རེབ་ཐོག་མདའ
རི་བོ་དེ་དང་ཉེ་ས་ཞིག་ནས་ཇ་གང་འཐུང་བཞིན་ངལ་ཞིག་གསོས།།
རྒྱུག་ཆུ་དྭངས་མོའི་གཞུང་ལ་ཞུགས་ནས་ཚ་སྡུག་གདུང་བ་ལན་ཅིག་བཀྲུས།།
ཧིན་དཱི་ལྷ་ཁང་མདུན་ནས་ལྟོས་ན་རྡ་སའི་གྲོང་བརྡལ་ཆུང་ཆུང་འདི།།
རི་མོ་མཁན་གྱི་པུར་རྩེ་ལྷུང་འདྲའི་ཡིད་འོང་ལྷ་ཡི་ཞིང་ཁམས་འདྲ།།
ལྗང་མདོག་གྱོན་པའི་སྤང་དང་རི་བོ་བདག་གི་གམ་ན་ལྷང་ངེར་འགྱིང་།།
ཅ་ཅོ་སྒྲོག་པའི་བྱ་ཡི་ཚོགས་རྣམས་ཕར་ཁའི་ནགས་ཀློང་དབུས་ན་རྩེན།།
རི་ནས་བབས་པའི་གཙང་བོའི་འགྲམ་ན་ལོ་ཆུང་འགའ་ཞིག་རྩེད་འཇོར་གཡེང་།།
ང་ནི་ཉག་ཀའི་མཐའ་ལ་འགྱིང་བཞིན་སེམས་པའི་སྐྱོ་གདུང་གླུ་རུ་བླངས།།
བསིལ་རླུང་ལྡིང་བའི་རྗེས་སོར་དེ་ན་སྤྲིན་པ་ཐ་ཐོར་མིག་ལ་མངོན།།
ན་བུན་འཁུར་བའི་གངས་རིའི་རྩེ་ན་རྒོད་པོའི་གཤོག་ཟུང་ལྷོད་ཀྱིས་བརྐྱངས།།
བགྲེས་སོང་རྒན་པོ་བ་མོའི་རྗེས་ན་རྔུལ་ནག་ཁྲོམ་ཁྲོམ་དལ་གྱིས་བགྲོད།།
སོས་དལ་འཚོ་བའི་ཁོར་ཡུག་འདི་ལ་བདག་ནི་ཅུང་ཙམ་སུན་ཏེ་ཡོད།།
ཀློག་ལ་བྲེལ་བའི་བདག་གི་གྲོགས་དེ་ལྗོན་པའི་འོག་ན་ཁེར་རྐྱང་ངང་།།
སློབ་ལ་བརྩོན་པའི་ངང་ཚུལ་དེ་ལ་བདག་ནི་ཅུང་ཙམ་ཧད་ཡོད་དུས།།
རི་ལ་གནས་པའི་སྡེ་ཆེན་དེ་ནས་དོན་གྱིས་བྲེལ་བའི་སྐད་གདངས་ཤིག །
གློ་བུར་རྒྱང་ནས་རྣ་བར་ལྷུང་བས་བདག་གི་བསམ་བློ་ཧད་དེ་དཀྲོགས།།
ཉིན་ལ་བྲེལ་བའི་ཉི་མའི་ཕྱིར་མིག་ནུབ་ཀྱི་རི་བོའི་རྩེ་ནས་ཡལ།།
མཚམས་སྤྲིན་དམར་པོ་མཁའ་ལ་འཆར་བའི་གངས་རིའི་ཁ་དོག་དམར་ལྷེམ་ལྷེམ།།
ས་སྲོད་ངོགས་ན་གསལ་ལེར་འཆར་བའི་ཤར་རིའི་རྩེ་ཡི་ཟླ་བ་དེས།།
རྒྱང་ལ་གྱེས་པའི་མཛའ་མོ་ཞིག་གི་སྣང་བརྙན་གསོན་པོ་སེམས་ལ་བབས།།
ས་སྲོད་ནམ་ཟླ་རི་ལ་བབས་པའི་ཚ་སྡུག་གདུང་བ་རྒྱང་ལ་འཐེན།།
ཟླ་བའི་འོད་སྣང་ས་ལ་ལྷུང་བས་མཚན་གྱི་སྨག་རུམ་དལ་གྱིས་ཕྱེས།།
བསིལ་རླུང་རེག་བྱ་ལུས་ལ་འཇམ་པས་སེམས་ཀྱི་གདུང་བ་རེ་ཞིག་སེལ།།
དབྱར་ཟླ་དྲུག་པའི་ཁོར་ཡུག་འདི་ལ་དུངས་ཞེན་ཟབ་མོ་བྲིས་ཏེ་ཡོད།།
ཕྱི་ལོ ༢༠༡༤ ཟླ ༦ ཚེས ༡༠ ཉིན་རྡ་སའི་ཉེ་འཁྲིས་སུ།
སྙན་ངག་དེ་རོ་མྱོང་བྱས། དང་པོར་གྲོགས་ལ་སྤྲིངས་པའི་ཚོར་བའི་གཟི་ཉམས་དང་གཉིས་པ་དགའ་མ་དུངས་བའི་སྡུག་ ཡུན་ལྟ་བུ་ཞིག་གིས་སྙན་ངག་པ་ཚོར་བའི་གཟི་ཁ་བཙན་ཙམ་བྱུང་བ་འདྲ།
ཀློག་པ་པོ་བྱང་ཐང་ཕོ་ཉས།