ཆེས་མཐོའི་ཁྲིམས་ཞིབ་པ་གསུམ་འཕོ་འགྱུར་ལ་བརྟེན་ནས་བྱུང་བའི་དཀའ་རྙོག་དེ་སེལ་ཐབས་ཤིག་ཡོད་དམ།

གཞུང་ཞབས་ཟུར་པ་འཇིགས་མེད་པ་སངས།

༄༅།། ཕྱི་ལོ་ ༢༠༢༡ ཟླ་ ༣ ཚེས་ ༢༥ ཉིན་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱིས་བྲེལ་བའི་ངང་ཁྲིམས་འགལ་གྱི་སྒོ་ནས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གསུམ་དུས་གཅིག་ལ་འཕོ་འགྱུར་བཏང་བ་ལ་བརྟེན། བཙན་བྱོལ་སྤྱི་ཚོགས་ཁྱོན་ཡོངས་ལ་བརྡབ་གསིག་ཚབས་ཆེན་བཟོས་པ་མ་ཟད། ད་ལྟའི་ཆར་དཀའ་ངལ་དེ་སེལ་མ་ཐུབ་པར་མུ་མཐུད་ལུས་པའི་དབང་གིས་འབྱུང་འགྱུར་བདུན་ཕྲག་ཁ་ཤས་ནང་མང་གཙོའི་ཀ་བ་གསུམ་ཆར་སྦོ་ལུག་རྒྱུའི་ཉེན་ཁའི་མཚམས་སུ་སླེབས་ཡོད་པ་ཚང་མས་མཁྱེན་གསལ་ལྟར་རེད། དེ་འདྲའི་ཉེན་ཁ་ལས་གྲོལ་ཆེད་ད་བར་རྒྱ་ཆེའི་མང་ཚོགས་ཀྱིས་བསམ་འཆར་དང་འབོད་བསྐུལ་ཇི་སྙེད་ཅིག་ཕུལ་དང་འབུལ་བཞིན་པ་རྣམས་ལ་སྤྱི་འཐུས་ལྷན་ཁང་གིས་ཡ་ལན་གནང་རྒྱུ་ལྟ་ཅི། ད་དུང་དེ་ལས་ལྡོག་ཏེ་མི་མང་གིས་བསམ་འཆར་སྤེལ་བ་དེ་གང་མིན་ཚད་རེད་མདོག་མདོག་བྱེད་པ་ནི། ཞེ་གཏིང་ལ་མང་གཙོའི་མྱོང་གོམས་གཏན་ནས་མེད་པའི་དན་རྟགས་དམར་རྗེན་དུ་ཐོན་པ་ཞིག་མ་ཡིན་ནམ། མང་གཙོའི་སྤྱི་ཚོགས་ནང་མི་མང་གི་བསམ་ཚུལ་ནི་གཙོ་བོ་ཡིན་སྟབས། ང་ཚོས་མུ་མཐུད་བསམ་འཆར་སྤེལ་ཏེ་དཀའ་རྙོག་འདི་ལ་གྲོལ་ཐབས་བཙལ་དགོས།

