བོད་ནས་་་་་་་་ར་ཛི་ནྰ་མ།
ཟླ་འདིའི་ཉིན་ཞག་མང་ཆེ་བ་ནི་བོད་པ་ཚང་ལ་མཚོན་ན་སྐྱོ་ཡུས་ཤིག་དང་།ཕྱིར་དྲན་ཞིག་ཡིན་སྲིད།ས་གཡོ་བའི་འཇིགས་པ་དང་།རྒྱལ་བོའི་ཆད་པའི་འཇིགས་པ་སོགས་ཀྱིས་ཡིད་སེམས་བློང་བློང་བོར་གྱུར་དུ་བཅུག་ནས་ཡོད།ས་གཡོ་བའི་རྒྱུ་དང་རྐྱེན་ལ་དཔྱོད་པ་ནི་ཤིན་ཏུ་ལྐོག་གྱུར་ཞིག་ཡིན་པས། ང་ལ་མཚོན་ན་རྒྱུ་མཚན་འདིའོ་ཞེས་བཤད་དུ་མེད། འོན་ཀྱང་གནོད་ཐེབས་ས་ཁུལ་ལ་བལྟས་ཏེ་བཤད་ན་མིག་ཆུ་ཞིག་དང་སྡུག་བསྔལ་ཞིག་ལས་རང་ངོས་ཀྱི་ཚོར་བ་ཁྱད་མཚར་བ་ཞིག་ཅི་ཡང་འོང་རྒྱུ་མི་འདུག འོན་ཀྱང་གཡས་ལྷུང་དང་གཡོན་ལྷུང་གི་ཆབ་སྲིད་པ་དག་གིས་ཁ་ངོ་ཅི་ལྟར་བཀྲུ་ཚུལ་དང་།སྙན་པ་ཅི་ལྟར་མཐོར་འདེགས་གཏོང་ཚུལ་གྱི་གོ་སྐབས་ཤིག་ཀྱང་རེད།གསར་ལམ་ཁག་ན་ཡང་ལྟ་ལུགས་མི་མཐུན་པ་དང་དཔྱོད་ལུགས་མི་མཐུན་པ་རྟ་མོག་མོག་གི་སྤུ་བཞིན་དུ་འཕྱུར་གྱིན་ཡོད་པས་ཨ་ཐང་ཆད་དུ་བཅུག་འགྲོ།འོན་ཀྱང་མི་རིགས་ཤིག་གི་ཆིག་སྒྲིལ་ཞིག་དང་རུས་ཞེན་ཞིག་ནི་ས་འོག་གི་གཏེར་བཏོན་པ་བཞིན་ལྷང་ལ་བུད་དེ་གསལ་བོར་མཐོང་བ་ནི་སྐྱོ་བའི་ཁྲོད་ཀྱི་འོད་ཟེར་ཞིག་རེད།འོད་ཟེར་དེའི་སྙིང་བོ་དང་ཉིང་ཏིག་གི་ཚུལ་མང་པོ་ཞིག་ནི་དགེ་འདུན་པས་བཟུང་ཡོད་ཅིང་།རྒྱ་མིའི་གསར་ལམ་ཁག་གི་ཤེལ་ངོས་སུ་ཅི་བཞིན་དུ་འཆར་མི་བཏུབ་པའི་རིགས་ཤིག་རེད།དེ་ནི་རྫས་འགྱུར་གྱི་ནུས་པའི་ཆ་དམའ་རུ་ལྷུང་ནས་འཆར་མ་ཐུབ་པ་ཞིག་ནི་མིན་ཏེ།ཉིས་སྟོང་བརྒྱད་ཀྱི་རྫས་འགྱུར་ཕྱི་མ་ཞིག་གིས་སྒྲིབ་ཡོལ་གྱི་གྲིབ་མས་བཅད་འདུག་པས་ཡིན་འགྲོ།ད་དུང་འདས་པོའི་གྲངས་དང་དངོས་རྫས་ཀྱིས་གནོད་ཐེབས་ས་ཁུལ་ཡོངས་སུ་སྐྱོབ་ཐུབ་ཀྱིན་ཡོད་མེད། དམངས་སྲིད་ཐིན་གྱི་ལག་ཏུ་བརྫངས་པའི་སྒོར་མོ་དུང་ཕྱིར་བཞི་བཅུ་བོ་དེ་གང་དུ་འགྲོ་མིན་སོགས་ཤིན་ཏུ་རབ་ཏུ་ལྐོག་ཏུ་གྱུར་ནས་ཀུན་ཀྱི་མིག་ནི་རིག་རིག་དང་།རྣ་བ་ནི་ཅོར་ཅོར་གྱིས་ཚུལ་དུ་ཡོད་འགྲོ།སྐབས་འདིར་སྒེར་གཅོད་པ་ལ་བློ་མི་གཏོད་ཅིང་ཡིད་མི་འཁེལ་བའི་མི་བུ་རེ་འགས་ནི་རང་ཉིད་དངོས་སུ་གནོད་ཐེབས་ས་ཁུལ་དུ་འགྲོ་ཐུབ་བྱས་ཏེ་ལུས་རྒྱུ་གཉིས་ཀས་ཤ་ཐང་གིས་འབད་པ་ཆེན་པོ་བྱས་ཡོད་ཅིང་།རྒྱུ་དང་རྐྱེན་གྱིས་གནོད་ཐེབས་ས་ཁུལ་དུ་འགྲོ་མ་ཐུབ་པའི་རུས་པ་ཅན་དག་གིས་ནི་རྨས་མ་མྱུར་སྐྱོབ་ལ་ཞབས་གཡོག་སྒྲུབ་པ་དང་ཁ་ཟས་གཡོ་སྐོལ་དང་མཁོ་ཆོས་མཉོ་སྒྲུབ་ལ་བྲེལ་འདུགམི་དེ་དག་གི་ཁྲོད་ན་ངས་དོ་ནུབ་དྲན་གིན་ཡོད་པའི་སྐུ་ཞབས་ཞོགས་དུང་ཡང་ཡོད།ཁོའི་གྲོགས་པོ་ཉི་གཞོན་གྱིས་བཤད་པ་བཞིན་སྐུ་ཞབས་ཁོང་ནི་ཉིན་དེ་གར་ནད་པར་ཞབས་གཡོག་དང་ཁམས་འདྲི།མཁོ་ཆོས་མཉོ་སྒྲུབ་ཀྱི་ཕྱོགས་སུ་བརྒྱུགས་ནས་ལུས་པོར་ངལ་གསོ་མེད་ཅིང་།ཐེངས་འདིའི་ཆག་འཇིག་ལ་སེམས་འཁོར་ནས་སྙིང་ལ་ཙག་ཤེད་བསླངས་ཏེ་ལུས་སེམས་གཉིས་ཧ་ཅང་ངལ་ཞིང་དུབ་པའི་བསྒང་ཞིག་ལ །ཁོའི་སྒོ་མོ་རྡུང་མཁན་གྱི་སྒེར་གཅོད་པས་ག་བྱེད་འདི་བྱེད་ཀྱི་གོ་སྐབས་མེད་ཅིང་།འདི་ཡིན་དེ་ཡིན་གྱི་གསལ་ཁ་མེད་པར་གློ་བུར་དུ་འཇུ་བཟུང་བྱས་པ་ནི་ཇི་འདྲའི་ངུ་བྲོ་བ་དང་ཡ་ང་བ་ཞིག་རེད་དམ།འོན་ཀྱང་ཕྱོགས་གཞན་ཞིག་ནས་བསམས་ན་འདི་ནི་སྐྱེ་བུ་རླབས་ཆེན་ཞིག་གི་རྣམ་ཐར་འཁྱོངས་སོང་བའི་རྟགས་ཤིག་ཀྱང་རེད་སྙམ་སྐྱེས་ཡོད་པས་སེམས་ཁ་ཅུང་ཟད་བདེ་ལ་འཁོད་འགྲོ། སྒེར་གཅོད་པའི་གཞུང་འདི་འདྲ་ཞིག་གི་འོག་ནས་ཁ་མིན་དོན་གྱི་དམངས་གཙོ་དང་མི་རིགས་གླེང་མཁན་ཞིག་ལ་མཚོན་ན་འདི་ནི་རྒྱུད་རིམ་ཞིག་རེད། ཁོ་རང་ཉིད་ཀྱིས་ཀྱང་མི་རིགས་ཤིག་གི་དོན་དུ་རང་གི་ཐོབ་དང་བདེ་སྐྱིད་ཡོད་ཚད་ཐེད་ལ་བོར་བའི་རྟགས་ཤིག་རེད།ལོ་ངོ་འགའི་ཡར་སྔོན་ནས་བཟུང་མི་རིགས་ཀྱི་འཚོ་གནས་གླེང་ནས་གཉན་པོའི་མཐུ་དང་།རྣོན་པོའི་བཙན་གྱི་རལ་ཁ་ནས་ཀྱང་རང་ཉིད་གཙུབ་ཧྲུལ་དུ་བཏང་ནས་[[དཔྱོད་ཤེས་རྒྱང་འབོད་]]དང་[[དོགས་སློང་སྙིང་སྟོབས་]][[རིགས་ཤེས་ཀུན་གྲོལ]]་སོགས་བོད་ཡུལ་དུ་བཀྲམ་པ་རེད།དེར་མཐུད་ནས་བོད་མིར་ནང་གི་བསམ་བློའི་གསར་བརྗེས་ཤིག་བསྐྲུན་ཡོད།མི་རེ་འགས་དེ་ནི་གསར་བརྗེས་ཤིག་མ་ཡིན་པར་སྐྱུགས་རོ་ཞིག་རེད་ཅེས་བརྗོད་པར་འདོད་ན་ཡང་།བོད་རང་ཉིད་ལ་མཚམས་འདི་ནས་བཟུང་སྟེ་རིག་གནས་ལ་བརྒལ་བརྟགས་གསར་བ་ཞིག་དང་།དྲི་བ་གསར་བ་ཞིག་བསླངས་པར་མ་ཟད།སེམས་འཚུབ་གསར་བ་ཞིག་བསླངས་ཡོད་པས་ངས་ནི་བོད་མིའི་ནང་གི་བསམ་བློའི་གསར་བརྗེས་དུས་རིམ་ཞིག་ལ་འཇོག་གི་ཡིན།དེ་ཡི་རྗེས་སུ་ས་བྱི་ལོའི་གསར་བརྗེས་སྐབས་སུ་ཁོང་གིས་ནན་ཏན་གྱིས་དཔྱོད་ཅིང་།ཡུན་གྱིས་བསམས་ཏེ་[[གནམ་ས་གོ་འབྱེད་]]ཅེས་པའི་སྐད་གྲགས་ཆོད་པའི་དེབ་འདི་འབྲི་མགོ་ཚུགས་ཡོད།འདི་དུས་སུ་ཡང་འུར་སྐྱ་རེ་འགས་ཞོགས་དུང་ཤི་སོང་བ་ཡིན་ནམ་དང་།ཡང་ན་ཞོགས་དུང་རྒྱ་མིའི་རྒྱུག་ཁྱི་ཡིན་པའི་དན་རྟགས་རྙེད་སོང་ཁུལ་བྱས་ཏེ་གང་ཡིན་སར་སྐད་གཏོང་བ་ཚུན་ཆད་ཀྱི་སྦྱོར་བ་བརྩམས་མོད།ཁོང་གིས་བཟོད་བསྲན་དང་དཀའ་ཐུབ་ཀྱི་བགྱི་བ་ལྷུར་བླངས་ཏེ་རང་གི་འགན་འཁྲི་མཚམས་མ་བཞག་པ་རེད།[[གནམ་ས་གོ་འབྱེད་]]མི་ཡུལ་ལ་བཞག་པ་ནས་ཁོང་ལ་བསྟོད་པའི་མཐེབ་མོ་ཀེར་མཁན་དང་།གར་འགྲོ་གར་འདུག་ལ་མངོན་པའི་མི་དང་མི་མངོན་པའི་ཚན་རིག་བརྟགས་དཔྱོད་པའི་ཐབས་ཀྱི་རྒྱ་ཡང་བཙུགས་ཡོད་པས།ངེད་ཅག་གི་ཁ་དཔེར་ཁེ་ཆེ་ས་ན་ཉེན་ཆེ།རི་མཐོ་ས་ན་གཡང་གཟར་ཞེས་པའི་ཚུལ་དུ་སོང་ནས།༤.