ཆོས་ཀྱི་མཆོད་སྤྲིན།

སློབ་དཔོན་འཇིགས་མེད་བློ་གྲོས་རྒྱལ་མཚན།

ཆོས་གྲོགས་རྣམས་པ། ཉེ་སྔོན་ཁོ་བོས་ཕྱི་ལོ་༢༠༡༡ཟླ་༨ཚེས་༡ནས་དབུ་བཙུགས་ཏེ། ཉིན་མཚན་ཁ་སྦྱོར་གྱི་བརྩོན་པ་ལྷོད་མེད་བྱས་ནས་ཟླ་དེའི་ཚེས་༢༥ལ་ཀཿཐོག་ནས་ཕྱོགས་བསྒྲིགས་ཞུས་པའི་སྔ་འགྱུར་བཀའ་མ་ཤིན་ཏུ་རྒྱས་པ་པོད་ཆེན་བརྒྱ་དང་ཉི་ཤུ་ཅན་དེ་ལ་དཀར་ཆག་ཤིན་ཏུ་རྒྱས་པ་ཞིག་བྲིས་ཟིན་ཅིང་། དེ་ཡང་སྤྱིར་དཀར་ཆག་འདི་དུས་ཡུན་ཟླ་གཅིག་ཙམ་གྱི་རིང་འབྲི་ཐུབ་པའི་རེ་བ་བྲལ་ཡང་། སྐྱབས་རྗེ་བདུད་འཇོམས་རིན་པོ་ཆེས་ཕྱོགས་བསྒྲིགས་ཞུས་པའི་བཀའ་མ་པོད་ཆེན་ལྔ་བཅུ་རྩ་བརྒྱད་ཅན་ལ་༢༠༠༧གྱི་ལོར་དཀར་ཆག་ཞིབ་མོར་བྲིས་ཟིན་པ་དང་། བཀའ་མ་ཤིན་ཏུ་རྒྱས་པ་འདི་ཉིད་བཀའ་མ་དེ་ལ་གཞི་བྱས་ནས་བསྒྲིགས་པ་ཡིན་སྟབས། དཀར་ཆག་ཀྱང་སྔར་གྱི་དཀར་ཆག་དེས་གཞི་བྱས་ནས་འབྲི་ཐུབ་པས་སྟབས་བདེ་བོ་ཞིག་བྱུང་། དེ་ཡང་གཞུང་དང་མན་ངག་སོགས་མཛད་པ་པོ་རྣམས་ཀྱིས་རང་ཉིད་ལ་ཁེངས་བསྐྱུང་གིས། དཔེར་ན་རྨོངས་པ་དྷརྨཱ་ཤྲྰི་ཞེས་པ་ལྟ་བུ་དང༌། ཆོས་སྨྲ་བའི་གཟུགས་བརྙན་འཇིགས་མེད་བསྟན་པའི་ཉི་མ་ཞེས་དང༌། རྨོངས་རྟུལ་ཤཱཀྱའི་དགེ་སློང་གི་མིང་ཙམ་འཛིན་པ་ཡོན་ཏན་རྒྱ་མཚོ་ཞེས་དང་། ཁྱི་ནག་ཨ་བུ་ཧྲལ་པོ་ཞེས་གསུངས་པ་ལྟ་བུ་རྣམས་ལ། ལོ་ཆེན་དྷརྨཱ་ཤྲཱི་ཞེས་དང༌། རྡོ་གྲུབ་འཇིགས་མེད་བསྟན་པའི་ཉི་མ། ཀོང་སྤྲུལ་ཡོན་ཏན་རྒྱ་མཚོ། དཔལ་སྤྲུལ་རིན་པོ་ཆེ་ཞེས་པ་ལྟ་བུར་བྲིས་པ་ལས་གཞན་ཕལ་མོ་ཆེ་རྣམས་མཛད་པ་པོའི་དགོངས་བཞེད་ལྟར་མཛད་བྱང་རང་དུ་མཚན་གྱི་རྣམ་གྲངས་ཅི་ལྟར་ཡོད་པ་དེ་ལྟར་དུ་བྲིས་ཤིང༌། ཡོངས་གྲགས་སུ་ཤེས་དཀའ་བ་རྣམས་ལ་མཚན་ཡོངས་གྲགས་ཀྱི་བར་མཆན་བཏབ་ཡོད་པ་དང༌། མཛད་བྱང་མི་གསལ་བའི་རིགས་རྣམས་དེ་ལྟར་སོར་བཞག་བྱས་པ་ལས། འཁྲུལ་བ་མི་འབྱུང་བའི་ཕྱིར་འགའ་ཞིག་ལ་མཛད་པོ་སུ་ཡིན་ཤེས་ཀྱང་མཚན་བཀོད་མེད། བཀའ་མའི་དཀར་ཆག་བསྡུས་པ་རྣམས་དང་གླེགས་བམ་སོ་སོའི་དབུར་བཞུགས་པའི་དཀར་ཆག་ལས། འདིར་བསྟན་གྱི་དཀར་ཆག་རྣམས་ཤིན་ཏུ་དག་པར་ཡོད་སྙམ་པ་ལགས།
