ངོས་གཅིག་ནས་མཐོང་བའི་འཇིག་རྟེན། ད་དུང་ཚད་རྡུལ་འགུལ་ཤུགས་རིག་པ།

ཀླུ་སྨྱོན།

གལ་སྲིད།

ཡོད་ཚད་རང་རྐྱང་ཐུབ་པའི་མཁྲེགས་གཟུགས་ཀྱི་ངང་དུ་གནས་ཡོད་ཚེ།

ངས་ཁྱོད་མཐོང་མི་ཐུབ་པ་ཇི་བཞིན།

ཁྱོད་ཀྱིས་ཀྱང་ང་རང་མཐོང་མི་ཐུབ་ཅིང།

འདི་འདྲའི་ཞེ་མེར་པའི་ཀློང་ནས། །

ང་ཚོས་འདི་ལྟར་ཕན་ཚུན་ལ་དགའ་མོས་ཀྱང་བྱེད་མི་སྲིད།

མིག་རྡེབ་ཡུན་རེར།

འོད་ཀྱི་འགྱེད་ཚད་དེ་དུང་ཕྱུར་དྲུག་བརྒྱ་ལས་མ་བརྒལ་ཚེ། (འདི་ནི་འོལ་ཚོད་ཡིན།)

ངོས་གཞན་ཞིག་ནས།

ངས་ཁྱོད་འདི་ལྟར་མཛེས་པའི་མཐར་ཐུག་ཏུ་མཐོང་ཞིང་།

ཚད་རྡུལ་(Quantum)འགུལ་ཤུགས་རིག་པ་བ་ཞིག་ཡིན་པའི་ངོས་ནས།

ངས་འདི་ལྟར་ཁྱོད་ཀྱི་མཛེས་པ་ལ་ཡང་མཐའ་དང་མུ་ཞེས་པ་ཞིག་འཇོག་རྒྱུ་མ་རྙེད།

ངས་ཁྱོད་ཀྱི་ཞལ་རས་དེ་གོར་གོར་ཞིག་དང་།

ཡང་ན་གྲུ་བཞི་ཞིག་ཡིན་ངོས་མི་ཟིན་ཅིང་།

ཁྱོད་ཀྱི་མཛེས་པའི་མིག་ཟུང་དང་ཞིམ་པའི་མཆུ་སྒྲོས་ཀྱང་།

ངས་དུས་ནམ་ཡང་ལོངས་སུ་སྤྱོད་པའི་སྐལ་བ་ཞིག་ཡོད་མི་སྲིད།

ཁྱོད་ཀྱི་ཕྱིའི་མཛེས་པ་དང་ནང་གི་བསམ་བློ།

ད་དུང་ཁྱོད་ཀྱི་མི་ཚེ་དང་ཚད་རྡུལ་འགུལ་ཤུགས་རིག་པ།

ལྟོས་གྲུབ་ལ་འགུལ་ཤུགས་ཀྱིས་གཞོག་འདེགས་བར་མ་ཆད་དུ་བྱེད་པའི་འཇིག་རྟེན་འདིར།

ཡོད་ཚད་གཞི་གཅིག་ལས་གྱེས་ཤིང་སླར་ཡང་གཞི་གཅིག་ལ་འབྱར་སྲིད་པས།

ངས་ནམ་ཡང་ཁྱེད་ཀྱི་མཛེས་སྡུག་དེ་བློས་མ་ཐོངས།

དུས་ཚོད་དང་བར་སྣང་གིས་འཇིག་རྟེན་གྱི་མཛེས་སྡུག་ཡོད་ཚད་ལ་བཀོད་འདོམས་བྱེད་ཅིང་།

ཚད་རྡུལ་འགུལ་ཤུགས་རིག་པས་ཡུལ་དང་ཡུལ་ཅན་གཉིས་དབྱེར་མེད་དུ་བསྲེས་ཟིན་པས།

ད་ནི་ཁྱེད་རང་གི་མཛེས་སྡུག་དེའི་ཀློང་ནས་ངས་བསྐལ་པའི་བར་དུ་རང་ཉིད་ཀྱི་བདེ་བ་མྱོང་ཆོག་ལ།

ཇི་སྲིད་བར་དུ་ཆོས་ཉིད་དང་ཚད་རྡུལ་འགུལ་ཤུགས་རིག་པ་གཉིས་རྨེག་མེད་དུ་མ་སོང་བར།

ངས་རང་ཉིད་ཀྱིས་སྒྱུ་རྩལ་ལ་བཞག་པའི་སྡོམ་ཚིག་ཉག་ཕྲ་བ་དག་ཀྱང་གཅེར་ཉར་བྱེད་ཆོག་ཨང་།