༢༣ཉི་མ་ཁ་སང་གི་བར་དུ་ཀུན་པོས་ཞོགས་དུང་བཟུང་ཡོད་མེད་དང་།འཛིན་རྒྱུ་ཡིན་མིན།ཡང་ན་རེ་འགར་རྣམ་རྟོག་ཀྱང་གཞན་དང་གཞན་ཞིག་ལངས་ཡོད་ངེས་མོད།དེ་དང་དེའི་ངང་ཚུལ་ནི་སྐུ་ཞབས་ཁོང་ལ་མཚོན་ན་རྒྱུན་ལྡན་ཞིག་ཡིན་པས་ལྟ་རིན་དང་དཔྱོད་རིན་ཅང་མེད་པ་རེད།༤.༢༣ཁ་སང་གི་ཉི་མ་ནས་བཟུང་སྟེ་སྒེར་གཅོད་པའི་ལག་འོག་ན་ཨམ་ཚུགས་བསྡམས་ཤིང་།རུས་རྐང་བདེན་སྟོབས་ཀྱིས་འགྲེངས་ཏེ་འདྲི་གཅོད་དང་དུ་བླངས་པའི་ངང་འཚོ་ཞིང་།མཇུག་འབྲས་ཅི་འབྱུང་ལ་བསམ་བློ་གཏོང་གིན་ཡོད་ངེས་ཡིན།ངེད་ཅག་བོད་ཕྱི་ནང་གི་དྲ་ལམ་དག་ན་ཡང་སྐུ་ཞབས་ཁོང་དང་ཁོང་གི་བརྩམས་ཆོས་ཐད་ལ་བགྲོ་གླེང་བྱེད་པ་དང་།རྩོམ་ཡིག་འབྲི་བ།བཅར་འདྲི་བྱེད་པ་སོགས་ཀྱི་བགྱི་བ་མངོན་དུ་གྱུར་འདུག་པས།སྐུ་ཞབས་ཁོང་ལ་བརྩི་བཀུར་བྱེད་མཁན་གྲོགས་པོ་ང་ལ་མཚོན་ན་དྲང་ལྡོག་ཅི་ཞིག་གླེང་ཡང་རླབས་ཆེ་བའི་རྟགས་ཤིག་མཐོང་གིན་ཡོད།དེའི་ཕྱིར་གལ་ཏེ་ང་སྐུ་ཞབས་ཁོང་ལ་མཇལ་དུས་ཤིག་ལ་བོད་ཕྱི་ནང་གཉིས་ཀྱིས་ཁྱོད་ལ་ངོ་སོ་ཆེན་པོ་སྤྲད་སོང་བ་དང་།ཁྱོད་ཀྱིས་བྱས་པ་ལ་རྗེས་དང་།བྲིས་པ་ལ་ཤུལ་ཡོད་པ་མཐོང་སོང་ཟེར་བའི་ལག་པ་གཏོང་གི་ཡིན།དེ་ལྟ་མོད་འཇིག་རྟེན་གྱི་རིག་པ་མཐུ་རྡུགས་པ་རེ་འགས་ནི་གོ་བ་ལོག་ལམ་དུ་འབྱམས་པའི་ངང་རང་གི་ཞེན་ཁོག་དང་དུངས་ཞེན་ཁོ་ནར་འབྱར་ཡོད་འདུགཁོང་གི་བརྩམས་ཆོས་[[གནམ་ས་གོ་འབྱེད་]]ཅེས་པ་ཅི་ལྟར་འགྲེལ་ཡང་རུང་མོད།བོད་གནམ་ལ་དགའ་བ་དང་།རྒྱ་ས་ལ་དགའ་བའི་སྐད་ཆ་རེ་འགས་གནམ་ས་གོ་འབྱེད་ཀྱི་མིང་ལ་དཔྱད་པ་དང་།ཡང་དཔྱོད་ཤེས་རྒྱང་འབོད་ལས་བདག་ཡོད་པར་སྨྲ་བ་དེ་ལ་ཆོས་གཞུང་གི་བདག་མེད་ཀྱི་རིག་པས་ཕུ་འདེབས་པ།ཐོབ་ཐང་དང་འདྲ་མཉམ་ཐད་ནས་ཕྱག་འཚལ་མི་འཚལ་གྱི་བརྗོད་སྟངས་ལ་གུས་ལུགས་སོགས་ཀྱིས་ལན་སྐྱོན་པ་དག་ནི་ཀ་བའི་ཆོས་ཉིད་བུམ་པར་སྦྱར་ནས་འགྲེལ་རྒྱག་པའི་ངང་ཚུལ་དུ་སོང་བ་དང་།ཞོགས་དུང་གིས་ཆོས་ཤེས་མི་ཤེས་ཀྱི་སྒོ་ནས་ཞོགས་དུང་ལ་ལྟ་བ་ནི་ཨ་མ་རྒན་མས་ཐབ་རྩ་ནས་དཔྱོད་ལུགས་ཤིག་ཡིན་པའི་ཁར།ཕ་རོལ་བོ་ལ་གནས་ལུགས་ཡོད་མེད་ལ་མི་ལྟ་བུར་རང་གི་དུངས་ཞེན་ཙམ་པོ་དབང་བཙུན་པར་བྱས་ཏེ་རིག་པ་གྱ་གྱུར་ལྷུང་བ་ལས་གཞན་ཅི་ཡང་མིན་ཞིང་།གང་ཡང་མ་རེད།དེ་དང་དེ་ལ་སོགས་པའི་ཐ་སྙད་གཅིག་གི་རྒྱབ་ན་དུས་རབས་གསར་རྙིང་གི་རིག་གནས་མི་འདྲ་བ་གཉིས་ཀྱི་གོ་ལུགས་སམ།ཡང་ན་ལྷ་ཆོས་མི་ཆོས་གཉིས་ཀྱི་གོ་ལུགས་ཤིག་ཟེར་ཡང་རུང་།འཁོར་བར་འཁོར་ཚུལ་གྱི་ལྟ་སྟངས་དང་འཁོར་བར་འབྲལ་ཚུལ་གྱི་གོ་ལུགས་ཤིག་ཏུ་སྨྲ་ཡང་ཆོག