ཆོས་བྷ་རྒྱ་ཐོ།

ཀླུ་སྨྱོན་ཧེ་རུ་ཀ

འདྲེ་སྒྲུང་འདི་ནི་ལ་རྩེ་དཔེ་མཛོད་ཁང་གིས་བསྡུས་པའི་འདྲེ་སྒྲུང་འགྲན་བསྡུར་དེའི་ཆེད་དུ་བྲིས་པ་ཡིན་མོད། དེ་རིང་གཤམ་གསལ་གྱི་འགྲེལ་བཤད་དང་བཅས་ཕྱིར་སློག་གནང་འདུག

“༄། རྩོམ་པ་པོ་ཀླུ་སྨྱོན་ཧེ་རུ་ཀ་ལགས་ལ།
ཟླ་འདིའི་ཚེས་ཉེར་བཞིའི་དགོང་མོར་སྤེལ་འཆར་གྱི་ཀུན་ཕན་ཐེབས་རྩ་ཚོགས་པའི་“མཚན་གུང་གི་ཆོ་ངེ་”ཞེས་པའི་བོད་ཀྱི་འདྲེ་སྒྲུང་གི་འགྲན་བསྡུར་དེ་ལ་སྐུ་ཉིད་ནས་འདྲེ་སྒྲུང་”ཆོས་བྷ་རྒྱ་ཐོ།”ཞེས་པ་ཆེད་རྩོམ་གྱིས་རྒྱབ་སྐྱོར་གནང་བར་ང་ཚོས་སྙིང་ཐག་པ་ནས་ཐུགས་རྗེ་ཆེ་ཞུ་བཞིན་ཡོད། ང་ཚོས་འདྲེ་སྒྲུང་ཀློག་འདེམས་ཚོགས་ཆུང་ཞིག་ཆེད་འཛུགས་ཀྱིས་བོད་ཕྱི་ནང་གཉིས་ཀ་ནས་འདྲེ་སྒྲུང་འགྲན་བསྡུར་ལ་ཞུགས་མཁན་གྱི་འདྲེ་སྒྲུང་མི་ཉུང་བ་ཞིག་འབྱོར་བ་ལས་འགྲན་བསྡུར་དངོས་ལ་ཞུགས་རྒྱུའི་འདྲེ་སྒྲུང་ལྔ་དམངས་གཙོའི་ལམ་ནས་འོས་ཤོག་འཕངས་ནས་བདམས་པ་ཡིན། ཕངས་སེམས་དང་བཅས་ཞུ་རྒྱུ་ཞིག་ལ་སྐུ་ཉིད་ཀྱི་འདྲེ་སྒྲུང་དེ་འགྲན་ཞུགས་འདྲེ་སྒྲུང་ལྔ་བོའི་གྲས་སུ་འདེམས་ཐོན་བྱུང་མ་སོང་། ཡིན་ན་ཡང་སྐུ་ཉིད་རྩོམ་བྲིས་ཀྱིས་འགྲན་བསྡུར་འདི་ལ་ཞུགས་པ་འདིས་ང་ཚོ་ལ་རྒྱབ་སྐྱོར་ཆེན་པོ་ཞིག་ཐོབ། རྗེས་མ་ཡང་ང་ཚོའི་ལས་འགུལ་འདི་རིགས་ལ་རྒྱབ་སྐྱོར་གནང་རྒྱུར་སྙིང་ཐག་པ་ནས་རེ་བ་ཞུའོ།ཞེས་པད་མ་འབུམ་ནས།”

ད་ནི་ང་ཚོ་འདྲེ་སྒྲུང་དངོས་ལ་འཇུག
ངས་འདྲེ་སྒྲུང་བསྡུ་བའི་གསལ་བསྒྲགས་འདི་དེ་རིང་ཕྱི་དྲོའི་ཆུ་ཚོད་བཞི་དང་ཕྱེད་ཀའི་སྟེང་མཐོང་བ་ཡིན། གསལ་བསྒྲགས་འདི་ཀློག་བཞིན་པའི་སྐབས་དེར་ངའི་ཡིད་ལ་ལམ་སེང་རང་གི་ཕ་ཡུལ་དུ་བྱུང་བའི་འདྲེ་རྒོད་ཅིག་གི་གཏམ་རྒྱུད་ཤར་བྱུང་། གཏམ་རྒྱུད་དེ་ཁྱེད་ཅག་ལ་བཤད་མགོ་མ་བརྩམས་སྔོན་ལ་རྩམ་གསུར་ཞིག་བདུགས་ནས་འདྲེ་རྒོད་དེ་དོ་དགོང་ངའི་རྨི་ལམ་ནང་ཡོང་སྟེ་ཁོའི་སྡེར་མོ་ཁྲག་ཞག་ཅན་དེས་ངའི་སྐེ་བཙུར་བ་དང་མིག་འབྲུ་བ། བྲང་ཁ་དང་ལྟོ་བ་དྲལ་ནས་གློ་སྙིང་དང་རྒྱུ་མ་ཕྱུང་བ་སོགས་འཇིགས་སུ་རུང་བའི་གནོད་འཚེ་རིགས་མི་འདྲ་བ་དུ་མ་ཞིག་མི་གཏོང་བའི་གྲ་སྒྲིག་བྱེད་དགོས།
