དགེ་འདུན་རབ་གསལ་གྱིས།
ད་ནངས་ཞོགས་ཀར་ངེད་ཀྱིས་གསར་འགྱུར་ཀློག་སྐབས་ལྷ་ས་གཅིག་པུ་ནས་མི་སྟོང་ཕྲག་ཙམ་འཛིན་བཟུང་བྱས་པ་རེད་ཟེར། བཙན་བྱོལ་བོད་མི་རྣམས་ཀྱི་སེམས་པ་ཟིང་སླེབས་ཏེ་སྡོད་སྐབས་འདིར་གཞིས་ལུས་སྤུན་ཟླ་རྣམས་སླར་ཡང་མནར་གཅོད་དང་དམར་གསོད་ཀྱི་འོག་ཏུ་ཚུད། འཛམ་གླིང་གི་དམར་གསོད་ཆེན་མོ་གཞན་དག་བསྡུར་ན། བོད་མི་རིགས་ཀྱི་བདེ་སྡུག་འདི་ནི་མི་དྲུག་ཅུ་ལྷག་གི་རིང་ལ་རྒྱུན་མཐུད་པ་ཞིག་ཡིན། ང་ཚོའི་མི་རབས་གསུམ་ནས་བཞི་ཡི་བར་དུ་རྒྱ་ལག་ནས་ཤི་བཞིན་ཡོད། བོད་མི་རིགས་ཀྱི་རེ་བ་ནི་ད་དུང་གསོན་པོ་དང་ཇེ་གསལ་དུ་འགྲོ་བཞིན་ཡོད།།
བླ་བྲང་དགོན་པའི་ཁྲོམ་སྐོར་གྱི་སྐབས་སུ་བོད་རང་བཙན་དང་༧རྒྱལ་བ་དོན་གྱི་བདག་པོ་སྐུ་ཚེ་སྲིང་བའི་འབོད་སྒྲ་གསལ་པོར་ཐོས། གཞོན་ནུ་ཞིག་གི་བྲང་ཁོག་སྟེང་མདེའུ་ཕོག་སྟེ་དམར་གསོད་བཏང་བའི་རི་མོ་འདི་ངའི་ཀླད་པའི་ནང་ཟུག་ནས་བསྡད་སོང་། ལྷ་ས་ནས་རེབ་གོང་དང་གཅན་ཚ། བླ་བྲང་། གཙོས། རྨ་ཆུ། རྔ་བ། ལི་ཐང་སོགས་ཏེ། བོད་མི་རིགས་ཀྱིས་རྒྱ་རྒོལ་གྱི་ལས་འགུལ་འདི་བོད་ཀྱི་ས་ཁྲ་ལེབ་མོའི་སྟེང་ཁེབས་ནས་སླེབས་ཡོད། བཙན་གནོན་རྒྱ་དམར་གྱི་སྙིང་ལ་ཟུག་གཟེར་ཡང་བསྐྱར་བསླངས་ཤིང་འཛམ་གླིང་མདུན་དུ་རང་གི་གདོང་བག་ངོ་མ་དེ་ཇེ་གསལ་དུ་ཐོན་ཡོད་ལ། སྲིད་འཛིན་ཧུ་ཅིན་ཐའོ་ཡི་གདོང་དེ་མི་གསོད་ཀྱི་ལག་དམར་གྱི་བཤན་པ་ཞིག་ཏུ་གྱུར་ཡོད།
ཨ་ཁ། ངའི་སེམས་ཀྱི་མཆི་མ་དེ་ནི་ཡང་བསྐྱར་བོད་རིགས་སྤུན་ཟླ་ཚོའི་ཕྱོགས་སུ་ཤོར། བོད་མི་ཁྲི་ཕྲག་མང་པོས་ད་ནི་གཅར་རྡུང་གི་སྡུག་བསྔལ་འདི་སླར་ཡང་མྱངས་དགོས་བྱུང་སོང་། བོད་རིགས་འདི་ནི་ལས་རྒྱུ་འབྲས་དང་སྐྱེ་བ་སྔ་ཕྱི་ལ་ཡིད་ཆེས་ཡོད་བརྟེན། གཅེས་པའི་ཚེ་སྲོག་ཤོར་བའི་དཔའ་བོ་དང་དཔའ་མོ་རྣམས་ནི་འཕགས་པ་སྤྱན་རས་གཟིགས་ཀྱིས་ཚེ་རབས་ནས་ཚེ་རབས་སུ་རྗེས་སུ་འཛིན་པ་ནི་༧རྒྱལ་བ་བསྟན་འཛིན་རྒྱ་མཚོས་མཁྱེན་ནོ༎ བོད་མི་རིགས་ནི་སེམས་ཁམས་ཀྱི་དམྱལ་བ་གསོན་པོ་འདི་ལས་བསྐྱབ་ཏུ་གསོལ། ངེད་ཀྱིས་པེ་ཅིན་དང་མདོ་སྨད་ཕྱོགས་སུ་ཡོད་པའི་གྲོགས་པོ་ཚོ་ལ་ཁ་པར་བཏང་དུས། “དྲིན་ཆེན། སེམས་བདེ་མོ་བྱོས། ང་ཚོ་བདེ་མོ་སྐྱིད་པོ་ཡིན།”ཟེར། ཚིག་འདི་ཚོའི་རྒྱབ་ཀྱི་སྦས་པའི་ཞལ་ཆེམས་དེ་ཚོ་ངའི་སེམས་ལ་ཤར་ཤར་ཡིན།
སྟབས་ཉེས་པའི་གནས་ཚུལ་འདིའི་ཕྱོགས་ནས་ང་ཚོའི་རླབས་ཆེ་བའི་ལས་འགུལ་ལ་ཡང་སེམས་འཁོར་བྱུང་། བོད་མི་རིགས་ཀྱིས་སླར་ཡང་ལན་གཅིག་བཙན་པོ་སྲོང་བཙན་གྱི་བུ་རབས་ཚ་བརྒྱུད་ཡིན་པའི་རང་མདངས་ཐོན་པར་བྱས་ཡོད་དེ། འདི་ནི་བོད་ཤོར་བ་ནས་བརྩིས་ན། ང་ཚོའི་མི་རབས་གསུམ་པའམ་བཞི་བའི་མི་རྒྱུད་ཀྱིས་བོད་རང་བཙན་སླར་གསོ་བྱེད་པའི་ལས་འགུལ་གྱི་རྣམ་པ་ཡིན། ང་ཚོའི་ཞི་བའི་སྐད་འབོད་ལ་རྒྱ་དམར་གྱི་དྲག་པོའི་མེ་མདའ་ཕོག་པ་ཡིན། བོད་མི་རིགས་ཀྱི་ཟུག་གཟེར་ཇེ་ཆེ་ཡིན། སྙིང་ནད་འདི་ཚོ་རྡོ་ལ་རི་མོ་བྲིས་པ་ལས་ཀྱང་བརྟན་པར་གྱུར། བོད་མི་རིགས་ཀྱི་མངོན་མདོད་དེ་ཡང་ཇེ་གསལ་དུ་སོང་སྟེ། བོད་མི་མང་རྒྱ་དམར་གྱི་འོག་ནས་མི་ལོ་ཇི་ཙམ་མང་བ་བསྡད་པ་དེ་ཙམ་གྱིས་མཉམ་གནས་དཀའ་བའི་རྣམ་པ་དེ་ཇེ་ཆེར་གྱུར་པ་ཡིན། གལ་སྲིད་རྒྱ་འདིས་བོད་མི་རིགས་ལ་མཐོང་ཆུང་དང་ཁྱད་གསོད། དམའ་འབེབས་དང་དབང་ཤེད་ཀྱི་རྣམ་པ་མེད་པ་ཡིན་ན་བསམ་རྒྱུ་ཞིག་ཡོད་ལས་ཆེ་མོད། གོང་གསལ་དེ་ཚོ་ནི་རྒྱ་དམར་པོའི་ཁྲག་ལ་ཐིམ་ཡོད།
ང་བཙན་བྱོལ་དུ་གྱར་ནས་མི་ལོ་ཉེར་གཅིག་པ་འགྲོ་བའི་དུས་འདིར་སླར་ཡང་བོད་རིགས་སྤུན་ཟླ་རྣམས་ལ་གདུང་སེམས་མཉམ་སྐྱེད་ཀྱི་ངུ་འབོད་འདི་ཚོ་བྲིས་པ་ཡིན་ཞིང་། འཛམ་གླིང་ཁྱོན་དུ་གནས་པའི་བོད་རིགས་ཡོངས་རྫོགས་མགྲིན་གཅིག་དབྱངས་གཅིག་གིས་བོད་ལ་རང་དབང་གི་ཉི་མ་འཆར་བའི་རེ་བ་འདི་འཇུ་བར་ཤོག་ཅེས་གསོལ་བ་འདེབས་པ་ཡིན། རེ་བ་འདི་ནི་ང་ཚོའི་སེམས་ལ་གནས་ལ། ཇི་སྲིད་ང་ཚོའི་རེ་བ་གསོན་པོ་དེ་སྲིད་དུ་ང་ཚོའི་འཐབ་རྩོད་གནས་ངེས་ཡིན་ལ། ང་ཚོའི་རེ་བ་ཤུགས་ཆེ་རུ་སོང་བ་དེའི་ཚོད་ཀྱིས་ང་ཚོའི་དམིགས་ཡུལ་འགྲུབ་ཉེ་བ་ཡིན་ནོ༎
I am very excited about the new webpage.