སྐྱོ་བྲག་དགའ་དབང་།
བདག་ལེགས་སུ་འདོད་པ་དག་གིས་གང་ལ་བསྟེན་ན་བུ་མོ་རིན་ཆེན་གྱིས་ཞུས་པའི་མདོ་ལས། བུ་མོ་གསུམ་པོ་འདི་དག་ནི་བྱང་ཆུབ་སེམས་དཔའི་བདེན་པ་སྟེ། གསུམ་གང་ཞེ་ན། གང་སངས་རྒྱས་ལ་མི་སླུ་བ་དང་། བདག་ལ་མི་སླུ་བ་དང་། སེམས་ཅན་ཐམས་ཅད་ལ་མི་སླུ་བའོ། །ཞེས་པ་ལྟར། བདག་གཞན་མཆོད་འོས་དང་བཅས་པ་མི་སླུ་བ་དོན་དངོས་ཀྱི་བླ་མ་དགེ་བའི་བཤེས་གཉེན་དག་ལ་བསྟེན་པར་བྱ་བའོ། །
གང་ལ་ལེགས་པར་བསྟེན་པས་ཐུགས་རྗེའི་ལྕགས་ཀྱུས་ཡང་དག་པར་ཟིན་ན། དེ་བཞིན་གཤེགས་པའི་ཡོན་ཏན་དང་ཡེ་ཤེས་བསམ་གྱིས་མི་ཁྱབ་པའི་ཡུལ་ལ་འཇུག་པ་བསྟན་པའི་མདོ་ལས། འཇམ་དཔལ་དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་བསྐལ་པ་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་གྲངས་མེད་པ་དག་ཏུ་སེམས་ཅན་དམྱལ་བ་དང་། དུད་འགྲོ་དང་། ཡི་དྭགས་དང་། གཤིན་རྗེའི་འཇིག་རྟེན་དུ་གནས་པར་འགྱུར་བའི་ལས་རྣམས་ཚེ་འདི་ལ་རྣམ་པར་སྨིན་པར་འགྱུར་ཏེ། ཀླད་པ་ཚ་བས་སམ། རིམས་ཚ་བས་སམ། རྩིབ་ལོགས་ན་བས་སམ། རྒྱལ་སྲིད་འཁྲུགས་པས་སམ། ཀླ་ཀློ་འཁྲུགས་པས་སམ། མུ་གེའི་འཁྲུགས་པས་སམ། ལུས་ལ་གནོད་པ་དང་། ཡིད་ལ་གནོད་པ་གང་ཡང་རུང་བས་བརྒྱད་བཀག་པས་ཀྱང་ཚེ་གཅིག་ལ་བྱང་བར་འགྱུར་ཏེ། ཐ་ན་རྨི་ལམ་ཙམ་གྱིས་ཀྱང་བྱང་བར་འགྱུར་རོ། །ཞེས་པ་ལྟར། སྔོན་ལས་ངན་པ་རྒྱ་ཆེན་པོ་རྣམས་བྱང་བའི་རྟགས་སུ་ན་ཚ་རྐྱེན་ངན་ཅི་རིགས་པ་རྣམས་འབྱུང་བ་ཡིན་ནོ། །
ན་ཚ་རྐྱེན་ངན་རྣམས་ལྷོང་བའི་རྐྱེན་དངོས་ནི་བླ་མའི་བྱིན་རླབས་ཡིན་པ་སྟེ། ཁྲིད་ཐུང་བརྒྱ་རྩ་ལས། ཚེ་རབས་སྔ་མའི་ལས་འབྲས་ཚེ་རབས་ཕྱི་མ་འཁོར་བ་མཐའ་མེད་དུ་སྨིན་རྒྱུ་དེ་ཐམས་ཅད་འདིར་བླ་མའི་བྱིན་རླབས་ཀྱིས་དུས་ཐུང་ངུར་སྨིན་ཏེ། དགྲ་འདྲེ། སྨྱོ་འབོགས། ཁམས་འདུས། ཤིག་ནད། མཛེ། དམུ་ཆུ། མ་ཉེས་པའི་ཁ་ཡོག་སྣ་ཚོགས་པ་འབྱུང་བ་ཡིན། ཞེས་སོ། །
དེ་ལྟར་ན་ཚ་རྐྱེན་ངན་རྣམས་རང་ཉིད་ལ་བྱུང་བ་ན། ཁྲིད་ཐུང་བརྒྱ་རྩ་ལས། བསགས་ཆུང་རྣམས་གསོལ་བ་བཏབ་ནས་བདེ་བ་བྱུང་དུས་ང་འདྲ་བའི་མཆོག་གྱུར་གང་ནའང་མེད་བསམ། སྡུག་བསྔལ་བྱུང་དུས་ངས་དམ་པའི་ཆོས་བྱས་པས་སྡུག་བསྔལ་འདི་འདྲ་མི་ཡོང་ཐང་ཟེར་བ་ཀུན་མོས་གུས་དང་གསོལ་འདེབས་ཀྱི་རྒྱུས་མེད་པ་ཡིན། ཞེས་པའི་གོ་ལོག་མི་བྱ་བར་ལམ་དུ་གཏོང་བ་ལ་འབད་པར་བྱ་དགོས་སོ། །