སྤྱིར་ན་ང་རང་ཆུང་དུས་ནས་ཕ་མ་དང་ཨ་མྱེས་སོགས་ཀྱི་ངག་ནས་འདྲེ་སྒྲུང་མང་པོ་ཐོས་མྱོང་ཞིང་། བྱིས་པ་གཞན་དག་དང་འདྲ་བར་འདྲེ་སྒྲུང་ལ་ཉན་རྗེས་དགོང་མོར་མུན་ནག་ནང་གཅིག་བུར་ཉལ་མི་ཕོད་ལ་ཕྱི་རོལ་ཏུ་གཅིན་པ་གཏོང་དུ་འགྲོ་རྒྱུ་ནི་སྤྲོས་བྲལ་རེད། དེ་དུས་ཀྱི་འདྲེ་སྒྲུང་མང་པོ་ཞིག་གཞན་གྱི་ངག་ལས་ཐོས་པ་ཡིན་ཡང་། འདྲེ་སྒྲུང་གཅིག་གི་ཁྲོད་ཀྱི་མི་སྣའམ་འདྲེ་དེ་ནི་ང་ཚོའི་སྡེ་བའི་མི་ཡིན་ལ་ཁོའི་གཉེན་ཉེ་འབྲེལ་མང་པོ་ཞིག་ངས་ངོ་ཤེས་ཀྱི་ཡོད།
འདྲེ་འམ་མི་དེའི་མིང་ལ་ཆོས་བྷ་རྒྱ་ཐོ་ཟེར། ཁོ་སྔོན་ཆད་རིག་གནས་གསར་བརྗེའི་ཡར་སྔོན་དུ་ངའི་ཕ་ཡུལ་གྱི་ཟངས་ཐལ་དགོན་པ་ཟེར་བ་དེར་གྲྭ་པ་བྱས་འདུག་ཅིང་། གྲྭ་པ་ཡིན་དུས་སུ་ལན་མང་པོར་མཚན་མོར་གཅིག་བུར་དུར་ཁྲོད་ནང་དུ་སོང་ནས་བུད་མེད་ཚོའི་བེམ་པོར་ཆགས་པ་སྤྱོད་པ་རེད་ཟེར། སྡེ་བའི་ནང་གི་བུད་མེད་ཆེ་གེ་མོ་ཞིག་ཤི་རྗེས་ཕུང་པོ་དུར་ཁྲོད་དུ་ནམ་སྐྱེལ་བའི་དུས་ཚོད་དེ་ཁོས་ཏག་ཏག་ཤེས་པ་དང་། མཚན་མོ་དེར་ཁོ་རང་དུར་ཁྲོད་ཀྱི་གཡས་ཕྱོགས་དེར་ཡོད་པའི་ཤིང་ནགས་ཐར་ཐོར་དེའི་ནང་དུ་བསྐུངས་ནས་བསྡད་དེ། རོ་སྐྱེལ་མཁན་ཚོ་ཕྱིར་ལོག་མ་ཐག་ལམ་སེང་དུར་ཁྲོད་ནང་བརྒྱུགས་ནས་བུད་མེད་དེ་ཚོའི་རོ་སྟེང་དུ་ཞོན་ཏེ་ཆགས་པ་སྤྱོད་པ་དང་། ཆགས་པ་སྤྱོད་དུས་རོ་ལ་འོ་སྐྱེལ་བ་དང་ནུ་མ་འཕུར་བ། སྐད་ཆ་བཤད་པ་སོགས་མི་གསོན་པོ་ཇི་བཞིན་བྱེད་ཅིང་། མཚན་གང་བོར་རོ་ལ་འཁྲིག་སྤྱོད་བྱས་རྗེས་ཐང་ཆད་དེ་རོ་དང་མཉམ་དུ་གཉིད་ཁུག་ནས་འདུག་པ་དང་། སང་ཞོགས་སྔ་བོར་ཡར་ལངས་ཏེ་རྐང་འཇབ་ལག་འཇབ་ཀྱིས་ཕྱིར་དགོན་པར་ལོག་པ་རེད།
ཐོག་མར་ཁོས་བུད་མེད་ཀྱི་བེམ་པོར་ཆགས་པ་སྤྱོད་པའི་སྐོར་དེ་རང་གི་གྲོགས་པོ་ཞིག་ལ་ནང་གཏམ་གྱི་ཚུལ་དུ་བཤད་པ་དང་། ཁོའི་གྲོགས་པོ་དེ་ཐོག་མར་ཡིད་མ་ཆེས་པར་བརྟེན། ཁོས་མཚན་གཅིག་གྲོགས་པོ་ཁྲིད་དེ་དུར་ཁྲོད་ནང་སོང་ནས་བུད་མེད་ཀྱི་བེམ་པོ་གསར་པ་ཞིག་ལ་ཆགས་པ་སྤྱད་འདུག ཁོ་ཆགས་པས་མྱོས་དུས་ལན་རེར་ཁ་ནས་ཆགས་སྐད་འབྱིན་པ་དང་། ལན་རེར་གཤིན་པོའི་རོ་གྱེན་དུ་བསླངས་ནས་མཉམ་དུ་ཞབས་བྲོ་འཁྲབ་བཞིན་འཁྲིག་པ་སྤྱོད་པ་དང་། བེམ་པོའི་སོག་རྒྱབ་ཅིག་ནས་རྩ་མདུད་ཅིག་སེན་མོས་མནན་པ་ན་གཤིན་པོའི་ལག་པས་ཁོ་རང་གི་མགུལ་ནས་འཁྱུད་ཡོང་གིན་འདུག་ཟེར། ཁོའི་ཆགས་སེམས་ཇེ་ཐུར་སོང་སྟེ་མཐའ་མར་གཤིན་པོར་སྨོན་ལམ་འདོན་གྱི་ཡིན་ཟེར་ནས་རས་གུར་ཞིག་དུར་ཁྲོད་ནང་ཕུབ་སྟེ་དེ་རུ་བསྡད་ནས་ཉིན་མཚན་མེད་པར་བུད་མེད་ཚོའི་བེམ་པོར་འཁྲིག་པ་སྤྱད་འདུག་ཅིང་། མི་ལ་ལས་བཤད་ན་ཁོའི་གུར་ནང་དུ་བུད་མེད་མཛེས་མ་གཉིས་གསུམ་གྱི་རོའི་སྟེང་དུ་འཁྱག་པ་སྤུངས་ནས་རུལ་དུ་མ་བཅུག་པར་ཉར་ཡོད་འདུག་ཅིང་། རོ་རེ་ཟུང་གི་རྐང་ལག་ཀྱང་རས་གུར་གྱི་ཟུར་ནས་ཕྱི་རོལ་ཏུ་བརྐྱངས་བསྡད་ཡོད་འདུག
