—དངོས་བྱུང་གི་གཏམ་རྒྱུད་ཐུང་ཐུང་ཞིག
དམྱལ་བ་བོ། ད་སོངས། རེམ་མ་སོངས།
ཤག་རོགས་དེ་ཚོ་ཚང་མ་ང་ལས་ལོ་གསུམ་བཞི་ཙམ་གྱིས་རྒན་པ་ཡིན་ཡང་། ཁོ་ཚོས་སྨག་འདི་ལྟར་ནག་པའི་མཚན་མོ་འདིར་སྡར་མ་སྙིང་ཆུང་གི་ང་རང་སློབ་གྲྭའི་ཇ་ཁང་གི་སྒེའུ་ཁུང་ཆུང་ཆུང་དེ་ལས་ཅོང་རྡོག་རྐུ་རུ་འགྲོ་དགོས་ཞེས་བཙན་སྐུལ་བྱས་སོང་།
ཟླ་གཅིག་སྔོན་གྱི་དགུན་ཁའི་མཚན་མོ་ཞིག་ལ་ཡང་ཁོ་ཚོས་འདི་ལྟར་ང་རང་བཙན་གྱིས་ཉལ་ཁང་གི་ལྟག་རྒྱབ་དེར་ཡོད་པའི་ཞོག་ཞོག་བླུགས་ཡོད་སའི་ས་དོང་དེའི་ནང་དུ་བཙན་གྱིས་སོང་ནས་ཞོག་ཁོག་རྐུ་རུ་བཅུག་པ་དྲན་ན་ད་དུང་ཤ་འདར་རྒྱག་ཡོང་བ་ཞིག་ཡིན་ཡང་། ཁོ་ཚོའི་གཏུམ་དྲག་གི་གདོང་རིས་རེ་རེ་ལས་གལ་སྲིད་ངས་ཁོ་ཚོའི་ཁ་ལ་མ་ཉན་ན་ལམ་སེང་གཅར་རྡུང་དྲག་པོ་ཞིག་བྱེད་རྒྱུ་ཡིན་པར་ཐེ་ཚོམ་ཕྲ་མོ་ཙམ་ཡང་མི་འདུག
ངའི་སྐམ་ལ་རིད་པའི་ལུས་པོ་ཆུང་ཆུང་དེ་སྤྲེའུ་ཞིག་དང་འདྲ་བར་ཇ་ཁང་གི་སྒེའུ་ཁུང་ལས་ནང་དུ་ཤུད་སོང་། གཤའ་དཀར་གྱི་སྡེར་མ་ཆེན་པོ་གཉིས་ཀྱི་ནང་དུ་དཀར་སོབ་སོབ་ཀྱི་ཅོང་རྡོག་དང་སེར་ལྷང་ལྷང་གི་མར་ལོ་མང་པོ་ཞིག་གིས་ང་ལ་བསྒུགས་བསྡད་འདུག ངས་རང་ཉིད་དང་ཤག་རོགས་ཚོའི་ཚིལ་དྲེགས་ཆགས་པའི་ཞྭ་མོ་དེ་ཚོའི་ནང་དུ་ཅོང་རྡོག*་དང་མར་ལོ་མང་ཐག་ཆོད་རེ་བཅུག་སྟེ་སྒེའུ་ཁུང་ཕྱི་རོལ་ནས་སྤྱང་ལྟོགས་བཞིན་བསྒུགས་བསྡད་ཡོད་པའི་ཁོ་ཚོར་བྱིན། ཅོང་རྡོག་དང་མར་ལོ་རག་རྗེས་ཁོ་ཚོས་ང་རང་ཇ་ཁང་གི་སྒེའུ་ཁུང་ལས་ཕྱིར་ལེན་རོགས་ཀྱང་མི་བྱེད་པར་རླུང་གཡུག་པ་ལྟར་མུན་ཁྲོད་དུ་ཡལ་སོང་།
