རྔ་བ་ཆོས་བྷེ།
(ཉིན་གཅིག་ཅེས་སྨྲས་ན་ཉིན་ཐོག་ཐག་གཅིག་གམ་ཉི་མ་ཧྲིལ་བོ་ཞིག་ལ་གོ་དགོས་པར་མ་ཟད། ཉིན་ཐོ་ཡིན་ནའང་ཉིན་གཅིག་གི་བྱ་གཞག་རྣམས་བྲི་དགོས་པ་ཞིག་ཡིན་པ་ཤས་ཆེ་མོད། ཕྲན་གྱིས་དེ་རིང་འདིར་ཉིན་མ་ཕྱེད་ཀྱི་མཐོང་སྣང་དག་ལས་བྲིས་མེད་པས་ཉིན་གཅིག་ཅེས་བྲིས་པ་ནི་འབྲེལ་མི་ཆགས་ཤིག་ཏུ་སེམས། དེ་བས་བོད་ཀྱི་ཡི་གེ་ལ་དགའ་བ་རྣམས་ལ་ཐོག་མར་དགོངས་སེལ་ཞིག་ཞུ་འདོད་བྱུང་། )
དེ་རིང་ནི་གྲྭ་ཚང་ཚུགས་ཏེ་མི་ལོ་ཧྲིལ་བོ་ཉེར་ལྔ་ལོན་པའི་དུས་ཚུགས་ཁྱད་ལས་ཀྱང་ཁྱད་པར་བ་ཞིག་ཡིན་སྟབས་ཉིན་འདི་ལ་གུང་སེང་བྱས། སློབ་སྦྱོང་བའམ་ཉིན་བཞིན་ཅི་ཞིག་ལ་འབད་འབུངས་བྱེད་མཁན་ཞིག་ལ་མཚོན་ན། དུས་ཡིན་དུས་མིན་གྱི་གུང་སེང་རེ་ཐོབ་པའི་ནི་སྤྲོ་བའི་ཉིན་མོ་ཞིག་ཡིན། ཞོགས་པའི་ཉི་རྩེ་མཐོན་མཐིང་གི་མཁའ་དབྱིབས་སུ་ག་ལེར་འཕགས་ཏེ་འོད་ཆེམ་ཆེམ་གྱིས་འཕྲོས། མཐའ་ཀླས་པའི་འཇིག་རྟེན་ནི་ཉི་ཟེར་གྱི་སྤྲས་པའི་གསེར་མདོག་ཅན་ཏེ་ཚ་ཟེར་གྱི་ངད་པ་ཡང་བར་མེད་དུ་ལྡིང་། བདག་གིས་ནི་དེ་རིང་གི་གུང་སེང་དང་བསྟུན་ཏེ་ལས་དོན་འགའ་ཞིག་སྒྲུབ་རྒྱུ་ཞོགས་པ་ནས་འཆར་གཞི་བསྒྲིགས་པ་ཡིན། ལས་དོན་གྱི་བཀད་དང་པོ་ནི་ནད་འདྲི་ལ་འགྲོ་བའི་གྲབས་བཤམས་ཤིང་། ཆུ་ཚོད་བརྒྱད་དང་ཕྱེད་ཀ་ཙམ་ལ་ལམ་དུ་ཆས། འགྲོ་ཞོར་ཚོང་ཁང་ནས་ཁ་བཏགས་ཤིག་ཉོ་རྩིས་བྱས་པ་ན་གཞན་དག་གིས་ང་ལ་བལྟས་ཏེ་གད་མོ་ལྷུག་པར་གྲོལ། དྲང་པོར་ཞུས་ན་ང་ནི་མིའི་སྤྱི་ཚོགས་སུ་འཚོ་ཞིང་མིིའི་གྲལ་དུ་ཞུགས་པ་ཡིན་མོད་ཀྱང་། མིའི་སྤྱི་མཐུན་གྱི་འགྲོ་ཕྱོགས་འགའ་ལ་རྒྱུས་དེ་ཙམ་མེད་པས་སྐབས་ལན་རེར་དེ་རིང་ལྟར་གྱི་དགོད་ཁ་སློང་བར་བྱེད་དགོས། འདི་ནི་མིའི་ཆོས་ཉིད་ཅིག་ཡིན་པས་ནོངས་དགོས་པ་ཅི་ཡང་མི་འདུག