གཞུང་པ་ཚེ་དབང་བསོད་ནམས།
༧ གོང་ས་མཆོག་གི་གསུང་འཕྲིན་ཆ་ཚང་འདིར་བཀོད་ཡོད། ༼ ༄༅ །ཀོ་ལི་གྷལ་དོན་ལྡན་གླིང་གཞིས་ཆགས་ཚུགས་ནས་མི་ལོ་ ༥༠ འཁོར་བའི་དུས་དྲན་བསྲུང་བརྩི་བྱེད་བཞིན་ཡོད་པར་གཞིས་མི་ཡོངས་དང་ཕྱི་ནང་གི་སྐུ་མགྲོན་བཅས་པར་མཛའ་བརྩེའི་འཚམས་འདྲི་ཡོད། རང་ཅག་བཙན་བྱོལ་དུ་འབྱོར་རྗེས་གཞིས་ཆགས་ཟུར་འཛུགས་དགོས་པའི་དམིགས་དོན་ནི། མི་འབོར་ཆེ་ཞིང་ས་རྒྱ་ཆེ་བའི་རྒྱ་གར་གྱི་ཡུལ་གྲུ་ཁག་ནང་རིམ་གྱིས་སིམ་སྟེ་ཁ་འཐོར་དུ་མི་འགྲོ་བ་དང་། བོད་ཀྱི་ཆོས་དང་རིག་གཞུང་། སྐད་ཡིག་། ཡུལ་གོམས་གཤིས་ལུགས་བཅས་པ་མི་ཉམས་རྒྱུན་འཛིན་དང་། ངེས་བརྟན་མེད་པའི་འཚོ་བའི་དཀའ་ངལ་སེལ་ཐབས་བཅས་ཀྱི་ཆེད་དུ་ཡིན་པ་ལྟར་ཕྱོགས་ཚང་མ་ནས་ངལ་ཁུར་དང་ལེན་ཕྱར་གྲུ་མཉམ་འདེགས་བྱས་པའི་འབྲས་བུ་རང་རེའི་མིག་གི་སྤྱོད་ཡུལ་དུ་གྱུར་པ་འདི་ཡིན། སླད་གཞིས་ཆགས་ཁག་ནང་རྒན་རྒོན་ནད་གཅོང་ཉམ་ཐག་ཧྲེང་པོ་ཡོད་རིགས་ཀྱི་འཚོ་བའི་གནས་སྟངས་ཐོག་དམིགས་བསལ་དོ་སྣང་ལྟ་རྟོག་རོགས་རམ་དང་འབྲེལ། ནང་དོན་རིག་པ་སེམས་ཀྱི་འཕྲོད་བསྟེན་དང་། གསོ་བ་རིག་པ་ལུས་ཀྱི་འཕྲོད་བསྟེན་ཡིན་ལུགས་བཤད་སྲོལ་ཡོད་པ་ལྟར་རྒན་རྒོག་དེ་དག་གི་ཟས་སྤྱོད་འཕྲོད་བསྟེན་ཐོག་ལའང་ལྟ་ཞིབ་མི་ལྷོད་པ་དགོས་གལ། བོད་གཞིས་ལུས་མི་མང་རྣམས་གཞན་དབང་འོག་ཏུ་ཚུད་ཡོད་ཀྱང་མཐུན་སྒྲིལ་རྡོག་རྩ་གཅིག་སྒྲིལ་གྱིས་ཆོལ་གསུམ་ཁ་བྲལ་གཏོང་ཐུབ་མེད། འོན་ཀྱང་འདི་ཕྱོགས་རང་རེ་བཙན་བྱོལ་ནང་སྤྱི་སེམས་ཀྱིས་ཕོངས་པའི་ཅོལ་ཆུང་ཁག་གཅིག་གིས་ཕྱོགས་རིས་འཐེན་འཁྱེར་གྱི་བྱ་བ་སྤེལ་བ་དེ་ནི་ཞབས་འདྲེན་བློ་ཕམ་གྱི་གནས་ཡིན་པས་སེར་སྐྱ་འགོ་དམངས་ཚང་མས་ཅིས་ཀྱང་ཡིད་གཟབ་དགོས་གལ་བློ་འཇགས་གྱིས། རྗེས་འཛིན་སྨོན་ལམ་བཅས། ཤཀྱཱའི་དགེ་སྦྱོང་ཆོས་སྨྲ་བ་ཏཱ་ལའི་བླ་མས། རབ་བྱུང་བཅུ་བདུན་པའི་ཆུ་ཡོས་ཟླ་བ་ ༡༢ ཚེས་ ༢༧ ཕྱི་ལོ་ ༢༠༢༤ ཟླ་ ༢ ཚེས་ ༧ ལ། ༽ ༧ གོང་ས་མཆོག་གི་གསུང་འཕྲིན་དེ་ཀོ་ལི་གྷལ་གཞིས་ཆགས་ལ་གནང་ཡོད་ན་ཡང་། ནང་དོན་ནི། ༼ འོན་ཀྱང་འདི་ཕྱོགས་རང་རེ་བཙན་བྱོལ་ནང་སྤྱི་སེམས་ཀྱིས་ཕོངས་པའི་ཅོལ་ཆུང་ཁག་གཅིག་གིས་ཕྱོགས་རིས་འཐེན་འཁྱེར་གྱི་བྱ་བ་སྤེལ་བ་དེ་ནི་ཞབས་འདྲེན་བློ་ཕམ་གྱི་གནས་ཡིན་པས་སེར་སྐྱ་འགོ་དམངས་ཚང་མས་ཅིས་ཀྱང་ཡིད་གཟབ་དགོས་གལ་བློ་འཇགས་གྱིས་ཞེས་བཀའ་ཕེབས་པ་ནས། ༼ སེར་མོ་བ། སྐྱ་བོ། འགོ་ཁྲིད། མི་དམངས། ༽ བཅས་ལ་གོ་བ་ནས་ཉེ་ལམ་སྤྱི་ཟླ་གསུམ་པའི་སྤྱི་འཐུས་གྲོས་ཚོགས་ཚོགས་སྐབས་༧ གོང་ས་མཆོག་གི་གསུང་འཕྲིན་དང་འབྲེལ་བའི་སྐོར་ལ་ངོས་ནས་རང་གི་བསམ་ཚུལ་སྤྱི་འཐུས་གྲོས་ཚོགས་ལ་བདེ་སྙན་ཕུལ་བའི་ངོ་ཤུས་མང་གཙོའི་ཀ་བ་འཛིན་སྐྱོང་བཀའ་ཤག་དང་། ཆེས་མཐོའི་ཁྲིམས་ཞིབ་ཁང་བཅས་ལ་ཕུལ་བར་སྤྱི་འཐུས་གྲོས་ཚོགས་དང་། འཛིན་སྐྱོང་བཀའ་ཤག ཆེས་མཐོའི་ཁྲིམས་ཞིབ་ཁང་། བཅས་མང་གཙོའི་ཀ་བ་གསུམ་ནས་གུས་པར་འབྱོར་ལན་ཙམ་ཡང་ཕེབས་མ་བྱུང་ན་མང་གཙོའི་སྒྲིག་འཛུགས་ནང་མི་མང་གིས་བདེ་སྙན་ལ་བདག་པོ་རྒྱག་རྒྱུ་དེ་མི་མང་འཐུས་མིའི་ཐུགས་འགན་ཡིན་པ་དང་། མི་མང་གིས་བསམ་ཚུལ་དང་མི་མང་གིས་མངོན་འདོད་ལ་བདག་པོ་མ་རྒྱབ་པའི་ཉིན་མོ་དེ་ནས་མང་གཙོ། ༼ Democracy ༽ དེ་གྲལ་རིམ་དམངས་གཙོ། ༼ Proletarian ༽ ལ་ཁ་ཕྱོགས་པ་མ་རེད་དམ། ༧ གོང་ས་མཆོག་གི་གསུང་འཕྲིན་དེ་ཀོ་ལི་གྷལ་གཞིས་ཆགས་ལ་ཕེབས་ཡོད་ན་ཡང་ནང་དོན། སེར་སྐྱ་འགོ་དམངས་ཚང་མས་ཅིས་ཀྱང་ཡིད་གཟབ་དགོས་གལ་བློ་འཇགས་གྱིས་གསལ་བ་ནས་མང་གཙོའི་ཀ་བ་གསུམ་ནས་༧ གོང་ས་མཆོག་གི་གསུང་འཕྲིན་ལ་འགན་འཁུར་ནས་མི་མང་གིས་སྐུ་ཚབ་སྤྱི་འཐུས་གྲོས་ཚོགས་ནས་༧ གོང་ས་༧ སྐྱབས་མགོན་ཆེན་པོ་མཆོག་རྣམ་མཁྱེན་ཆོས་ཀློང་ཆེན་པོར་རྙོག་འགལ་སྐད་ཅིག་ཀྱང་མི་བཞེས་པའི་མཚན་འཁོད་སྙན་ཞུ་དང་།
མི་མང་ལ་སྔར་འགྱོད་ཕྱིས་སྡོམས་སྤངས་བླང་ཚུལ་བཞིན་དགོས་པའི་ལམ་སྟོན་བཀའ་སློབ་སོགས་གྲོས་ཆོད་ག་རེ་བཞག་ཡོད་དེ་ཡང་གསལ་པོ་ཤེས་འདོད་བྱུང་ལ་༧ གོང་ས་མཆོག་གི་གསུང་འཕྲིན་དེ་བཙན་བྱོལ་བོད་མི་སྤྱི་བོ་གནམ་སྟན་ཚང་མས་ཧ་གོ་དོན་རྟོགས་ལ་སོང་མང་གཙོའི་ཀ་བ་གསུམ་ནས་རི་བོང་རྡོ་བརྫུས་བྱས་ནས་ཧ་མ་གོ་ལྟ་བུར་ནམ་ཡང་བཞུགས་མི་ཉན་པ་ནི་མང་གཙོ་དང་ཁྲིམས་ཀྱི་དབང་བསྒྱུར། ཚེ་འདི་ཕྱི། ལས་རྒྱུ་འབྲས། ཁྲེལ་ངོ་ཚ། ཡ་རབས་བཟང་སྤྱོད་སོགས་ལ་འགན་འཁུར་དགོས་ཀྱི་མེད་པ་ཡིན་ནམ།