ལར་དེང་སང་མཚོ་སྔོན་དང་། སི་ཁྲོན། ལྷ་ས་སོགས་ཀྱི་ཞིབ་འཇུག་ཁང་མང་པོས་གཟན་དཀར་རིན་པོ་ཆེ་དང་། མཁྱེན་རབ་འོད་ཟེར་སོགས་མཁས་དབང་རྒན་པ་དུ་མ་ལ་སྤྱི་ཁྱབ་སློབ་སྟོན་པའི་མཚན་རེ་ཕུལ་རྗེས། མདོ་རྒྱུད་བསྟན་བཅོས་སྤྱི་དང་། བྱེ་བྲག་ས་དགེ་བཀའ་རྙིང་གི་གསུང་འབུམ་དུ་མ་ལ་དཀར་ཆག་རྒྱས་བསྡུས་སྣ་ཚོགས་བྲིས་ནས་པར་སྐྲུན་བྱས་པར་སྣང་ཡང་། དོན་ལ་ལག་པས་དངོས་སུ་འབྲི་མཁན་རྣམས་ཆེས་སྤྱིར་བཏང་གི་ལས་བྱེད་དཀྱུས་མ་རྣམས་ཡིན་པས། ཆད་པ་དང་། ནོར་བ་དང་། ལྷག་པ་དང་། མཚམས་གསལ་པོར་ཕྱེས་མེད་པའི་ཆོས་ཚན་དུ་མ་ཆོས་ཚན་གཅིག་ཏུ་བགྲངས་པ་དང་། ཡང་ཆོས་ཚན་གཅིག་ལ་བརྗོད་བྱ་རེ་རེའི་མཚམས་སུ་སྦྲུལ་ཤད་དམ་ཡང་ན་བར་སྟོང་ཕྱེས་ཡོད་ས་རྣམས་ཆོས་ཚན་རེ་རེར་བགྲངས་པ། དོན་ལ་གོ་བ་མ་ལོན་པའི་དབང་གིས་ཚིག་ཐག་གཅོད་པའི་སྤོབས་པ་མེད་ཅིང་མགོ་ཉོག་པ། ཡིག་མཁན་གྱིས་ནོར་བ་དང་པར་ཁང་གིས་ནོར་ཏེ་ཐ་ན་གླེགས་བམ་སྔ་ཕྱི་འཁྲུགས་པ་ཚུན་ཆད་ལ་ཞུ་དག་བྱེད་པའི་ནུས་པ་མེད་པ། རྒྱས་པར་བཤད་དགོས་ས་ནས་གཅམ་བུར་ཕྱིན་ཅིང་བཤད་མི་དགོས་པ་རྣམས་མང་དུ་བཤད་པ་ལྟ་བུ་དང་། ཁྱད་པར་དུ་སྒྲུབ་སྡེའི་ཕྱོགས་ལ་ལས་བྱང་དང་། བསྐྱེད་ཆོག ས་ཆོག དཀྱིལ་ཆོག བསྙེན་ཡིག ལྷན་ཐབས། འཛབ་བྱང་། མཆོད་བསྟོད། བཀླག་ཆོག སྤྱན་འདྲེན་བྱིན་འབེབས། རབ་གནས་སྦྱིན་སྲེག འགུགས་བསྒྲལ་བསྟབ་གསུམ། བསྐང་བསྐུལ་བཟློག་གསུམ་སོགས་ཐུན་མིན་གྱི་ཆོས་སྐད་རྣམས་ལ་གོ་བ་མ་ལོན་པ་དག་གིས་སྒྲུབ་སྡེའི་ཕྱོགས་ཀྱི་དཀར་ཆག་འབྲི་བ་ནི་ཅུང་ཐལ་ཆེ་བ་ཞིག་ལས་ཅི་ཡང་མེད་ཅིང་། གཡག་གི་རྭ་ཁ་ལ་བལྟས་ནས་ཚོང་བསྒྲིགས་པ་ལྟ་བུས་གར་ཡང་མི་ཕྱིན་པས་སྐབས་རེར་ཁོང་ཅག་གིས་བྱས་པ་རྣམས་ལ་ཆད་ལྷག་དང་ནོར་འཁྲུལ་གྱི་ཕུང་པོ་ཕྱུར་བུར་སྤུངས་འདུག་སྟབས། ཕྲན་བུ་རང་ལ་ལྷ་འབྲི་རྟེན་བཞེངས་དང་། དགོན་པ་དང་བཤད་གྲྭ་སོགས་བཙུག་སྟེ་བསྟན་པའི་ཞབས་འདེགས་ཞུ་རྒྱུའི་འཇོན་ཐང་མེད་པ་དང་། ཡང་ཆོས་སྲིད་གང་གི་ཕྱོགས་ནས་ཀྱང་ལས་ཀྱི་སྣེ་མོ་བར་གཏོགས་པ་ལྟ་བུ་གང་ཡང་མིན་པས། ལས་མེད་དལ་སྡོད་ཉི་མ་མི་འཁྱོལ་བའི་གོ་སྐབས་དང་བསྟུན་ཏེ་རང་གི་ཡབ་མེས་ཀྱི་ཡིག་ཚང་རྣམས་ལ་བདག་པོ་ཞིག་བྱེད་འདོད་ནས་བཀའ་གཏེར་གཉིས་དང་། རྙིང་རྒྱུད་ཆེན་མོ། ཀུན་མཁྱེན་ཆེ་བཞི་སོགས་སྔ་འགྱུར་བའི་པཎ་གྲུབ་རྣམས་ཀྱི་གསུང་རབས་ཡོངས་སུ་རྫོགས་པའི་རྡུལ་ལན་གཅིག་སྤྲུགས་རྒྱུ་དང་། མ་འོངས་པའི་སྐྱེ་བོ་དོན་གཉེར་ཅན་རྣམས་ལ་ཡབ་མེས་གོང་མའི་བང་མཛོད་ཀྱི་རྩིས་ཐོ་གསལ་པོ་ཞིག་ལག་ཏུ་སྤྲོད་པའི་ངལ་བ་འདི་ལྷུར་བླངས་པ་ཡིན་ཞིང་།
དེ་ཡང་ཁོ་བོར་མཚོན་ན་བོད་དུ་སྡོད་སྐབས་བླ་མ་བཀའ་དྲིན་ཅན་རྣམས་ཀྱི་སྐུ་དྲིན་ལས་མདོ་སྔགས་ཀྱི་ཆོས་སྤྱི་དང་། ཁྱད་པར་ནང་རྒྱུད་ཡོ་ག་སྡེ་གསུམ་གྱི་ཕྱོགས་ལ་སྒྱུ་འཕྲུལ་གསང་བ་སྙིང་པོ་དང་། གསང་འགྲེལ་ཕྱོགས་བཅུའི་མུན་སེལ། གསང་བདག་ཞལ་ལུང་དང་དགོངས་རྒྱན། སྤྱི་དོན་ལེགས་བཤད་རོལ་མཚོ། སྤྱི་དོན་འོད་གསལ་སྙིང་པོ། མཛོད་སྡེ། བཀའ་བརྒྱད་རྣམ་བཤད། ཐེག་དགུའི་སྤྱི་ཆིངས། གཉུག་སེམས་སྐོར་གསུམ་སོགས་རྒྱུད་དང་རྒྱུད་ཀྱི་དགོངས་འགྲེལ་དུ་མ་ལ་རང་བློ་དང་འཚམས་པའི་སྦྱངས་པ་ཅུང་བྱས་ཤིང་། ངའི་དགོན་པ་རྨ་ཡུལ་ཁྲ་གླིང་དགོན་ཆེན་དུ་མདོ་འོག་མིན་ཚོགས་ཆེན་འདུས་པ་དང་། རྒྱུད་སྒྱུ་འཕྲུལ་དྲྭ་བས་མཚོན་སྔ་འགྱུར་བཀའ་མའི་སྒྲུབ་མཆོད་ཁག་བཅུ་དྲུག་དང་། དེར་མ་འདུས་པའི་ཚེས་བཅུའི་སྒྲུབ་མཆོད་སོགས་ཤིན་ཏུ་རྒྱས་པ་ཨོ་རྒྱན་སྨིན་གྲོལ་གླིང་དང་། རྒྱལ་བ་ཀཿཐོག་པའི་ཕྱག་བཞེས་ཇི་ལྟ་བ་བཞིན་ཡོད་ཅིང་། དེ་དག་གི་ཐིག་རྡུལ་ཚོན་དང་། ཆོ་ག་ཕྱག་ལེན་སོགས་ཀྱི་ལག་ལེན་གྱི་འགན་ཡང་ཁུར་མྱོང་བ་སོགས་ཀྱིས། སྔ་འགྱུར་བཀའ་གཏེར་གཉིས་ཀྱི་ཆོས་སྤྱི་ལ་གོ་བའི་རྨང་གཞི་ཕྲན་བུ་ཙམ་ཡོད་པའི་ཐོག