མདོར་ན་ལྟོས་འཇོག་གིས་འགྲེལ་སྟངས་ཤིག་ཡོད་པས་ཤ་གཟུགས་ཟ་རྐྱང་མི་བྱེད་པ་ནི་གལ་ཆེ་མོད།ཁ་སང་དང་དེ་རིང་ལ་ཐ་སྙད་སྐམ་པོ་ཞིག་འཕྱུར་བ་བཞིན་དུ་ལྡོད་ནས་འདུག་སྐབས་མ་ཡིན་པར།སྐུ་ཞབས་ཁོ་དང་ཁོས་མཚོན་པའི་ཤེས་ཡོན་པ་རུས་ཞེན་ཅན་དག་བཙོན་དུ་བཅུག་པའི་ཐད་དམ།བཙོན་དུ་མ་སོང་བའི་ཤེས་ཡོན་པ་དག་གི་སྨྲ་སྒོ་འཇིགས་སྐུལ་གྱི་ལྕགས་ཟྭ་རྒྱག་གིན་འདུག་པའི་ཚུལ་འདི་ལ་ཅི་ལྟར་རྒོལ་བའི་དུས་ལ་བབ་འདུག སྤྱིར་རིག་པ་སྤྱི་འགྲོས་ཀྱི་སྒང་ན། རིག་གཞུང་ནི་ནམ་ཡང་སྐྱ་ཐང་ཐིང་དང་། མཚོ་བ་ནི་ནམ་ཡང་སྔོ་ཐང་ཐིང་ཟེར་བའི་སྲོལ་ཞིག་ཡོད་པ་འདིར་བལྟས་འོང་ན་ཡང་། རིག་གཞུང་རྐྱང་བ་ཞིག་གླེང་བ་དང་ཐ་སྙད་རྡོག་པོ་རེ་འགའ་ཙམ་ལ་རྩོད་རྒྱབ་བསྡད་ནཅི་ཡང་མི་ཕན་ཞིང་།
དད་པ་ཡོད་མེད་བཤད་ནས་རྒན་མོར་ཉི་མར་ལྡེ་བ་བཞིན་བསྡད་པས་ཀྱང་གར་ཡང་མི་ཕྱིན་པས།ད་ལྟའི་བོད་པའི་ཤེས་ཡོན་པའི་ཆབ་སྲིད་ཀྱི་གནས་བབ་འདི་གདོང་ལེན་བྱེད་པའི་དུས་སུ་བབ་འདུག དབྱིན་རྒྱ་བོད་གསུམ་གྱི་ཡིག་ལམ་དང་ཚོགས་པ་ཆེ་ཆུང་ཀུན་པོས་ཁྲིམས་གཏུགས་དང་།སྐད་འབོད།མདོར་ན་འུར་འུར་ཟང་ཟིང་བཟོ་བའི་སྐབས་སུ་བབ་འདུག སེམས་ཁུར་ཡོད་དང་རྒྱབ་སྐྱོར་ཡོད་ཙམ་གྱིས་ལག་སྐྱེས་ཆེན་པོ་ཞིག་ཕུལ་ཡོད་པའི་ཁེངས་སེམས་འདོར་དགོས་པའི་ཚད་ལ་བསླེབས་ཡོད། ངོ་མ་བོད་ནང་གི་ཤེས་ཡོན་པ་འམ་རུས་ཞེན་ཅན་ཚོའི་མདུན་ལམ་འདི་ལྟར་བུད་སོང་བ་ཡིན་ན།བོད་མི་རིགས་ཀྱི་མདུན་ལམ་ལ་དོན་གྱི་གཉའ་ཆག་ཐེབས་ཀི་རེད།ཆོས་སྲིད་དཔལ་འབྱོར་གང་ཡིན་རུང་རྩ་བའི་སྒུལ་ཤུགས་ནི་ཤེས་ཡོན་པ་ལ་ཐུག་འདུག་པ་ངོ་ཤེས་དགོས་པ་རེད།ཤེས་ཡོན་པ་ནི་ནམ་ལངས་ཁའི་བྱ་ཕོ་ལྟ་བུ་རེད།ནམ་རྒྱུན་མ་འོངས་པའི་དུས་ཀྱི་བརྡ་ཞིག་གཏོང་གིན་ཡོད།རྒྱུ་དང་དབང་ཆ་ཅན་དག་ལས་ཤེས་ཡོན་པར་བདག་པོ་བརྒྱག་དགོས།དེ་དག་ནི་སྐབས་དང་འཕྲལ་ཙམ་ལས་ཕན་པ་དཀའ་ཞིང་།ཤེས་ཡོན་པས་ལག་རྗེས་ནི་ཕུག་དང་རྒྱང་ན་ཡོད་པས་ངེས་པར་ཁྱོད་ཅག་གིས་མཚོ་ནང་ལ་ཁབ་བོར་བ་བཞིན་དུ་མི་བསྐྱུར་རྒྱུའི་ཞུ་བ་གཏོང་གི་ཡིན།
རྩོམ་པ་པོས་བོད་ནས་བསྐྱར་བཅོས་བསྐྱར་བསྐུར་བྱས་བ་ལྟར་གལ་ཆེན་ལ་རྩིས་ནས་བསྐྱར་བཀོད་དངས་ལེན་བྱས་བ་ཡིན
བསྐྱར་བཀོད་མ་བྱས་གོང་ལ་གཤམ་གྱི་མཆན་ ༣ བཀོད་འདུག
1. ༡༽ མདོ་ལྷ་ཁམས་པ་ནས།
སྤྱི་ལོ་ ༢༠༡༠ ཟླ་ ༤ ཚེས་ ༢༩ གི་ཆུ་ཚོད་ ༡༧ སྐར་མ་ ༣༧
ཞོགས་དུང་ལགས་སྐུ་གངོས་སུ་མིག་གིས་མ་མཐོང་ཡང་། ཁོས་གིས་བུས་པའི་དུང་སྒྲ་ཙག་ཤར་མ་དེས་རི་བོ་ཧི་མ་ལ་ཡའི་ཕ་རོལ་ཚུར་རོལ་གཉིས་ཀའི་མི་མང་པོ་ཞིག་གི་ནངས་སྔ་མོའི་ཞོགས་ཉལ་སྐྱིད་པོ་དེ་ལས་མགོ་བོ་ཡར་མི་རྒྱས་ག་མེད་ཆགས་པ་རེད།
