ཉིན་ཐོ་ལས་འཕྲོས་པའི་གཏམ།

མགར་འཇམ་དབྱངས།

ལྷ་ཡུལ་ཞེས་པའི་སྤྲོ་སྣང་དོད་པོ་ཞིག་དང་དམྱལ་བ་ཞེས་པའི་ཡིད་ལ་གཟན་པའི་མིང་ཚིག་འདི་གཉི་འཚོལ་བར། ང་ཚོས་རྒྱང་ཐག་རིང་བོའི་ཁད་ཀྱིས་ཆོད་པའི་གནས་ཤིག་གི་གཏིང་སྔོག་པའི་ལས་ལ་ངལ་བ་བྱ་དགོས་དོན་ཡེ་ནས་མེད། དེ་ནི་ང་ཚོའི་ཉིན་རེའི་འཚོ་བའི་ཁྲོད་ཀྱི་འགྲོ་འདུག་ཉལ་འཆག་གི་སྤྱོད་ལམ་ཐོག་ནས་འོང་བ་ཞིག་མ་ཡིན་ནམ།
ལྟོས་དང་། རང་ཉིད་དང་རང་ཉིད་ཀྱི་ཉེ་འཁོར་ལ་མིག་གིས་བལྟས་ཤིང་སེམས་ཀྱིས་མྱངས་པའི་ཐོག ཕན་ཚུན་ལ་བརྩི་བཀུར་དང་བྱམས་བརྩེས་ཟིན་པའི་ལྷིང་འཇགས་ཀྱི་འཚོ་བ་ཞིག་མྱོང་རོལ་བྱོས་དང་། ང་ཚོ་ལྷ་ཡུལ་དུ་མི་འདུག་ཅེས་སུ་ཞིག་གིས་ཀྱང་བསྙོན་འདིང་བྱ་མི་ནུས་ལ། དོན་དངོས་སུ་ང་ཚོའི་ལུས་དང་སེམས་པའི་ཕྲ་ཕུང་རེ་རེར་ལྷ་ཡུལ་གྱི་བདེ་བའི་དྲོད་ཁོལ་ངང་གིས་ཁྱབ་ཡོད་པ་ཚོར་ཐུབ།
དེ་ལས་ལྡོག་སྟེ་ཆགས་སྡང་རྨོོངས་གསུམ་གྱི་རྒྱུ་ཆ་བྱས་པའི་སྡང་མིག་དང་སོ་སྒྲའི་སྡུག་སྐད་ཀྱི་འོག་ན། རྣལ་དུ་གནས་པའི་སེམས་པའི་དབུགས་ཀྱི་རྒྱུ་བ་ལྷོད་པོ་ཞིག་ཀྱང་གཏོང་བའི་གོ་སྐབས་ཡོངས་བཅོམ་འཕྲོག་བྱེད་པ་མ་ཟད། བདེན་པ་དང་གནས་ལུགས་བརྡར་བའི་ཤེས་རབ་གསོན་པོ་ཞིག་ཀྱང་འོང་ཐབས་ཡེ་ནས་བྲལ་རྐྱེན། ཁོ་བོས་ནམ་རྒྱུན་འདི་ལྟར་འགྲེལ་བརྗོད་བྱེད་ཀྱིན་ཡོད།

གང་ཞིག་ཏུ་ལྷིང་འཇགས་ཀྱི་འཚོ་བ་མེད་ན། དེར་དམྱལ་བ་མི་ཡུལ་དུ་ཡོད་པའི་བདེན་དཔང་ཡིན་ལ། སུ་ཞིག་གིས་ལྷིང་འཇགས་ཀྱི་མལ་ས་གཏོར་ན། དེ་ལ་བདུད་ཀྱི་སྙིང་ཁམས་ཞུགས་པའི་དན་རྟགས་ཡིན་པས། དེ་འདྲའི་གནས་གང་ཞིག་དམྱལ་བར་འབོད་ཆོག་ལ། རྒྱང་ཐག་རིང་བོ་ཞིག་མ་ཡིན་པར། རང་ཉིད་ཀྱིས་བཟོ་བཞིན་པའི་འཇིགས་སུ་རུང་བའི་དམྱལ་བའི་འཇིག་རྟེན་ངོ་མ་དེ་ཡིན་ཆོག ད་དུང་རང་ཉིད་ཀྱང་སྡུག་རྩུབ་ཀྱི་མེ་དཔུང་མཆེད་པའི་ལས་མཁན་གླང་མགོ་ཅན་དུ་འབོད་པ་མ་རེད་ཅེས་སུ་ཡིས་བདེན་དཔང་བྱ་ཐུབ།

དེས་ན་ས་སྒང་རིལ་བོ་འདིའི་དངོས་པོ་ཡོད་དོ་ཅོག་གི་སྐྱེ་འཇིག་གནས་གསུམ་གྱི་ནུས་པ། རང་སྟེང་གི་རྒྱུ་འབྲས་རྟེན་འབྱུང་གི་རྣམ་བཞག་ལ་ལྟོས་པ་ལས། ལྟོས་མེད་ཡན་གར་བའི་བྱེད་པོ་གཞན་ཞིག་འཚོལ་བའི་ངལ་བ་བརྟེན་པ་ནི་དགོད་བྲོ་བའི་བྱ་ལས་ཤིག་མ་ཡིན་ནམ།
་