ཨེ་མ་ཧོ།
ན་མོ་གུ་རུ་པདྨ་ཀ་ར་ཡེ།།
ཀ་དག་སྤྲོས་བྲལ་མངོན་རྟོགས་ནས།།
ཁ་སྦྱོར་བདུན་ལ་བྱང་ཆུབ་པའི།།
ག་བུར་མདངས་འཛིན་རྡོ་རྗེ་འཛིན།།
ང་ཡིས་བརྒྱུད་གསུམ་བླ་མར་འདུད།།
ཅ་ཅོའི་ཚིག་ཙམ་མི་འཛིན་པར།།
ཆ་ལུགས་ཆོས་མཐུན་སྤྱོད་པ་སྐྱོང་།།
ཇ་ཆང་མཉམ་པའི་ལྟ་དགོངས་སྤེལ།།
ཉ་རྒན་ཕྱེ་ཚན་མི་གནང་འཚལ།།
ཏ་ཐཱ་ག་ཏ་ཕྱི་ན་དབེན།།
ཐ་སྙད་ཙམ་ལ་མི་ཆགས་པར།།
ད་ལྟའི་དུས་རབས་དང་འཚམས་པའི།།
ན་གཞོན་དགེ་བའི་ཕྲིན་ལས་འབོད།།
པ་ལོ་བཞག་ནས་སྔགས་འཆང་མཛོད།།
ཕ་མེས་བརྒྱུད་པའི་གསང་ཆེན་ལ།།
བ་གླང་རྟུལ་ཞུགས་མ་འཛིན་པར།།
མ་སྨད་གསར་བའི་ལང་འཚོ་ངོམས།།
ཙ་རིའི་སྒོམ་ཆེན་མ་ཡིན་ཀྱང་།།
ཚ་གྲང་བསལ་བའི་སྨན་མཆོག་བཞིན།།
ཛ་ཡའི་བསྟན་པའི་གསང་ཆེན་ལ།།
ཝ་ལེར་ངེས་པའི་དཔའ་གདེངས་ཤོམས།།
ཞྭ་དམར་བསྟན་པའི་ཐེག་དགུའི་དོན།།
ཟ་མ་ཏོག་གི་བདུད་རྩིའི་མཛོད།།
འ་ཅག་རིགས་མཐུན་སྐལ་བཟང་གིས།།
ཡ་རབས་སྔགས་ལམ་ཉམས་སུ་ལོངས།།
ར་བ་གངས་དཀར་ནང་ཤེད་ན།།
ལ་རྒྱ་ཅན་གྱི་སྐྱེས་བུ་ཁྱེད།།
ཤ་ཚ་སྙིང་རྗེའི་གཏམ་མིན།།
ས་གོང་ལས་ལྷག་དད་གུས་མཆིས།།
ཧ་ཅང་དགའ་བའི་གཏམ་བཟང་ལས།།
ཨ་བུའི་འདོ་ཤོར་མིན་པར་ཤེས།།
འོན་ཀྱང་ཕ་བཟང་ཁྱོད་ཀྱིས།།
ཕ་བླ་མ་བཙོང་ཕ་བཟང་བུ།།
སྤྱན་མིག་ནམ་མཁའི་དབྱིངས་ལ་གཟིགས།།
འགྲོ་དོན་འཛམ་གླིང་ཁྱོན་ལ་གདལ།།
རིས་མེད་བསྟན་པའི་བདག་པོ་ཁྱེད།།
ཆོས་རིགས་རྒྱུད་པ་སྤེལ་ལ་ཤོག།
སྐུ་ཚེ་ཚེ་མཐའ་ཡས་དང་མཉམ།།
གསུང་ཆོས་རྒྱ་བོད་དབྱིན་ལ་ཁྱབ།།
ཐུགས་བརྩེ་འགྲོ་བ་ཡོངས་ལ་དགོངས།།
ཡོན་ཏན་ཕྲིན་ལས་ཀུན་བཟང་སྨོན།།
ཅེས་པ་འདི་ཡང་རབ་གནས་ལྷ་བབས་ཟླ་བའི་སངས་རྒྱས་སྨན་བླའི་དུས་ཆེན་ལ་ཆོས་མཆེད་དམ་པ་རྫ་མཁན་ཆེན་ཚེ་རིང་བཀྲ་ཤིས་ཀྱི་བརྡ་སྐད་ལ་གང་ཤར་ཏུ་ཤྲཱིཿཨེ་མ་ཧོས་དབྱིན་ཡུལ་ཛྙཱ་ན་གུ་རུའི་སྒྲུབ་ཁང་བགྱིས་པར་དགེའོ།། །།
ད་ཡང་ཨཱ་ཙཱརྱ་དམར་པོའི་རྗེས་འཇུག་ཚོ་ལ་ཕར་འཐོལ་གཅིག་སླེབས་སོང་བསམ་སྟེ་དགའ་མགུ་རྗེས་སུ་ཡི་རང་དང་བཅས་ཏེ་ཁ་གཏགས་སེར་པོ་ཁྱི་རྔ་ལྟར་གཡོབ་ཀྱིག་འདུག་གདའ། ཨ་ཅང་ཀུ་རེ་ཞུས།ཧ་ཧ་ཧ།
བཀའ་དྲིན་ཆེ། མཇལ་ཡོད།