རྔ་བ་ཀུན་བཟང་།
ཕོ་གསར་མོ་གསར་མང་བའི་ཆང་ཁང་ལ་འགྲོ་བ་ཧ་ཅང་ཉུང་ཉུང་ཡིན། འགྲོ་མ་འདོད་པ་མིན། དུས་ཚོད་དང་ཁོར་ཡུག་དབང་གི་འགྲོ་ས་མ་རགས་ཐལ། མཚན་ཚོགས་ཁང་གི་གླུ་གར་དང་རོལ་མོ་སོགས་ལ་དེ་བས་དགའ། སྐྱེ་བ་སྔོན་མ་ནས་གླུ་དབྱངས་ཀྱི་བག་ཆགས་ཡོད་པར་འདྲ།
དྲང་པོར་བརྗོད་ན། ཉིན་འགའ་གོང་ནས་ང་ས་ཆ་རྒྱ་ཆུང་ཡང་ཁམས་དྭངས་ས་ཞིག་ན་ཡོད།དལ་དལ་ལྷོད་ལྷོད་དང་། བློ་བདེ་བག་ཕེབས་ངང་ནས་དཔྱད་དེབ་འགའ་ཀློག་ནས་བསྡད་ཡོད། དྭངས་གཙང་གི་ཁོར་ཡུག་དང་འཕྲད་དུས་བསམ་ཡུལ་ལས་འདས་པའི་འཆར་སྣང་སྐྱིད་པོ་སྦྱིན་པར་བྱེད།
དེའི་ཕྱིར། མདང་ནུབ་འཛིན་གྲོགས་འགའ་མཉམ་དུ་ཆང་ཁང་ལ་ཕྱིན་པ་ཡིན། མཉམ་དུ་ཆང་འཐུང་ནས་ཁ་བརྡ་བྱེད་དུས། ད་གཟོད། འདས་ཟིན་པའི་མི་ལོ་དགུ་ཡི་སློབ་གླིང་གི་འཚོ་བ་དེ་ཡིད་ལ་གློག་བརྙན་ལྟར་འཁོར་ལ། ལྷོད་ཤིག་ཤིག་ངང་ཁ་བརྡ་གློད་དེ་སྡོད་པའི་སྐལ་བ་ཞིག་བྱུང་དུས། ནམ་ཡིན་རུང་ཚར་རྒྱུ་མེད་པའི་དཔེ་ཀློག་གི་དཀའ་ཁག་དག་བརྗེད་འགྲོ་ལ། སུ་ཡང་མེད་པའི་ས་མཐའ་ཡང་བདེ་སྐྱིད་ཀྱི་ཞིང་ཁམས་ཡིན་པའི་དྲན་གསོ་ཞིག་བྱུང་།
དེ་བས་ཀྱང་། ཆང་ཁང་འདི་ནི་རི་འདབ་ཀྱི་ནགས་ཚལ་དཀྱིལ་ན་ཡོད་པས། ཟང་ཟིང་དང་རབ་རིབ་གྱི་འུར་སྒྲ་ཞིག་གང་ན་ཡོད། གསེར་མདོག་བཀྲ་བའི་གློག་འོད་ཆུང་ཆུང་འགའ་དང་བརྩེ་དུང་གི་རོལ་མོ་ལྷོད་ལྷོག་ཞིག་བཏང་འདུག། ད་དུང་རྐུབ་བཀྱག་དང་གཡས་གཡོན་གྱི་གྱང་ཟུང་ལ་དེང་རབས་ཀྱི་རི་མོ་སྣ་ཚོགས་བྲིས་བ་མཐོང་དུས། གློ་བུར་ཏུ་དྲན་སྣང་མང་ཡང་རང་སེམས་ཀྱི་འཆར་སྣང་རང་ཁུག་ལ་མ་གསང་ཀ་མེད་བྱུང་། གང་ལྟར་ཆང་ཁང་འདི་ནི་ངའི་དྲན་འཆར་ཡིད་ཀྱི་མེ་ཏོག་དང་། བག་ཆགས་ཀྱི་ཚགས་ཁྲོལ་ནང་བླུགས་ན་རིན་ཐང་ཡོད་པས། བསྐྱར་དུ་ལོག་འདོད།
2021/08/14/
གཏམ་འདི་སྙིང་རྗེ་པོ་ཞིག་འདུག
ཐུགས་རྗེ་གནང་།
ཨརྱ་ལགས། བཀའ་དྲིན། ནམ་ཡང་འཆར་ཡིད་ལྡན་པ་ཤོག།