རེབ་ཐོག་མདའ།
ཆར་ཆུ་བསིལ་མ་དགུང་ནས་བབས་ཏེ་ས་གཞིའི་ངོ་གདོང་རླན་གྱིས་ཟིན་ཐལ།།
སྤྲིན་པ་དཀར་པོ་ཁ་དོག་འགྱུར་ནས་ཡར་ཁའི་རི་ཡི་རྩེ་མོ་བཀླུབས་སོང་།།
ཉི་མའི་འཛུམ་མདངས་རེ་ཞིག་བོར་བའི་རྒྱང་རིང་ནམ་མཐའི་མཁའ་དབྱིངས་དེ་ན།།
གློག་ཞགས་དམར་པོའི་སྨུག་སྤྲིན་ཀློང་ན་རང་དབང་འཁྱུག་རྩལ་ངོམས་འདི་མཚར་བ།།
ས་ཆེན་སྐྱོ་བའི་མྱ་ངན་མིག་ཆུ་ཉིན་དང་མཚན་ལ་ཤག་ཤག་བབས་ནས།།
ལམ་ཆེན་དཀྱིལ་ན་དལ་གྱིས་བཞུར་བའི་རྐ་ཆུ་དེ་ཡང་ཀུ་ཅོས་ཁེངས་འདུག།།
ཁྲོམ་དང་སྲང་ལམ་ཁུ་སིམ་ཀློང་ན་གཉིད་དུ་ཡུར་བའི་རྨི་ལམ་རིང་མོ།།
རྒྱང་རིང་འགྲུལ་བའི་རླངས་འཁོར་དུང་སྒྲས་སྐྱ་རེངས་བུ་མོ་མཉམ་ཏུ་དཀྲོག་སོང་།།
ཁང་བརྩེགས་མཐོན་པོའི་ངོ་གདོང་སྐྱ་བོ་ངལ་དུབ་ཁྲོད་ན་རྔུལ་ཆུས་བརླན་འདུག།
རྡོ་དང་གད་སྙིགས་རིམ་པར་སྤུངས་པའི་ཟ་ཁང་ཚོང་ཁང་གྲུ་ཟུར་དག་ན།།
བ་མོ་བདག་མེད་ཟས་ལྷག་སྤྱོད་བཞིན་བག་དལ་འཚོ་བའི་ངང་ཚུལ་དེ་ལ།།
སྲང་ཁྱི་དེ་ཡིས་ཕྲག་དོག་མཇུག་མ་གཡུག་གཡུག་བྱེད་བཞིན་རྒྱང་ནས་སླེབས་ཐལ།།
ཚོང་ཁང་ནང་དུ་མགྲོན་ལ་སྒུག་པའི་བདག་པོའི་གདོང་གི་འཛུམ་ཆུང་དྭངས་མོ།།
ཁ་སང་དེ་རིང་ཆར་ཞོད་དེ་ཡིས་བཀྲུས་པ་ཡིན་ནམ་ཁུར་བ་གང་ཡིན།།
གསལ་བོ་ངག་གི་ཁ་ལྕེ་གསོན་པོ་བདག་ལ་ཤུར་ཤུར་བཤད་རྒྱུ་མེད་ཀྱང་།།
ནམ་ཟླ་འདི་ལ་ཁ་ཁོག་མེད་པར་སུན་སྣང་བྱེད་པ་ང་ལས་མང་གི།
སྦག་སྦག་གཏོང་བའི་ཕོ་གསར་དེ་ཡིས་རང་གི་རྒྱུག་རྩལ་ངོམས་པ་ཡིན་ནམ།།
ཡང་ན་དེང་རབས་འཕྲུལ་ཆས་དེ་ལ་འགྲན་ཞིག་འཛུགས་འདོད་བསམ་འདི་ཅི་ཡིན།།
སྲང་ལམ་དོག་མོའི་གཞུང་དེ་གཤགས་ནས་སྲང་གི་ཆུ་རྙོག་མཆོད་དེ་སོང་བ།།
མ་ཎི་ཁང་གི་འོག་ན་སྡོད་པའི་སྤྲང་པོ་ཧད་པའི་མིག་ལས་མཐོང་ཐལ།།
ཤུགས་ཀྱིས་ལྡང་བའི་རླུང་བུ་དེ་ཡིས་ཆར་ཆུར་རམ་འདེགས་བྱེད་པ་ཇི་བཞིན།།
ཡར་ཁའི་ལྗོན་པའི་མགོ་བོ་མཐོན་པོ་དལ་གྱིས་མར་ལ་བསྙེལ་ཏེ་བུད་ཐལ།།