ཡབ་མེས་གོང་མ་རྣམས་ཀྱི་གདམས་ངག་ལ་གཟུ་ལུམ་དང་རང་བཟོས་བསླད་པའི་སྤོབས་པ་མེད་སྟབས། གལ་ལ་ཐུག་དུས་ཧམ་བཤད་དང་། ཚོད་དཔག་བྱས་ནས་བཤད་པ་མ་ཡིན་པར། དཀར་ཆག་ཁག་གི་གནད་འགག་ཆེ་ས་རྣམས་ནི་གཞུང་རང་རང་གི་ཡིག་ཆུང་དང་བར་མཆན། མན་ངག་གི་རྒྱབ་ཡིག བླ་མ་གོང་མ་རྣམས་ཀྱི་ཟིན་བྲིས། བི་མ་ལ་དང་། ལྕེ་བཙུན་ཆེན་པོ་སོགས་ཀྱིས་མཛད་པའི་མན་ངག་གི་ཐེམ་བྱང་དང་ཁྲིད་ཡིག ༧གོང་ས་ལྔ་པ་ཆེན་པོ་དང་སྨིན་གླིང་གཏེར་ཆེན་སོགས་ཀྱི་གསན་ཡིག གཏེར་ཆེན་མངའ་བདག་ཉང་གིས་ཕྱག་བྲིས་ངོ་མའི་བུ་ཡིག་མངའ་རིས་པཎ་ཆེན་གྱི་ཕྱག་དཔེ་ལས་སྨིན་གླིང་གདུང་སྲས་པདྨ་འགྱུར་མེད་རྒྱ་མཚོས་བཤུས་པ། ཐེག་མཆོག་མཛོད་དང་སྔགས་ཀྱི་སྤྱི་དོན་ཚངས་དབྱངས་འབྲུག་སྒྲ་སོགས་ལ་ཁུངས་གཏུགས་ནས་ཆོས་མཚམས་དང༌། ཆོས་ཀྱི་རྣམ་གྲངས་རྣམས་ཤིན་ཏུ་དག་པར་གཏན་ལ་ཕབ་ཡོད་ཅིང་། དེ་དག་གི་ཚུལ་ཡང་རང་རང་གི་མཚམས་རྣམས་སུ་བར་མཆན་གསལ་པོར་བཏབ་ཡོད་པས་དོན་གཉེར་ཅན་རྣམས་ཀྱིས་གཟིགས་ཙམ་གྱིས་མཁྱེན་སླ་བར་ཡོད་དོ།།
ལར་གླག་བླ་བསོད་ནམས་ཆོས་འགྲུབ་ཀྱིས། བསྒྲུབ་བྱའི་ཆོས་ལ་རྒྱ་གར་གྲུབ་མཐའ་བཞི།། བོད་ལ་གསར་རྙིང་ཆོས་ལུགས་སྣ་ཚོགས་ཡོད།། སྐྱེས་ནས་འཕྲད་པའི་ཆོས་དེ་ལྷ་སྐལ་ཡིན།། གཙོ་བོ་དེ་ཉིད་བསྒྲུབ་བྱའི་སྙིང་པོར་ཟུངས།། ཞེས་གསུངས་པ་ལྟར། ཆོས་བརྒྱུད་ཁག་གི་མཁས་པ་སོ་སོས་རང་རང་གི་ཡབ་མེས་གོང་མའི་ཡིག་ཚང་སྤྱིའི་རྡུལ་རེ་སྤྲུགས་རྒྱུ་ཅི་བས་ཀྱང་གལ་ཆེ་བ་འདྲ་བས་ཐུགས་ལ་བསྣམས་རོགས་ཞུ།