ཇི་ལྟར་ལམ་དུ་གཏོང་བའི་ཐབས་དམ་པ་ནི། དགོངས་གཅིག་རིན་བྱང་མ་ལས། རང་ལ་སྡུག་བསྔལ་དང་ཉེས་པ་མི་མཐུན་པའི་ཚོགས་ཅི་བྱུང་ཡང་། དེ་ལ་དམིགས་ནས་བདག་གི་ལས་ཀྱི་འབྲས་བུ་ཉམས་སུ་མྱོང་བཞིན་པ་འདིས། སེམས་ཅན་རྣམས་ཀྱི་སྡུག་བསྔལ་དང་། ཉེས་ཚོགས་རྒྱུ་འབྲས་དང་བཅས་པ་དག་པར་གྱུར་ཅིག །ཅེས་ལམ་དུ་གཏོང་བ་འདི་ངེད་ཀྱི་ཉམས་ལེན་ཡིན། ཞེས་པ་འདི་ཉིད་དོ། །
ལམ་དུ་གཏོང་བའི་ཐབས་ཚུལ་འདི་ནི། སངས་རྒྱས་ཀྱི་སྐྱེས་རབས་མཛའ་བོའི་བུ་མོ་རྒྱ་མཚོ་ཆེན་པོར་ཚོང་དུ་ཆས་པ་ན། མ་ནི་སྙིང་བྱམས་པས་ཅི་བྱ་གཏོལ་མེད་ནས་མཆི་མ་འཛག་ཅིང་ངུ་བཞིན་རྐང་པ་ལ་འཇུས་ནས་བུ་གཅིག་ང་བོར་ཏེ་རྒྱ་མཚོ་ཆེན་པོའི་ནང་དུ་མ་འགྲོ་ཞིག །ཟེར་བ་ལ་མཛའ་བོའི་བུ་མོ་ཁྲོས་ཏེ་མའི་མགོ་བོ་ལ་རྡོག་པས་བསྣུན་པའི་རྣམ་སྨིན་གྱིས། ལྷོ་ཕྱོགས་ཀྱི་ལམ་དུ་སོང་སོང་བའི་ཐ་མར་ལྕགས་ཀྱི་མཁར་ཞིག་མཐོང་བ་དེའི་ནང་དུ་སོང་བ་ན། མཛའ་བོའི་བུ་མོའི་མགོ་བོ་ལ་ལྕགས་ཀྱི་འཁོར་ལོ་ཀུན་ཏུ་འབར་བ་ཞིག་འཁོར་བའི་སྡུག་བསྔལ་གྱི་ཚོར་བས་ཉེན་ནས་སེམས་ཅན་རྣམས་ལ་སྙིང་རྗེ་བསྐྱེད་དེ། ང་ནི་སེམས་ཅན་ཐམས་ཅད་ཀྱི་ཕྱིར་འཁོར་ལོ་འདི་མགོ་བོའི་སྟེང་དུ་འཛིན་པར་འདོད་ཀྱི། འདི་ལྟ་བུའི་ལས་བྱེད་པ་གཞན་སུ་ཡང་འདིར་འོང་བར་མ་གྱུར་ཅིག །ཅེས་སྨྲས་མ་ཐག་ཏུ་མཛའ་བོའི་བུ་མོའི་འཁོར་ལོ་དེ། མགོ་བོ་ལས་གྱེན་དུ་འཕགས་ནས་ཏ་ལ་བདུན་སྲིད་ཙམ་གྱི་ནམ་མཁའ་ལ་འདུག་ཅིང་། མཛའ་བོའི་བུ་མོ་ནི་དེ་ནས་ཤི་འཕོས་ཏེ་དགའ་ལྡན་གྱི་ལྷའི་རིས་སུ་སྐྱེས་པ་དང་ཤིན་ཏུ་མཐུན་པ་ཡིན་ནོ། །
མཛའ་བོའི་བུ་མོ་ཞེས་པས་བུ་མོ་ཞིག་ཡིན་པར་བློ་ངང་གྱིས་སྐྱེ་དགོས་པ་ཞིག་ཡིན་ཀྱང་། དེ་ཉིད་ན། བུ་གཅིག་ང་བོར་ཏེ། ཞེས་པས་བུ་ཚ་ཡིན་དགོས། རང་གི་དྲིན་ཅན་མའི་མགོ་ལ་མགོ་བོ་ལ་རྡོག་པས་བསྣུན་པའི་རྣམ་སྨིན་གྱིས། མཐོང་བའི་ཆོས་ལ་སྟེ། ཚེ་འདི་ཉིད་ལ་རྣམ་པར་སྨིན་པའི་སྡུག་བསྔལ་ཚད་མེད་པ་མྱོང་དགོས་པ་བྱུང་ཡང་། གཞན་ལ་ཕན་པའི་སེམས་ཐུགས་ལ་མངའ་བས། དེ་ཉིད་ནས་ཚེ་འཕོས་མ་ཐག་ཏུ། སྐྱེས་ནས་མྱོང་འགྱུར་ལས་ཀྱིས་དགའ་ལྡན་གྱི་ལྷའི་རིས་སུ་སྐྱེས་སོ། དེ་བཞིན་དུ། བོད་ཀྱི་མཁས་པ་རྣམས་ཀྱིས་བྲིས་པའི་ཡི་གེ་དག་ཆ་རྣམས་གཞན་སྐྱེ་བོ་མང་པོ་ལ་ཕན་ནོ་སྙམ་པས་སྲུང་བ་ལ་འབད་ན། བསོད་ནམས་ཚད་མེད་པ་འཐོབ་པར་འགྱུར་བ་གདོན་མི་ཟའོ།
རྐྱེན་ངན་བར་ཆད་མེད་ན་ཆོས་པ་ཡང་དག་ཞིག་གང་ནས་ཡོང་།
རྐྱེན་ངན་བར་ཆད་ཆོས་ཀྱིས་ལམ་སྣ་རེད་།
ཆོས་པ་ཡང་དག་རྐྱེན་ངན་བར་ཆད་རྒྱུད་ནས་བྱུང་།