ད་ལྟའི་དཀའ་རྙོག་འདི་ལས་གྲོལ་ཐབས་གང་འདྲ་ཞིག་བཙལ་རུང་། ཕྱི་ཟླ་ ༣ ཚེས་ ༢༥ བཞག་པའི་གྲོས་ཆོད་ཨང་ ༣༩ དེ་རྩིས་མེད་གཏོང་དགོས་ཤིང་། དེ་ཡང་བཅའ་ཁྲིམས་དང་མཐུན་པའི་སྒོ་ནས་གནང་ཐུབ་དགོས་ཀྱི་ཡོད་སྟབས། ཟླ་བའི་སྔོན་མའི་ནང་སྟེ། ཕྱི་ལོ་ ༢༠༢༡ ཟླ་ ༤ ཚེས་ ༢༧ ཉིན་གུས་ནས་སྤྱི་འཐུས་ཚོགས་གཞོན་གྱི་མིང་ཐོག་མཚན་འཁོད་སྙན་ཞུ་དང་སྦྲགས་དགོངས་པའི་དཔྱད་གཞིའི་སླད་ ༼ཆེས་མཐོའི་ཁྲིམས་ཞིབ་པ་གསུམ་འཕོ་འགྱུར་ལ་བརྟེན་ནས་བྱུང་བའི་དཀའ་རྙོད་དེ་སེལ་ཐབས་ཤིག་ཡོད་དམ།༽ ཞེས་དཔྱད་རྩོམ་ཞིག་ཕུལ་བར་ད་བར་ཡ་ལན་གང་ཡང་མ་བྱུང་བ་མ་ཟད། ཐུགས་ཞིབ་ཀྱང་གནང་ཡོད་ཚོད་མི་འདུག་ན། ད་ཆ་སྙན་ཞུ་དང་དཔྱད་རྩོམ་གཉིས་ཀ་ཡོངས་གྲགས་མ་བཟོ་འདོད་བྱུང་།   

དེང་སང་བཅའ་ཁྲིམས་ཀྱི་སྒྲོམ་གཞི་ཆ་ཚང་བ་ཞིག་དམིགས་འོག་ཏུ་མ་ཆུད་པར་བཅའ་ཁྲིམས་ལ་ད་དུང་བསྐྱར་བཅོས་མང་པོ་གནང་དགོས་འདུག་ཅེས་གསུང་མཁན་འགའ་ཞིག་ཡོང་གི་ཡོད་ཚོད་འདུག  བཅའ་ཁྲིམས་ལ་དགོས་ངེས་ཀྱི་བསྐྱར་བཅོས་བྱེད་དགོས་ངེས་ཤིག་ཀྱང་རེད། འོན་ཀྱང་བཅའ་ཁྲིམས་ཆ་ཚང་བ་ཞིག་དམིགས་འོག་ཏུ་མ་ཆུད་པར་བསྐྱར་བཅོས་གཏོང་གིན་བསྡད་ན་བཅའ་ཁྲིམས་རྩབ་ཧྲལ་གཏོང་རྒྱུ་ཉག་གཅིག་རེད། དེ་ཡང་ཉེ་ཆར་གྲོས་ཚོགས་ཀྱིས་ཆེས་མཐོའི་ཁྲིམས་ཞིབ་ཁང་དང་འབྲེལ་བའི་བཅའ་ཁྲིམས་བསྐྱར་བཅོས་ཁག་ལས་གསལ་པོ་ཆགས་ཟིན། བཙན་བྱོལ་བོད་མིའི་བཅའ་ཁྲིམས་འདིའི་ཟིན་བྲིས་བཟོ་བའི་སྐབས་སུ་སྙན་གྲགས་ཆེ་བའི་རྩ་ཁྲིམས་ཀྱི་ཁྱད་མཁས་མི་སྣ་མང་པོ་ལས་སློབ་སྟོན་དང་བགྲོ་གླེང་ཞུས་མཐར་བཙན་བྱོལ་བོད་མིའི་དགོས་མཁོར་གཞིགས་པའི་བཅའ་ཁྲིམས་ཤིག་བཟོས་ཡོད། གལ་ཏེ་རྩ་ཁྲིམས་དང་སྒྲིག་གཞི་སོགས་ལ་ཐུགས་རྒྱུས་ཏོག་ཙམ་ཡོད་མཁན་ཡིན་ན་བཙན་བྱོལ་བོད་མིའི་བཅའ་ཁྲིམས་ནི་ཆ་ཚང་ཞིང་ལག་ཏུ་བླང་བདེ་བ་ཡིན་པ་ཧ་ཅང་གསལ་པོ་རེད། བཅའ་ཁྲིམས་ནི་ཁྲིམས་ཀྱི་ཨ་མ་ལྟ་བུ་རེད། གཞུང་ཡོངས་རྫོགས་ཀྱི་ལས་དོན་བྱེད་ཕྱོགས་ཞིབ་ཕྲ་འདིའི་ནང་བཀོད་སྲོལ་མེད་ཅིང་། སོ་སོའི་དགོས་མཁོའི་སྒྲིག་གཞི་ཞིབ་ཕྲ་རྣམས་བཅའ་ཁྲིམས་ཀྱི་དོན་ཚན་གྱི་འོག་ནས་བཟོ་དགོས་ཀྱི་ཡོད། འོན་ཀྱང་ད་བར་བཅའ་ཁྲིམས་ཀྱི་འོག་ནས་སྒྲིག་གཞི་བཟོ་འགོད་མ་ཐུབ་པ་ཇི་སྙེད་ཅིག་ཡོད། དཔེར་ན། བཅའ་ཁྲིམས་དོན་ཚན་བརྒྱད་པའི་ནང་གསེས་བཞི་པ་དང་། དོན་ཚན་ཞེ་དྲུག་པའི་ནང་གསེས་གཉིས་པ། དེ་བཞིན་བཅའ་ཁྲིམས་དོན་ཚན་བཅོ་བརྒྱད་པའི་ནང་གསེས་གསུམ་པ་དང་། དོན་ཚན་ང་བཞི་པ་སོགས་རེད། ཁྲིམས་བཟོ་ལྷན་ཚོགས་ཀྱི་བླ་ན་མེད་པའི་ལས་དོན་ནམ་ལས་འགན་ནི་ཁྲིམས་སྒྲིག་ཁག་བཟོ་རྒྱུ་དེ་རེད། 

