ཅོག་མྱི།
བོད་ནས་སློབ་གྲྭར་འགྲོ་མྱོང་མཁན་དང་རྒྱ་ནག་གི་རྩོམ་གྱི་འབྲི་སྟངས་ལ་ཆ་རྒྱུས་རོབ་ཙམ་ཡོད་མཁན་ཞིག་ཡིན་ན་ཇི་བཞིན་བརྗོད་པའི་རྩོམ་ཞེས་པའི་ཟེར་སྲོལ་འདི་ལ་རྣ་རྡིབ་ཏུ་གྱུར་ཡོད་སྲིད།
ཇི་ཞིག་ནི་ཇི་བཞིན་བརྗོད་པའི་རྩོམ་ཡིན། སྒྲུང་རྩོམ་ཞེས་བྱ་བ་ནི་རྟོག་བཏགས་དང་སྣང་གྲག་རིག་གསུམ་ལ་རྩོམ་མཁན་གྱི་དགའ་མོས་དང་ཆུ་ཚད་ལྟར་ཇི་བཞིན་བྲིས་པ་ཞིག་ལ་ཟེར། ལ་ལ་ནི་དངོས་ཡོད་ལས་བྱུང་བ་དང་ལ་ལ་ནི་བློ་ལས་བསླངས་པ་ཡིན། ལ་ལ་ནི་འདྲེས་མ་ཡིན། དེ་ལ་རིགས་རྒྱ་མཚོའི་ཆུ་ཐིགས་ལྟར་མང་བས་བགྲངས་ཀྱིས་མི་ལངས་སོ།།
འཛམ་གླིང་རྩོམ་མཁན་ཁྱུ་ཚོགས་ཀྱི་ཁྲོད་ནའང་ཆབ་སྲིད་འཐབ་རྩོད་ཀྱི་ཀླད་རྙིང་མང་བོ་བདོག་པས་དེ་དག་གི་དགའ་མོས་དང་ཁེ་ཕན་ལྟར་རྩོམ་རིག་ལ་འོལ་ཚོད་ཀྱིས་གྲལ་དང་རིམ་པ་དབྱེ་བ་མ་གཏོགས། རྩོམ་ཁོ་རང་སྟེང་ན་གྲལ་རིམ་དང་རིགས་ཞེས་པ་དབྱེ་ཤིན་ཏུ་དཀའ། ཁོ་བོ་སློབ་གྲྭར་འགྲིམས་དུས་རྩོམ་ལུས་ཤུགས་ཆེ་ཤོས་དེ་སྒྱུ་འཕྲུལ་དངོས་ཡོད་རིང་ལུགས་ཀྱི་རྩོམ་༼ལོ་བརྒྱའི་དབེན་གནས།༽༼Cien años de soledad༽ ཞེས་པ་དེ་དང་ནོ་པེལ་རྩོམ་རིག་བྱ་དགའ་ཟེར་བ་དེ་ཡིན། དེའི་དུས་ཀྱི་མིག་རྒྱ་ཆེར་མེད་པའི་བོད་ཀྱི་རྩོམ་པ་པོ་དེ་དག་གི་ཁ་ནང་གི་སྐྱབས་འགྲོ་སེམས་བསྐྱེད་ཀྱང་དེ་ཡིན།
ཁོ་བོས་ཀྱང་ལོ་གཞོན་ཞིང་ཤེས་རྒྱ་དོག་པས་དེ་དག་གི་རྗེས་སུ་འབྲངས་ནས་རྩོམ་ལུས་དེ་ནང་བཞིན་རྩོམ་ཡིག་རེ་འགའ་བྲིས་ནས་དགའ་ཀྲོག་ཀྲོག་བྱས་མྱོང་། མི་ཚེ་ཐུང་ཐུང་འདི་རྨི་ལམ་སད་ལ་ཁད་ཅིག་དང་འདྲ། ཡིན་ནའང་སད་མེད། ད་ལྟར་གློ་བུར་དུ་སད་དུས་རྩོམ་རིག་ལ་གྲལ་རིམ་དབྱེ་བ་ནི་མི་མངོན་པའི་དབྱིངས་ན་གནས་པའི་མངའ་བདག་དག་གི་དབང་བསྒྱུར་ཐབས་ཀྱི་ཐེག་པ་ཞིག་ཡིན་པ་གཞི་ནས་ཚོར། མངའ་བདག་དེ་དག་གིས་བརྗོད་ལས་འདས་པའི་རྩོམ་གཡོག་མང་པོ་དབང་དུ་མནན་ཡོད། ཀྱེ་མ་ཧོ། དོན་དམ་པར་རྨི་ལམ་རྨིས་ཡོད་དུས་རང་ཉིད་བྲན་གཡོག་ཏུ་གྱུར་ཟིན་ཏོ།
ང་ཚོ་བོད་ཀྱི་རྩོམ་རིག་ལ་ཕྱིའི་ཤུགས་རྐྱེན་དང་ནང་གི་རྨོངས་མུན་ལས་རང་གི་ཁྱད་ཆོས་ཟེར་བ་ཞིག་གཞི་ནས་ཡལ་ཟིན། དེའི་མངོན་རྟགས་ནི་ང་ཚོར་གླིང་གེ་སེར་ལྟ་བུ་ཞིག་ད་ལྟ་འབྲི་ཐུབ་ཀྱིན་མེད་ལ་བཙན་པོ་ཟེར་བ་ཞིག་ད་ལྟ་ཡོང་རྒྱུ་མེད་པ་དེ་ཡིན།
མདོར་ན་རྩོམ་ཐམས་ཅད་ནི་ཇི་བཞིན་བརྗོད་པའི་རྩོམ་ཡིན་ལ། རྩོམ་ལ་རིགས་དང་དབྱེ་བ་དགར་བ་ནི་རྩོམ་པ་པོའི་བསམ་བློ་དང་ཤེས་ཡན་འཆར་རྟོག་དབང་དུ་འདུ་ཆེད་ཡིན།
རྩོམ་ཐུང་དོན་འདུས་ཅན་ཞིག་སྤེལ་འདུག འདི་ནི་ལམ་སྟོན་རང་བཞིན་ཅན་ཞིག་དང་། བློ་སྒོ་འབྱེད་བྱེད་ཅིག་རེད། ཚང་མས་བསམ་ཚུལ་ལྷུག་པོར་བརྗོད་ནས་མུ་མཐུད་བགྲོ་གླེང་བྱེད་འོས་པར་མཐོང་།
གྲོགས་བཟང་བོ་ལྷ་སྡེ་བདེ་མོ། བཙན་བྱོལ་གྱི་རྩོམ་རིག་པ་ནང་ཇི་བཞིན་བརྗོད་པའི་རྩོམ་ལུས་ཀྱི་བྱུང་རིམ་དང་སྒྱུ་འཕྲུལ་དངོས་ཡོད་རིང་ལུགས་ཀྱི་རྩོམ་རྩལ་དག་ཤེས་མཁན་ཉུང་ཉུང་རེད། ཁོང་ཚོས་ཨ་མེ་རི་ཀ་གླིང་གི་ལོ་རྒྱུས་ཤེས་ནའང་དེའི་སྐོར་གྱི་རྩོམ་མཆོག་ལ་དོ་སྣང་མེད། བོད་ཀྱི་རྩོམ་པ་པོ་ཚོས་རྩོམ་མཆོག་དེ་དག་ཨ་ཞང་ཚང་གི་བཀའ་དྲིན་ལས་ཀློག་པའི་སྐལ་བ་ལྡན་ནའང་ཨ་ཞང་ཚང་གིས་ལོ་རྒྱུས་དངོས་མ་བསྟན་མེད་པས་ལོག་ལམ་ལ་ཕྱིན་པ་མང་། ཁྱེད་དང་ང་ལྟ་བུ་རྩོམ་པ་པོ་ཕྱོགས་གཉིས་ཀར་ཆ་རྒྱུས་ཡོད་པ་ཉུང་ཉུང་རེད། དེ་ཕྱིར་བོད་ཕྱི་ནང་གི་འབྱུང་འགྱུར་བ་ཚོར་དམིགས་ནས་སྐུ་ཉིད་ཀྱིས་སྒྲུང་རྩོམ་རེ་འབྲི་རྒྱུ་ནི་བདག་གི་རེ་བ་ཡིན།
ལོ་གཉིས་གསུམ་གྱི་སྔོན་ལ་དགེ་འདུན་རབ་གསལ་དང་གདན་སའི་དགེ་བཤེས་རེ་འགའ་སྐྱ་བརྒྱབ་ནས་ཨ་རིའི་རྩོམ་རྒན་༼བགྲེས་པོ་དང་རྒྱ་མཚོ།༽༼the old man and the sea༽༼老人与海༽བོད་ཡིག་ལ་བསྒྱུར་ཡོད་པ་དེ་ཀློག། དགེ་འདུན་རབ་གསལ་དངོས་གནས་བཙན་བྱོལ་བའི་རྩོམ་པ་པོ་ཞིག་ཏུ་གྱུར་ཟིན། ཁོང་གིས་ཞབས་འདེགས་ཞུས་སའང་བཙན་བྱོལ་བའི་རྗེས་རབས་པ་ཁོ་ན་ཡིན་པའི་སྣང་བ་བྱིན་སོང་། ང་ཚོས་རྩོམ་རྒན་འདི་རིགས་འབྲི་བའམ་བསྒྱུར་དུས་རྒྱ་ཆེ་བའི་གཞིས་ལུས་ཀློག་མཁན་དག་ནམ་ཡིན་ཡང་དམིགས་འབེན་དང་བོར་འཇོག་དགོས། གང་ཡིན་ཞེ་ན། བོད་ཀྱི་རྩོམ་རིག་གི་གསོན་ཤུགས་དང་མེ་རོ་བཙན་བྱོལ་ལ་བྲོས་མེད་པས་སོ།
ཀློག་དེ་བཀླགས་ལ་བཅོས་རོགས།