སྟོན་དུས་ཀྱི་ཉིན་ཞིག ཟོག་རྫི་ཞིག་ཁ་སྐོམ་ནས་ཆུ་འཐུང་ཕྱིར་ཆོས་སྦ་རྒྱ་ཐོའི་གུར་ནང་དུ་འཛུལ་བ་ན། ཆེས་འཇིགས་སུ་རུང་བའི་སྣང་ཚུལ་ངོ་མཚར་བ་ཞིག་མཐོང་བ་ནི། ཆོས་བྷ་རྒྱ་ཐོ་རོ་བུད་མེད་ལོ་ཆུང་ཞིག་གི་བེམ་པོའི་བརླ་བར་དུ་འཁྲིག་པ་སྤྱོད་པའི་ཚུལ་དུ་ཡོད་པ་དང་། འོག་གི་རོ་དེའི་ལག་པ་གཉིས་ཀྱིས་ཁོའི་སྐེ་དམ་དུ་བཙུར་འདུག་པ་དང་། ཁོའི་གདོང་མདོག་ཁྲག་ལྟར་དམར་པོ་ཆགས་ཤིང་དཔྲལ་རྩ་ཐམས་ཅད་མཛུབ་མོའི་སྦོམ་ཕྲ་ཙམ་དུ་གྱུར་པ་དང་། མིག་རིལ་གཉིས་ཕྱིར་ཐོན་ནས་འགྲམ་པའི་སྟེང་དུ་བསྣར་བསྡད་ཡོད་པ་མ་ཟད། ཁ་གདངས་ཤིང་ལྕེ་སྔོན་པོ་ལྕགས་ཀྱི་མདོག་ལྟ་བུ་ཞིག་ཁའི་ཟུར་དུ་བརྐྱངས་ནས་ཤི་བསྡད་ཡོད་པ་རེད།
ཕྱུག་རྫི་དེས་དེ་མཐོང་ནས་ཨག་རིང་ཞིག་བཏབ་སྟེ་ཕྱིར་འགྱེལ་མ་ལངས་སུ་བྲོས་ནས་དུར་ཁྲོད་དེའི་ལུང་མདོའི་སྡེ་བ་སྟེ་ལུང་ནག་སྡེ་བའི་ནང་དུ་བརྒྱུགས་ནས་མི་རིག་ཚད་ཐུག་ཚད་ལ་འཇིགས་ཡེར་བའི་དོན་རྐྱེན་དེ་བཤད་གང་ཐུབ་བྱས། ཐོག་མར་སྡེ་བའི་མི་རྣམས་ཡིད་མ་ཆེས་ཀྱང་ཕྱུག་རྫིའི་གདོང་གི་རྣམ་འགྱུར་དང་སྐད་ཀྱི་འདར་གདངས་ལས་ཐེ་ཚོམ་ཐམས་ཅད་ཡོངས་སུ་གྲོལ་ནས་གསར་བུ་བློ་ཁོག་ཆེན་པོ་ཡིན་ཟེར་མཁན་རེ་ཟུང་གྲ་སྒྲིག་གིས་གྲི་དང་མེ་མདའ། མདུང་དང་སྟ་རེ་སོགས་ཁྱེར་ནས་ཆོས་བྷ་རྒྱ་ཐོའི་གུར་གྱི་ཕྱོགས་སུ་གཤར། གུར་དང་ཐག་ཇེ་ཉེ་ཡིན་དུས་གུར་ནང་ནས་མི་ཞིག་གིས་ལྡབ་ལྡིབ་ཅིག་བཤད་ཞོར་དངངས་པ་རིང་བོ་ཞིག་འཐེན་པའི་སྒྲ་གསལ་ལ་མི་གསལ་བ་ཞིག་གྲག་ཡོང་བས། གསར་བུ་བློ་ཁོག་དེ་ཙམ་མི་ཆེ་བ་དག་ནི་གོམ་ཁ་ཇེ་དལ་དུ་སོང་བ་དང་། ཁོ་ཚོའི་ཁ་ནང་གི་དཀོན་མཆོག་དང་གཞི་བདག་ལ་གསོལ་བ་འདེབ་པའི་དབྱངས་རྟ་ཡང་ཁུ་སིམ་མེར་གྱུར། འོན་ཀྱང་། བཙན་རྒོལ་སྐྱབས་ཟེར་བའི་གསར་བུ་ནམ་རྒྱུན་དེ་ཙམ་བློ་ཁོག་ཆེན་པོའི་གྲས་སུ་མི་བགྲངས་པ་ཞིག་ཡོད་པ་དེས་ཐེ་ཚོམ་མེད་པར་གུར་གྱི་སྒོ་ཕྱེས་ནས་ནང་དུ་ལྟ་ཙམ་བྱས་མ་ཐག། གློ་བུར་དུ་འཇིགས་སུ་རུང་ཞིང་སྙིང་ལ་ཟུག་པའི་ཨག