སྐྱེས་སར་ཀླུ་སྒྲུབ་ཀྱིས་བསྒྱུར།
བརྒྱད་པ། ཡེ་ཤུ་མ་ཤི་ཀའི་ཐུགས་གཤིས།
ངས་ད་ལྟ་གཤམ་གྱི་གནད་དོན་ལ་སྐད་ཆ་ཚིག་འགའ་བཤད་འདོད། ངས་རྟག་པར་རྗེས་དཔག་རིང་ལུགས་པས་གནད་དོན་དེ་ཐག་གཅོད་ཡག་པོ་ཞིག་བྱས་མི་འདུག་བསམ་བཞིན་ཡོད། དེ་ནི་ཡེ་ཤུ་མ་ཤི་ཀ་ཆེས་མཁས་མཛངས་གཉིས་ལྡན་གྱི་སྐྱེས་བུ་ཁྱད་པར་བ་ཞིག་ཡིན་མིན་གྱི་གནད་དོན་འདི་རེད། མི་རྣམས་ཀྱིས་ཡོངས་ཁྱབ་ཏུ་ཁོང་ནི་སྐྱེས་བུ་ཤེས་སྤྱོད་གཉིས་ལྡན་ཞིག་ཏུ་ངོས་འཛིན་བྱས་དང་བྱེད་མུས་དེ་རེད།
འོན་ཀྱང་ང་རང་ཉིད་ལ་དེའི་སྐོར་གསལ་རྟོགས་དེ་ཙམ་མེད། ངས་བསམ་ན། ཕྱོགས་མང་པོ་ཞིག་གི་ཐད་ནས། ཡེ་ཤུ་ཆོས་ལུགས་ཀྱི་ཆེད་མཁས་པ་དག་ལས་ཀྱང་། ངས་ཁོང་ཁས་ལེན་མང་བ་བྱེད་ཀྱིན་ཡོད། ཡིན་ན་ཡང་། ཁས་ལེན་དེས་ཕྱོགས་ཚང་མར་ཁྱབ་མིན་ནི་མི་ཤེས། ཡིན་ཡང་། ང་ཁོང་དང་ལྷན་དུ། ཡེ་ཤུ་ཆོས་ལུགས་ཀྱི་ཆེད་མཁས་མི་སྣ་ཚོ་ལས་ལྷག་པའི་རྒྱང་རིང་སར་མཉམ་བསྐྱོད་བྱེད་ཐུབ།
ཁྱེད་ཚོས་བསླབ་བྱ་འདི་དྲན་ངེས་རེད། ཁོང་གིས་“ངན་པ་བཀག་འགོག་མ་བྱེད་ཅིག
ཁྱེད་ཀྱི་འགྲམ་པ་གཡས་པར་འགྲམ་ལྕག་གཞུ་མཁན་དེར། འགྲམ་པ་གཡོན་པ་ཡང་དེ་ལྟར་བཟེད་ཅིག ཅེས་གསུངས་པ་འདི་ནི་བཅས་མཚམས་གསར་པ་ཞིག་དང་། ཡང་ན་རྩ་འཛིན་གསར་པ་ཞིག་མ་རེད། དེ་ནི་རྒྱའི་ལའོ་ཙི་དང་། རྒྱ་གར་གྱི་སངས་རྒྱས་གཉིས་ཀྱིས་ཡེ་ཤུ་སྔོན་གྱི་ལོ་ལྔ་བརྒྱ་དྲུག་བརྒྱ་ཙམ་ལ་རྩ་དོན་འདི་བེད་སྦྱོད་བྱས་ཡོད་མོད། འོན་ཀྱང་དོན་དངོས་ཐོག འདི་ནི་ཡེ་ཤུ་ཆོས་ལུགས་པས་དང་ལེན་བྱེད་པའི་རྩ་དོན་ཞིག་མ་རེད།
དཔེར་ན། ད་ལྟའི་དབུ་བཞུགས་བློན་ཆེན་(Stanley Baldwin) ནི་བློ་གཅིག་སེམས་གཅིག་གིས་ཡི་ཤུ་ཆོས་ལུགས་ལ་དད་མོས་བྱེད་མཁན་ཞིག་ཡིན་པར་དོགས་པ་སྤུ་ཙམ་ཡང་མེད།འོན་ཀྱང་ངས་ཁྱེད་ཚོའི་ཁྲོད་ཀྱི་མི་སུ་འདྲ་ཞིག་གིས་ཁོང་གི་འགྲམ་པར་གཞུས་ན་འགྲིག་པའི་བསམ་ཚུལ་འདོན་ཐབས་མེད། ངས་བསམ་ན་ཁྱོད་ཚོས་ཕལ་ཆེར་ཤེས་ཚོད། ཁོས་བརྗོད་པ་འདིའི་དམིགས་ཡུལ་ནི་དཔེ་འཇོག་རང་བཞིན་ཙམ་དུ་ངོས་འཛིན་བྱས་ཡོད་ངེས།
ད་དུང་ཧ་ལས་པའི་དཔེ་མཚོན་གྱི་གནད་དོན་གཞན་ཞིག་འདུག ཁྱོད་ཚོའི་དྲན་པར་ཡོད་ངེས་རེད། ཡེ་ཤུ་མ་ཤི་ཀས་གསུངས་པར། “གཞན་ལ་ཁྲིམས་གཅོད་མ་བྱེད།
