཎ་ཆེན་རིན་པོ་ཆེ་བཙོན་ནས་གློད་བགྲོལ་གཏོང་དགོས་ག་ཟེར་ནས་ངར་བཞིན་པ་ངས་གསར་འགྱུར་ལས་མཐོང་སོང་། བོད་ནང་གི་བོད་མི་རྣམ་པས་དྲིན་ཤེས་བྱེད་སར་ཁྱོས་གནད་མ་ཐེག་པ་འདི་གཙོ་བོ་རང་གི་ཀུན་སློང་མ་འགྲིག་པ་རེད།།
དཀོན་མཆོག་ལགས། གནའ་རབས་ནས་དེ་རིང་བར་ད་ལྟའི་གནས་བབ་འདི་འདྲ་ཡག་པོ་ཞིག་བྱུང་མྱོང་མེད་ཅེས་པ་དེས་གང་ཞིག་ཤོད་ཀྱིན་ཡོད། རྒྱ་མི་གུང་ཁྲན་གྱིས་དབང་བསྒྱུར་དེར་ཟེར་གྱིན་ཡོད་དམ། བོན་པོས་བོད་དོན་འཐབ་རྩོད་བྱས་པ་དེ་ལ་དམིགས་བསལ་ངོ་མཚར་རྒྱུ་གང་འདུག ཁྱོད་དེ་ལ་དམིགས་བསལ་ངོ་མཚར་སྐྱེ་རྒྱུ་དེ་ཡང་ཁྱོད་ཀྱིས་བོན་ལ་ལྟ་སྟངས་དང་ཡིད་ཆེས་ཆུང་དྲགས་པའི་རྐྱེན་རེད། ང་རྒྱ་སྐྱེད་རིང་ལུགས་པའི་གདུག་རྩུབ་འོག་ནས་འཚར་ལོངས་བྱུང་རྐྱེན་ནམ་ཡིན་ཡང་སྤྱི་ཚོགས་ཀྱི་སྟོབས་ཤུགས་ཆུང་གྲས་ཀྱི་རྒྱབ་དུ་འགྲེང་རྒྱུར་འབད་བརྩོན་བྱེད་ཀྱིན་ཡོད། ཁྱོད་ཡེ་ཤེས་ལ་མི་དགའ་བའི་རྒྱུ་རྐྱེན་ངས་ཤེས་ཀྱིན་འདུག ཁར་སང་ཁྱོད་ཀྱི་ཨ་ཁུ་དཔོན་གྱི་སྐོར་ནས་གླེང་བྱུང་ང་། དེ་ཁྱོད་ཚོའི་གྲས་ཀྱི་ཡུན་རིང་པོའི་ནད་རྙིང་ཞིག་རེད།
མཐེབ་གཞུང་གསར་བ་འདི་ནས་ད་དུང་ཡིག་རྡོག་ཁ་ཤས་རེག་མ་སོང་། དེ་བས་མཆན་ཐུང་ངུ་ཞིག་འབྲི་བར་ཡང་དཀའ་ལས་ཆེན་པོ་ཞིག་མྱོང་དགོས་འདུག ང་ཡིན་ན་ཕྱི་ལ་བསྐོར་ན་ཞ་ཉེ་མགོ་དང་ནང་ལ་བསྐོར་ན་ལྕགས་ཀྱི་མགོ་ཟེར་བ་ནང་བཞིན་ག་དུས་ཡིན་ན་ནང་ལོགས་སུ་ཁབ་གཙགས་འབིག་གཙགས་བྱེད་སྡོད་མཁན་དེའི་གྲངས་གང་དུ་ཡོད་རུང་ད་ལྟའི་དུས་འདིར་ཕན་ལས་གནོད་ཆེ་བ་ཞིག་ལ་ངོས་འཇིན་བྱེད་སྡོད་མཁན་ཞིག་ཡིན། མ་གཞི་ང་རང་ཆོས་ལ་ཤི་འཐམ་བྱས་ནས་སྡོད་མཁན་དེ་འདྲ་ཅང་མིན་ནའང་ཆོས་ལུགས་ནི་བོད་དོན་དང་ཁ་བྲལ་ཐབས་མེད་པ་ཞིག་