༄༅།། དཔལ་ལྡན་བོད་མི་མང་སྤྱི་འཐུས་ཚོགས་གཞོན་སྐོུ་ཨཱ་ཅཱརྱ་ཡེ་ཤེས་ཕུན་ཚོགས་མཆོག་གི་དྲུང་དུ།

གུས་པས་ཞུ་གསོལ། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གསུམ་སྡེབ་གཅིག་ལ་འཕོ་འགྱུར་བཏང་བ་ལ་བརྟེན་ནས་གདོང་ལེན་བྱེད་དཀའ་བའི་གནད་དོན་མང་པོ་གཅིག་མཇུག་གཉིས་མཐུད་དུ་བྱུང་དང་འབྱུང་བཞིན་པར་སོང་། མཛད་གཙོ་རྣམ་པ་ཚོ་ཡོངས་དང་། ཁྱད་པར་སྐུ་ཉིད་ལ་མཛད་དཀའ་ཆེན་པོ་ཡོད་པ་གསལ་པོ་རེད། འོན་ཀྱང་ད་ལན་སྐུ་ཉིད་ནས་བློ་རྒྱ་ཡངས་པོའི་སྒོ་ནས་འགོ་ཁྲིད་ཀྱི་ནུས་པ་བཏོན་ཏེ་དཀའ་རྙོག་འདི་ལས་གྲོལ་ཐུབ་པ་བྱུང་ན། བོད་མི་རིགས་ལ་ཞབས་འདེགས་རླབས་ཆེན་བསྒྲུབ་རྒྱུ་མ་ཟད། རྒྱལ་བ་དགྱེས་པའི་མཆོད་སྤྲིན་དུའང་འགྲོ་རྒྱུ་ཡིན་པ་ཞུ་ག་ལ་དགོས།

