བསྟན་འཛིན།
༼གསལ་བཤད། ངའི་རྩོམ་འདི་བོད་ཀྱི་གཙང་པོའི་ནང་ལ་རྒྱ་ནག་གི་ཉ་སྲིན་འབོར་བའི་སྐོར་ཡིན། གཞན་པ་མི་ཤེས། རྒྱ་ནག་གི་རྒྱ་མཚོའི་ནང་ལ་ཉ་སྲིན་འབོར་བ་དེ་ལ་འབྲེལ་བ་མེད། དེ་བས་མཁན་པོ་ཚུལ་ཁྲིམས་ལ་ཟུར་ཟ་མེད། ཁོང་ལ་སྙོན་འཛུགས་བྱེད་མཁན་རྣམས་ཀྱིས་རྩོམ་འདི་བེད་སྤྱོད་མི་གཏོང་བ་ཞུ། ༽
མིག་སྔའི་བོད་ཕྱི་ནང་གི་བགྲོ་གླེང་ཆེན་པོ་ཞིག་ནི་ཚེ་ཐར་སྐོར་རེད། ས་ག་ཟླ་བ་ཤར་བ་དང་། མི་མང་པོ་ཞིག་གིས་སེམས་ཅན་ཚེ་ཐར་གཏོང་བ་དེ་རེད། དེ་ལ་ཆོས་ལུགས་པ་རྣམས་ཀྱིས་དགའ་པོ་དང་ཡིད་རང་བྱེད། སྤྱི་ཚོགས་ཐོག་ཉམས་མྱོང་ཅན་དང་། ཐོས་རྒྱ་ཆེ་བ་རྣམས་ཀྱིས་ངོ་རྒོལ་བྱེད། ཆོས་ལུགས་པས་དགའ་པོ་བྱེད་པ་ནི་དགེ་བ་འབུམ་འགྱུར་ཡིན་སྟབས་རེད། སྤྱི་ཚོགས་ལ་བསམ་ཤེས་ཡོད་པ་རྣམས་ཀྱིས་ཚེ་ཐར་གྱི་ངན་འབྲས་གླེང་བ་རེད། ས་ག་ཟླ་བར་དགེ་བ་བསགས་ན་ཕན་འབྲས་བསམ་གྱིས་མི་ཁྱབ་པ་ཡོད་པ་སངས་རྒྱས་ཀྱི་གསུང་ནང་ལ་ངས་རྙེད་མ་སོང་། བོད་ཀྱི་བླ་མ་རྣམས་ཀྱི་གསུང་ནང་ལ་འདུག འོན་ཀྱང་། ལོ་ཤས་ནང་ལ་རྒྱ་རིགས་ཀྱི་སྦྱིན་བདག་མང་པོ་ཐོབ་ནས། ཉ་སྲིན་འབོར་ཆེན་ཚེ་ཐར་གཏོང་ཁུལ་གྱིས་བོད་ཀྱི་གཙང་པོའི་ནང་ལ་འབོར་བ་དེར་མཇུག་འབྲས་ངན་པ་འགའ་ཤས་ཡོད་པ་གསལ་པོ་རེད།
གཙང་པོ་སོ་སོར་དེའི་ཁོར་ཡུག་མི་འདྲ་བ་དང་འཚོ་ཁྱིམ་གནས་སྟངས་མི་འདྲ་བར་བརྟེན་། དེའི་ནང་ལ་འཚོ་སྡོད་བྱེད་མཁན་གྱི་ཉ་རྣམས་ཀྱང་སྲོག་ཆགས་མི་འདྲ་བ་ཡིན། གལ་ཏེ་ཁོར་ཡུག་དེ་ནས་མ་ཡིན་པའི་སྲོག་ཆགས་མང་པོ་དེར་འབོར་ན། སྲོག་ཆགས་ཀྱི་འཚོ་སྡོད་ཁོར་ཡུག་འཁྲུགས་ནས། སེམས་ཅན་མང་པོ་ཤི་འགྲོ་བ་དངོས་ཡོད་གནས་ཚུལ་རེད།