ལ་བལྟ་སྡོད་མཁན་དེ་འདྲ་ཞིག་ཡིན། ལྷག་པར་ཏུ་ཆོས་ལུགས་ཁ་ལ་འཁྱེར་ནས་ནང་ཁུལ་འབུར་འཇོམས་གཏོང་སྟངས་འདིས་རང་རེར་གནའ་ནས་ཁེ་བཟང་རེག་མ་མྱོང་ལ་མ་འོངས་པ་ན་ཡང་རེག་ཡ་མེད་པ་གསལ་བོ་ཡིན། བྱས་ཙང་ངས་སྤོབས་པ་སོགས་ལ་བཤད་འདོད་པ་ནི་འདས་ཟིན་པའི་ལུང་རུལ་བ་དང་གཏམ་ཆོ་མེད་དེ་འདྲ་འཁྱེར་ཡོང་ནས་ནང་ཁུལ་གྱི་ཞི་བདེ་མ་དཀྲོགས་རོགས་ཞེས་འབོད་བསྐུལ་གཏོང་གི་ཡོད། ཡང་དགོད་བྲོ་བ་ཞིག་ལ་ངས་ཨ་ཁུ་དཔོན་ཟེར་བ་ལས་ཀྱང་ཁོ་རང་པད་མ་བཀའ་ཐང་གི་སྟེང་དུ་ངར་ལངས་པ་གང་ཞེན་ཁོག་གི་སྐད་ཆ་ཡིན་མིན་ཡང་ཤེས་མི་འདུག ཁ་ཉིན་རིག་རྡོར་གྱི་བཀའ་བསྡུས་ལུང་དྲངས་བར་བསྟོད་པའི་མཐེ་བོང་སྟོན་མཁན་གྱི་སྤོབས་པས་དེ་རིང་པད་མ་བཀའ་ཐང་ལ་ཁྲོ་བོས་མིག་ལོག་བལྟ་སྟངས་འདིར་ང་ཧ་ལས་སོང་བ་མ་ཟད། མི་འདིའི་རང་གཤིས་མཐོང་སོང་ལ་ཁོས་འཆར་གཞི་ཡང་ཧ་གོ་སོང་། ད་ཡིན་ན་སྤོབས་པ་དྲིན་ཆེན་མིག་ཆེ་ཙམ་གདངས་ནས་མདུན་ལ་འགྲོ་རོགས། སྐུ་མཁྱེན།།
དཀོན་མཆོག་ཡ། སྙིང་ཉེ་བའི་དཀོན་མཆོག
ངས་སྤྱི་ཚོགས་ཤིག་གི་མགྲིན་ཚབ་པ་བྱས་ནས་སྐྱིད་སྡུག་གི་གནས་སྟངས་ཤིག་ཤོད་ཀྱིན་ཡོད།
ངས་ལོ་རྒྱུས་ལ་དཔང་པོ་བྱས་ནས་དྲང་བདེན་གྱི་རྒྱུ་མཚན་ཞིག་བགྲང་གིན་ཡོད།
ངས་དངོས་ཡོད་ཀྱི་འཇིག་རྟེན་ལ་བལྟས་ནས་ཉམས་མྱོང་གི་སྡོམ་ཚིག་ཅིག་རྒྱག་གིན་ཡོད།
ངས་རིགས་རུས་ཀྱི་ཞེན་པ་ལ་བསམ་ནས་མཛའ་བརྩེ་ཡི་ཐབས་ལམ་ཞིག་གླེང་གིན་ཡོད།
ངས་ཆོས་སྲིད་ཀྱི་ཆག་འཇིག་ལ་བསམ་ནས་ཛ་དྲག་གི་འབོད་སྐུལ་ཞིག་ཞུ་གིན་ཡོད།
ང་འཐབ་རྩོད་ཀྱི་གཡུལ་ས་འདིའི་སྒང་ནས་ཉམ་ཆུང་གི་རྒྱབ་རྩར་འགྲེང་གིན་ཡོད།
སྐྱིད་སྡུག་གི་གནས་སྟངས་བཤད་མི་ཆོག་ཟེར་མཁན་དེ་རྒྱ་མི་གུང་ཁྲན་གྱི་བྱེད་སྟངས་ངོ་མ་དེ་རེད། ང་ཚོས་འདི་ཚོ་མི་མཐོང་ཁུལ་བྱས་ནས་ཕན་གྱི་མ་རེད།