ཁྲིམས་ཐག་རང་ཉིད་ལ་གཅོད་ཡོང་།” ཅེས་བཤད། ངའི་བསམ་པར་རྩ་དོན་འདི་ཡེ་ཤུ་ཆོས་ལུགས་ཀྱི་རྒྱལ་ཁབ་གང་གི་ཡང་ཁྲིམས་རར་དགའ་བསུ་ཐོབ་པ་ཤེས་ཚོར་མ་བྱུང་།
ངའི་དུས་རབས་འདིར་ངས་ཁྲིམས་དཔོན་མང་པོ་ཞིག་ངོ་ཤེས་ཀྱི་ཡོད། ཁོ་ཚོ་ཚང་མ་ནི་དད་གུས་ཅན་གྱི་ཡེ་ཤུ་ཆོས་ལུགས་པ་ཡིན་ཞིང་། ཁོ་ཚོས་རང་ཉིད་ཀྱི་བྱ་སྤྱོད་ནི་ཡེ་ཤུ་ཆོས་ལུགས་ཀྱི་རྩ་དོན་དང་འགལ་བ་རེད་སྙམ་མཁན་གཅིག་ཀྱང་མེད།
ཡེ་ཤུ་མ་ཤི་ཀས་གསུངས་པར། “ཁྱོད་ལ་ཞུ་བ་བྱེད་མཁན་ཡིན་ན། ཁྱོད་ཀྱིས་ཁོ་ལ་སྟེར་དགོས། སྐྱིན་ཚབ་ཕྱིར་མ་རག་བར། ཁོ་དང་ཁ་མ་འབྲལ།”ཞེས་བཤད་པ་ནི་རྩ་དོན་ཧ་ཅང་ཡག་པོ་ཞིག་རེད།
ཁྱེད་ཚོའི་གཙོ་འཛིན་གྱིས། ཁྱོད་ཚོར་དྲན་སྐུལ་གྱིས་ང་ཚོས་ཆབ་སྲིད་སྐོར་བཤད་ཀྱི་མིན་གསུངས་པ་ལྟར་རེད། ཡིན་ནའང་དོ་སྣང་མ་བྱས་ཐབས་མེད་ཅིག་ཡོད་པ་ནི། འདས་པའི་འདེམས་བསྐོ་ཆེན་མོ་རེད། དེ་ནི་ཁྱོད་ལ་ཞུ་བ་བྱེད་མཁན་ཚོར་གཡོལ་ཐབས་བྱ་རྒྱུའི་ཆེད་དུ་རེད། གང་ཡིན་ཟེར་ན། ཁོས་ཁྱོད་བེད་སྤྱོད་བྱེད་སྲིད་པས་རེད།
དེར་བརྟེན་ང་ཚོས་བལྟས་ན། རྒྱལ་ཁབ་འདིའི་རང་དབང་ཕྱོགས་ཁག་དང་། རྙིང་ཞེན་ཕྱོགས་ཁག་ཚང་མ་ཡེ་ཤུ་ཆོས་ལུགས་ཀྱི་དྲང་བདེན་ལ་མོས་མཐུན་མི་བྱེད་མཁན་ལས་གྲུབ་པ་ཞིག་རེད།གང་ཡིན་ཟེར་ན། ཐེངས་འདིར་ཁོ་ཚོས་དངོས་གནས་སེམས་ཐག་རྦད་བཅད་ཀྱིས་ཁ་ཕྱོགས་བསྒྱུར་ཡོད་པའི་རྐྱེན་གྱིས་རེད།
དེ་མིན། ད་རུང་ཡེ་ཤུ་ཡི་ལེགས་བཤད་གཞན་ཞིག་ཡོད། ངས་བསམ་ན་དེ་ལ་དོན་སྙིང་ཧ་ཅང་ཆེན་པོ་ཡོད། འོན་ཀྱང་ངས་བསམ་ན་དེར་ང་ཚོ་ཡེ་ཤུ་ཆོས་ལུགས་པའི་གྲོགས་པོ་ཚོའི་ས་ནས་དགའ་བསུ་མི་ཐོབ། ཁོང་གིས་གསུང་རྒྱུར།“ཁྱོད་རང་ཕུལ་དུ་བྱུང་བ་ཞིགས་ཆགས་འདོད་ན། ཁྱོད་ལ་གང་ཡོད་ལ་དེ་བཙོང་ནས། དེའི་རིན་འབབ་དབུལ་བོ་ཚོར་སྤྲོད་ཤོག” ཅེས་པ་དེ་རེད།
ངས་བལྟས་ན་འདི་ནི་ཧ་ཅང་ལེགས་པའི་ལེགས་བཤད་ཅིག་རེད། འོན་ཀྱང་ངས་བཤད་པ་ལྟར། ལེགས་བཤད་འདི་ལག་བསྟར་བྱེད་མཁན་མང་པོ་ཞིག་བྱུང་མེད། འདི་དག་ཚང་མ་གང་ལེགས་གསུངས་ཡོད་རུང་དེ་དག་མངོན་འགྱུར་བྱེད་དཀའ། ང་རང་གིས་རང་ཉིད་ཀྱིས་ཁོ་ཚོའི་འདོད་པ་ཚིམ་ཐུབ་ཅེས་མི་བཤད་མོད། གང་ལྟར་ཡེ་ཤུ་ཆོས་ལུགས་པ་ཞིག་གི་ངོས་ནས་བཤད་ན་གནད་དོན་འདི་ཚོ་ཡོངས་སུ་གཅིག་འདྲ་མ་རེད།