དེ་རིང་འདིར་ཞུ་བར་བྱ་བའི་སྙིང་པོ་ནི། ཕྲན་གྱིས་གསར་དུ་བྲིས་པའི་བཀའ་མ་ཤིན་ཏུ་རྒྱས་པའི་དཀར་ཆག་དང་། སྔར་བྲིས་པའི་བཀའ་མ་རྒྱས་པའི་དཀར་ཆག རྙིང་མ་རྒྱུད་འབུམ་ཆེན་མོའི་དཀར་ཆག་སོགས་ཕྲན་སྒེར་གྱི་དྲ་རྒྱ་ www.lightof-wisdom.org དང་། ཡང་རེ་ཞིག་ཕྲན་གྱི་དྲ་རྒྱ་ལ་དེ་ལ་ Additional website space ཟེར་བ་དེ་ཉོས་མེད་པས་དེར་མ་ཤོང་པ་རྣམས་ཨེ་མ་ཧོའི་རིག་མཛོད་ཀྱི་དྲ་རྒྱ་འདིའི་ http://www.amahoweb.org ཐོག་ནས་ཕབ་ལེན་གནང་ཆོག་ཅིང་། མ་མཐའ་ཡང་དོན་གཉེར་ཅན་རྣམས་ལ་གླེགས་བམ་འཚོལ་སླ་བའི་དགོས་པ་ཙམ་རེ་བསྒྲུབ་ཐུབ་ངེས་ཡིན་པས་དེ་ལུགས་ལྟར་དགྱེས་བཞེས་གནང་རོགས་ཞུ་བ་དང་། ཡི་གེའི་ཐོག་ལ་མཐའ་མའི་ཞུ་དག་གྲུབ་མེད་པས་ཡིག་ནོར་གང་མང་ཡོད་ངེས་ལ་དགོངས་པ་མ་ཚོམས་རོགས་ཞུ་བ་ཡིན།

སླར་སྨྲས་པ།
གང་ཞིག་འདོད་སྲེད་རྨོངས་པའི་རྒྱ་མཚོ་རུ།།
ཆོས་པར་རློམས་པ་ཀྱང་ཡོངས་བྱིངས་སྟེ།།
རྙེད་དང་བཀུར་དང་གྲགས་པ་འཚོལ་བ་ལ།།
ཉིན་མཚན་བར་མེད་རྒྱུག་པའི་དུས་འདིས་སྐྱོ།།

བརྒྱུད་པའི་ཆུ་བོ་མེད་པའི་དབང་བསྐུར་དང་།།
རང་ལ་ངེས་ཤེས་མེད་པའི་ངོ་སྤྲོད་སོགས།།
ཡོད་དགུ་གཡོ་རྒྱུས་སྤྱོད་པའི་དུས་མཐའ་འདིར།།
ངེས་དོན་སྙིང་པོའི་ཆོས་ལ་སུ་ཡིད་རྟོན།།

སྡེ་གསུམ་ཀློང་དགུའི་ཆོས་མཛོད་བདུད་རྩིའི་མཚོ།།
མ་སྦྱངས་བླུན་པོས་གཟུ་ལུམ་རང་བཟོ་ཡི།།
ཁ་ཆུས་བསླད་ཀྱིན་ཟོངས་སུ་འཚོང་བ་ལས།།
བསྟན་ལ་སྙིང་ནས་གཅེས་པ་ཉིན་སྐར་ཙམ།།

དེ་བས་མ་སྨད་ལྷག་བསམ་ཉིན་མོའི་མགོན།།
བརྩོན་པ་རྟ་བདུན་ཤུགས་ཀྱིས་དྲངས་པ་ལས།།
འཆར་ནུབ་སྤངས་པའི་ཤེས་རབ་སྣང་བ་འདི།།
ཀུན་བཟང་ཐུགས་ཀྱི་བསྟན་པའི་རྒྱན་དུ་གྲུབ།།

སྔ་འགྱུར་རིག་འཛིན་བརྒྱུད་པའི་ཕ་ནོར་སྟེ།།
བཀའ་གཏེར་ཡིད་བཞིན་ནོར་བུའི་བང་མཛོད་དུ།།
རིན་བྲལ་ཆོས་ཚུལ་འདི་དང་འདི་བཞུགས་ཅེས།།
ཕྱི་རབས་དོན་དུ་རྩིས་ཀྱི་ཐོ་འདི་བྲིས།།

སྐུ་ལོ་དངུལ་གྱིས་བཏུམས་ཀྱང་དགོས་པ་ཆུང་།
འཁོར་དང་གཡོག་པོ་མང་ཡང་ཕན་པ་ཅི།།
ངེས་དོན་སྤྲུལ་པའི་སྐུ་འདྲ་མཆིས་ལགས་ན།།
བཤད་སྒྲུབ་བསྟན་ལ་ལག་རྗེས་ད་ཞོག་ཤིགས།། ཞེས་ཀྱང་སྨྲས་སོ།།