ངོ་དེབ་ལས་ཉེན་ཁ་ཞིག

སྤྱིར་དོ་ཞག་དྲ་ཐོག་ནས་གནས་ཚུལ་འདྲ་མིན་ལྷགས་ཀྱི་ཡོད་པས་དེ་ལ་སྤྱི་སྒེར་གཉིས་ཀས་སྣང་མེད་བྱ་སར་མི་འགྲོ། ཨ་རིའི་ཧ་ཝར་ཌི་སློབ་གྲྭ་ཆེན་མོའི་Harvard University སློབ་མ་མཱར་ཁི་རྫུག་ཁེར་བྷེར་ Mark Zuckerberg གྱིས་དང་ཐོག་སློབ་གྲོགས་ཕན་ཚུན་བར་ངོ་ཤེས་གྲོགས་སྒྲིག་གི་འབྲེལ་བ་བྱེད་སར་དམིགས་ཏེ། ཕྱི་ལོ་2004ལོར་གསར་གཏོད་བྱས་པའི་ངོ་དེབ་Facebook ལ་མཚོན་ན། མི་སྒེར་དང་ཚོགས་པ་རྣམས་ཀྱིས་འབྲེལ་ལམ་འཛུགས་ས་སྟབས་བདེ་བའི་ཐོག་དྲ་ངོས་དེར་ལས་རིགས་འདྲ་མིན་ཐད་མཁོ་གལ་ཆེ་བའི་ལེ་ཚན་མང་བ་དང་། ཞིབ་ཚགས་པ། སྤུས་ཀ་དག་པ་སོགས་ཀྱི་ཁྱད་ཆོས་ལྡན་པས་དུས་ཡུན་ཐུང་ངུའི་ནང་ཁྱབ་བརྡལ་ཆེ་བ་རྒྱལ་སྤྱི་ཅན་དུ་ཆགས། དེང་སང་རྒྱ་གར་ནང་གཅིག་པུར་མི་ས་ཡ་བརྒྱད་ཅུ་གྱ་གཉིས་ཀྱིས་ངོ་དེབ་བེད་སྤྱོད་གཏོང་གི་ཡོད་པ་ཁྱོད་ཀྱིས་གོ་ཨེ་མྱོང་། ངས་འདིར་བཤད་འདོད་པ་ནི་མི་མང་ཆེ་བས་སོ་སོའི་ངོ་དེབ་དྲ་བྱང་ ID ་ལ་གསང་ཨང་བརྟན་པོ་ཞིག་ཡོད་ན་དྲ་ཐོག་བདེ་འཇགས་ཐད་བློ་བདེ་བག་ཕེབས་ཡིན་བསམ་གྱི་ཡོད་ཚོད་རེད།
ཡིན་ནའང་དྲན་རྒྱུ་རྒོད་པོ་རེས་དམིགས་ཡུལ་ངེས་ཅན་སླད་གཞན་གྱི་འདྲ་པར་དང་མིང་སོགས་བརྐུ་བཤུའི་ལམ་ནས་ངོ་དེབ་དྲ་བྱང་གསར་བ་རེ་བཟོས་ཏེ། མི་དེ་ཡིན་ཁུལ་གྱིས་དེའི་གྲོགས་པོ་ཚོར་འཇབ་རྒོལ་གྱིས་མགོ་སྐོར་བའི་འཁྲབ་སྟོན་སྣ་ཚོགས་བྱེད་ཀྱི་ཡོད་པ་གོ་རྒྱུ་འདུག དཔེར་མཚོན་གཅིག་ཞུས་ན། མི་ཆེ་གེ་མོས་ཐབས་ལམ་འདྲ་མིན་ཐོག་ནས་ཁྱོད་ཀྱི་དངུལ་ཁང་གི་དེབ་ཨང་བསླུ་བྲིད་ཀྱིས་ལེན་ལ་བརྩོན་པ་ལྟ་བུ་རེད། གལ་སྲིད་ཁྱོད་ཀྱི་དངུལ་ཁང་གི་དེབ་ཨང་དེ་ཚོའི་ལག་ཏུ་ཤོར་ན་ཁྱོད་ཀྱི་དངུལ་སྒོར་ཀླད་ཀོར་བཟོ་བ་ཐག་ཆོད། གནས་ཚུལ་དེ་རིགས་ནི་ངོ་དེབ་གཅིག་པུའི་ཁྲོད་ནས་མིན་པར་གློག་འཕྲིན་Emailཁ་བྱང་ནང་དུའང་ཡོང་གི་ཡོད། དེ་ནི་ཁོ་བོས་གོ་ལོ་ཐོས་ལོ་ཙམ་མ་ཡིན་པར་ཉམས་མྱོང་དངོས་ལས་ར་འཕྲོད་བྱུང་བས། རྗེས་མར་སུ་དང་སུ་ཡིན་རུང་ངོ་ཤེས་གྲོགས་པོ་ཚོའི་དྲ་བྱང་གསར་བའི་ཐོག་ནས་གྲོགས་སྒྲིག་རེ་སྐུལ་བྱེད་པའམ་དོགས་གཞི་ཅི་རིགས་བྱུང་ཚེ་སེམས་ཆུང་བྱོས།