བོད་ནང་ལ་ས་ག་ཟླ་བར་ཉ་སྲིན་མང་པོ་ཉོ་མཁན་ཡོད་པར་གཞིགས་ནས། ཉ་སྲིན་ཚོང་པ་རྣམས་ཀྱིས་རྒྱ་ནག་གི་ཞིང་ཆེན་མང་པོ་ནས་བོད་ལ་ཉ་སྲིན་མང་པོ་དབོར། བོད་པ་སྲོག་བླུ་གཏོང་མཁན་རྣམས་ལ་བཙོང་། བོད་པ་དེ་དག་གིས་རྒྱ་ནག་ནས་རྫས་དང་སྨན་གྱིས་གསོས་པའི་ཉ་སྲིན་དེ་དག་བོད་ཀྱི་དྭངས་ཤིང་གཙང་བའི་གཙང་པོའི་ནང་འབོར། ཉ་སྲིན་དེ་དག་མང་ཆེ་བ་ཆུ་མ་འཕྲོད་པར་ཤི། གཙང་པོ་ཉ་རོས་ཁེངས། བོད་ཀྱི་དྭངས་ཤིང་གཙང་བའི་གཙང་པོ་དེ་དག་ཤིན་དུ་དྲི་ངན་ཞིང་། སྐྱུག་བྲོ་བའི་གཙང་པོ་ཞིག་ལ་གྱུར་བ་དེ་ངན་འབྲས་དང་པོ་དེ་རེད། དེ་བཞིན་མ་ཤི་བར་ལྷག་མར་ལུས་པའི་རྒྱ་ནག་གི་ཉ་ལྷག་མ་རྣམས་ཀྱིས་བོད་ཀྱི་གཙང་པོའི་ནང་གི་རང་འབྱུང་གི་ཟས་ལ་བརྟེན་ནས་འཚོ་སྡོད་བྱེད་པའི་ཉ་ཆུང་རྣམས་བསད་ནས་བཟས། བོད་ཀྱི་གཙང་པོའི་ནང་ལ་ཡོད་པའི་བོད་པའི་ཉ་ཚང་མ་རྩ་མེད་གཏོང་བ་དེ་ནག་ཉེས་གཉིས་པ་དེ་རེད།
ད་དུང་ཉ་རོ་དང་དེ་དག་ལས་འཐོན་པའི་ནད་ཚབ་ཆེན་རྣམས་སྲིན་འབུ་བརྒྱུད་ནས་བོད་ཀྱི་གཙང་པོའི་ནང་ལ་འཕེལ། གཙང་པོ་དེའི་ཆུ་འཐུང་མཁན་གྱི་མི་དང་སྲོག་ཆགས་ཀྱི་ལུས་ལ་སྔར་བྱུང་མ་མྱོང་བའི་ནད་ཚབ་ཆེན་འཕོག་པ་དེ་ནག་ཉེས་གསུམ་པ་དེ་རེད། མཚོ་སྔོན་གྱི་ཟི་ལིང་སྨན་ཁང་ནང་ལ་ཟླ་བ་གཅིག་ལ་བོད་པའི་འབྲོག་པ་ལྔ་ཙམ་ཕོ་བའི་སྐྲན་ནད་ལ་བརྟེན་ནས་གྲོངས་པ་དེ་ཕོ་བར་སྲིན་འབུ་ལོ་མང་གསོག་པར་བརྟེན་སྐྲན་ནད་འཕེལ་བ་རྒྱ་ནག་གི་སྨན་པས་ཤོད་ཀྱི་འདུག སྲིན་འབུ་དེ་དག་བོད་ཀྱི་ཆུའི་ནང་ནས་ཡོང་གི་ཡོད་པ་ད་ཆ་རིམ་བཞིན་གསལ་པོ་ཆགས་ཡོང་གི་འདུག་ཟེར། ད་བསམ་བློ་ཐོངས།
