བློ་བཟང་རིན་ཆེན།
སྔོན་གླེང་།
དེ་རིང་རེས་གཟའ་ཟླ་བའི་གུང་སེང་རེད། འོན་ཀྱང་ལོ་འཁོར་རྒྱུགས་སྤྲོད་རན་ལ་ཉེ་བས། ཁང་ཚན་དུ་བློ་འཛིན་གྱི་སྐད་སྒྲ་ལྡིར་ལྡིར་གྲགས་པས་ཞོགས་པ་སྔོ་བོ་ནས་གཉིད་ནས་བསླངས་སོང་། འོན་ཀྱང་གཉིད་མ་ཁུག་ཀྱང་ཉལ་ཐུལ་དྲོན་པོས་ནང་དུ་ཚ་སོབ་སོབ་གླུ་གཞས་སྙན་མོ་ཞིག་ལ་ཉན་བཞིན་སླར་ཡང་ཉལ། ཆུ་ཚོད་བཅུ་བའི་ཐོག་གྲོགས་པོ་སྐོར་ཞིག་དང་ལྷན་དུ་མོག་མོག་བཟོས་ཏེ་གུང་ཟས་སྤུས་ལེགས་ཤིག་བཟས། མ་ཟད་གཞས་དགོན་གྱི་མཁན་པོ་གསར་པའི་སྐོར་ལ་ལབ་གླེང་མང་པོ་ཞིག་བྱས་ཤིང་། དེ་འཇོག་སྟངས་སྐོར་གྱི་གཏམ་རྒྱུད་མང་པོ་ཞིག་ཐོས་དུས་བློ་ཕམ་སྐྱེས་ཏེ་རང་ཤག་ཏུ་ལོག
དེ་ནས་ཕྱི་ལོགས་སུ་ཟམ་ཟིམ་དུ་འབབ་པའི་ཆར་སྒྲ་ལ་ཉན་བཞིན་སྔར་གྱི་དཔེ་ཀློག་གི་འཕྲོ་ནས་ཀློག་དུས། དེ་རིང་གི་ཚན་པ་འདི་དཔེ་དེབ་འདིའི་གཞུང་དངོས་ལ་ཁེལ་འདུག མ་གཞི་དཔེ་དེབ་འདི་ནི་སྡེ་ཚན་གཉིས་དང་ལེའུ་བཅུ་གཅིག་གི་རྩོམ་ལུས་ཤིག་རེད་ལ། ལེའུ་རེ་ལའང་ཚན་པ་མང་དག་ཅིག་མཆིས་སོ།། དེ་རིང་བཀླག་པར་བྱ་བའི་ལེའུ་འདིའི་མིང་ལ་<<ཆོས་དང་མ་འབྲེལ་བའི་རིང་ལུགས་ལ་བསྐྱར་ཞིབ་>>ཟེར་ཞིང་། དེ་ལའང་ནང་གསེས་ཀྱི་ཚན་པ་བདུན་མཆིས་པ་ལྟར། དེ་དག་བཀླགས་པའི་བརྗེད་བྱང་ཞིག་ངལ་བ་བསྟེན་ནས་གཤམ་ལ་འབྲི་བར་བྱ།
ཚན་རིག་གི་དུས་སྐབས་ཀྱི་ནང་སེམས་ཀྱི་རིན་ཐང་།
མ་གཞི་༧གོང་ས་སྐྱབས་མགོན་ཆེན་པོ་མཆོག་ནི་སེམས་ཁམས་ཚན་རིག་པ་ཡག་ཤོས་ཤིག་ཏུ་ངོས་འཛིན་བྱེད་ཆོག་ཀྱང་། ཁོང་གིས་ཁེངས་སྐྱུང་གི་ངང་ནས་“ང་རང་ཚན་རིག་པ་མིན་པ་གསལ་པོ་རེད།” མ་ཟད་ཚན་རིག་ནི་ངོས་རང་ཕྲུ་གུ་ཡིན་སྐབས་སློབ་སྦྱོང་གི་ཆ་ཤས་ཤིག་ཀྱང་མིན། འོན་ཀྱང་བཙན་བྱོལ་དུ་འབྱོར་བ་ནས་བཟུང་། ཚན་རིག་ལ་དོ་སྣང་དང་ཁ་གསབ་བྱས། དེའང་མི་ལོ་སུམ་ཅུ་ལྷག་གི་རིང་ལ་དངོས་ཁམས་རིག་པ་དང་། འཇིག་རྟེན་ཁམས་ཀྱི་རིག་པ། སྐྱེ་དངོས་རིག་པ། སེམས་ཁམས་རིག་པ། དབང་རྩའི་ཚན་རིག་སོགས་ལ་ཆེད་མཁས་ཀྱི་མཁས་དབང་མང་པོ་དང་ལྷན་དུ་བགྲོ་གླེང་དང་ཉམས་ཞིབ་བྱས་པ་ཡིན་ཞེས་གསུངས་ཡོད། འདི་དག་ལ་ལྟ་དུས་༧གོང་ས་སྐྱབས་མགོན་ཆེན་པོ་མཆོག་ནི་གནའ་དེང་ལ་དབྱེ་བ་མེད་པར་གང་ལ་ཤེས་རིག་གི་དཔལ་ཡོན་མཆིས་ན། དེ་ལ་འཇུག་པའི་བློ་སྟོབས་དང་། ལེགས་ཉེས་རྣམ་པར་འབྱེད་པའི་རྣམ་དཔྱོད་མངའ་བ་དཔོག་ཐུབ།
འདས་པའི་ལོ་ངོ་བརྒྱ་ཕྲག་གཉིས་ཙམ་གྱི་ནང་ལ་ཕྱིའི་མཐུན་རྐྱེན་ཡར་རྒྱས་སོང་ཞིང་། ཚན་རིག་གི་ལག་རྩལ་འཕེལ་རིམ་ལ་བརྟེན་ནས་སྔར་རྨི་ལམ་དུ་འཁོར་མ་མྱོང་བའི་གནམ་གྲུ་དང་། གློག་ཀླད་སོགས་མངོན་གྱུར་བྱུང་བ་རེད། དེར་བརྟེན་མི་མང་པོ་ཞིག་གིས་རེ་བ་ཚན་རིག་ལ་བཅོལ་ནས་ཆོས་ལུགས་དགོས་མིན་དང་། བདེ་སྐྱིད་ནི་ཚན་རིག་གི་ལག་རྩལ་ལ་བརྟེན་ནས་བྱུང་བར་ཡིད་ཆེས་བྱེད་པ་ལ་ཧང་སངས་དགོས་དོན་མེད་ཅེས་གསུངས་པ་ཧ་ཅང་བདེན་དུ་སྙམ།
ཚན་རིག་གི་ཡར་ཐོན་དང་འགྲོགས་ནས་སེམས་དོན་རིག་པའི་རིན་ཐང་ཡར་རྒྱས་སུ་འགྲོ་དགོས་པ་ནི་ཧ་ཅང་གལ་ཆེན་ཞིག་ཡིན་ནའང་། ད་ཆ་སེམས་དོན་རིག་པ་སྣང་མེད་དུ་ལུས་པ་ནི་འཐུས་ཤོར་ཆེན་པོ་ཞིག་རེད། འོན་ཀྱང་དུས་ཚོད་ཀྱི་འགྱུར་འགྲོས་དང་བསྟུན་ནས་ནང་སེམས་ཀྱི་བཟང་སྤྱོད་ཐད་ལ་ཚན་རིག་གི་སྒྲུབ་བྱེད་བརྟན་པོ་ཞིག་རིམ་པས་ཐོན་པར་ངོས་ལ་ཡིད་ཆེས་ཡོད་ཅེས་གསུངས་འདུག ད་དུང་རང་འདོད་མེད་པ་དང་། གཞན་ལ་སེམས་ཁུར་བྱེད་པ་ནི་ང་ཚོའི་ལུས་པོའི་གྲུབ་ཆའི་རང་ཆས་སུ་གྲུབ་པར་ཚན་རིག་གིས་དཔང་རྟགས་བྱས་ཡོད། དེ་དང་ང་ཚོ་སྒེར་གྱི་མྱོང་བ་མཉམ་སྡེབ་བྱས་ཤིང་། རྒྱུན་ཤེས་དང་ཟུང་འབྲེལ་བྱས་ཚེ། ཆོས་དད་ལ་རྩ་བ་ནས་མ་བརྟེན་པར་འགྲོ་བ་མིའི་གཞིའི་རྩའི་རིན་ཐང་རྒྱུད་སྦྱོང་བྱེད་པའི་ཕན་ཡོན་ཐད་སྒྲུབ་བྱེད་བླ་མེད་ཅིག་བསྐྲུན་ཐུབ་ཅེས་གསུངས་པ་ཕུགས་རྒྱང་རིང་པོའི་གདམས་ངག་ཅིག་གོ །
2020/8/3 བློ་བཟང་རིན་ཆེན་གྱིས་བྲིས།
་་་་་་་་་་་་་་་་ ཚན་རིག་ལ་དོ་སྣང་དང་ཁ་གསབ་བྱས། དེའང་མི་ལོ་སུམ་ཅུ་ལྷག་གི་རིང་ལ་དངོས་ཁམས་རིག་པ་དང་། འཇིག་རྟེན་ཁམས་ཀྱི་རིག་པ། སྐྱེ་དངོས་རིག་པ། སེམས་ཁམས་རིག་པ། དབང་རྩའི་ཚན་རིག་སོགས་ལ་ཆེད་མཁས་ཀྱི་མཁས་དབང་མང་པོ་དང་ལྷན་དུ་བགྲོ་གླེང་དང་ཉམས་ཞིབ་བྱས་པ་ཡིན་ཞེས་གསུངས་ཡོད། ་་་་་་་་་་་་་་་
་
ཚན་རིག་ནི་ཡར་རྒྱས་དང་། བདེ་སྐྱིད་ཀྱི་ཕྱོགས་སུ་བསྒྱུར་ཕྱིར་སྦྱང་དགོས་པ་ལས། དམག་འཁྲུགས་མཚོན་བྱ་དང་། མི་སྡེ་རྡེབ་གསོད་ཀྱི་ཆེད་དུ་མ་སོང་བའི་ཆེད་དུ་ཚན་རིག་སྦྱང་དགོས་པ་དེ་གཞི་ནས་ཤེས་ནས་གྲྭ་པའམ། ཆོས་པས་ཚན་རིག་སྦྱོངས་དགོས་ཡིན་དགོས་པར་མངོན་འདུག་སྙམ་མོ།།