དེ་འདྲ་སོང་ཙང་། དཀའ་རྙོག་འདི་ལས་གྲོལ་ཐབས་སུ་མི་མང་པོས་ལྷག་བསམ་རྣམ་དག་གིས་བསམ་འཆར་འདོན་སྤེལ་གནང་དང་གནང་བཞིན་པ་ལྟར། གུས་ནས་ཀྱང་སྤྱི་དོན་ལ་ཕན་ན་སྙམ་པའི་བསམ་པ་བཟང་པོས་ཀུན་ནས་བསླངས་ཏེ་དཀའ་རྙོག་འདི་ལས་གྲོལ་ཐབས་ཤིག་བྱུང་ན་ཅི་མ་རུང་སྙམ་ཏེ་བསམ་བློ་མང་པོ་བཏང་བ་ཡིན། ཁྱད་པར་རང་ཅག་སློབ་ཟུར་ཡོངས་ཀྱིས་གུས་བརྩི་ཆེན་པོ་ཞུ་ཡུལ་དང་། བཅའ་ཁྲིམས་རིན་པོ་ཆེ་ཐོག་མར་བཟོ་བཀོད་གནང་མཁན་གཙོ་བོའི་ཁོངས་ཡོད་པ་དཔལ་ལྡན་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོའི་ཆེས་ཉེ་སྔོན་ནོར་ཝེ་བོད་ཀྱི་རླུང་འཕྲིན་ཁང་ལ་གནང་བའི་བཀའ་སློབ་ཀྱི་ནང་དོན་རྣམས་གཞི་རྩར་བཞག་ནས། བཅའ་ཁྲིམས་ཀྱི་དོན་ཚན་ཁག་ཕན་ཚུན་སྦྱར་ནས་བསམ་ཞིབ་ནན་པོ་བྱས་འབྲས་སུ། ཐབས་ལམ་འདི་འདྲ་ཞིག་མེད་དམ་སྙམ་པ་བྱུང་བ་རྣམས་སྤྱི་བརྟོལ་བསྐྱེད་དེ་སྐུ་ཉིད་ཀྱི་དཔྱད་གཞིར་ཡོངས་གྲགས་མ་ཡིན་པར་ནང་མོལ་རང་གི་ངོ་བོའི་ཐོག་ནས་ཟུར་འབུལ་ཞུས་པ་ལགས་ན། ཞུ་ཧམ་དུ་དགོངས་པར་ཐུགས་ཕན་གསོས་པ་ཡོད་མེད་གཟིགས་ཞིབ་ཡོང་བ་ཞུ། གུས་ཝར་ཎ་སློབ་ཟུར་དང་གཞུང་ཞབས་ཟུར་པ་ཨོ་སི་ཀྲོ་ལི་ཡར་གནས་སྡོད་འཇིགས་མེད་པ་སངས་ཀྱིས་གུས་ཞབས་བཅས་ཕྱི་ལོ་ ༢༠༢༡ ཟླ་ ༤ ཚེས་ ༢༧ ཉིན་ཕུལ།། 

ཆེས་མཐོའི་ཁྲིམས་ཞིབ་པ་གསུམ་འཕོ་འགྱུར་ལ་བརྟེན་ནས་བྱུང་བའི་དཀའ་རྙོག་དེ་སེལ་ཐབས་ཤིག་ཡོད་དམ།

༄༅།། ཉེ་ཆར་གྲོས་ཚོགས་ཀྱིས་ཁྲིམས་ཞིབ་པ་གསུམ་སྡེབ་གཅིག་ལ་འཕོ་འགྱུར་བཏང་བའི་རྗེས་སུ་འབྱུང་འགྱུར་བོད་མིའི་སྒྲིག་འཛུགས་ཀྱི་མང་གཙོའི་སྒྲོམ་གཞི་དེ་བཅའ་ཁྲིམས་དང་མཐུན་པ་གནས་ཐབས་ཇི་ལྟར་ཡོང་གི་ཡོད་མེད་ཀྱི་བསམ་ཚུལ་གསལ་པོ་ཞིག་ད་བར་མཇལ་མ་སོང་།

དེ་ནི་གནས་ཚུལ་ཕྲན་བུའི་རྙོག་འཛིངས་ཅན་ཞིག་ཡིན་པས་ཐུགས་ཁག་ཀྱང་མི་འདུག དེ་ཡང་།

༡། སྐབས་བཅུ་དྲུག་པའི་སྤྱི་འཐུས་ལྷན་ཚོགས་ཀྱི་ལས་ཡུན་མ་རྫོགས་གོང་དུ་ཆེས་མཐོའི་ཁྲིམས་ཞིབ་པ་གསར་པ་གསུམ་བསྐོ་གཞག་གནང་བའི་དབང་དུ་བཏང་ནའང་། བཅའ་ཁྲིམས་དོན་ཚན་རེ་གསུམ་པའི་ནང་གསེས་གསུམ་པའི་དགོངས་དོན་ལྟར་དམ་བཅའ་འབུལ་ཡུལ་མེད་པར་བརྟེན། ཁྲིམས་མཐུན་གྱི་ཆེས་མཐོའི་ཁྲིམས་ཞིབ་པ་ཆགས་ཐབས་མེད།

