ཆང་སྐྱེས།
སྔོན་བསགས་ལས་ཀྱིས་བཀོད་པའི་ལས་འཕྲོ་མིན་སོང་།།
ཆུང་ནས་འགྲོགས་ཤིང་འདྲེས་པའི་མཛའ་གྲོགས་མ་ཡིན།།
གློ་རྡེག་སྟེས་དབང་ཞིག་གིས་ཐུག་འཕྲད་བར་ནས།།
སྣང་བརྙན་གསོན་པོ་ཞིག་གི་བག་ཆགས་བཞག་སོང་།།
ལག་པ་ལག་པས་འཇུས་ཏེ་བརྩེ་དུང་མ་གླེང་།།
མགོ་བོ་བྲང་ཁར་གླན་ཏེ་སྙིང་གཏམ་མ་བཤད།།
སྐད་འཕྲིན་དྲྭ་ལམ་སྟེང་གི་རྩེད་འཇོ་བར་ནས།།
བདག་སེམས་ཁྱོད་ལ་ཤོར་ཏེ་འགོག་ཐབས་མ་བྱུང་།།
ཁ་པར་འཆར་ངོས་སྟེང་ན་ཡིད་དུ་འོང་ཞིང་།།
མིག་ཟུང་འཛུམ་གྱིས་ཕྱུག་པའི་ན་ཆུང་བུ་མོའི།།
ཀུ་རེ་དགོད་གཏམ་བར་གྱི་རྣམ་འགྱུར་རེ་རེ།།
བདག་གི་སྙིང་ལ་བཏབ་པའི་མེ་ཏོག་ཆུན་པོ།།
གླིང་གི་སེང་ལྕམ་འབྲུག་མོའི་སྐྱེས་གཟུགས་དྲང་མོ།།
སྙན་ངག་པ་ཡི་ངག་གི་གླུ་རུ་བླངས་སོང་།།
མཚོན་གྱིས་མ་བྱུགས་ཁྱེད་ཀྱི་ལང་ཚོ་དམར་པོ།།
བདག་ལ་མཚོན་ན་སེམས་ཀྱི་མཛེས་སྡུག་ཡིན་སོང་།།
ཉི་མ་རི་ལ་ནུབ་པའི་ས་སྲོད་ཅིག་སྟེ།།
བདག་གིས་ཁྱེད་རང་དྲན་པའི་སྐབས་ཤིག་ཡིན་སོང་།།
མུན་པ་ས་ལ་ལྷུང་བའི་སྨག་རུམ་ཀློང་ནས།།
ཁྱོད་ཀྱིས་བདག་ལ་རེ་སྒུག་བྱས་མྱོང་ཨེ་ཡོད།།
མགོ་བོ་ལག་པས་བསྐྱོར་པའི་བསམ་གཞིག་ཁུགས་ནས།།
ཁྱོད་ཞལ་ཟླ་བ་ཡིད་ལ་འཁོར་འཁོར་བྱས་བྱུང་།།
མཚན་མོ་གཉིད་ལ་ཤོར་བའི་རྨི་ལམ་ཞིང་ནས།།
ཁྱེད་རང་བདག་གི་རུམ་ན་འཛུམ་གྱིས་ཁེངས་འདུག།