ཁ་བཏགས་ནི་མཐའ་གཅིག་ཏུ་རྟེན་འབྲེལ་མཚོན་བྱེད་ཅིག་དང་དེ་བེད་སྤྱོད་ཀྱང་མཇལ་དར་སྙན་ཤལ་ཁོ་ན་ལ་བཀོལ་དགོས་པ་ཞིག་ཡིན་པའི་ངེས་པ་ཅི་ཡང་མི་འདུག་སྙམ། དེ་བས་ངས་ཁ་བཏགས་ནི་གུས་ལུགས་ཀྱི་མཚོན་བྱེད་ཅིག་ཏུ་རློམ་མོད་ངའི་འདོད་པ་ལྟར་གྱི་དྲན་ཚུལ་ལ་ཁ་ཅིག་དགོད་བྲོ་བོ་བྱུང་སོང་། དེ་ནི་ངས་འགྲོ་སྟངས་ཡིན་ལུགས་ཇི་བཞིམ་མ་ཤེས་པས་ལན་འདུག་སྙམ་ཏེ་སྨན་ཁང་དུ་འགྲོ་བའི་ལམ་སྙེག་པ་ཡིན། དེར་མ་ཟད་ཤིང་ཏོག་འགའ་ཞིག་ཀྱང་ཉོས་ཏེ་ཚ་བ་རབ་ཏུ་སྐྱེན་ཡང་རྐང་ཐང་དུ་སོས་དལ་གྱིས་སོང་། རྐང་ཐང་དུ་འགྲོ་བ་ནི་འཕྲོད་བསྟེན་གྱི་མཆོག་ཏུ་སྨྲ་བཞིན་འདུག་པས་ལོ་འདི་དག་ལ་ཀུན་གྱིས་སྔོན་གྱི་སྒྱིད་ལུག་དོར་ཏེ། ད་ནི་གང་ཐུབ་ཅི་ནུས་ཀྱིས་རྐང་ཐང་དུ་འགྲོ་བར་འབད་བརྩོན་བྱེད་པའི་རླབས་རྒྱུན་ཞིག་འཕྱུར་བཞིན་འདུག ངས་ཀྱང་རང་གི་ལུས་པོའི་བདེ་ཐང་གི་ཆེད་དུ་དམིགས་བཙུགས་ཏེ་རྐང་ཐང་དུ་ཕྱིན་པ་ཡིན། ཚ་བ་ནི་འབར་འབུར་ཆེ་བའི་རི་བོ་དང་རི་གཞོངས་བརྒྱུད་དེ་སྣ་བརྒྱའི་མེ་ཏོག་གི་དྲི་ངད་བཞིན་གང་དུ་སོང་ན་དེ་རུ་སླེབས་འདུག ཡིན་ཡང་ཚ་བ་དེ་དང་འགྲོགས་པའི་བསིལ་རླུང་ཡན་པོ་ཞིག་ཚ་བས་བརྣད་པའི་ལུས་ན་ཕོག་ཙ་ན། བདེ་སྣང་གི་རེག་ཚོར་ཡིད་ངོམས་པ་ཞིག་བྱུང་ཞིང་དེས་གདོན་མི་ཟ་བར་ལམ་ཐག་གྲངས་ཀྱིས་འཇལ་བར་དཀའ་སྣང་མེད་པའི་བདེ་ཉམས་ཤིག་སྦྱིན། བརྒྱ་ལམ་དུ་ཐོན་སྐབས་འདུ་འཛི་ལ་བསྒྲེས་པའི་རླངས་འཁོར་རྣམས་ནི་སྨྱོན་པ་ལྟར་ཤུགས་ཀྱིས་རྒྱུག་བཞིན། དེའི་མྱུར་སྟབས་ལ་འགྲན་སྡོ་བ་དང་འདྲ་བའི་འཕྲུལ་རྟ་རྣམས་ཀྱང་ཤུགས་གང་ཡོད་ཀྱིས་མདུན་དུ་རྒྱུག་བཞིན་འདུག