ཉིན་ཤས་སྔོན་རྒྱ་གར་གྱིས་གྲོས་ཚོགས་འོག་མའི་འཐུས་མིའི་འོས་བསྡུའི་ལས་རིམ་ནང་རྡ་ས་ཁུལ་གྱི་བོད་མི་བཙན་བྱོལ་བ་ཁག་ཅིག་ནས་འོས་འཕེན་གྱི་ཆ་ཤས་བླངས་པའི་སྐོར་ལ་དཔྱད་པའི་གཏམ།

གཞུང་པ་ཚེ་དབང་བསོད་ནམས།

སྤྱི་ལོ་ ༡༩༥༩ ལོར་བོད་ལ་རྐྱེན་ངན་འཕྲད་ནས་བོད་རྒྱལ་ཁབ་དང་བོད་མི་རིགས་ཀྱི་ཆོས་སྲིད་གཉིས་ཀྱིས་དབུ་ཁྲིད་༧ སྤྱི་ནོར་༧ གོང་ས་༧ སྐྱབས་མགོན་ཆེན་པོ་མཆོག་གི་དབུ་ཁྲིད་འོག་ཁོང་གི་བཀའ་ཤག་ལྷན་རྒྱས་དང་ཞི་བའི་ཞིང་འབྲོག་མི་མང་ཁྲི་ཚོ་བརྒྱད་ལྷག་ཙམ་བཅས་ཁོང་གི་ཕེབས་རྗེས་སུ་འབྲང་ནས་རྒྱ་བལ་འབྲུག་གསུམ་ནང་བཙན་བྱོལ་དུ་འབྱོར་ནས་དུས་ད་ལྟ་བར་བོད་མི་བཙན་བྱོལ་བ་རང་ལོ་བཅུ་བཞི་ཡན་མི་རེའི་ལག་ཏུ་གནས་ཡུལ་ལུང་པའི་ཁྲིམས་མཐུན་གྱི་ཡིག་ཆ། ༼ Registration Certificate RC ༽ རྒྱ་གར་ཕྱི་སྲིད་ལས་ཁུངས་ནས་ལོ་ལྟར་དུས་འགྱངས་བཀའ་ཁྲོལ་བརྒྱུད་ང་ཚོའི་ལག་ཏུ་ཡོད་པ་ནས་ང་ཚོ་རྒྱ་གར་གྱི་ཡུལ་མི་དང་ཁ་ཁ་ཡིན་པ་དང་ང་ཚོ་ནི་རང་བཙན་བརྩོད་མཁན་གྱི་བོད་མི་རིགས་ཞིག་ཡིན་པ་འཛམ་གླིང་མི་མང་ནས་གསལ་པོ་མཁྱེན་བཞིན་པ་མ་ཟད་རྒྱ་གར་གཞུང་མང་གཉིས་ནས་ཀྱང་དུས་ཚོད་ལ་སྔ་ཕྱི་མ་གཏོགས་བོད་པ་ཚོ་བོད་ལ་ལོག་མཁན་ཡིན་པའི་ངོས་འཛིན་གནང་བཞིན་པ་ནས་ཉེ་ལམ་རྒྱ་གར་གྱི་འོས་བསྡུའི་ལས་རིམ་ནང་བོད་མི་བཙན་བྱོལ་བ་རྒྱ་གར་ནང་གནས་སྡོད་བྱེད་མཁན་ RC ལག་ཏུ་བཟུང་ནས་ཡུལ་མིའི་མཉམ་འོས་འཕེན་པ་འདིའི་མ་འོངས་རྒྱ་གར་གཞུང་དང་མི་མང་གི་ང་ཚོར་ལྟ་སྟངས་ག་འདྲ་ཆགས་མིན་དེ་ཡང་ང་ཚོའི་བསམ་བློའི་ནང་བང་སྒྲིག་དགོས་པ་ནི་ང་ཚོའི་ལག་ཏུ་ཕྱི་མི་རྒྱ་གར་ནང་གནས་སྡོད་ཆོག་པའི་ཁྲིམས་མཐུན་གྱི་ཡིག་ཆ་ RC ལག་ཏུ་བཟུང་ནས་གནས་ཡུལ་ལུང་པའི་ཆབ་སྲིད་འགྲན་བརྩོད་ནང་འཛུལ་བ་དེ་ཁྲིམས་མཐུན་ཡིན་དང་ཁྲིམས་འགལ་ཡིན་དེ་ཡང་གསལ་པོ་མ་ཆགས་པ་ནི་ང་ཚོའི་བཅའ་ཁྲིམས་དོན་ཚན་བརྒྱད་པ། བོད་ཀྱི་ཡུལ་མི། ཟེར་བའི་ནང་གསེས་བཞི་པའི་ནང་སྤྱི་འཐུས་ལྷན་ཚོགས་ནས་བོད་ཀྱིས་ཡུལ་མིའི་ཁྲིམས་ལུགས་གཏན་འབེབས་མ་ཐུབ་པ་ནས་ད་ལམ་གྱི་གནས་སྟངས་འདི་ཆགས་པ་མ་རེད་དམ། དབུས་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་ནས་ད་ལམ་གྱི་གནས་ཚུལ་འདིའི་ཐོག་ཐུགས་ཞིབ་ནན་པོ་མ་གནང་ཚེ་མ་འོངས་རྒྱ་གར་གཞུང་མང་གཉིས་ནས་ང་ཚོ་བོད་མི་བཙན་བྱོལ་བ་ཚོར་གཟིགས་ཕྱོགས་དང་བལྟ་སྟངས་ལ་བརྡོ་ཕོག་མི་ཡོང་བའི་ངེས་པ་མེད་པ་ནི་རྒྱ་གར་གྱི་གྲོས་ཚོགས་ཀྱི་འོས་བསྡུ་དེ་སྲིད་དོན་ཚོགས་པའི་བར་ཁྱོད་ཤི་ང་གསོན་གྱི་ཐོབ་ཤོར་ཆེ་བའི་ཉེན་ཚབ་ཅན་གྱི་འོས་བསྡུའི་མགྲན་བརྩོད་ནང་ང་ཚོ་བོད་མི་བཙན་བྱོལ་བ་ཕྱི་མི་གནས་སྡོད་ཆོག་པའི་ལག་ཁྱེར་ RC ལག་ཏུ་བཟུང་ནས་ཡུལ་མི་དང་འདྲ་མཉམ་གྱི་འོས་འཕེན་པ་ནི་མེ་དམར་པོ་ལག་པས་འཇུས་པ་མ་རེད་དམ། བཅའ་ཁྲིམས་དོན་ཚན་བརྒྱད་པ། བོད་ཀྱི་ཡུལ་མི། ནང་གསེས་བཞི་པའི་ནང་སྤྱི་འཐུས་ལྷན་ཚོགས་ནས་བོད་ཀྱིས་ཡུལ་མིའི་ཁྲིམས་ལུགས་གཏན་འབེབས་གནང་དགོས་པ་གསལ་འདུག་ན་བཙན་བྱོལ་བོད་མིའི་བཅའ་ཁྲིམས་ཀྱིས་ནུས་པ་འཐོན་ནས་མི་ལོ་སུམ་བཅུ་ལྷག་ཙམ་འགྲོ་བའི་སྐབས་འདིར་ཁྲིམས་བཟོ་སྤྱི་འཐུས་གྲོས་ཚོགས་ནས་བོད་ཀྱིས་ཡུལ་མིའི་ཁྲིམས་ལུགས་གཏན་འབེབས་མ་ཐུབ་པ་དེ་ནི་མི་མང་གིས་འཐུས་མི་ཁྲིམས་བཟོ་སྤྱི་འཐུས་གྲོས་ཚོགས་ནས་ཁྲིམས་བཟོའི་ལས་འགན་མ་འགྲུབ་པར་ངོས་འཛིན་ཞུས་ན་མ་འགྲིག་པའི་ཉེས་པ་ག་ནས་ཡོད།