ཁ་བའི་རྣམ་ཤེས།
རོ་བརྒྱའི་དཔལ་འཛིན་ཇ་ཁུ་དྭངས་མ་འདི།།
སྦྱངས་རྟོགས་སྦར་བས་བདུད་རྩིའི་བཅུད་དུ་སྨིན།།
སྟེང་ཕྱོགས་གྲུ་འཛིན་ཞིང་དུ་བཞུགས་པ་ཡི།།
དཀར་ཕྱོགས་སྐྱོང་བའི་ལྷ་ཡི་ཚོགས་ལ་འབུལ།།
གངས་ལྗོངས་སླར་ཡང་དར་བའི་བཀྲ་ཤིས་ཤོག།།
ཇ་ཁུ་ཚྭ་དང་བསྦྱར་ཏེ་འབྲི་མར་འདེབས།།
མདོང་མོའི་ནང་དུ་དཀྲུག་དཀྲུག་ལན་དགུ་གཏོང་།།
རོ་བཅུད་གཉིས་ལྡན་བོད་ཇ་གར་མ་འདི།།
བོད་རིགས་སྤུན་ཟླ་ཡོངས་ལ་མཆོད་པ་འབུལ།།
གཞིས་བྱེས་མཉམ་འཛོམས་ཡོང་བའི་བཀྲ་ཤིས་ཤོག།།
ཇ་སིལ་འོ་མའི་ནང་དུ་ཡུན་རིང་སྐོལ།།
མངར་ཟས་ཀ་ར་སྨན་སྣ་སྒ་སྨུག་འདེབས།།
ཞིམ་མངར་དྲི་ཞིམ་ཐུལ་བའི་འོ་ཇ་འདི།།
བཀའ་དྲིན་ཅན་གྱི་རྒྱ་གར་མི་ལ་འབུལ།།
དར་རྒྱས་ཡུན་དུ་གནས་པའི་བཀྲ་ཤིས་ཤོག།
ལོ་ངོ་སྟོང་ལ་སོན་པའི་ཇ་ལོ་ཞིག།
རྫ་ཁོག་ཆུང་ཆུང་ཞིག་ཏུ་སྦངས་ཏེ་འཐུང་།།
རིན་གོང་ཆེ་བའི་གནའ་བོའི་ཇ་རྙིང་འདི།།
ཉི་ཧོང་གྲོགས་པོ་རྣམས་ལ་མཆོད་པ་འབུལ།།
མེས་པོའི་གཟི་བརྗིད་དར་བའི་བཀྲ་ཤིས་ཤོག།
ཤིང་གི་འབྲས་བུ་བརྔོས་ཤིང་ཞིབ་མོར་འཐག།
ཆུ་ཁོལ་ནང་དུ་སྦངས་ཏེ་སྙིགས་མ་འདོར།།
ཁ་ཏིག་ཆེ་བའི་ཚིག་ཇ་ནག་པོ་འདི།།
མགོ་སེར་མི་ཡི་རིགས་ལ་མཆོད་པ་འབུལ།།
དངོས་པོའི་དཔལ་ཡོན་དར་བའི་བཀྲ་ཤིས་ཤོག།།
ཇ་ལོ་སྔོ་སྐམ་ཤེལ་ཕོར་ནང་དུ་སྦོང་།།
ཇ་ཚགས་མཆུ་ཡིས་རྒྱག་བཞིན་ཐུ་ལུད་འཕེན།།
ཇ་མིན་ཆུ་མིན་རྒྱ་ཡི་ཆིང་ཁྲཱ་འདི།།
ཙི་ནའི་ཡུལ་གྱི་མི་ལ་མཆོད་པ་འབུལ།།
ནད་དང་མུ་གེ་ཞི་བའི་བཀྲ་ཤིས་ཤོག།
རི་སུལ་ཞིང་གྲོང་སྐྱེས་པའི་རྩི་ཤིང་བསྡུས།།
གང་ལ་གང་ཕན་བསྦྱར་ཏེ་དལ་བུར་སྐོལ།།
ཡུལ་གྲུ་གང་སར་དར་བའི་སྨན་ཇ་འདི།།
ཉམ་ཐག་ནད་པ་ཀུན་ལ་མཆོད་པ་འབུལ།།
ཏོག་དབྱིབས་ནད་ལས་ཐར་བའི་བཀྲ་ཤིས་ཤོག།
གཞན་ཡང་མི་རིགས་གཞན་ལ་ཇ་རིགས་མང་།།
མངར་སྐྱུར་བྲོ་བ་མི་འདྲ་དེ་བས་མང་།།
བསྲེས་ལྷད་མེད་པའི་སོ་སོའི་སྒེར་ཇ་འདི།།
འཛམ་གླིང་མི་མང་ཡོངས་ལ་མཆོད་པ་འབུལ།།
རིག་གཞུང་རྒྱུན་འཛིན་ཐུབ་པའི་བཀྲ་ཤིས་ཤོག།