འདི་ལྟ་བའི་འདུ་འཛི་རྒྱུན་ལྡན་མིན་པ་རྣམས་ལ་སེམས་གཡེང་གིན་སྨན་ཁག་གམ་དུ་སླེབས་སོང་། སྨན་ཁང་ནི་དོན་ངོ་མ་ནད་ཁང་ཞིག་ཡིན་ཞིང་དེར་འདུས་སོ་ཅོག་ཀྱང་ནད་ཀྱིས་ཉེན་པའི་མི་འབའ་ཞིག་ཡིན། སྨན་ཁང་འདི་ནི་བོད་གཞུང་གི་ཕྱི་ལུགས་སྨན་ཁང་ཆེ་ཤོས་དེ་ཡིན། ནང་གི་སྐད་པ་རྣམས་ཀྱང་བོད་པ་ཤ་སྟག་ཡིན་པས་སྐད་འཕྲོད་མིན་སོགས་ལ་དཀའ་ངལ་ཅི་ཡང་མེད། ཡིན་ཡང་། གསར་དུ་འབྱོར་བའི་ཨ་མདོ་བ་ཞིག་ཡིན་ན་དབུས་གཙང་གི་སྐད་ལ་རྒྱུས་དེ་ཙམ་མེད་པས་བར་དུ་སྐད་སྒྱུར་ཞིག་མཁོ་བ་ཡིན། དེང་འདིར་ཀུན་གྱིས་བོད་ལ་སྤྱི་སྐད་ཅིག་དགོས་ཞེས་ཚར་ཚར་ཟློ་བཞིན་འདུག་ཀྱང་། ཁ་བཤད་ཆུ་ཡི་ཝུ་བ་ཞེས་པའི་དཔེ་ལྟར་སྤྱི་སྐད་ཞིག་ཅིའི་ཕྱིར་དགོས་པ་དང་ཅི་ལྟར་བྱས་ཏེ་སྤྱི་སྐད་ཅིག་འཆགས་ཐུབ་པའི་གཞུང་ལུགས་སུས་ཀྱང་མཛད་མེད། བོད་ཀྱི་བརྡ་སྤྲོད་ལ་བྱང་ཆུད་པ་ཞིག་སྦྱང་ན་སྤྱི་སྐད་ཅིག་ཡོད་དགོས་པའི་འུད་པོ་ཆེ་དེ་འདྲ་བསྒྲགས་མ་བསྒྲགས་མེད་ཀྱང་སྲིད་དེ། མཁས་པ་རྒྱལ་གྲོལ་ལམ་ཤེས་རབ་བསྟན་དར་ཞེས་པས་ཁོང་གི་ཉིན་ཐོ་རུ་དབུས་ཀྱི་སློབ་ཆེན་དགེ་རྒན་མ་ཞིག་དང་ལྷན་དུ་རིག་གཞུང་བགྲོ་གླེང་བྱས་ཀྱང་། སྐད་འཕྲོད་མིན་གྱི་ངལ་བ་ཏིལ་ཙམ་ཡང་མ་འཕྲད་པས་བདེན་མིན་ཚོད་ལྟ་གྱིས་ཞེས་ཤ་ཚ་ཚས་བྲིས་འདུག