༢། སྐབས་བཅུ་དྲུག་པའི་སྤྱི་འཐུས་ལྷན་ཚོགས་ཀྱིས་ཆེས་མཐོའི་ཁྲིམས་ཞིབ་པ་གསར་བསྐོ་མ་བྱས་པར་ལས་དུས་རྫོགས་ནས་སྐབས་བཅུ་བདུན་པའི་སྤྱི་འཐུས་ལྷན་ཚོགས་ཀྱི་ལས་དུས་མགོ་བཙུགས་པ་ཡིན་ན། སྐབས་བཅུ་བདུན་པའི་སྤྱི་འཐུས་ལྷན་ཚོགས་ཀྱི་ཚོགས་གཙོ་དང་ཚོགས་གཙོ་གཞོན་པ་གཉིས་བཅའ་ཁྲིམས་དོན་ཚན་ཞེ་ལྔ་པའི་ནང་གསེས་གཉིས་པའི་དགོངས་དོན་ལྟར་དམ་བཅའ་འབུལ་ཡུལ་མེད་པས། ཁྲིམས་མཐུན་གྱི་ཚོགས་གཙོ་དང་ཚོགས་གཞོན་ཆགས་མི་ཐུབ་པར་བརྟེན། སྐབས་བཅུ་བདུན་པའི་སྤྱི་འཐུས་ལྷན་ཚོགས་མཚན་ཉིད་ཚང་བ་ཞིག་ཡོང་ཐབས་མེད།

༣། སྐབས་བཅུ་དྲུག་པའི་སྤྱི་འཐུས་ལྷན་ཚོགས་དེ་བཅའ་ཁྲིམས་དོན་ཚན་སོ་དགུ་པའི་ནང་གསལ་ལྟར་ལོ་ལྔའི་ཡུན་ཚད་ཚང་བའི་རྗེས་སུ་སྐབས་བཅུ་བདུན་པའི་སྤྱི་འཐུས་ལྷན་ཚོགས་ཀྱིས་དམ་འབུལ་མ་ཐུབ་ན། བཅའ་ཁྲིམས་ལེའུ་ལྔ་པའི་ནང་གསལ་ཁྲིམས་བཟོ་དབང་འཛིན་མེད་པ་ཆགས་རྒྱུ་རེད།