་རིང་ཞིག་བཏབ་རྗེས་སྡོང་རྒན་རྩ་བ་བཅད་པ་ལྟར་ས་རུ་འགྱེལ་བ་དང་མཉམ་དུ་གཅིན་སྐྱག་ཀྱང་དབང་མེད་དུ་གུ་ཐུང་ནང་ཤོར་བའི་དྲི་ངན་ཆིལ་ལེར་སོང་བས། ཁོའི་རྒྱབ་ལོགས་སུ་ཡོད་པའི་གསར་བུ་དེ་ཚོས་ཁོའི་དྲན་མེད་དུ་བརྒྱལ་བའི་ཕུང་པོ་ཡང་བསྐྱུར་ནས་འུར་ལྡིར་གྱིས་ཕྱིར་བལྟས་མེད་པར་བྲོས་སོང་བ་རེད།
ཆུ་ཚོད་བཞི་ཙམ་གྱི་རྗེས་སུ་བཙན་རྒོལ་སྐྱབས་ཀྱིས་དྲན་པ་ཕྲན་བུ་ཞིག་སོས་ནས་གོག་མ་ནུར་གྱིས་ཕྱིར་རང་ཁྱིམ་དུ་འབྱོར་ཙམ་བྱུང་མོད། མཚན་མོ་དེར་ལུས་པོ་འདར་ཞིང་ངག་ལྡབ་ལྡིབ་ཏུ་གྱུར་ཅིང་། མགོ་མཇུག་མེད་པའི་སྐད་ངན་སྣ་ཚོགས་བར་མེད་དུ་སྒྲོག་པ་དང་། ཁ་སྣ་གཉིས་ཀ་ནས་ཁྲག་དམར་པོ་དྲི་མ་སྣོམ་མི་བཟོད་པ་ཞིག་བསྐྱུགས་རྗེས། མིག་གཉིས་ཀླད་ལ་འཁོར་ཞིང་རྐང་ལག་ལྕགས་ལྟར་རེངས་ཏེ་གཤིན་རྗེ་ཆོས་ཀྱི་རྒྱལ་པོའི་མགྲོན་དུ་ཆས་སོང་ལ། དགོང་མོ་དེའི་མཚན་གང་བོར་ཁྱི་རྒན་ཚོས་གཟུགས་མེད་ཅིག་སྡེ་དཀྱིལ་ནས་ཡར་བདའ་མར་བདའ་བྱས་ནས་སྐྱ་རེངས་མ་བཀྱགས་བར་དུ་མཚམས་བཞག་མ་སོང་ཟེར།
ཟླ་བ་གཅིག་འདས་སོང་། ཡིན་ཡང་ཆོས་བྷ་རྒྱ་ཐོའི་རོ་གུར་དེ་ད་དུང་འགྱེལ་མེད་པ་རེད་ལ། ནམ་རྒྱུན་བདུན་ཕྲག་རེ་རེ་བཞིན་མང་གཞུང་གི་སྟོད་སྨད་བར་གསུམ་ནས་དུར་ཁྲོད་ནང་གཤིན་པོའི་ཕུང་པོ་སྐྱེལ་དུ་ཡོང་བའི་འདུ་འཛི་དེ་ཡོངས་སུ་མཚམས་ཆད། ཚེ་འདས་མང་པོའི་ཕུང་པོ་རང་རང་གི་སྡེ་བའི་ཉེ་འདབས་སུ་ས་སྦས་གཏོང་དགོས་བྱུང་བ་དང་། བན་སྔགས་བོན་གསུམ་སུ་ཡང་དུར་ཁྲོད་དེར་བཅར་མ་ཐུབ། མཚན་མོ་དུ་མར་རོ་གུར་དེའི་ནང་ནས་ཆོས་བྷ་རྒྱ་ཐོས་སྐད་ཅོར་རྒྱག་པ་དང་། སྐབས་རེར་འཁྲིག་སྤྱོད་ཀྱིས་མྱོས་པའི་ཆགས་སྐད་རྒྱག་པ་ཡང་ཐོས་རབས་འདུག་ལ། མི་ལ་ལས་ཉིན་མོར་རོ་གུར་དེའི་ནང་ནས་རོ་ལངས་ཕོ་མོ་ཚོས་གར་འཁྲབ་ཀིན་འདུག་པ་ཡང་མཐོང་སོང་ཟེར།
མང་སྨད་ན་སྡེ་བ་ཆུང་ཆུང་ཞིག་ཡོད་པའི་ནང་དུ་སྔགས་པ་མཚན་སྙན་གྲགས་དེ་ཙམ་ཆེན་པོ་མེད་པ་ཞིག་ཡོད། ཁོའི་མིང་ལ་སྔགས་པ་རིག་འཛིན་ཟེར་ཞིང་ཞབས་དཀར་ཚོགས་དྲུག་རང་གྲོལ་སྐུ་ཕྲེང་ཞིག་གི་སློབ་མ་ཡིན་སྐད། མཚན་མོ་ཞིག་ལ་སྔགས་པ་རིག་འཛིན་གྱིས་རྟ་ཞོན་ནས་གཅིག་བུར་དུར་ཁྲོད་དེར་བསྐྱོད། ཁོ་དུར་ཁྲོད་དང་ཐག་ཉེ་སར་བསླེབས་དུས། རོ་གུར་དེའི་ནང་དུ་མེ་འབར་བའི་གྲིབ་ནག་གི་ངོས་སུ་རོ་ལངས་ཕོ་མོ་ཚོའི་གཟུགས་རིས་གསལ་བོར་མངོན་འདུག