འདི་རུ་ན་འཆིའི་རྦ་རླབས་སྐྱོམ་པའི་གནས་འཇིགས་ཡེར་བ་ཞིག་ཡིན་ལ། དལ་འབྱོར་གྱི་མི་ལུས་རིན་པོ་ཆེ་ཡིན་ནོ་སྐད་ཀྱི་གདོས་གཟིགས་དག་གི་ཐ་མའི་ལོག་མལ་ཡང་འདི་ཡིན། མི་ཞེས་པ་འདི་ལ་རང་རྟོན་གྱི་འདུ་ཤེས་ཨ་འཐས་ཤིག་ཡོད་པས་ལམ་གང་ཞིག་ཏུ་འཇུག་གི་གང་ཞིག་ཏུ་མི་འཇུག་པའི་གདམ་ག་མང་དུ་བྱེད་མོད། གདམ་ག་མ་མེད་པའི་གདམ་ག་ཞིག་ནི་ང་ཚོ་ངེས་པར་དུ་འདི་རུ་ཐེངས་ཤིག་བཅར་དགོས། ང་རང་སྨན་ཁང་ནང་དུ་འཛུལ་བ་ནས་ཕྱོགས་གང་ཞིག་གི་ནད་ཁང་དུ་ནད་པ་གང་དེ་ཡོད་མེད་ཀྱང་གསལ་བོ་མི་ཤེས། ནད་ཁང་གཅིག་ཏུ་གྱ་ཚོམ་གྱིས་བལྟས་ཙ་ན་འགྲོ་ས་འཆུགས་མི་འདུག་པས་དེ་མུར་ནང་དུ་སོང་། སྔོན་དུ་བགྲོས་པ་ཇི་བཞིན་ང་མིའི་སྤྱི་ཚོགས་སུ་གནས་བཅས་མོད་མིའི་འགྲོ་ལུགས་ཚུལ་བཞིན་མི་ཤེས་པས་ནད་པར་ནད་འདྲི་བྱེད་རྒྱུ་ཡིད་ལའང་མ་དྲན། གཅིག་བྱས་ན་དེ་ནི་རང་གི་རང་གཤིས་དང་འབྲེལ་བ་ཏིལ་ཙམ་ཡང་མེད་ཅེས་བཤད་མི་སྤོབས་པར། ང་རང་མ་གཞི་ནས་ཁ་ཡག་གིས་གཞན་དག་ལ་གོ་སྐོན་བློ་འགུག་བྱེད་རྒྱུར་དེ་ཙམ་དགའ་བོ་མེད། ནང་གི་རྐུབ་སྟེགས་དེའི་ཐོག་ཏུ་བསྡད་དེ་ནད་པ་དང་ནད་གཡོག་གཉིས་ལ་ཅི་འབྲེལ་མི་འབྲེལ་གྱི་སྐད་ཆ་འགའ་བཤད། ཏག་ཏག་བཤད་ན་ངས་སེམས་ནས་ཁོང་ཅག་ལ་ཅི་ཞིག་བཤད་དགོས་པའང་ཤེས་ཀྱི་མི་འདུག ནད་གཡོག་གྲྭ་བ་དེས་ངའི་ལག་ཏུ་གཏེར་ཆུ་ཞིག་གཏད་པས་དེ་མུར་རྔམས་འཐུང་འགའ་ཞིག་བྱས། ནད་ཁང་ཆེ་རྒྱུ་མེད་ལ་ཆུང་རྒྱུ་ཡང་མི་འདུག་ནད་པ་དག་འདི་ནས་རིང་མིན་དུ་བྲལ་རྒྱུ་ཡིན་གཤིས་ཁང་མིག་འདི་ཙམ་གྱིས་མ་འཐུས་པ་ཅི་ཡང་མེད་པ་འདྲ། མཇུག་ཏུ་ནད་པར་དབུལ་རྒྱུའི་ཤིང་ཏོག་དང་སྒོར་ལྔ་བརྒྱ་བཅས་ཕུལ་ཏེ་སྨན་ཁང་དང་གྱེས་པ་ཡིན། ངྷ་ཤོད་ནས་འཕྲོད་བསྟེན་ལ་དམིགས་ཏེ་ཞིམ་ཤིང་ཁུ་བ་ངོ་མ་ཡིན་པའི་ཤེལ་ཕོར་གང་འཐུང་རྗེས་སྤྱི་སྤྱོད་རླངས་འཁོེར་གྱི་ས་ཚུགས་སུ་སོང་། ཡུད་ཙམ་བསྒུགས་རྗེས་རླངས་འཁོར་ལྗང་མདོག་ཅན་ཞིག་སླེབས་པས་འགྲོ་སའི་མིང་བཤད་པ་ན་ས་དེར་འགྲོ་བའི་བརྡ་རུ་མགོ་གཡུག་ཙམ་བྱས། མགོ་གཡུགས་ཏེ་བརྡ་སྤྲོད་སྟངས་འདི་རྒྱ་གར་གྱི་སྤྱི་སྲོལ་ཞིག་ཡིན་པས་མཚམས་ལན་རེར་བོད་མི་ཚོས་ཀྱང་སྲོལ་དེ་ག་ལག་ལེན་དུ་བསྟར་སྐབས་དགོད་བྲོ་བ་ཞིག་ཡོང་རྒྱུ་འདུག སྤྱི་འཁོར་ནང་དུ་བུད་པ་ནས་སྣ་ལམ་དུ་མི་ཞིམ་པའི་དྲི་སྣ་ཚོགས་ཤིག་ཁྱབ་རྒྱུ་ཡོད་པ་དེའང་ཡུལ་འདིའི་ལྷན་སྐྱེས་ཤིག་ཡིན་ལ། སྤྱི་འཁོར་ནང་དུ་རྩིང་ཆུ་དང་ལྗན་ལྗིན་སོགས་ལྟོར་ཁུང་ནས་བབས་པའི་དྲི་ངན་དེ་ལྟ་བུ་ཅི་ཡང་མེད། སྣར་གཟན་པའི་དྲི་མ་ནི་སྙིང་པོ་ལྷ་ཆོས་ཡིན་བྱེད་དོ་སྐད་ཀྱི་སྦྱར་སྤུས་སྒྲོན་པ་དེ་དང་ལོ་བཅུ་ཕྲག་ལྷག་བརྒལ་མེད་དམ་སྙམ་པའི་ཚིལ་གྱི་དྲེག་པ། གཞན་ཡང་རྒྱ་གར་མི་སྤྱིའི་ལུས་ཐོག་གི་ཀུན་བརྟགས་ཀྱི་དྲི་མ་སོགས་མི་ཞིམ་པའམ་སྣ་བར་མ་གོམས་པའི་དྲི་མ་འདི་རིངས་ཀྱིས་ནད་མེད་ཅིག་ནད་ཅན་དུ་སྒྱུར་བར་བྱེད་པའི་རྐྱེན་ཡར་ལྡན་དུ་ཚང་ཡོད། སྤྱི་འཁོར་འདིའི་ནང་ན་རྒས་འཁོགས་ཡོད་ཅིང་ན་གཞོན་ཡོད་བྱིས་པའང་འདུག ངའི་སྔུན་གྱི་འདུག་སྟེགས་གསུམ་ཅན་གྱི་རྐུབ་སྟེགས་དེའི་ཐོག་ཏུ་རྒས་པ་ལོ་ན་ལྔ་བཅུ་ལྷག་མིན་ནམ་སྙམ་པ་ཞིག་བསྡད་ཅིང་། ལག་གི་ཁུག་མ་དང་ལུས་ཀྱི་གྱོན་གོས་གདོང་གི་རང་བཞིན་གང་ལ་བལྟས་ཀྱང་། ཁོ་བ་གང་ཞིག་ཏུ་ལས་ཀ་བྱེད་དུ་འགྲོ་མཁན་ཞིག་ཡིན་པ་རྟོགས་སླ། བསྡད་དེ་ཅུང་ཙམ་ཞིག་ཕྱིན་རྗེས་ཁོས་ལག་ཁུག་ལས་སོ་མང་ཞིག་བླངས་ཏེ་རང་གི་སྐྲ་ལ་ཤད