དེ་ནས་བཟུང་མི་དེ་ཚོས་དུང་སྒྲ་དེ་གང་ནས་བུས་བ་དང་། འབུད་མཁན་སུ་ཡིན་པ། ག་རེ་བྱས་ནས་བུས་པ་རེད་སོགས་ཀྱི་གླེང་སློང་ད་རེག་བར་དུ་རྒྱུན་མ་ཆད་པ་རེད།
ད་ལོ་ཡང་བསྐྱར་ཞོགས་དུང་གིས་གླིང་བུ་ཞིག་བུས་པ་རེད། གླིང་བུ་དེའི་སྒྲ་དབྱངས་ཡང་བསྐྱར་ཧི་མ་ལ་ཡའི་ཕྱོགས་བཞི་ནས་ཐོས་ཡོད་པ་མ་ཟད་གླིང་ཆེན་བཞིའི་ས་ཕྱོགས་སུ་ཡང་གླིང་བུ་དེའི་སྒྲ་དབྱངས་ལ་ཉན་ཐུབ་པ་བྱུང་འདུག་མོད། ཅང་མ་འགོར་བར་གླིང་བུའི་སྒྲ་གདངས་མ་ཡལ་གོང་བོང་བུའི་ངུ་སྐད་ཅིག་ཅིང་་་་་་་་་་་་་་་་་་་་
2. ༢༽ རྒྱ་ནག་ཉམས་ཞིབ་པ་ནས།
སྤྱི་ལོ་ ༢༠༡༠ ཟླ་ ༤ ཚེས་ ༢༩ གི་ཆུ་ཚོད་ ༡༧ སྐར་མ་ ༥༦
ཞོགས་དུང་གི་དཔའ་བོ་ཡིན་པར་ཁས་ལེན་དགོས་ན་།ཁོང་གི་ལྟ་བ་ཐམས་ཅད་ལ་རིགས་པའི་དཔྱད་པ་ཅི་ཡང་མེད་པར་ཁས་ལེན་དགོས་བའི་སེམས་ཀྱི་འཆར་ཚུལ་འདི་ཅི་ཞིག་ཡིན་ནམ།
དོན་གྱིས་ཞོགས་དུང་བོད་ཀྱི་ཆོས་དང་།རིག་གཞུང་།དེ་བཞིན་སེམས་ཀྱི་འཆར་ཚུལ་སོགས་ཀྱི་རྙིང་བ་དོར་དགོས་བའི་ལྟ་བ་ཡོད་དམ་མེད།
ཡོད་ན་།འདི་རེད་ཅེས་བཤད་ཆོག་གི་མ་རེད་དམ་།
ཉིན་གུང་ཞིག་ལ་དུང་སྒྲ་ཞིག་དངོས་གནས་གོ་སོང་།ཡང་ཁོས་བསམ་པ་ཞོགས་དུང་ཡིན་བསམ་ནས་བུས་བ་ཡིན་པ་ནི་ཏན་ཏན་རེད་།ཞོགས་དུང་མ་ཡིན་པ་ཞིག་ལ་བཙན་གྱི་ཞོགས་དུང་ཡིན་ཞེས་མགོ་ལ་བཙན་གྱི་མཇོག་གི་ཡིན་ནམ།བོད་པ་འདི་ཚོ་ཡ་མཚར་།
3. ༣༽ མདོ་ལྷ་ཁམས་པ་ནས།
སྤྱི་ལོ་ ༢༠༡༠ ཟླ་ ༤ ཚེས་ ༢༩ གི་ཆུ་ཚོད་ ༡༨ སྐར་མ་ ༣༤
སྐད་ཆ་ཅིག་བཤད་བསམ་ན་དྲང་པོར་བཤད་རྒྱུ་དེ་ཧ་ཅང་གལ་ཆེ། བཤད་སོང་ན་བཤད་མ་སོང་མི་་ཟེར་བ་དང་། ཡང་། མ་བཤད་ན་བཤད་སོང་ཟེར་བ་སོགས་ནི་དྲང་པོ་ཡིན་མིན་གི་ཚད་འཛིན་ས་རེད།
དེར་སྟངས་འཛིན་བྱེད་ཐུབ་ན་སྐད་ཆ་དྲང་པོ་ཅིག་བཤད་ཐུབ་ཀིན་རེད། སྐད་ཆ་དྲང་པོ་ཅིག་བཤད་ཐུབ་སོང་ན་སྐད་ཆ་བདེན་པ་ཅིག་ལ་རང་བཞིན་གྱིས་འགྱུར་གི་རེད།
ཞོགས་དུང་གིས་རང་གི་སྲོག་དང་ཚེ་ལྷག་ཤར་ལ་བསྐྱུར་བ་དེ་ཁོང་ཉིད་དཔའ་བོ་ཡིན་པའི་རྟགས་སུ་མཐོང་། ཡང་ཁོང་གིས། བོད་མི་རིགས་ཀྱི་ཉམས་རྒུད་ཡོད་ཚད་འདུ་ཤེས་རྙིང་བ་ལས་བྱུང་བ་དང་། འདུ་ཤེས་དེའི་ཐུག་ས་གཙོ་བོ་ནང་པའི་ཆོས་ལ་ཐུག་ཡོད་པ་དེ་ཡང་ཁོང་གི་ལྟ་བའི་མཐར་ཐུག་རེད།
ཡིན་ན་ཡང་། དཔའ་བོ་ཡིན་མིན་དང་ལྟ་བ་གང་ཡིན་གཉིས་ཐ་དད་ཡིན་པས། ཉ་དང་ཉུང་མ་མཉམ་དུ་བསྲེས་ན་ག་ནས་འགྲིག
ར་ཛི་ནཱ་མར་ཐུགས་རྗེ་ཆེ་ཞུ། འདི་ཁྱོད་ཀྱི་རྩོམ་ཡིག་ཐེངས་གཉིས་པ་དེ་བཀླགས་པ་ཡིན། སྐུ་ཞབས་ཞོགས་དུང་བཟུང་ཚར་བ་རེད། ཁོང་གི་བརྩམས་ཆོས་ཅི་ཡོད་བོད་ཕྱི་ནང་གཉིས་ན་བཀླགས་མྱོང་མཁན་དང་མྱོང་ཐུབ་མཁན་གང་མང་ཡོད་མྱོང་ནི་རེད། བསྟོད་ལས་སྟོད་ལ་འཇོག་མཁན་དང་སྨད་ནས་དུང་ལ་འཕེན་མཁན། རྒྱ་གུང་ཁྲན་གྱི་རྒྱུགས་ཁྱི་རེད་ཟེར་མཁན། བོད་མི་རིགས་ཀྱི་བསམ་བློ་བ་དང་མཁས་དབང་། དཔའ་བོ་རེད་ཟེར་མཁན། ནང་བསྟན་ལ་དགག་གིན་འདུག་པས་བསྟན་དགྲ་རེད་ཟེར་མཁན་འདྲ་མིན་བྱུང་ཡང་། ད་ནི་ཁོང་བོད་ཀྱི་དགྲ་བོ་རྒྱ་གུང་ཁྲན་གྱིས་བཟུང་ཟིན་ལ། འཛིན་དོན་དེ་ཡང་རྒྱ་གུང་ཁྲན་དང་རྒྱབ་འགལ་གྱི་མིང་འདོག་སྣ་ཚོགས་ཀྱིས་བཟུང་བ་དང་། རྒྱབ་ཀྱིས་ཕྱོགས་དོན་དེ་ཡང་བོད་མི་རིགས་དང་རིག་གཞུང་། བོད་ཀྱི་འགྲོ་མིའི་ཐོབ་ཐང་དང་རྩ་དོན་སོགས་གནལ་དུ་འཁེལ་ཞིང་གཏིང་ནས་གླེང་ཡོད་པས་རེད། རྒྱ་གཞུང་ལ་སྡིགས་ཤིང་སྔར་ནས་ད་ལྟ་ལ་ཐུག་གི་བར་རྒྱ་གུང་ཁྲན་གྱིས་བོད་མིརིགས་འདི་སྡུག་སྣ་ཚོགས་ཅི་བྱས་དང་། ཐ་ན་མི་ལོ་དྲུག་ཅུ་ལྷག་གི་རིང་ལ་རྒྱས་བཀག་སྡོམ་ཆེ་བའི་ཡིག་ཆ་དག་ལས་བོད་མིར་བསད་རྨས་སྡུག་སྦྱོང་མནར་གཅོད་ཅི་བྱས་གཙོ་འདོན་གྱིས་བྲིས་གནམ་ས་གོ་འབྱེད་ཀྱི་དེབ་དེ་ལས་ཞོགས་དུང་བཟུང་དོན་དང་། བོད་མི་རིགས་གཞུང་ལ་ཤ་ཚ་ཡོད་མེད་སོགས་གསལ་ཁ་འབྱུང་གི་རེད་སྙམ། འདིར་བཤད་མཁན་མང་ཆེ་བས་སྐུ་ཞབས་ཞོགས་དུང་གིས་ནང་བསྟན་ཆོས་ལུགས་ལ་ཅིག་བཤད་འདུག་ཟེར་ནས་ད་དུང་ཡང་སྙིང་ནད་འདྲ་ཞིག་འཛིན་གིན་འདུག སྔར་རྒྱ་ནག་གོ་གུང་གཉིས་ཀྱིས་རྒྱ་ཁབ་ཀྱི་བདག་དབང་བརྩད་དེ་ཁྱོད་ཤི་ང་གསོན་གྱི་དམག་འཐབ་དྲག་བྱེད་པའི་སྐབས་སུའང་འཇར་པན་ལ་ཁ་གཏད་གཅོག་སྐབས། མཉམ་དུ་རེད། ཞོགས་དུང་གིས་ནང་བསྟན་ལ་དགག་ཡོད་ཀྱང་ད་སྐབས་ནི་ཁོས་བོད་མི་རིགས་ཀྱི་དོན་དུ་ཚོར་ཤུགས་ཆེན་པོས་བཤད་པའི་སྐད་ཆ་(གནམ་ས་གོ་འབྱེད།)བཤད་པས་རྒྱ་གཞུང་གིས་འཛིན་བཟུང་བྱས་པ་རེད་པས། དེ་ཁ་སང་དང་རིང་། སང་ནིན་ནས་གནངས་ཉིན་སོགས་ཉིན་མ་དུ་ཙམ་དང་ཟླ་བ་དུ་ཙམ། ཡང་ན་ལོ་དུ་ཙམ་དུ་ཁོས་བོད་མི་རིགས་ཀྱི་ཆེད་དུ རྒྱའི་སྡུག་སྦྱོར་མནར་གཅོད་ཇི་ལྟར་དང་ཅི་ཙམ་མྱངས་དང་མྱོང་བཞིན་པ། བོད་ཀྱི་དུས་བབ་རྩོམ་སྒྲིག་པ་སྐུ་ཞབས་ལུང་རིགས་རྒྱལ་གྱིས་ཅུང་ཙམ་བཤད་འདུག་པ་དེས་ཀྱང་གསལ་བོ་ཤེས་ཐུབ་གི དེ་བས་བདག་གི་སྙིང་དབུས་ནས་རེ་བ་ཙམ་ཞུ་རྒྱུར། སྐུ་ཞབས་ཞོགས་དུང་གཙོས་ཉེ་ཆར་བཟུང་བའི་བོད་ནང་གི་ཤེས་ཡོན་པ་དེ་ཚོའི་ཆེད་དུ་ང་ཚོའི་ལྟ་ཚུལ་ལམ་ལྟ་བ་མཉམ་བསྲེས་སྐད་ཆ་དམ་དུམ་རེ་བཤད་འདུག་པའི་ཚོད་མིན་པར། ནུས་ཤུགས་གཅིག་ཏུ་སྒྲིལ་ནས་ཤེས་ཡོད་པ་འདི་ཚོའི་ཆེད་དུ་སྐད་ཆ་ཞི་གབཤད་པའི་དུས་རེད་སྣམ། ཁ་སྔོན་ཀུན་གླེང་ནས་ཀྱང་བོད་ཕྱི་ནང་གཉིས་ན་ཞོགས་དུང་གིས་ནང་བསྟན་པ་ཅིག་ཅིག་མིག་མིག་བཤད་མྱོང་བས་ད་ནི་བོད་ནང་དུ་ཁོ་ལ་རྒྱབ་སྐྱོར་བྱེད་མཁན