བློ་བཟང་རིན་ཆེན།
སྔོན་གླེང་།
ང་ནི་གྲོགས་པོ་ནང་ཁུལ་ལ་རྩོད་པ་རྒྱག་རྒྱུར་ཧ་ཅང་དགའ། བརྗོད་བྱ་བྱེ་བྲག་པ་ཞིག་གི་ཐོག་ལ་རྩོད་པ་བྱེད་སྐབས། མཚམས་རེར་རང་གི་ཞེ་ཕུག་གི་འདོད་པ་མིན་ཡང་། དགག་ཕྱོགས་ནས་བསམ་ཚུལ་བརྗོད་དེ་རྩོད་པ་ལྷུར་ལེན་བྱས་མྱོང་། བསམ་ཚུལ་བརྗེ་རེས་སམ་རྩོད་པ་རྩོད་ལན་གྱི་སྐབས་སུ་གྲོགས་པོ་ཕན་ཚུན་ཁོང་ཁྲོ་ལངས་ཏེ་ཉིན་ཤས་ལ་ཁ་གཏམ་ཆད་པའི་གཏམ་རྒྱུད་མང་པོ་བྱུང་མྱོང་། ཁ་གཏམ་ཆད་པའི་སྐབས་སུ་མི་སྐྱིད་པ་རེ་ཡོད་ཀྱང་སྔོན་ཆད་ཀྱི་བྱུང་བར་ཕྱི་མིག་རེ་བལྟས་ཚེ་དགོད་སྤྲོ་བ་ཞིག་རེད།
དོ་ནུབ་ཡང་རྟེན་འབྲེལ་ཀྱི་རྟགས་ཀྱིས་མྱུ་གུ་བདེན་མེད་དུ་སྒྲུབ་པའི་ཕྱི་རྒོལ་ཡང་དག་གིས་རྟེན་འབྲེལ་ལ་བདེན་མེད་ཀྱིས་ཁྱབ་པ་རྟོགས་མིན་ཐོག་ནས་རྩོད་པ་བྱས་ཏེ་གྲོགས་པོ་ཞིག་རླུང་ལངས་པར་བྱས། གྲོགས་པོ་ཁོང་གིས་ཟེར་རྒྱུར། སྐབས་ཀྱི་ཕྱི་རྒོལ་ཡང་དག་གིས་རྟེན་འབྲེལ་ལ་བདེན་མེད་ཀྱིས་ཁྱབ་པ་མ་རྟོགས་པ་པཎ་ཆེན་བསོད་ནམས་གྲགས་པའི་མཐའ་དཔྱོད་དུ་ལུང་ཁ་གསལ་ཡོད་རེད་ཟེར། དེ་ནས་ངས་”མཐའ་དཔྱོད་ནི་འདི་ལ་འདུག ཁྱེད་ཀྱང་འདི་ན་འདུག ལུང་དེ་སྟོན་དང “ཟེར་བཞིན་ངས་མཐའ་དཔྱོད་ཨུ་ཚུགས་ཀྱིས་ཁོ་ལ་སྤྲད་པ་ཡིན། ངས་རྩོད་པ་ཧུར་ལེན་པའི་རྣམ་འགྱུར་གྱིས་ཁོ་རང་རླུང་ལངས་བཅུག་སོང་། དེ་ནས་ང་ཚོའི་རྩོད་པ་རིམ་གྱི་ཤུགས་ཆུང་དུ་སོང་སྟེ་མཐར་རང་རང་སོའི་སོའི་ཤག་ལ་ལོགས་དགོས་བྱུང་། དེ་ནས་ངས་ག་ལེར་<<ཆོས་ལུགས་ཀྱི་མཚམས་ལས་འདས་པའི་འཇིག་རྟེན་སྤྱི་སྨན་གྱི་བཟང་སྤྱོད་>>ཀྱི་ མིའི་རང་བཞིན་ལ་བཟང་སྤྱོད་ཀྱི་རྩ་བ་འཛུགས་པ་ཞེས་པའི་ཚན་པ་འདི་བཀླགས་ཏེ་གཤམ་ལ་བརྗེད་ཐོ་ཞིག་འབྲི་འདོད་བྱུང་།
མིའི་རང་བཞིན་ལ་བཟང་སྤྱོད་ཀྱི་རྩ་བ་འཛུགས་པ།