་རྒྱག་བཞིན་སྐྲའི་དབྱིབས་ལེགས་པར་བཅོས། སྣང་ཚུལ་འདི་ནི་རྒྱུན་པར་མཐོང་མང་ཞིང་ལྷག་ཏུ་གྲོང་གསེབ་ནང་དུ་མཐོང་རྒྱུ་ཡོད། དེ་བས། སོ་མང་ངམ་སྐྲ་ཤད་རང་ལུས་ཀྱི་གྲིབ་མ་བཞིན་དུ་ཡོད་པ་ནི་གྲོང་གསེབ་ཀྱི་སྲོལ་རྒྱུན་ནམ་ཕྱག་ལེན་གཅིག་མིན་པའི་ངེས་པ་ཡེ་མི་འདུག རྒྱ་གར་བས་རང་གི་སྐྲ་ནི་ལུས་ཀྱི་ཆ་ཀུན་ལས་ཀྱང་དོ་སྣང་བྱེད་དགོས་པ་ཞིག་ཏུ་སེམས་བཞིན་ཡོད་པ་ནི། བོད་པ་ཚོས་ཕྱིའི་མགུལ་རྒྱན་སྣ་ཚོགས་ལ་དད་དོད་བྱེད་པ་དང་གཅིག་མཚུངས་སུ་སྣང་། རླངས་འཁོར་མང་དྲགས་པ་དང་ལམ་ཞེང་ཆུང་དྲགས་པའི་ས་ཆ་འདི་ནས་རླངས་འཁོར་རྣམས་མཐའ་གཅིག་ཏུ་བརྒྱ་ལམ་ཁོ་ན་རྒྱུད་མི་འོས་པར་བསྐོར་ནས་འགྲོ་དགོས་ཀྱི་འདུག རྒྱ་གར་ནི་ཆོས་ལུགས་སྣ་ཚོགས་ཤིག་གི་སྐྱེད་མ་ལྟ་བུ་ཡིན་པར་མ་ཟད། ཆོས་ལུགས་ཁས་མི་འཆེ་མཁན་ཞིག་ཧ་ལམ་མེད་ཅིང་ཆོས་པ་རྣམས་ནི་ཕལ་ཆེར་རྨོངས་དད་འབའ་ཞིག་ཡིན་ཞེས་སྨྲ་ཆོག རྒྱ་གར་གྱི་ཁྱད་ཆོས་རྨ་མེད་པ་ཞིག་ནི་ཡུལ་གཅིག་ལ་ལྷ་ཁང་གྲངས་ཀྱིས་མི་ལངས་པ་ཡོད་ཅིང་། རིག་བྱེད་ཆོས་ལུགས་ལ་དད་མཁན་ཞིག་ཡིན་ན་ལྷ་ཁང་དེ་དག་ཐག་ཉེ་རིང་གང་ནས་མཐོང་ཡང་ལག་པས་ཕྱག་རྒྱ་སྣ་ཚོགས་ཀྱིས་བཀུར་བསྟི་བྱེད་པ་ནི་ཆོས་ལུགས་པ་ཞིག་ལ་ཚང་དགོས་པའི་ཆ་རྐྱེན་ཞིག་ཏུ་བསམ་མེད་དམ་སྙམ། དེ་བས་ཆོས་དད་ཅེས་པ་ནི་མིའི་བསམ་བློའི་རིན་ཐང་ཞིག་ཏུ་གྱུར་ཡོད་པ་མངོན། རྨོངས་དད་ཅེས་ཀུན་གྱིས་དམོད་བོར་དགོས་པའི་ལུགས་སྲོལ་ཞིག་ཡིན་ཡང་། རྨོངས་དད་བྱེད་པ་ལའང་རྒྱུ་མཚན་ངེས་ཅན་རེ་ཡོད་པས་དེ་ཡིན་ན་གནས་མ་ཡིན་པ་ཞིག་ཏུ་བརྩི་མི་འོས་པ་ཡིན། རྨོངས་དད་ཀྱིས་ཀྱང་ཕ་རོལ་གྱི་སེམས་ལ་སྤོབས་པ་དང་རེ་བ་གསར་བ་ཞིག་སྦྱིན་གྱི་ཡོད་གཤིས། གང་ཡང་རྨོངས་བྱ་དང་རྨོངས་བྱེད་དུ་བཙན་གྱིས་འགྲེལ་རྒྱག་པ་ནི་ཚིག་གི་ལྷག་རོ་ཞིག་མིན་པའི་ངེས་པ་ཅི་ཡང་མི་འདུག་ཨང་། སྤྱི་འཁོར་ནི་སྤྱི་འཁོར་རང་ཡིན་པས་གནས་ལ་ངེས་པར་མ་མཆིས་པར་གང་ནས་མི་རག་ན་དེ་རུ་འདུག་ལ་སྡོད་མཁན་བྱིངས་རྒྱ་གར་བ་ཡིན། ཁོ་ཅག་ལ་དམིགས་པའམ་ཁ་ལོ་བའི་དགའ་ཕྱོགས་གང་ཡིན་ཆ་མ་འཚལ་ཡང་འགྲོ་འགོ་བཙུགས་པ་ནས་མར་ལ་ཐོན་ཐོན་གྱི་བར་དུ་གླུ་གཞས་དག་མཚམས་མི་ཆད་པར་བཏང་བྱུང་། ང་ལ་མཚོན་ན་ནི་སྙིང་པོ་ཏིལ་འབྲུ་ཙམ་ཡང་མི་འདུག་པས་རྣ་བ་མི་གཡོར་བར་ཉིན་ཐོ་འབྲི་ཆེད་རང་གི་མཐོས་ཐོས་རྣམས་ཟིན་ཐོར་བཀོད། རྒྱུད་སྟོད་ཀྱི་སྒོ་དྲུང་དུ་སླེབས་སྐབས་དེ་རིང་དཔེ་མཛོད་ཁང་གི་སྒོ་ཕྱེས་མེད་ཚེ་རང་གི་དམིགས་ཡུལ་མ་གྲུབ་པ་ཡིན་པས་ཡིད་ཆད་དང་བཅས་ཡོང་དགོས་ཐུག་ཚེ་སྐྱོ་ཨང་སྙམ། རྒྱུད་སྟོད་ནི་ཡུལ་འདིར་ཡོད་པའི་དགོན་པ་ཀུན་ལས་རྒྱ་ཆེ་ཤོས་དང་གྲགས་ཆེ་ཤོས་འབྱོར་བ་རྒྱས་ཤོས་སོགས་ཕྱི་ནང་གི་བཀོད་པ་ཅུང་ཕུན་སུམ་ཚོགས་པ་ལྡན་པའི་དགོན་པ་ཞིག་རེད། ལམ་འགྲམ་གཡས་གཡོན་དུའང་སྐྱེད་ཚལ་ཡིད་དུ་འོང་པ་དུ་མ་བཙུགས་ཤིང་། ལྗོན་པ་དང་གཡུར་དུ་ཟ་བའི་མེ་ཏོག་སོགས་འདྲེན་བྱེད་ཀྱི་རྒྱུ་བ་ངང་གིས་ཚུར་ཕྱོགས་སུ་འདྲེན་ནུས་པའི་མེ་ཏོག་གི་ཕང་ཕུང་རབ་ཏུ་རྒྱས་འདུག