ནམ་མཁའ།
གངས་ལྗོངས་རྫ་ཆུ་བསིལ་མ།།
རྫས་སྦྱོར་དུག་ཆུས་སྒྱུར་སོང་།།
ཉམ་ཆུང་ཉ་མོ་སྐྱོ་ཡང་།།
སྐྱོབ་མཁན་གཅིག་ཀྱང་མི་འདུག །
གོས་ལྗང་སྤང་ཐང་སྔོན་མོ།།
རྡུལ་ཕྲན་སྙིགས་རོས་ཁེངས་སོང་།།
ཉམ་ཆུང་ལུག་གུ་སྐྱོ་ཡང་།།
སྐྱོབ་མཁན་གཅིག་ཀྱང་མི་འདུག །
གངས་ལྗོངས་བོད་ཀྱི་ཡུལ་ལ།།
རྒྱ་དམར་ཀླ་ཀློས་ཁྱབ་སོང་།།
སྐྱོ་གླུ་ཕྱི་མིས་ཐོས་ཀྱང་།།
སྐྱོབ་མཁན་གཅིག་ཀྱང་མི་འདུག །
མཛེས་ལྗོངས་ནགས་ཚལ་སྟུག་པོ།།
བཅད་ནས་སྟོང་པར་གྱུར་སོང་།།
རི་དྭགས་སྟག་གཟིག་སེང་གསུམ།།
སྐྱོ་བའི་མཆི་མ་ལྷུང་སོང་།།
གངས་ཆབ་རྨ་འབྲི་གཙང་གསུམ།།
དམར་བོ་ཁྲག་གིས་སྒྱུར་སོང་།།
སྐྱིད་དུས་མགོ་འཕང་མི་མཐོ་བ།།
སྡུག་དུས་མགོ་འཕང་མི་དམའ་བ།།
གངས་ཅན་མཁས་བས་ཡིག་ཐོག་ལ།།
སྔ་ནས་བཞག་པའི་གདམ་ངག་རེད།
སྐྱིད་སྡུག་གཉིས་ཀ་རྐྱལ་བ་རེད།
རྐྱལ་བ་སྒང་ལ་ལོག་རེས་རེད།
སྐྱེ་ཆེན་དམ་པའི་ཞལ་ལུང་ལས།།
ཡང་ཡང་ཐོས་བའི་བཀའ་ཆོས་རེད།
རི་ཐོ་སྒུལ་བ་མ་ནུས་ཀྱང་།།
སྤོ་ཐོ་ཞིག་པའི་གསོན་ཤུགས་འདི།
ཆུ་ཐིགས་གསོག་པ་རྒྱ་མཚོ་ལྟར།།
དུས་འདིར་དུས་ནས་རྒྱས་བར་ཤོག།
མི་ལོ་དྲུག་ཅུ་མྱངས་ཀྱང་སྐྱོབ་མཁན་མི་འདུག །
བོད་མི་བདུན་ཅུ་བསྲེགས་ཀྱང་རྒྱབ་སྐྱོར་མི་འདུག །
རང་བཙན་བློས་བཏང་བྱས་ཀྱང་ཁ་ཡ་མི་འདུག །
དབུས་ལམ་གཉིས་ཕན་བདམས་ཀྱང་རེ་བ་མི་འདུག །