་དང་དགའ་མཁན་མང་པོ་མེད་པའི་སྐོར་འདྲ་ཟིག་བཤད་སོང་། དངོས་གནས་བྱབ་ཆུང་གི་སྐད་ཆ་རང་རེད་བསམ་བྱུང་། ཞོགས་དུང་གིས་ཀྱང་བོད་མི་རིགས་འདི་ཡག་པོ་ཞིག་ཆགས་ཐུབ་ན། གཞན་དང་ཕྱོགས་གང་ཐད་ནས་མཉམ་སྐྱོད་རེ་བྱེད་ཐུབ་ན་བསམ་ནས་བོད་དོན་བསད་ཀྱིན་པ་ལས། གཞན་ཞོགས་དུང་ཁོ་རང་རྒྱ་གུང་ཁྲན་གྱིས་བཟུང་བ་དེ་འགྲིག་འདུག་སྙམ་པའི་ཚོར་བ་སྐྱེས་བྱེད་ཀྱི་སྐད་ཆ་ཞིག་ནམ་ཟར་ཡང་བཤད་མི་འདུག་ལ། ནམ་ཞར་ཡང་བཤད་ཀི་མ་རེད་སྙམ་པའི་ཡིད་ཆེས་གཙང་མ་ཡོད། དེ་བས་ང་ཚོས་རང་དབང་ལུང་པ་ནས་ནང་ཁུལ་གྱི་ལྟ་ཚུལ་མཐུན་མིན་གྱིས་སྐད་ཆ་བཤད་འདུག་པའི་དུས་མིན་པར་བོད་མི་རིགས་གཅིག་པ་དང་། རིག་གཞུང་གཅིག་པ། དམིགས་ཡུལ་གཅིག་པ། རྩ་དོན་གཅིག་པའི་ཆེད་དུ་ཡིན་པས་ན། དུས་སྐབས་འདི་ནི་ནང་ཁུལ་ལྟ་བ་མཐུན་མིན་གླེང་བའི་དུས་མིན་པས། རབ་བྱུང་ན་དེའི་རིགས་གནས་སྐབས་རིང་མི་གླེང་བའི་རེ་སྐུལ་སྙིང་ནས་ཞུས་པ་ཡིན།
རྒྱ་ནག་ཉམས་ཞིབ་པ་ཟེར་བ་འདིས་ཅི་ཞིག་ལ་ཉམས་ཞིབ་བྱེད་ཀྱི་ཡོད་དམ།འདུ་ཤེས་རྙིང་པ་འདོར་དགོས་ཟེར་བ་དང་ལྟ་ཚུལ་རྙིང་བ་འདོར་དགོས་ཟེར་བས་ཅི་ཞིག་ལ་ཁྱོད་རང་ཤ་འདར་རུས་འདར་རྒྱག་དགོས་ཀྱི་འདུག།རིག་གཞུང་དང་གོམས་སྲོལ།འདུ་ཤེས་སོགས་གང་ཡིན་ཡང་ཕན་གནོད་ཀྱི་གྲུབ་འབྲས་རེརེ་མངོན་ཡོང་གི་ཡོད་ཡོད་ལ།དགོས་མཁོ་དང་དགོས་གཏུགས་ཀྱི་གནས་བབ་རེ་རེ་ནས་སྙིགས་དོར་གསར་ལེན་གྱི་གོ་རིམ་རེ་ཡོང་གི་ཡོད་པ་རེད།དེ་བས་ཕན་འབྲས་མེད་ཅིང་ཡོད་གོ་མི་ཆོད་པ་དག་ནི་རྙིང་པ་ཡིན་པ་རྒྱུ་མཚན་དུ་བྱས་ཏེ་སྲོག་ལྟར་གཅེས་ཉར་བྱེད་དགོས་དོན་ག་ལ་ཡོད།གོམས་སྲོལ་དང་རིག་དངོས་ཙམ་ཡིན་པ་ལ་རྒྱུ་མཚན་དུ་བཟུང་ནས་ཨུ་ཚུགས་དང་མཁྲེགས་ཤིང་གིས་སྐྱོར་བ་ནི་དོན་དངོས་སུ་དུས་ཚོད་སྟོང་ཟད་དུ་གཏོང་བ་མ་ཡིན་ནམ།རིག་པ་སྣ་མང་དང་སྤྱི་ཚོགས་སྣེ་མང་དུ་འགྲོ་བཞིན་པའི་སྒང་ལ་གསར་རྙིང་ཡོད་ཚད་མཁོ་བར་སྨྲ་བའི་ང་ཚོའི་ཀུན་སྤྱོད་འདིས་ནི་ང་ཚོར་ཤི་མེད་ཚོར་མེད་དུ་གཏོང་གི་འདུག་པ་ཚོར་ཀྱི་མེད་དམ།
ཞོགས་དུང་གི་འདུ་ཤེས་ཟེར་བ་དང་་བག་ཆག་ཟེར་བའི་གོ་དོན་ལ་བསྡུས་གྲྭའི་རིག་ལམ་འདྲ་བོ་དང་ཚད་མའི་གཞུང་གི་མཚན་ཉིད་འདྲ་བོ་ཁྱེར་ཡོང་ཏེ་ཉམས་ཞིབ་བྱས་པ་ཡིན་ན་གོ་བ་འཁྲལ་འཁྲུལ་དུ་གྱུར་འགྲོ།རྒྱུ་མཚན་མཚན་མ་རིག་པའི་འགྲོ་སྟངས་གཅིག་པུ་ཚད་མར་བཟུང་བས་དངོས་ཡོད་འཚོ་བའི་དངོས་ཡོད་མཐའ་དག་ལ་བརྡར་ཤ་གཅོད་རྒྱུ་ཡིན་ཟེར་ན་ཅུང་གླུན་དྲག་འགྲོ
༄༎ སྐུ་ཞབས་ཞོགས་དུང་གི་བོད་རིགས་ལ་ལ་ཞེད་དང་གདུང་ཟབ་པའི་རྩོམ་རིགས་མང་པོ་བྲིས་ཡོད་ དེ་དག་ལ་རྗེས་སུ་ཡིད་རིང་ཞུ་ཡི་ཡོད། དངོས་གནས་བཤད་ན་ང་ཚོའི་བོད་མི་རིགས་འདི་ནང་ཆོས་ཀྱི་ཕོང་མེད། ནང་ ཆོས་སྦྱང་མཁན་གྱི་གང་ཟག་བྱེ་བྲག་པ་ཁག་གཅིག་གི་ཆོས་ལུག་གི་དར་ཆ་འཁྱེར་ནས་མི་མང་གི་ནང་དར་ཁྱབ་སྤེལ་བ་དེ་ཡིས་བོད་མི་རིགས་ཀྱི་ཆབ་སྲིད་ཀྱི་བལྟ་སྟང་ཤིག་འཛིན་མ་ཐུབ་པར་ང་ཚོའི་བོད་རིགས་ཀྱི་ཆབ་སྲིད་གོད་ཆག་འདི་བྱུང་བ་རེད། ཞོགས་དུང་ལགས་ཀྱི་གསུང་པ་དེ་ཚོ་ཕྱོགས་ཚང་མ་ནས་ཉམས་ཞིབ་བྱེད་སྟེ་ང་ཚོའི་སྐད་ཆ་བཤད་དགོས་ཀྱི་ཡོད། ང་ཚོའི་ཆོས་བྱེད་མཁན་གྱི་གང་ཟག་དེ་ཚོའི་སྲིད་ཀྱི་ཕྱོགས་སུ་ཐུགས་བསམས་མ་བཞེད་པར་ད་ལྟའི་གནས་ཚུལ་འདི་ཡི་འོག་ཏུ་ལྷུང་བ་རེད་སྙམ། གཙོ་བ་ཆོས་སྲིད་ཟུང་འབྲེལ་བྱེད་ན་ཧ་ཅང་གི་དཀའ་ལས་ཁག་པོ་ཞིག་མཐོང་གི་འདུག ང་ཚོའི་ངེས་པར་དུ་ཆོས་དང་སྲིད་གཉིས་མཉམ་དུ་ཡོང་མི་སྲིད་པ་ཞིག་མཐོང་གི་འདུག ཆོས་སྲིད་གཉིས་ལོག་ཁ་བྱེད་དགོས་ཀྱི་འདུག དེ་རིང་རྒྱུ་མཚན་མང་པོ་བཤད་རྒྱུ་ཡོད་སྟེ། ད་ལྟ་ཚོུད་ཀྱི་རྐྱེན་པས་མང་པོ་འབྲི་ཁུམ་མ་བྱུང་པར་རྗེས་སུ་རིམ་བཞིན་འབྲི་ཡི་ཡིན། ཞོགས་དུང་ལ་སེམས་མ་སྐྱོ་ང་ཚོ་ཁྱེད་རང་གི་མཉམ་དུ་ཡོད།
དངོས་ནས་བཙན་བྱོལ་ཡི་གེ་བ་ཚོས་གསང་ན་ཆབ་གཅིན་ལས་མེད་ཀྱང་འདོན་རན་ལ་སླེབས་འདུག སྐབས་བབ་ཁོང་གི་ལྟ་གྲུབ་སོགས་གླེང་བཞིན་པའི་མཁས་པ་ཚོའི་སྡོམ་ཚིག་ཀྱང་བཏང་སྙོམས་སུ་འཇོག་ལ། ལྷག་ཏུ་བཀུར་འོས་ཧོར་གཙང་འཇིགས་མེད་དང་རྡོ་རྗེ་ཚེ་བརྟན་ལྟ་བུར་ཞོགས་དུང་གླེང་རྒྱུའི་སྤོབས་པ་ཡོད་མེད་ཀྱང་མི་སྨྲའི་ངང་དུ་འཇོག བབ་དོན་བཀལ་བསྐྱིལ་ནས་ཚད་ལྡན་ཁྲིམས་ཐོག་ཏུ་འགྲོ་ཐབས་དང་། ཁྲིམས་ཐོག་ནས་སྦྱངས་བཤད་ཚད་ལྡན་གྱི་རང་དབང་ཐོབ་ཕྱིར། རྡ་ས་ལྟེ་བར་བྱས་པའི་ཡི་གེ་བ་ཚོས་མཉམ་རུབ་ཀྱིས་གཏུགས་གཤེར་
དང་། ཟས་བཅད་ངོ་རྒོལ། མར་མེ་ཁྲོམ་སྐོར། ཁོང་གི་དགོངས་གཞི་འཁོད་པའི་སྦྱར་ཡིག་ཆེན་པོ་འགྲེམ་པ། ཁོང་གི་སྐུ་པར་བཤམས་པ། ཁོང་ཆེ་འདོན་གྱི་གཞས་ཚིག་རྩོམ་པ། དེ་འབྲེལ་གྱི་གྱོན་གོས་ཆེད་བཟོ། སྐྲ་དང་སྨ་ར་མི་འབྲེག་པ། བོད་དར་སྒྲེང་བ། གསལ་འགོད་གསལ་བསྒྲགས་སྤེལ་བ་སོགས་མ་སྐུལ་དང་དུ་ལོངས་དང་། བདག་གིས་ཧིན་སྒོར་ཆིག་ཁྲི་རང་ལ་མེད་ཀྱང་གཞན་ལས་གཡར་ཏེ་ལས་འགུལ་དེ་རིགས་ལེགས་འགྲུབ་ཡོང་བར་ཞལ་འདེབས་དང་། རང་ནུས་ཅི་ལྕོགས་ཀྱིས་གྲ་སྒྲིག་ཨང་གསར་ཡིན།
ངས་ཀྱང་སྐུ་ཞབས་ཞོགས་དུང་ལགས་ཡང་ཡང་དྲན་བགྱིད་འདུག་པས། ཁོང་གཙོས་པའི་བོད་མི་ཆབ་སྲིད་བཙོན་པ་རྣམས་གང་མྱུར་གློད་གྲོལ་ཡོང་བའི་རེ་འབོད་དང་སྨོན་འདུན་ཞུ།
ངས་སྐུ་ཞབས་ཞོགས་དུང་སྙིང་རྗེ་སོང་གང་ཡིན་ཞེ་ན་རྒྱ་ངོ་མ་ལོན་བོད་རྗེས་མ་ཆོད་པ་ཞིག་ཆགས་འདུག