གཡང་སྐྱབས་རྒྱལ་ལགས། འཇུ་མི་ཕམ་པ་འདིས་སྟོན་པ་གཤེན་རབ་དང་ཀོང་ཙེ་འཕྲུལ་རྒྱལ་སོགས་ལ་ཕྱག་འཚལ་ནས་ཇུ་ཐིགས་དང་རྩིས་ཀྱི་སྐོར་སོགས་མང་པོ་ཞིག་བྲིས་འདུག་མོད། ཁོ་རང་གི་ལྟ་གྲུབ་ངོ་མ་ཤོད་སྐབས་བོན་པོ་ལ་ངན་སྨྲས་བྱས་འདུག དེ་ཡང་དབུ་མ་རྒྱན་འགྲེལ་འཇམ་དབྱངས་བླ་མ་དགྱེས་པའི་ཞལ་ལུང་ཞེས་པ་དེ་ནང་དུ་རྒྱ་གར་དུ་ཕྱི་པ་དང་ནང་པ། རྒྱ་ནག་ཏུ་ཧ་ཤང་དང་ཧུ་ཤང་། བོད་དུ་བན་དེ་དང་བོན་པོ་སྟེ་ལྟ་བ་ཡང་དག་རེ་དང་ལྟ་ལོག་རེ་མཉམ་དུ་འབྱུང་ཚུལ་སོགས་བྲིས་འདུག བོན་པོ་ཚོས་རྒྱ་གར་གྱི་མཁན་པོ་ཞི་བ་འཚོ་དགྲ་རུ་འཛིན་པས་བོན་པོ་ལ་དགའ་མི་རུང་ཚུལ་ཙམ་སྟེ་བོད་ཀྱི་ཐུབ་བསྟན་པ་ཚོའི་སྤྱི་འགྲོས་ཀྱི་དགག་སྟངས་ཙམ་ཞིག་རེད་འདུག་ ད་ཡིན་ན་བླ་ཆེན་རྣམས་དང་ཆབ་སྲིད་ཀྱི་ལས་སྣེ་ན་འགྱེང་བ་ཚོས་བོན་པོ་ཚོར་ལོ་རྒྱུས་ཀྱི་སྟེང་དུ་མཐོང་ཆུང་དང་ཐུབ་ཚོད་བཏང་བ་དེར་དགོང་དག་ཅིག་ཞུ་དགོས་པའི་ཚོད་དུ་སླེབས་འདུག
སྤོབས་པས་ཟེར་ན་ཁོ་རང་ནི་བཙན་པོའི་མགོ་ནས་གནོན་མཁན་དང་གཉོམ་ཆུང་མཐའ་ནས་ལངས་མཁན་ཞིག་ཡིན་ཟེར། དེ་འདྲ་གཟུར་གནས་ཡ་རབས་ཤིག་ཡིན་པ་དངོས་འབྲེལ་ཡིན་ན་རང་རེའི་བོད་མི་ཡོངས་ལ་བཙན་གནོད་གཏོང་མཁན་གྱི་དགྲ་ལ་ཁ་གཏད་ཤིག་ཙམ་ཡང་བྱེད་མི་ཐུབ་པར་ཆོས་ལུགས་བྱེ་བྲག་པ་ཞིག་གི་གཏིང་ནད་འཁྱེར་ནས་བོད་མི་མང་འགྱེལ་བའི་སྒང་ལ་རྡོག་པ་མ་སྤོས་ན་ཅི་མ་ཆོག་གམ། དེང་སང་ན་གཞོན་སྐོར་ཞིག་ཆོས་ཕྱོགས་ལ་ཡིད་ག་འགག་དོན་ཡང་མཐར་གཏུགས་ན་གནའ་ནས་ད་ལྟའི་བར་ཁྱོད་རང་གི་བཟོ་འདྲ་བོ་རེ་ཟུང་གིས་ཆོས་ལུགས་ཀྱི་མིང་འཁྱེར་ནས་བོད་མི་རིགས་འདིར་ཡང་ཡང་ནང་དམེ་དང་ཕམ་ཁ་མང་བོ་ཞིག་གི་སྣེ་དྲངས་ཙང་བྱུང་བ་རེད། འདིར་ཡང་ཡང་ཁྱོད་ལ་གསལ་འདེབས་ཞུ་ཡ་ལ། རང་ངོ་མའི་བོད་མི་མང་ལ་སེམས་པ་རྣམ་དག་ཅིག་དང་བསམ་བློ་ཡོད་མཁན་ཞིག་ཡིན་ན་ད་ནས་ཆོས་ལུགས་ཀྱི་རུལ་དྲི་འདིའི་རིགས་འཁྱེར་མ་ཡོང་རོགས་ཞེས་རེ་འདུན་ཡོད། ད་རུང་མི་ཆོག་ཤུགས་ལྡན་རྗེས་འབྲངས་ནང་བཞིན་ཆོས་ལུགས་ཁ་ལ་བཟུང་ནས་ནང་ཁུལ་དཀྲུགས་དཀྲུགས་གཏོང་གི་ཡིན་ཟེར་ན་ཁྱོས་ལྟོས། ནམ་ཞིག་ང་ཐེ་བའི་བོད་མི་ཐམས་ཅད་ཀྱིས་ཁྱོད་རང་གྲངས་ལ་སྟོན་གཞུག་བུ་ལོན་འདེད་པའི་ཉི་མ་ཞིག་ཡོང་གི་རེད།།
སེམས་ཀྱི་ཁེན་ས་ལྟ་བུའི་མི་ཞིག་འོད་སྣང་བཞིན་ང་ཚོ་དང་གྱེས་སོང །
ང་ཚོ་བོད་པ་ཚོ་འཚོ་ཞིང་གནས་བཅས་པའི་གོ་ལ་ཟླུམ་པོའི་ཡང་རྩེ་དེར། རྒྱ་ནག་དམར་ཕྱོགས་པས་བཙན་འཛུལ་དྲག་པོ་བྱས་ཏེ་ཆོས་དང་རིག་གཞུང་གང་ཐད་ནས་གཏོར་སྐྱོན་ཚད་མེད་བྱུང་བ་འདི་དག་ང་ཚོས་འཛམ་གླིང་ཕྱོགས་ཀུན་ཏུ་གསལ་བར་བསྒྲགས་མོད། བདེན་པ་ལ་ཤུགས་ཆེ་བའི་ཁ་གཡང་ཙམ་ལས་བོད་པ་ཚང་གི་རྩ་བའི་གནད་དོན་ཆ་ཚང་འཇིག་ཉེན་གྱི་ཉེན་ཁ་ལས་སྐྱོབ་ཐུབ་མེད་པ་རེད། འདི་ལྟར་ཡུན་རིང་དུ་ཕྱིན་ཚེ་བོད་ཅེས་པ་འདི་ཤོག་ངོས་ཀྱི་མི་རིགས་ཤིག་ཏུ་འགྱུར་རྒྱུ་ཉག་གཅིག་ཡིན་པ་ཚང་མས་ཤེས་གསལ་ཡིན་པ་ལྟར། ད་ཆ་ང་ཚོ་བཙན་བྱོལ་བ་ཚང་མས་གཞིས་ལུས་སྤུན་ཟླ་ཚོའི་ཞེ་ལ་བརྣགས་པའི་བོད་རང་བཙན་གྱི་ལྟ་གྲུབ་འདི་རང་གཞུང་གི་རྩ་བའི་ལངས་ཕྱོགས་ལ་འཛིན་ཐུབ་པ་ཞིག་བྱེད་རྒྱུ་ནི་ད་ལྟའི་དུས་བབ་ཀྱིས་སྤྲད་པའི་འོས་འགན་ཞིག་རེད།