ངས་རང་ནུས་ཅི་ཡོད་ཀྱིས་རང་གི་ཕྲ་ལ་མཉེན་པའི་གཟུགས་པོ་དེ་སྒེའུ་ཁུང་ཆུང་ཆུང་དེའི་ཕྱི་རོལ་ཏུ་འབུད་ཐབས་བྱས། ནང་ལ་བསླེབས་དུས་ཤག་རོགས་ཚོས་མེ་བུས་ནས་རང་རང་གི་ལྕགས་ཕོར་ཚོ་ཚ་བོ་བཟོས་པའི་ནང་དུ་མར་ལོ་བཞུས་པའི་ཤིང། དེའི་ནང་དུ་ཅོང་རྡོག་བརྔོས་ནས་མ་ཁོམ་པར་འདུག སྟབས་ལེགས་པ་ཞིག་ལ་དོ་དགོང་ཁོ་ཚོས་ངའི་སྐལ་བ་མ་བཅད་པར་ང་ལ་ཡང་བརྒྱགས་ཚད་ཅིག་བཟའ་རུ་བཅུག་བྱུང་།
སང་ཉིན། ཉི་འོད་སེར་པོ་ཞིག་ཧ་ཅང་གྲང་བའི་གནམ་གཤིས་དང་མི་འཚམ་པའི་ཚུལ་དུ་སློབ་གྲྭའི་ཁོར་ཡུག་ཏུ་འཕྲོས་ཡོད། དགེ་རྒན་དང་སློབ་མ་ཚང་མ་མཉམ་དུ་ཚོགས་འདུར་འཛོམས་སོང་། ཤག་རོགས་ཚོ་དང་ང་རང་དགེ་སློབ་ཡོད་ཚད་ཀྱི་མདུན་དེར་ཡར་བསླངས་ནས་རྐུན་མ་ནག་ཆེན་ཡིན་པའི་དགག་པ་བརྒྱབ་སོང་། ཤག་རོགས་ཚོ་ནི་ནམ་རྒྱུན་སྤྱོད་པ་དང་སློབ་སྦྱོང་གང་ཐད་ནས་ཡར་སྐྱེད་དེ་ཙམ་མེད་པ་འབའ་ཞིག་ཡིན་པས་དེ་ཙམ་གྱི་ཚོར་སྣང་ཡོད་པར་མི་མཐོང་། ང་ནི་ལོ་རེ་རེ་བཞིན་གསུམ་བཟང་སློབ་མའི་བྱ་དགའ་ལེན་མཁན་ཞིག་ཡིན་པས་ངོ་ཚ་ནས་མགོ་ཡང་འགྱོགས་ཕོད་མ་སོང་། དེ་དུས་ནི་སྤྱི་ལོ་1981ལོའི་དགུན་ཁ་རེད།
* ཅོང་རྡོག་ནི་ཨམ་སྐད་ཡིན་ཞིང་རྒྱ་གར་དང་བལ་ཡུལ་དུ་བོད་པ་ཚོས་སྤྲིན་མོག་ཅེས་པ་དེ་ལ་གོ
ང་ཡང་ཆུང་དུས་སློབ་གྲོགས་འགའ་དང་མཉམ་དུ་སློབ་གྲའི་ཐབ་ཚང་དུ་འཛུལ་ནས་ཅོང་རྡོག་དང་ཕག་ཤ་བརྐུས་ནས་ཟོས་པ་དང་ཡུང་དོང་ནང་འཛུལ་ཏེ་ཡུང་མ་བརྐུས་ནས་བཙོས་པ་སོགས་དྲན་བཅུག་སོང་། ཕལ་ཆེར་ལོ་ཡང་དེ་དུས་ཤིག་ཡིན་ས་ཡོད། ཡིན་ནའང་དགེ་རྒན་ཚོས་བརྐུས་པ་ཤེས་ཡོད་ཀྱང་སུ་ཡིན་འཇུ་ཐུབ་མེད།
ཆུང་དུས་བརྐུས་པ་རྐུ་མ་མིན་ཡ ཧཧཧཧཧ
ད་ནི་ཀླུ་སྨྱོན་རྫི་རྡིབ་ཁུར་ཡོད་ས་རེད། ཡག་རྒྱུ་དང་སྙན་རྒྱུ་སྣ་ཅིག་མེད་པའི་རྩོམ་འཆལ་འདྲ་འབྲི་སྟངས་ལ་ལྟོས་དང་། ད་དུང་ཁྱོད་ལ་རེ་བ་ཡོད་ན་མང་བ་ལས་སྤུས་ཀ་གཙང་དགོས་པ་རེད། རྩོམ་འཆལ་མང་ན་གད་སྙིགས་རེད་ཨ་ལགས་ཚང་།