༤། ད་ལྟའི་སྲིད་སྐྱོང་དང་བཀའ་ཤག་དེ་དག་བཅའ་ཁྲིམས་དོན་ཚན་ཉེར་བཞི་པའི་ནང་གསལ་ཡུན་ཚད་རྫོགས་པའི་རྗེས་སུ་འདེམས་ཐོན་སྲིད་སྐྱོང་གསར་པས་བཅའ་ཁྲིམས་དོན་ཚན་ཉེར་ལྔ་པའི་དགོངས་དོན་ལྟར་དམ་འབུལ་མ་ཐུབ་ན་བར་བརྒལ་གྱི་འཛིན་སྐྱོང་ཙམ་ལས། བཅའ་ཁྲིམས་ལེའུ་བཞི་པའི་ནང་གསལ་སྒྲིག་འཛུགས་ཀྱི་འགན་འཛིན་ཡང་མཚན་ཉིད་ཚང་བ་ཞིག་མེད་པ་ཆགས་རྒྱུ་མ་ཟད། སྲིད་སྐྱོང་གསར་པའི་དམ་འབུལ་གྱི་དུས་ཚོད་ཡོང་རྒྱུ་མེད། དེར་བརྟེན་ད་རེས་ཆེས་མཐོའི་ཁྲིམས་ཞིབ་པ་གསུམ་པོ་བཅའ་ཁྲིམས་དགོངས་དོན་ལྟར་ཁྲིམས་ལུགས་ཀྱི་བྱ་རིམ་མེད་པར་གློ་བུར་དུ་ཁྲིམས་འགལ་གྱི་གྲོས་ཆོད་ཅིག་གི་ལམ་ནས་འཕོ་འགྱུར་བཏང་བ་དང་། ཆེས་མཐོའི་ཁྲིམས་ཞིབ་པ་གསུམ་པོས་ཀྱང་ཐུགས་བསམ་ཞིབ་ཚགས་མ་བཞེས་པར་གྲོས་ཚོགས་ཀྱིས་གྲོས་ཆོད་བཞག་པའི་བརྡ་ལན་བྱུང་འཕྲལ་ཕྱག་ལས་མཚམས་འཇོག་མཛད་པ། དེ་ལ་བརྟེན་ནས་གལ་སྲིད་འབྱུང་འགྱུར་ཟླ་བ་གཅིག་གཉིས་ནང་དཀའ་རྙོག་སེལ་ཐབས་མ་རྙེད་ན་མང་གཙོ་ཀ་བ་གསུམ་པོ་རྩ་མེད་འགྲོ་རྒྱུ་གཏན་འཁེལ་བ་རེད། དེ་འདྲའི་གནས་ཚུལ་ཡོང་རྒྱུ་ཡིན་པ་སྤྱི་འཐུས་གྲོས་ཚོགས་དང་ཁྲིམས་ཞིབ་པ་གསུམ་པོས་དགོངས་པ་མ་བཞེས་པ་རེད་དམ། དགོངས་པ་མ་འཁོར་བ་རེད། ཡང་ན་ཆེད་མངགས་གིས་གནང་བ་རེད། དེ་ནི་བོད་མི་མང་ཚོགས་ཀྱིས་ཤེས་དགོས་པ་ཞིག་རེད་ཅེས་དེང་སང་མི་བསམ་ཡོད་དང་། སེམས་ཆུང་། བོད་མིའི་སྒྲིག་འཛུགས་ལ་ཤ་ཞེན་ཡོད་མཁན་མང་པོ་ཞིག་གིས་ད་ཐབས་ཤེས་ག་རེ་ཡོད་དམ་གསུང་གིན་ཡོད་རེད།

གོང་དུ་ཞུས་པའི་རྒྱུ་མཚན་དེ་ཚོ་ལ་བརྟེན་ནས་ཆེས་མཐོའི་ཁྲིམས་ཞིབ་པ་གསུམ་འཕོ་འགྱུར་བཏང་བའི་ཁྲིམས་འགལ་གྱི་གྲོས་ཆོད་ཡིག་ཆ་ཨང་ ༣༩ ཞེས་པ་དེ་གྲོས་ཚོགས་ནས་ཕྱིར་འཐེན་བྱས་ཏེ། ཆེས་མཐོའི་ཁྲིམས་ཞིབ་པ་རྙིང་པ་གསུམ་གྱི་གོ་གནས་བསྐྱར་གསོ་བྱ་རྒྱུ་མ་གཏོགས་ཐབས་ཤེས་གཞན་པ་གང་ཡང་མེད་པ་གསལ་པོ་རེད།

སྤྱི་འཐུས་ལྷན་ཚོགས་ཀྱི་གྲོས་ཆོད་ཨང་ ༣༩ པ་ཕྱིར་བསྡུའམ་ནུས་མེད་གཏོང་རྒྱུའི་ཐབས་ལམ་ག་རེ་ཡོད་མེད་མང་པོས་མཁྱེན་གྱི་ཡོད་ཚོད་མི་འདུག

