གཞུང་པ་ཚེ་དབང་བསོད་ནམས།
ཉེ་ལམ་གསར་འགྱུར་བརྒྱུད་ལམ་ཁག་ཏུ་༧གོང་ས་མཆོག་ལ་གཞི་མེད་མཚན་ཤས་བཟོས་པའི་གནས་ཚུལ་འཐོན་པ་ནི་བོད་མི་རིགས་ལ་བསམ་ན། བློ་ཕམ་དང་ཁོང་ཁྲོ་བཟོད་སྲན་མི་ཐུབ་པའི་བྱ་སྤྱོད་ཐ་ཤལ་ཞིག་ཡིན་པ་ནས་བོད་མི་དང་བོད་དོན་ལ་སེམས་འཁུར་ཡོད་མཁན་དང་༧གོང་ས་མཆོག་ལ་དད་གུས་ཡོད་མཁན་ཕྱི་ནང་གི་མི་རིགས་མང་པོས་བཟང་སྤྱོད་དང་ཁ་མ་བྲལ་བའི་ཐོག་ནས་༧གོང་ས་མཆོག་ལ་གཞི་མེད་མཚན་སྨད་ཞུ་མཁན་ཚོར་རྒྱུ་ཚན་ལྡན་པའི་ཐོག་ནས་འབྲེལ་བཤད་དང་ངོ་སྤྲོད་གནང་མཁན་དང་ཞི་བའི་ངོ་རྒོལ་ལས་འགུལ་སྤེལ་མཁན་དང་ལན་འདེབས་གནང་མཁན་སོགས་ལས་འགུལ་འདྲ་མིན་གཅིག་རྗེས་གཉིས་མཐུད་བྱས་ནས་ཡོང་བཞིན་པ་ལ་རྗེས་སུ་ཡིད་རངས་ཞུ་གི་ཡོད།
༧གོང་ས་མཆོག་ལ་མཚན་སྨད་དང་བསྐུར་འདེབས་ཞུ་མཁན་དེ་དག་ནི་མི་ལུས་ཐེངས་གཅིག་བླངས་པ་དེ་དམྱལ་བ་གཏིང་ནག་ལ་འགྲོ་རྒྱུའི་ལས་ངན་པ་བསགས་ནས་མིག་ལྡན་གཡང་མཆོངས་བྱས་པ་ཙམ་ལས་༧གོང་ས་མཆོག་ནི་རི་རྒྱལ་ལྷུན་པོ་བཞིན་དུ་བརྟན་པ་དང་གངས་དཀར་ཏི་སི་བཞིན་དབུ་འཕང་མཐོ་བ་དང་མ་ཕམ་གཡུ་མཚོ་བཞིན་དུ་ཁ་ཞེང་ཆེ་བ་དང་རྒྱ་མཚོ་ཆེན་པོ་བཞིན་དུ་གཏིང་དཔོག་དཀའ་བ་ནས་དུས་ནམ་ཡང་ནག་ཕྱོགས་ཀླ་ཀློའི་ངན་བྱུས་འོག་ཉི་འོད་མུན་པས་ནམ་ཡང་འཇོམས་མི་ཐུབ་པ་དང་ས་གཞི་སྦར་མོས་ནམ་ཡང་ཁེབས་མི་ཐུབ་པ་དང་གངས་སེང་དཀར་པོ་ལ་ཁྱི་གིས་ནམ་ཡང་མགྲན་མི་ཐུབ་པ་ནས་གཞིས་བྱེས་བོད་མི་ཚོ་བློ་བདེ་བག་ཕེབས་ངང་གནས་ཆོག་པ་དང་ད་ལམ་གྱི་གནད་དོན་དེ་ཚོའི་རྒྱབ་ཏུ་སུ་དང་སུ་ཡོད་དབུས་བོད་མིའི་སྒྲིག་འཛུགས་སྡེ་སྲུང་ལྷན་ཁང་ནས་གནས་ཡུལ་རྒྱལ་ཁབ་སོ་སོའི་གསང་ལས་ཁག་དང་འབྲེལ་བ་གནང་ནས་ཡུལ་ཁྲིམས་ལ་སྦྱར་དགོས་པ་ནི་མ་འོངས་གཞི་མེད་སྐྱོན་འཛུགས་དེ་རིགས་མི་ཡོང་བའི་སྔོན་འགོག་དང་། ༧ གོང་ས་མཆོག་གི་བླ་བྲང་དགའ་ལྡན་ཕོ་བྲང་ཡིག་ཚང་ནས་མ་འོངས་༧གོང་ས་མཆོག་ལ་མཇལ་བཅར་ཞུ་མཁན་ཚོ་༧གོང་ས་མཆོག་དང་བར་ཐག་མི་ཊར་ལྔ་ཙམ་ངེས་པར་དུ་འཇོག་དགོས་པའི་འབོད་བསྐུལ་ཞུ་གི་ཡོད་ལ་༧གོང་ས་མཆོག་དང་ལྷན་དུ་སྐུ་པར་སྒྲོན་རྒྱུ་དེ་ཕྱི་ནང་གི་མཐོ་རིམ་མི་སྣ་གནད་ཡོད་ཚོ་ཙམ་ལས་གཞན་ཕྱི་ནང་གི་མི་མང་དཀྱུས་མ་མཇལ་ཁ་ཞུ་མཁན་ཚོ་དང་མཉམ་དུ་སྐུ་པར་མ་སྒྲོན་རོགས་ཞུ་འདོད་བྱུང་གང་ལགས་ཞུས་ན་མི་མང་པོ་ཞིག་གི་སྒོ་སྐབས་བླང་ནས་༧གོང་ས་མཆོག་དང་ལྷན་དུ་སྐུ་པར་སྒྲོན་ནས་༧ གོང་ས་མཆོག་དང་འབྲེལ་བ་གཏིང་ཟབ་ཡོད་པའི་རྣམ་འགྱུར་སྟོན་ནས་མི་མང་པོ་མགོ་འཁོར་དུ་བཅུག་མཁན་དེ་འདྲ་ཡང་ཡོང་མི་སྲིད་པ་མིན་པ་ནས་དགའ་ལྡན་ཕོ་བྲང་གི་འགན་ཡོད་དྲུང་ཆེ་ཚོའི་༧གོང་ས་མཆོག་གི་སྐུ་ཕྱྭ་དེ་ཕྱི་ནང་གི་མཇལ་ཁ་ཞུ་མཁན་ཚོ་ལས་གལ་ཆེ་བ་འཛིན་དགོས་པའི་འབོད་བསྐུལ་ཡང་ཞུ་འདོད་བྱུང་།
རྒྱུན་དུ་ང་ཚོའི་སྤྱི་ཚོགས་ནང་གསར་འགྱུར་འགོད་མཁན་དང་གསར་འགྱུར་སྤེལ་མཁན་དང་གསར་ཤོག་དང་དུས་དེབ་བརྙན་ཐུང་སོགས་བཟོ་མཁན་དང་ཡུ་ཊུབ་པར་སོགས་མི་སྒེར་དང་ཚོགས་སྐྱིད་འདྲ་མིན་ནས་ཚང་ཁ་ཤིག་ཤིག་བྱས་ནས་ངོ་དེབ་ནང་འཐོན་ཡོང་མཁན་ཚོ་ད་ལྟའི་ཛ་དྲག་གི་དུས་ཚོད་འདིར་དྲ་ལམ་དུ་ཕེབས་ནས་དངོས་ཡོད་རྒྱུ་ཚན་དང་ལྡན་པའི་འགོ་ནས་ངོ་རྒོལ་དང་གཏམ་བཤད་མཆན་འགོད་རྒྱུ་སོགས་བཟང་སྤྱོད་དང་ཁ་མ་བྲལ་བའི་ཐོག་ནས་གནད་ལ་འཁེལ་བ་དང་དོན་ལ་སྨིན་པ་ཡུལ་ཁྲིམས་དང་མ་འགལ་བ་ནས་ལས་འགུལ་སྤེལ་མཁན་ཚོར་ཐུགས་རྗེ་ཆེ་ཞུ་གི་ཡོད་། མཐའ་དོན་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་སྐུ་ཚེ་མི་ཞིག་རྡོ་རྗེའི་ཁམས་བརྟན་ཅིང་ཐུགས་ཀྱི་བཞེད་དགོངས་མཐའ་དག་སྒེག་མེད་ལྷུན་གྱི་འགྲུབ་པའི་སྨོན་འདུན་བཅས་རེ་ཞིག་འདིར་འཇུག་བསྡུས་པའོ་།
གཞུང་པས་།༢༠༢༣/༠༤/༡༦