གོ་ལ་ཧྲིལ་པོ་འདིའི་སྟེང་གི་རིག་གཞུང་དང་ལྟ་གྲུབ། སྒེར་གྱི་བསམ་ཚུལ་བཅས་ཐམས་ཅད་ཀྱི་ཁྲོད་དུ། འགྲོ་བ་མིའི་རང་བཞིན་གྱི་གལ་ཆེའི་དམིགས་ཡུལ་ཐད་ཐུན་མོང་གི་བསམ་ཚུལ་གཅིག་མཐུན་ཞིག་མེད་ཅིང་། བསྡུ་ན་ཕྱོགས་གསུམ་དུ་བསྡུ་ཆོག་སྟེ་མི་འགའ་ཤས་ཀྱིས་འགྲོ་བ་མིའི་གཞི་རྩའི་རང་བཞིན་ནི་དྲག་རྩུབ་དང་བཙན་ཤེད། རང་རྒྱལ་གཞན་ཕམ་འདོད་མཁན་ཞིག་ཡིན་པར་ལྟ་ཞིང་ཡིད་ཆེས་བྱས་ཡོད། ཕྱོགས་གཅིག་གིས་འགྲོ་བ་མིའི་གཞི་རྩའི་རང་བཞིན་ནི་བྱམས་བརྩེའི་བདག་ཉིད་དང་ཡ་རབས་སྤྱོད་བཟང་ཞིག་ཏུ་ལྟ་ཞིང་ཡིད་ཆེས་བྱས་ཡོད། མང་པོ་ཞིག་གིས་ལྟ་ཚུལ་དེ་གཉིས་ཀྱི་དབུས་ལ་གནས་ཏེ་འགྲོ་བ་མིའི་ཁྱད་ཆོས་དང་མངོན་འདོད་ཚང་མར་རིམ་པ་འདྲ་མིན་ཐོག་ནས་འགྲིག་མཐུན་བྱེད་ཀྱི་ཡོད་པ་དེའོ།།
ལྟ་ཚུལ་དེ་དག་ལས་གང་ཞིག་ཡང་དག་པ་ཡིན་མིན་ལ་ངེས་ཤེས་མ་རྙེད་ཀྱང་། འགྲོ་མིའི་གཞི་རྩའི་རང་བཞིན་བྱམས་བརྩེ་དང་ཡ་རབས་སྤྱོད་བཟང་ཡིན་པའི་ཕྱོགས་ལ་དགའ་ཞིང་གུས། དེ་ནི་རྒྱུ་མཚན་གང་ཡང་མེད་པར་ལྐུག་པའི་ཨུ་ཚུགས་ལྟ་བུ་མ་ཡིན་པར། འགྲོ་བ་མིའི་གཞི་རྩའི་རང་བཞིན་བྱམས་བརྩེ་ལྡན་པ་ཞིག་ཡིན་པའི་སྐོར་ལ་མཚན་སྙན་ཆེ་བའི་ཚན་རིག་པ་མང་པོས་འགྲེལ་བཤད་གནང་ཡོད་པ་༧གོང་ས་སྐྱབས་མགོན་ཆེན་པོ་མཆོག་གི་གསུང་ལས་ཡང་ཡང་གོ་མྱོང་། མ་ཟད་ལོ་ངོ་ཉིས་སྟོང་ལྔ་བརྒྱ་ལྷག་གི་ཡར་སྔོན་དུ་བྱོན་པའི་སྟོན་པ་ཤཱཀྱ་ཐུབ་པ་དང་ཁོང་གི་རྗེས་འཇུག་རྣམས་ཀྱིས་ནན་ཏན་དུ་གདམས་པ་དེར་རྒྱུ་མཚན་མེད་པ་ག་ལ་སྲིད། ད་དུང་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ཤར་ནུབ་ཀྱི་མི་རིགས་ཐམས་ཅད་ལ། འགྲོ་བ་མིའི་གཞི་རྩའི་རང་བཞི་བྱམས་བརྩེ་ལྡན་པ་ཞིག་ཡིན་པའི་འགྲེལ་བཤད་ནན་ཏན་དུ་གནང་བཞིན་པ་དེ་ནི་རྒྱུ་མཚན་མེད་པ་ཞིག་ག་ལ་ཡིན།
2020/9/14 བློ་བཟང་རིན་ཆེན་གྱིས་བྲིས།