འདིའི་སྐོར་དབུ་མའི་ལམ་ལ་དཔྱད་པ་ཞེས་པའི་དེབ་དེའི་ནང་སྐུ་ཞབས་འཇམ་དབྱངས་ནོར་བུས་གནད་དུ་སྨིན་པའི་དགག་སྒྲུབ་གཏིང་ཟབ་ཅིག་བྱས་ཡོད་པས་དེ་ལ་གཟིགས་པར་ཞུ། ཨོ་ལིམ་པུག་རྩེས་ཚར་བའི་རྒྱ་ནག་ལ་ཕྱི་མིག་ཅིག་བལྟས་པ་ཡིན་ན་བོད་དང་ཡུ་གུར་སོགས་རང་དབང་རྩོད་མཁན་རྣམས་ལ་ཆབ་སྲིད་ཀྱི་ཐད་ནས་དམ་དྲག་སྔར་ལས་ཤུགས་ཆེན་འབྱུང་བཞིན་ཡོད་པ་འདིས། ང་ཚོ་སྔོན་ཆད་ལམ་ལོག་ལ་བསྐྱོད་པ་བདེན་དཔང་བྱཻད་བཞིན་པ་ཞིག་ཏུ་ངོས་འཛིན་བྱས་ན་ཡང་མི་ཆོག་རྒྱུ་མེད་པར་སེམས། ཅི་ལྟར་ང་ཚོ་མུ་མཐུད་དུ་ལངས་ཕྱོགས་འདི་འདྲ་ཞིག་གི་ཐོག་ཤར་སྐྱོད་བྱས་པ་ཡིན་ན་ནམ་ཞིག་བུ་རབས་ཚ་རྒྱུད་ཀུན་ལ་ངོ་གནོང་དགོས་པ་ཞིག་ཏུ་མི་འགྱུར་བའི་ངེས་པ་མེད་པས། ཁ་ཙམ་མིན་པར་བོད་ཀྱི་ཆེད་དུ་སྨྱུ་གུ་འཛིན་མཁན་ཞིག་ཡིན་ན་གནད་དོན་འདི་དག་སྣང་ཆུང་དུ་མི་བསྐྱུར་བར་ཁ་ཚ་དགོས་གཏུགས་ཀྱིས་འདི་དང་འདི་ལྟ་བུའི་གནད་དོན་ལ་བསམ་གཞིག་རེ་བྱེད་རོགས་ཞེས་འབོད་སྐུལ་ཞུ་བ་ལགས།
ད་དུང་ཨ་རི་སོགས་གཙོས་རྒྱལ་ཁབ་མང་བོ་ཞིག་གིས་བོད་ལ་ཁ་ཙམ་གྱི་རྒྱབ་སྐྱོར་བྱེད་བཞིན་ཡོད་པ་འདིས། རྩ་་བའི་ང་ཚོའི་ལས་འགན་དག་མོག་མོག་དང་རབ་རིབ་ཏུ་བཟོ་བཞིན་ཡོད་ལ། མང་བོ་ཞིག་གིས་བདེན་མཐའ་གསལ་བ་ལ་ཡང་ཐག་མི་རིང་བར་ངོས་འཛིན་བྱེད་བཞིན་ཡོད་མོད། དེ་དག་ཚང་མ་རྒྱ་ནག་གི་གཡོ་འོག་ཏུ་ཚུད་སོང་བ་ཡིན། དེའི་ཕྱིར་ངེད་ཀྱིས་རང་ཉིད་ཀྱི་བསམ་ཚུལ་འདི་ཁྱེད་ཅག་གི་མདུན་སར་བཤམས་ནས་བགྲོ་གླེང་ཞིག་བྱེད་འདོད་ཡོད་ན་ལྷན་རྒྱས་ཚོས་བརྗོད་བྱའི་ཐོག་བགྲོ་གླེང་གང་མང་སྤེལ་རོགས་ཞུ།
བོད་མིའི་གཉན་འཕྲང་གི་དུས་འདིར་བསམ་བློ་མི་གཏོང་བར་ལུང་ཁུག་དང་ཆོས་ལུགས་བྱེ་བྲག་པ། ད་དུང་མི་སྒེར་རང་ཉིད་ཀྱི་མིང་གྲགས་ཁོ་ནའི་ཆེད་ཅི་ཡང་བྱེད་ཕོད་པའི་དཔའ་པོ་ཀླད་མེད་དེའི་རིགས་ཡིན་ན་རང་རེ་དང་གཏན་དུ་གྱེས་པར་དགའ་དགོས་པ་ལས་ངུ་དོན་མེད། འབར་ཞུན་ལགས་བཀྲིས་བདེ་ལེགས་ཡོད་ད། ད་མ་ངུ་་་་་་་་་མ་ངུ་།།