༡། མང་པོ་ཞིག་གིས་སྤྱི་འཐུས་རྩ་འབོར་གསུམ་ཆ་གཉིས་ཡན་གྱིས་གཏན་ལ་ཕབ་པའི་གྲོས་ཆོད་ཡིན་ཙང་། ཕྱིར་བསྡུ་བྱེད་པ་ལའང་རྩ་འབོར་གསུམ་ཆ་གཉིས་ཡན་གྱི་རྒྱབ་སྐྱོར་དགོས་ཀྱི་རེད་གསུང་མཁན་ཡང་འདུག དེ་ནི་ནོར་བ་རེད།

གྲོས་ཚོགས་ཀྱིས་བཞག་པའི་གྲོས་ཆོད་གང་ཡང་ཕྱིར་བསྡུ་གནང་བའི་སྐབས་སུ་གྲོས་ཆོད་གྲོས་འཆར་གྱི་ལམ་ནས་སྤྱི་འཐུས་ལྷན་ཚོགས་ཀྱི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞི་ལྟར་གྲོས་འཆར་བཏོན་ནས་གནང་རྒྱུ་ཡིན་པ་དང་། དེ་འདྲ་བའི་གྲོས་འཆར་དེ་བཅའ་ཁྲིམས་དོན་ཚན་ཞེ་བརྒྱད་པའི་ནང་“བཅའ་ཁྲིམས་འདིའི་དོན་ཚན་ཁག་ནང་དམིགས་ཀྱིས་བསལ་བའི་དོན་ཚན་རྣམས་ཕུད།” ཅེས་གསལ་བ་ལྟར་གྲོས་འཆར་དེ་ནི་བཅའ་ཁྲིམས་འདིིའི་དོན་ཚན་ཁག་ནང་དམིགས་ཀྱིས་བསལ་ཏེ་འོས་ཤོག་གྲངས་འབོར་ཉུང་མཐའ་ཇི་དགོས་གསལ་བའི་དོན་གནད་མིན་སྟབས། “དེ་མིན་སྤྱི་འཐུས་ལྷན་ཚོགས་ཀྱི་ལས་དོན་ཚང་མ་མང་མོས་ཇི་བྱུང་ལ་ཐག་གཅོད་བྱ་རྒྱུ།” ཞེས་པའི་ནང་གསལ་གྱི་ལས་དོན་ཡིན་པས་མང་མོས་ཙམ་གྱིས་འཐུས་པ་རེད།

༢། ཡང་ཕྱོགས་གཞན་ཞིག་ནས་བཤད་ན། སྔོན་དུ་གྲོས་ཆོད་ཡིག་ཆ་ཨང་ ༣༩ པར་རྒྱབ་སྐྱོར་འོས་ཤོག་འཕེན་མཁན་གྱི་སྤྱི་འཐུས་གཉིས་ལས་མི་ཉུང་བས་རྒྱབ་སྐྱོར་ཕྱིར་འཐེན་བྱེད་རྒྱུའི་གསལ་བསྒྲགས་གྲོས་ཚོགས་སུ་བྱས་པ་ཡིན་ན། སྔོན་མའི་གྲོས་ཆོད་ལ་སྤྱི་འཐུས་རྩ་འབོར་གསུམ་ཆ་གཉིས་ཡན་གྱི་གྲངས་ཚད་མ་ལོན་པ་ཆགས་ནས་རང་བཞིན་གྱིས་ནུས་མེད་དུ་འགྱུར་རྒྱུ་རེད།

གནས་ཚུལ་འདི་གྲོས་ཆོད་ཡོངས་ལ་ཁྱབ་ཐབས་མེད་ཀྱང་། བཀའ་ཤག་དང་། ཁྲིམས་ཞིབ་པ། སྤྱི་འཐུས་ཚོགས་གཙོ་བཅས་འཕོ་འགྱུར་གྱི་ལས་དོན་ཐོག་ཡོང་སྲིད་པ་ནི་གྲོས་ཚོགས་ལམ་ལུགས་ཅན་གྱི་རྒྱལ་ཁབ་ཚོའི་ནང་གཞུང་འཛིན་ལ་ཡིད་ཆེས་ཡོད་པའམ་མེད་པའི་གྲོས་འཆར་གྱི་ཐོག་དགག་བྱ་དང་རྒྱབ་སྐྱོར་བྱེད་མཁན་གྱི་སྤྱི་འཐུས་ཚོས་རྗེས་སུ་རང་གི་ལངས་ཕྱོགས་འགྱུར་བ་བཏང་ན་སྔོན་མའི་གྲོས་ཆོད་ནུས་མེད་དུ་འགྲོ་བ་སྤྱི་སྲོལ་དུ་ཡོད་བཞིན་པ་ཚང་མས་གཟིགས་གསལ་རེད།