སྤྲེ་འུ་རྒན་པོའི་གྲང་འཁྱག་མ་བཟོད་ཁང་བརྩེགས་མཐོན་པོའི་སྦུག་ལ་འཚང་ཡང་།།
ཁྱིམ་བདག་རྒན་པོའི་མིག་ཟུང་ནང་ལ་ལྷན་སྐྱེས་སྙིང་རྗེ་རི་མོར་བབས་འདུག།
འོ་ཇ་དཀར་བོའི་ཚ་དྲོད་བར་ནས་ལུས་སེམས་སྐྱིད་པའི་བདེ་སྣང་མྱོང་བཞིན།།
འདས་སོང་ལོ་ཟླའི་གཏམ་རྒྱུད་ཞིག་གི་ཕྱི་ནང་དལ་གྱིས་ཉུལ་བའི་དུས་སུ།།
ཆར་གདུགས་ཐོགས་པའི་སྙིང་སྡུག་མ་དེའི་གཟུགས་མེད་གོམ་སྒྲ་བདག་ཕྱོགས་རྒྱུ་བས།།
སེམས་དང་མིག་གཉིས་ཁོ་མོའི་ཕྱོགས་ལ་རང་དབང་མེད་པར་ག་ལེར་ཤོར་བ།།
མགོ་ལུས་ཡོངས་ན་ཆུ་ཐིགས་འཛར་ཞིང་དབྱུག་པ་ཐོགས་པའི་བགྲེས་སོང་དེ་ཡིས།།
ཡ་ཐོད་མིག་གིས་བདག་ལ་ཧད་དེ་ཁེར་དགོད་བྱེད་པའི་ཚུལ་དེར་བལྟས་ན།།
རྒྱང་ལ་ཤོར་བའི་བདག་གི་མིག་ཟུང་དབང་མེད་གཞན་ལ་འཁོར་དགོས་སྙམ་ཡང་།།
གློ་བུར་བྱུང་བའི་ཚུགས་ཀ་དེ་ལ་འགྲམ་གྱི་མགོ་སེར་གད་མོ་ཤོར་ཐལ།།
དེ་ལྟར་རེ་ཞིག་ངོ་ཚའི་མགོ་བོ་ཡར་ལ་མ་འཁྱོག་བྲང་ལ་ལྷུང་ནས།།
མིག་གི་འོག་ནས་ཁོ་མོའི་རྒྱབ་གཟུགས་དེ་ལ་དལ་གྱིས་ལྟ་འདོད་བྱུང་ཡང་།།
བགྲེས་སོང་ཨ་མའི་རྡབ་རྡིབ་ངག་གིས་བདག་ལ་ཅི་ཞིག་འཆད་ཀྱིན་འདུག་པས།།
དེ་རིང་སྙིང་སྡུག་ལང་ཚོ་དེ་ལ་སེམས་ཀྱིས་རོལ་བའི་ལས་དེ་ཟད་ཐལ།
བདག་དང་ཇ་ཕོར་སྟོང་བའི་ངང་ནས་ཇ་ཁང་སྦུག་ནས་ཁེར་རྐྱང་ལྷག་ཐལ།།
སེམས་མཐུན་བུ་མོའི་ལང་ཚོ་དེ་ལ་ལོངས་སུ་སྤྱོད་པའི་མིག་ཟུང་བོར་ཐལ།།
ཉིན་མ་གཅིག་གི་དུས་ཚོད་རིང་མོ་འདི་ལྟར་བོར་བའི་སྐྱ་སྟོང་ཞིག་གིས།།
ཆར་ཞོད་ཞིག་གི་མཐོང་ལམ་གྱུར་པ་མ་གསང་དྲང་མོ་འདི་རུ་བྲིས་ཡོད།།
ཤ་ཉེ་ཐོག་མདའ། སྐྱ་སྟོང་མ་རེད། རྐྱལ་སྟོང་རེད།
ཡང་སྙིང་ཆར་བ་དང་བརྩེ་དུང་གི་བར་ལ་གསང་བ་ཅི་ཞིག་ཡོད་དམ།
སྙན་ཚིག་དུམ་བུ་དེ་་་་་ཧ་ཅང་སྙན་པོ་འདུག་བཀའ་དྲིན་ཆེ།
ད་དུང་ཟ་ཁང་དེ་ས་ཆ་གང་དུ་ཡིན་མིན་ཁ་གསལ་ཞིག་བཟོ་ཐུབ་ན་དེ་བས་སྙན་ས་རེད།