མདོར་ན་བོད་ཀྱི་གཙང་པོ་བཙོག་པ་བཟོ་བ་དང་བོད་པའི་མི་དང་སྲོགས་ཆགས་ལ་དམྱལ་བ་མི་ཡུལ་ལ་འདྲེན་པ་དེ་བོད་ནང་གི་ཉ་སྲིན་སྲོག་བླུའི་ནག་ཉེས་ཆེ་ཤོས་དེ་རེད་འདུག
འོ་ན། ང་ཚོས་ས་ག་ཟླ་བར་ཇི་ལྟར་དགེ་བ་གསོག་དགོསསྙམས་ན། ངའི་བསམ་ཚུལ་ལ། སྔོན་ལ་རང་ཉིད་ཀྱིས་ཤ་སྤོངས་ན་སྲོག་གཅོད་མཁན་ཉུང་དུ་འགྲོ་རྒྱུ་རེད་སྙམས།
རེད་ཡ། ཡག་པོ་བྲིས་འདུག མི་མང་ལ་ཡོན་ཏན་མེད་པ་རེད། བླ་མ་ཚོས་བཀའ་སློབ་ཡག་པོ་གནང་དགོས་པ་རེད། དེ་མིན་མི་མང་ཚོས་རང་ཉིད་ནང་པ་ཡིན་སྙམ་ཡང་དོན་ལ་ནང་པའི་ཆོས་ཅུང་ཟད་ཀྱང་ཤེས་ཀྱི་ཡོད་པ་མ་རེད། ང་ཉིས་སྟོང་གཅིག་ལོའི་དགུན་ཁར་རྡོ་རྗེ་གདན་དུ་བསྐྱོད་པ་ཡིན། བོད་པ་གནས་མཇལ་བ་ཚོས་སྣུམ་གྱིས་མཆོད་མེ་སྤར་ནས་སྐོར་ལམ་ཚང་མ་བཙོག་པ་བྱས་འདུག མཆོད་མེ་ཕུལ་བས་དུད་པས་སྐོར་མཁན་ཚོའི་འཕྲོད་བསྟེན་ལའང་ཡག་པོ་མི་འདུག གང་ཅིའི་ཐད་ནས་མཆོད་མེ་སྤར་བ་ཡག་པོ་མ་མཐོང་ཡང་། གནས་མཇལ་པ་ཚོས་མར་མེ་སྤྱན་ལ་ཕུལ་བ་ཡིན་པས་གློག་མཆོད་ཡག་ཤོས་ཡིན་པ་ཤེས་ཐུབ་ཀྱི་མེད། དེང་དུས་མུ་མཐུད་ནས་སྣུམ་མཆོད་ཕུལ་གྱི་ཡོད་མེད་ཤེས་མ་སོང་། །
བོད་ཀྱི་བླ་གྲྭ་རྣམ་པའི་ཆོས་ཀྱི་བཀའ་སློབ་༼སྲོག་བླུ༽ཟེར་བའི་མིང་ཚིག་འདིའི་དེང་ཆར་གངས་རིའི་ལྗོངས་འདིར་རྒྱ་དང་ཧྭེ་ཧྭེ་ཚོ་མ་རྩ་མེད་པའི་ཚོང་ལམ་གསར་བ་ཞིག་བོད་ཁུལ་དུ་བསྐྲུན་བཞིན་པ་འདི་་ངེས་པར་དུ་མཚམས་འཇོག་པར་བོད་་ཀྱི་གཞོན་སྐྱེས་ཤེས་ཡོན་ཅན་དག་གཙོའི་བོད་མི་ཡོངས་ཀྱི་ཁུར་དུ་བབས་པའི་ལས་ཀ་སང་ཉིན་ལས་དེ་རིང་བྱེད་དགོས་པའི་ཧ་ཅང་ཛ་དྲག་གི་གནོད་དོན་ཚབ་ཆེན་ཞིག་རེད། དེ་མིན་བོད་ཀྱི་རྒྱ་བླ་ཚོ་དང་ངན་འབྲེལ་ཡོད་པའི་མི་རིགས་གཞན་དག་གིས་ང་ཚོའི་ཡོད་ཚད་བརླགས་པའི་ཉེན་ཁ་ཧ་ཅང་ཆེན་པོ་རེད།