༣། ཡང་ན་གྲོས་ཆོད་ཡིག་ཆ་ཨང་ ༣༩ པ་འཇོག་རྒྱུའི་ལས་རིམ་བཅའ་ཁྲིམས་དོན་ཚན་ང་བཞི་པའི་འབྲུ་དོན་དང་དངོས་སུ་འགལ་བ་ཡིན་སྟབས། བཅའ་ཁྲིམས་དོན་ཚན་ལྔ་པའི་ནང་གསེས་དང་པོའི་དགོངས་དོན་ལྟར་རྩ་འཛིན་མེད་པ་གྲོས་ཚོགས་ནས་གསལ་བསྒྲགས་གནང་ན་སྟབས་བདེ་པོ་དང་ཁྲིམས་དང་མཐུན་པའང་རེད།

༤། ཡང་ན་གྲོས་ཆོད་ཨང་ ༣༩ པ་དེའི་ཐོག་འོས་བསྡུ་བྱེད་སྟངས་དེ་བཅའ་ཁྲིམས་དོན་ཚན་ཞེ་བརྒྱད་པ་དང་དངོས་སུ་འགལ་བ་ཡིན་སྟབས། དེའི་རྒྱུ་མཚན་གྱིས་བཅའ་ཁྲིམས་དོན་ཚན་ལྔ་པའི་ནང་གསེས་དང་པོའི་འོག་རྩིས་མེད་གསལ་བསྒྲགས་གནང་ནའང་འགྲིགས་པ་ཞིག་རེད།

ད་ལྟའི་བཅའ་ཁྲིམས་ཀྱི་སྒྲོམ་གཞི་རྡིབ་པ་དང་། བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གཅིག་མཇུག་གཉིས་མཐུད་རྩ་མེད་དུ་འགྲོ་རྒྱུའི་ཉེན་ཁ་ལས་སྐྱོབ་པའི་ཐབས་ལམ་ནི་གྲོས་ཆོད་ཡིག་ཆ་ཨང་ ༣༩ པ་ཕྱིར་བསྡུ་བྱ་རྒྱུའམ། ནུས་མེད་དུ་གཏོང་རྒྱུ་ཁོ་ན་མ་གཏོགས་མེད། ཐབས་ལམ་འདི་ལག་བསྟར་བྱེད་པའི་འགན་དབང་དང་ནུས་པ་ནི་བོད་མི་མང་སྤྱི་འཐུས་ལྷན་ཚོགས་གཅིག་པུ་ལ་ཡོད་པ་དང་། དེ་ཡང་སྐབས་བཅུ་དྲུག་པའི་སྤྱི་འཐུས་ཀྱིས་གནང་དགོས་པ་དང་འབྲེལ་ཆགས་པ་ཡོད་པ་དེ་གསལ་པོ་རེད།

བོད་ཡིག་འབྲི་ཀློག་ཚད་ལྡན་མཁྱེན་མཁན་གྱི་མི་སུས་ཀྱང་བཙན་བྱོལ་བོད་མིའི་བཅའ་ཁྲིམས་རིན་པོ་ཆེ་ཞིབ་ཏུ་ཀློག་ན་གོང་དུ་བཤད་པའི་གནས་ཚུལ་རྣམས་གསལ་པོ་རྭ་འཕྲོད་ཐུབ་རྒྱུ་ཞིག་རེད་མ་གཏོགས། རྟོགས་དཀའ་བའི་དཀའ་གནད་ཅིག་མ་རེད་བསམ་གྱི་འདུག