བུད་མེད་གཅེར་བུའི་གཟུགས་དབྱིབས་དང་། ཆོས་བྷ་རྒྱ་ཐོའི་ཐུང་ཞིང་ཚོ་བའི་གཟུགས་རིས། ཀེང་རུས་ཙམ་ལས་ལྷགས་མེད་པའི་བུད་མེད་སྐྲ་རིང་པོ་ཅན་ཞིག་གི་གཟུགས་རིས་ཀྱང་མངོན། རོ་ལངས་འདི་ཚོས་སྐབས་རེར་ངུ་འབོད་སྙིང་ལ་གཟན་པ་རེ་བྱེད་ཅིང་། ལན་རེར་གད་མོ་རྣ་བར་རྩུབ་པ་རེ་ཡང་དགོད།
སྔགས་པ་རིག་འཛིན་རོ་གུར་ནས་གོམ་པ་བདུན་གྱི་སར་རྟ་ལས་བབས་ཤིང་སྒའི་སྔ་རུའི་སྟེང་དུ་འཕངས་པའི་ཏ་ལེན་ལས་ཌྰ་རྐང་གཉིས་ཕྱིར་བླངས། ཁོས་སྙན་ལ་ཟབ་པའི་མ་ཅིག་ལབ་སྒྲོན་གྱི་གཅོད་ཡུལ་མཁའ་འགྲོའི་གད་རྒྱངས་ཟེར་བ་དེ་བཏོན། ཐོག་མར་སྔགས་པས་སྙིང་ལ་གཟེར་ཤ་རྒྱུག་པའི་རྐང་དུང་ལན་གསུམ་བུས་པས། རོ་ལངས་ཚོས་ངར་སྐད་འདོན་བཞིན་རོ་གུར་གྱི་ནང་ནས་ཡར་མཆོང་མར་ལྡིང་བྱས། གཅོད་ཌྰིལ་གྱི་སྒྲ་སྐད་ཟིལ་རྔམ་ཆེ་བ་དང་བསྟུན་ནས་རོ་ལངས་ཚོས་སྡེར་ཤད་བརྒྱབ་སྟེ་རོ་གུར་འགྱེལ་མ་ལངས་དེའི་ཕྱོིགས་གང་ས་ནས་ཚལ་བར་གཤགས་ཤིང་ཁོ་ཚོའི་ཁ་ནང་སྣ་ནང་ནས་མེ་ལྕེ་སྔོན་པོ་ཞིག་འབར་བཞིན་གཅིག་གཅིག་ལ་འཐམས་ཏེ་དངངས་སྐྲག་སློང་བའི་ངུ་རྒྱངས་དྲག་པོ་བྱེད། སྔགས་པས་གཅོད་བཏོན་ནས་ཕྱེད་ཀར་བསླེབས་དུས་རོ་ལངས་ཚོ་རེ་རེ་བྱས་ནས་ས་རུ་འགྱེལ་ཏེ་འགྲེ་ལྡོག་བྱེད་པ་དང་། གཅོད་མཇུག་རྫོགས་གྲབ་ཡོད་དུས་ཆོས་བྷ་རྒྱ་ཐོའི་རོ་ལངས་དེའི་དྲག་ཏུ་འགྲེང་བའི་མཇེ་སྣེ་ནས་ཁྲག་ནག་པོ་དྲི་ངན་བཟོད་དུ་མེད་པ་ཞིག་གཅིན་པ་གཏོང་བ་ནང་བཞིན་ཤག་སེར་ཆུ་ཚོད་ཕྱེད་ཀའི་རིང་བཞུར་བྱུང་ལ། དེ་ནས་ཁོ་ཚོ་རེ་རེའི་ལུས་ཀྱི་བུ་ག་ཚང་མ་ནས་ཁྲག་དང་ཆུ་སེར། རྣག་ཁྲག་སོགས་དྲི་ངན་དང་བཅས་ཕྱོགས་ཕྱོགས་སུ་བཞུར་ཡོང་ཞིང་། སྐབས་ཤིག་རོ་ལངས་ཚང་མ་གྲགས་མེད་འགུལ་མེད་དུ་གྱུར་པ་དང་། སྔགས་པས་ཁ་ནས་དྲག་སྔགས་འདོན་བཞིན་ལག་པས་ཌྰ་དྲིལ་འཁྲོལ་བ་དང་། རྐང་པས་གར་སྟབས་སྒྱུར་བཞིན་རོ་གུར་དེ་དྲུད་ཡོང་ནས་རོ་ལངས་གསུམ་པོའི་སྟེང་དུ་འཕངས་རྗེས། སྔོན་ནས་གྲ་སྒྲིག་བྱས་ཡོད་པའི་རྟ་སྒའི་ཕྱི་རུའི་སྟེང་གི་མར་ཁུ་རྐྱལ་བ་གང་པོ་དེ་ཚོའི་སྟེང་བླུགས་རྗེས་མེ་ལྕགས་ཀྱིས་མེ་སྤར། སྐད་ཅིག་དེ་ཉིད་ལ་མུན་ནག་གི་མཚན་ལྗོངས་དེ་མེ་ལྕེ་དྲག་པོས་གསལ་གྱི་ལེར་བཏང་བ་དང་། མེ་ལྕེའི་ཁྲོད་ནས་རོ་ལངས་རེ་རེ་བཞིན་མགོ་བོ་འགྱོག་ཙམ་དང་ལག་པ་གཡོབ་ཙམ། སྡུག་སྐད་འདོན་ཙམ་དང་རྐང་བ་རྐྱོང་ཙམ་རེ་བྱས་རྗེས་མེ་ལྕེས་ཡོངས་སུ་ཚིག་སོང་།