དཔེ་མཛོད་འདི་རུ་ལན་གཅིག་ཡོང་མྱོང་པ་ལྟར་རྒྱུས་ཞད་ཙམ་འདུག་པས་ལྷམ་ཕུད་དེ་ནང་དུ་འཛུལ། དཔེ་མཛོད་ཁང་འདི་ཧ་ཅང་རྒྱ་ཆེ་བར་མ་ཟད་ནང་གི་བཟོ་བཀོད་ལེགས་ཤིང་ལས་བྱེད་སྡོད་ས་སོགས་གང་ལ་བལྟས་ཀྱང་དང་བ་འདྲེན་པ་ཞིག་རེད། འདི་ལས་དགོན་པ་འདིའི་གྲ་དག་གི་རྣམ་པ་མཐོང་ཡོང་པར་མ་ཟད་སྤྱི་སེམས་སྒེར་འཇོག་གིས་དཔེ་ཆ་གཏོས་ཆེ་བ་འདི་རུ་བསྒྲིགས་ཏེ། བོད་ཀྱི་རིག་གནས་ཀྱི་རིན་ཐང་དང་ཤེས་རིག་གི་སྐྱེད་འབྲས་སོགས་མདོར་ན་བོད་ཀྱི་དགེ་མཚན་གཞན་གྱིས་རྟོགས་ཆེད་དང་བོད་རིགས་དཔེ་ཀློག་ལ་སྤྲོ་བ་ཚོའི་རེ་འདོད་སྐོང་ཕྱིར་དུ་བཙུགས་པ་ཞིག་རེད་སྙམ། དཔེ་མཛོད་ཁང་ཅི་བས་རྒྱ་ཆེ་ཡང་ནང་དུ་དཔེ་ཀློག་བྱེད་མཁན་རེ་ཟུང་མ་གཏོགས་མི་འདུག འདི་ནི་དཔེ་མཛོད་ཁང་དང་ནང་གི་དཔེ་ཆའི་སྐྱོན་ལར་ནས་མིན་པར་དཔེ་ཀློག་བྱེད་པ་པོ་མི་སྒེར་གྱི་ཞན་ཆ་ཞིག་ཏུ་བརྩི་དགོས། འདིའི་ནང་གི་དཔེ་ཆ་བརྒྱ་ཆའི་གོ་དགུ་བོད་ཡིག་ཁ་གཙང་འབའ་ཞིག་ཡིན་མོད། བཙན་བྱོལ་དུ་བོད་ནས་གསར་དུ་འབྱོར་བ་ཞིག་མིན་ན་གཞིས་ཆགས་པའི་ནང་དུ་དཔེ་ཀློག་གི་ཆེད་དུ་འདིར་ཡོང་མཁན་ཞིག་མེད་པ་ལྟ་བུ་རེད། ངོ་མཚར་མཚར་དུ་གཟིགས་མོ་ལ་ཕེབས་མཁན་འགའ་རེ་ཡོད་དུ་སྲིད་དེ་ང་ཡོང་ཁར་གཞིས་ཆགས་པ་ཞིག་གིས་སྐྲ་སེར་ཅན་གསུམ་བཞི་ཞིག་ཁྲིད་དེ་འདིར་ལྟ་སྐོར་ཙམ་དུ་ཡོང་པས་མཚོན་ནོ། རང་ཉིད་ཀྱིས་མཛོད་ཁང་འདི་རུ་གོ་རིམ་གོང་བསྒྲིགས་ཀྱི་དཔེ་ཆ་སྤྱི་ཡོངས་ལ་རགས་ལྟ་ཞིག་བྱས་རྗེས་གཞི་ནས་ཀློག་རིན་ཡོད་པའི་དཔེ་ཆ་རེ་གཉིས་བདམས་ཏེ་ལས་བྱེད་ལ་གཡོར་རོགས་ཀྱི་རེ་སྐུལ་ཞུ་སྐབས། གསུང་འབུམ་རིགས་དང་དེབ་ཕྲེང་ཡོད་པ་རྣམས་གཡར་བོ་བྱེད་ཀྱི་མེད་ཅེས་སྨྲས། སྐད་ཆ་དེས་རྟབ་རྟབོ་པོར་བསྒྱུར་ཅིང་ཅི་བྱའི་གཏོལ་དང་བྲལ་ཏེ་རང་དགར་དེབ་གཉིས་གཡར་རྗེས་རང་གནས་སུ་ལོག་པའི་སྟ་གོན་བགྱིས་སོ།།