སྔགས་པས་ཉེ་འཁོར་ནས་རོ་གོས་ཚལ་བ་མང་པོ་ཞིག་བཏུས་ཡོང་ནས་མེ་ལྕེའི་ནང་དུ་འཕངས་པ་ན། ཚེག་སྒྲ་དང་མཉམ་དུ་བུད་མེད་དང་བྱིས་པའི་ངུ་སྐད་དང་། རྒན་པོ་དང་གསར་བུའི་ཨག་སྐད་རྣ་བར་གཟན་པ་རེ་ཡང་མཆེད་ཡོང་བ་དང་། སྐྱ་རེངས་འཆར་ལ་ཉེ་དུས། རོ་ལངས་བསྲེགས་པའི་མེ་ལྕེ་དེ་ཡང་ག་ལེར་ཇེ་ཆུང་ཇེ་ཆུང་དུ་གྱུར་ནས་མཐར་དུ་བ་བན་བུན་ཞིག་ལས་ཅི་ཡང་མ་ལྷགས་པ་དང་། མཇུག་མཐར་རོ་ལངས་ཚོའི་རུས་པ་ཚིག་རོ་ཁ་ཤས་ཤིག་སྐྱ་རིག་གེར་ཐལ་བའི་དཀྱིལ་དུ་ཧ་ཅང་མི་སྡུག་པའི་ཚུལ་དུ་གསལ་བོར་མཐོང་ཡོང་།
སྔགས་པས་རོ་ལངས་བཏུལ་སོང་ལ་སྔགས་པ་ཐང་ཡང་ཆད་སོང་། སྔགས་པས་རོ་ལངས་ཀྱི་རྣམ་ཤེས་འདྲེན་རྒྱུ་བརྗེད་སོང་། སྔགས་པས་དགའ་སྤྲོའི་ངང་རྟ་ཞོན་ནས་ཕྱིར་ལམ་ལ་ཆས་ཤིང་། ང་ཚོའི་སྡེ་བ་བརྒྱུད་ནས་འགྲོ་ཞོར་ད་ནས་བཟུང་གཤིན་པོའི་བེམ་པོ་རྣམས་དུར་ཁྲོད་དུ་བསྐྱལ་ན་ཆོག་ཅེས་བསྒྲགས། སྔགས་པ་ཁོའི་སྡེ་འདབས་སུ་སླེབ་གྲབ་ཡོད་དུས། གར་ཡོང་མ་ཤེས་པའི་ཁྱི་དམར་པོ་ཞིག་གིས་སྔགས་རྟའི་རྐང་པར་རྨུག་པས། སྔགས་རྟ་འདྲོགས་ནས་མཆོང་ཐེངས་གཅིག་གིས་སྔགས་པ་ས་རུ་གཡུགས་སོང་། ཡིན་ཡང་སྔགས་པས་ཡི་དམ་གྱི་བསྐྱེད་རིམ་མ་གློད་པས་ཁོའི་རྩིབ་མ་གསུམ་ཆག་པ་མ་གཏོགས་ཚེ་སྲོག་ལ་ཉེས་སྐྱོན་ཅི་ཡང་མ་བྱུང་།
དེ་ནས་བཟུང་ད་ལྟའི་བར་དུ་ང་ཚོའི་དུར་ཁྲོད་དེར་ཆོས་བྷ་རྒྱ་ཐོའི་གཟུགས་བརྙན་དངོས་སུ་མཐོང་མཁན་ཞིག་མ་བྱུང་། ཡིན་ཡང་། ཕལ་ཆེར་མཚན་མོ་རེ་རེ་བཞིན་ནམ་གུང་ལ་བསླེབས་པ་ན། ཆོས་བྷ་རྒྱ་ཐོས་ཀི་རིང་འདེབ་བཞིན་ཁོས་སྔོན་ཆད་འཁྲིག་པ་སྤྱོད་མྱོང་བའི་གཤིན་མོ་རེ་རེའི་མིང་ནས་བཟུང་སྟེ་དྲག་ཏུ་འབོད་པ་དང་། ལན་རེར་གཤིན་མོ་དེ་ཚོར་འཁྲིག་པ་སྤྱོད་དུས་ཀྱི་ཆགས་སྐད་འབྱིན་པ། སྐབས་རེར་ཁོའི་གཟུགས་མེད་པའི་ངུ་འབོད་དང་ཆགས་སྐད་ཀྱིས་སྡེ་དཀྱིལ་ནས་ཁྱི་རྒན་ཚོ་ཟང་ཟིང་ལང་ལོང་དུ་གཏོང་བ། ཡང་ལན་མང་པོར་བུ་མོ་ན་ཆུང་མང་པོ་ཞིག་དུར་ཁྲོད་དང་ཐག་ཉེ་བའི་རི་མགོའི་ཟོག་རྫི་རུ་ཡོད་དུས། གཟུགས་མེད་གདོན་འདྲེ་རོ་རུལ་གྱི་དྲི་ངན་འཐུལ་བ་ཞིག་གིས་མནན་ནས་འཁྲིག་པ་སྤྱོད་པའི་ཟོལ་གྱིས་ལུས་ཀྱི་གོས་ཚང་མ་བཤུས་འགྲོ་བ་སོགས་དེང་སང་གི་བར་དུ་རྒྱུན་ཆད་མེད་པར་ཡོད། གནས་ཚུལ་ཚབས་ཆེན་པོ་གཅིག་ནི། ངའི་གྲོགས་པོ་ཞིག་གི་ཨ་མས་ཉིན་གུང་ཞིག་ལ་ནང་དུ་མོའི་བུ་ཆུང་ཞིག་དང་མཉམ་དུ་ཡོས་རྔོ་བཞིན་ཡོད་དུས། གློ་བུར་དུ་སྒོ་ཁྲོག་སེ་ཕྱེས་མཁན་ཞིག་བྱུང་བ་དང་། མོས་དེར་ལྟ་ཙམ་བྱེད་པའི་སྐད་ཅིག་མ་དེའི་རིང་། ཨག་རིང་སྙིང་གསེང་དུ་ཟུག་པ་ཞིག་བརྒྱབ་པ་དང་མཉམ་དུ་ཁ་ནང་གི་སོ་ཚང་མ་རྡེབ་ཤུགས་ཆེན་པོས་ཕྱོགས་ཕྱོགས་སུ་འཐོར་ནས་དེ་མུར་དབུགས་ཆད་སོང་བ་དང་། ཁྱིམ་མི་ཚོ་ནང་དུ་བསླེབས་ནས་མོའི་བེམ་པོའི་གདོང་ལ་ལྟ་དུས། མོའི་མིག་གི་རྒྱལ་མོའི་ངོས་སུ་ཆོས་བྷ་རྒྱ་ཐོས་གཅེར་བུར་ཁ་གདངས་ཤིང་མིག་བགྲད། ད་དུང་མཇེ་ནག་པོ་ཞིག་ཀྱང་འདོམ་བར་ནས་འགྲེང་སྟེ་ཁོ་ཚང་གི་ནང་སྒོའི་ནང་རོལ་དེར་ལངས་བསྡད་ཡོད་པ་མཐོང་འདུག ཅང་མ་འགོར་མོའི་མཚན་མའི་ནང་ནས་ཁྲག་ནག་པོ་རུལ་ཁྲི་བར་མེད་དུ་ཁ་བ་ཞིག་བཞུར་ཡོང་བ་དང་། མོའི་བེམ་པོ་དེར་དབུགས་བརྒྱབ་པ་ཇི་བཞིན་སྐྲང་ནས་རྐང་ལག་བརྒྱངས་ཤིང་། ཁ་གདངས་ལྕེ་བསྣར་མིག་གཅེར་སོགས་ལྟ་མི་བཟོད་པ་ཞིག་ཏུ་གྱུར་སོང་བས། སྡེ་བའི་ནང་གི་མི་རྣམས་སྐྲག་ཐག་ཆོད་དེ་མཚན་མོ་དེ་རང་ལ་བུད་མེད་དེའི་ཕུང་པོ་དུར་ཁྲོད་དུ་བསྐྱལ་མོད། བདུན་ཕྲག་གཅིག་གི་རིང་ལ་ཕུང་པོའི་སྟེང་དུ་བྱ་རྒོད་འབབ་པ་ཕར་ཞོགས་ཕོ་རོག་ཅིག་ཀྱང་མ་འཁོར་བ་མ་ཟད། མཚན་མའི་ནང་ནས་དྲི་ངན་འཐུལ་བའི་ཁྲག་རྒྱུན་ཉིན་མཚན་མེད་པར་བཞུར་བ་དང་། ཕུང་པོའི་ཁོག་སྟོད་དགྱེ་ནས་ཡར་ལངས་གྲབ་བྱེད་བཞིན་ཡོད་པས། སྡེ་མི་ཚོ་ཐབས་ཟད་དེ་ཟངས་ཐལ་དགོན་པའི་གྲྭ་རྒོད་འགའ་གདན་འདྲེན་ཞུས་ནས་བེམ་རོ་ས་སྦས་མི་གཏོང་ཀ་མེད་བྱུང་། ས་སྦས་གཏོང་དུས་གཤིན་མོའི་བེམ་རོས་འཕག་འཚག་བརྒྱབ་སྟེ་གླགས་མ་ཁེལ་བར། མཐའ་མར་རྡོ་ཆེན་པོ་མང་པོས་དུར་ཁུང་གི་ཁ་གཅོད་དགོས་བྱུང་འདུག
ད་དུང་རིག་གསར་རྗེས་སུ་སླར་གསོ་བྱས་ནས་གྲྭ་པ་བརྒྱ་ཁར་ལོངས་ཡོད་པའི་ཟངས་ཐལ་དགོན་པའི་མཚན་མོའི་དུས་སུ། གྲྭ་པ་མང་པོས་ཆོས་བྷ་རྒྱ་ཐོ་གླིང་བར་གྱི་གྲིབ་ནག་ཁྲོད་དུ་ཡར་ལངས་བསྡད་ཡོད་པ་ཐེངས་མང་པོར་མཐོང་བ་དང་། སྐབས་རེར་གྲིབ་ནག་ནང་གཟུགས་མེད་ཅིག་གིས་ཆགས་སྐད་འབྱིན་བཞིན་གཅིན་པ་ཤག་སེ་གཏོང་ཡོང་བ་དང་། ལམ་སེང་དེའི་ཕྱོགས་སུ་གློག་གཞུ་སྤར་ནས་བལྟས་ན། ཁྲག་གི་ཐིགས་པ་དམར་ནག་དྲི་ངན་སྣོམ་མི་བཟོད་པ་ཞིག་ས་རུ་འཁྱིལ་བསྡད་ཡོད་པ་མཐོང་རྒྱུ་འདུག་ཅིང་། ཁྲག་ཐིགས་དེའི་སྟེང་དུ་འབུ་སྦྲང་ཡང་མི་འཁོར་བ་མངོན་སུམ་རེད། ད་དུང་ཆོས་བྷ་རྒྱ་ཐོའི་གྲྭ་ཤག་གི་ཤུལ་རེད་ཟེར་བའི་གྱང་ཆག་ཞིག་རོ་འགའ་ཡོད་པའི་གསེབ་ཏུ་རྩྭ་ལྡུམ་ཟ་ངེ་ཟིང་ངེ་མང་པོ་ཞིག་སྐྱེས་ཡོད་ཀྱང་། རྟ་ནོར་ལུག་གསུམ་སུ་ཡང་དེ་རུ་སོང་ནས་རྩྭ་མི་བཟའ་བ་དང་། མཚན་མོར་གྱང་ཆག་དེ་ཚོའི་གསེབ་ནས་ལན་རེར་ཀི་སྒྲ་སྒྲོག་ཅིང་མཚམས་རེར་ཆོ་ངེ་འདོན་པ་ཁོ་བོ་རྩོམ་པ་པོས་ལན་མང་ཐོས་མྱོང་ལ། རླུང་བུའི་རྒྱུ་ཕྱོགས་ཀྱིས་ཁོའི་གྲྭ་ཤག་གི་ཕྱོགས་དེ་ནས་དྲི་ངན་ཞིག་དབྱར་དགུན་སྟོན་དཔྱིད་མེད་པར་འཐུལ་ཡོང་བ་ཡང་མངོན་སུམ་ཡིན།
ངའི་ཕ་ཡུལ་གྱི་མི་ཚོས་ཆོས་བྷ་རྒྱ་ཐོའི་མིང་ནས་འབོད་རྒྱུར་ཡང་སྐྲག་སྣང་སྐྱེ་བ་དང་། ལྷག་པར་དུ་མཚན་མོའི་དུས་སུ་ཁོའི་མིང་ནས་འབོད་མཁན་ཞིག་བྱུང་ན་དེ་མ་ཐག་མདོ་གདུགས་སྒྲོལ་གསུམ་ཤེར་རྙིང་སེང་གདོང་སོགས་ཀྱི་གཟུངས་སྔགས་འདོན་པ་དང་། དུར་ཁྲོད་དུ་སྨུག་པ་འཐིབས་དུས་ཟོག་རྫི་མང་པོས་ཆོས་བྷ་རྒྱ་ཐོས་གཅེར་བུར་ཁ་ནང་ནས་ཁྲག་འཛག་བཞིན་བུ་མོ་ཞིག་གི་བེམ་པོ་དྲུད་ནས་ཡར་འགྲོ་མར་འགྲོ་བྱེད་པ་མཐོང་སོང་ཟེར་བ་དང་། སྐབས་འགར་ཁོའི་རས་གུར་དེ་ཡང་གསལ་ལ་མི་གསལ་བ་ཞིག་མཐོང་གིན་འདུག་ཟེར། ཡང་སྡེ་མི་ལ་ལས་ཁ་བརྡའི་ཞོར་ལ་ཁོས་མིང་ནས་བོས་པ་དང་མཉམ་དུ་ལམ་སེང་ལུས་ཀྱི་བ་སྤུ་གཟེངས་ཡོང་བ་དང་། སྣ་ལམ་དུ་རུལ་དྲི་འཐུལ་ཡོང་གིན་འདུག་ཟེར་བ་དང་། ཁ་ཤས་ཀྱིས་ཁོ་སྔོན་ཆད་མ་ཤི་བའི་དུས་ཀྱི་ལུས་ཀྱི་རྣམ་འགྱུར་དང་སྐད་ཀྱི་གདངས་སོགས་ཡིད་ལ་ཤར་ན་ཡང་། དེ་མ་ཐག་གཟུགས་པོར་གློག་འཁྱུད་པ་ལྟར་འདར་སིག་རྒྱག་པ་དང་མཉམ་དུ་སྣ་ལམ་དུ་ཤ་རུལ་གྱི་དྲི་མ་འཐུལ་ཡོང་གིན་འདུག་ཟེར་བཞིན་འདུག
སྒྲུང་འདི་བྲིས་ནས་མཚམས་འདིར་བསླེབས་དུས། ངའི་ལུས་ཀྱི་བ་སྤུ་རྣམས་གྱེན་དུ་ལངས་པ་དང་། མདུན་གྱི་གློག་ཀླད་ཀྱི་རྒྱབ་ནས་ཆོས་བྷ་རྒྱ་ཐོས་རུལ་དྲི་ཁ་ཞིང་འཇིགས་སུ་རུང་བའི་འདྲེ་ལག་ཚུར་རྐྱོང་བཞིན་ཡོད་པའི་སྣང་བ་ཞིག་ཤར་ཡོང་བས། ད་ནི་འདྲེ་སྒྲུང་ངམ་རོ་ལངས་ཀྱི་སྒྲུང་འདི་འབྲི་མཚམས་འཇོག་དགོས་པར་གྱུར་པས། གལ་སྲིད་ཁྱེད་ལ་སྒྲུང་འདི་དོན་དངོས་མིན་པའི་དོགས་པ་བྱུང་ན། ཐབས་བརྒྱ་ཇུས་སྟོང་གིས་ངའི་ཕ་ཡུལ་གྱི་དུར་ཁྲོད་དེར་ཐེངས་ཤིག་ཕེབས་ནས་མཚན་གཅིག་དེ་རུ་ཞག་འདུག་བྱེད་རྒྱུ་ནི་ངའི་རེ་བ་ཡིན།