ཉེན་ཁ་དང་རེ་ཞུ། ཨ་རིའི་རླུང་འཕྲིན་ཁང་ལ།

ཉི་མ་ཚེ་རིང་།

བོད་ཀྱི་སྤྱི་ཚོགས་ནང་གསར་འགོད་པའི་ལས་རིགས་གཉེར་བཞིན་པའི་བོད་མི་གསར་འགོད་པ་ཡོངས་ལ་ཞུ་རྒྱུར།
ད་ལྟ་བོད་མི་རིགས་ཀྱི་མ་འོངས་པའི་ཆབ་སྲིད་འཐབ་རྩོད་ཀྱི་མགོ་ཁྲིད་གསར་བ་ཞིག་ འོས་འདེམས་བྱ་དགོས་པའི་དུས་ཚོད་གལ་ཆེན་ཞིག་ཏུ་འཁེལ་ཡོད་པས། བོད་ཀྱི་གསར་འགོད་པ་ཚོས་དུས་ཚོད་གལ་ཆེན་འདིའི་ནང་དུ་ཕྱོགས་ཞེན་དོར་བ་དང་ལྟ་ ཚུལ་འདྲ་མཉམ་གྱིས་འོས་མིར་བཞེངས་མཁན་གྱི་སྐུ་དྲིན་ཅན་ཚོར་ཆ་མཉམ་གྱི་གར་སྟེགས་ཤིག་སྤྲོད་པར་རེ་བ་ཞུ་རྒྱུ་ཡིན། བློ་འཚབ་འདི་ཇི་ལྟར་བྱུང་བར་རྒྱུ་རྐྱེན་དེ་ག་རེ་ཡིན་ལབ་ན། ཉེ་སྔོན་དྲ་རྒྱ་ཁག་ཏུ་ཨ་རིའི་རླུང་འཕྲིན་ཁང་གི་གསར་འགོད་པ་འགའ་ཤས་ཀྱིས་་བཀའ་འཁྲི་ འོས་མི་བཞེངས་མཁན་བྱེ་བྲག་གཅིག་ལ་རྒྱབ་སྐྱོར་གྱི་སྒོ་ནས་མི་མང་གི་ཁྲོད་དུ་གསུངས་བཤད་གནང་བ་སོགས་ཀྱི་གནས་ཚུལ་ཞིག་གོ་ཐོས་བྱུང་ལ། ཡང་བཀའ་འཁྲི་བཞེངས་་མི་བྱེ་བྲག་ཅིག་ལ་རྒྱབ་སྐྱོར་གྱི་ལས་འགུལ་དེའི་ནང་དུ་ཨ་རིའི་རླུང་འཕྲིན་ཁང་གི་བོད་མི་གསར་འགོད་པ་འགའ་ཤས་ཀྱིས་གོ་སྒྲིག་བྱས་པ་དང་། རྒྱབ་སྐྱོར་བགནང་་མཁན་གྱི་གསུངས་བཤད་གནང་མཁན་ནི་ཨ་རིའི་རླུང་འཕྲིན་ཁང་གི་གསར་འགོད་པ་ཁ་ཤས་ཤིག་མངོན་གསལ་དོད་པོས་མི་མང་གི་ནང་དུ་ཐོན་ཏེ་བཀའ་བློན་འཁྲི་བ་བཞེངས་མི་འོས་་མི་བྱེ་བྲག་དེ་ལ་འོས་ངེས་པར་དུ་བླུགས་དགོས་པའི་གསུངས་བཤད་རིང་མོ་རེ་གནང་འདུག
བོད་མི་གསར་འགོད་པ་ཚོ་ཡིན་ཡང་བོད་མི་ཡིན་ཙང་མི་སོ་སོའི་ལྟ་ཚུལ་ལྟར་རྒྱབ་སྐྱོར་བྱེད་ཡུལ་དེར་རྒྱབ་སྐྱོར་བྱ་ཆོག་པ་ཡོད་ཀྱང་། ད་ལྟ་བོད་ཕྱི་ནང་གཉིས་སུ་ཨ་རིའི་རླུང་འཕྲིན་ཁང་ནི་ཆོལ་ཁ་གསུམ་རིས་མེད་ཀྱིས་ཉན་ཞིབ་བྱེད་ཡུལ་ཡིན་པས། ཨ་རིའི་རླུང་འཕྲིན་ཁང་གི་གསར་འགོད་པ་ཚོས་མི་མང་གི་ནང་དུ་ཕྱོགས་ཞེན་གྱི་ལྟ་བ་ཁྱེར་བ་ལྟར་ཐེངས་འདིའི་བཀའ་བློན་འཁྲི་པ་དང་འབྲེལ་བའི་གནས་ཚུལ་དང་ལས་འགུལ། མི་སྣ་གང་ཡིན་ཡང་དེའི་སྐོར་གྱི་གསལ་འགྱུར་ལ་ཡང་དེ་ལྟ་བུའི་ཕྱོགས་ཞེན་མི་སླེབས་པར་སུས་ཀྱང་བཤད་ཐབས་བྲལ་བས། ཨ་རིའི་རླུང་འཕྲིན་ཁང་ལ་བོད་ཕྱི་ནང་གཉིས་ཀྱི་རེ་བ་དང་ཡིད་ཆེས་བཅོལ་ཡོད་པ་བརླག་ཉེན་ཡོད་པ་དང་བོད་མི་རིགས་ལ་རླུང་འཕྲིན་ཁང་འདི་ཡིས་ཞབས་ཞུ་བྱ་མི་ཐུབ་པར་གྱུར་བའི་ཉེན་ཁ་ཡོད་ཙང། དུས་ཚོད་གལ་ཆེན་པོ་འདིའི་ནང་དུ་རླུང་འཕྲིན་ཁང་སོ་སོའི་གསར་འགོད་པ་ཚོས་རང་ཚུགས་བརྟན་པོ་དང་བར་གནས་ཀྱི་ཁྱད་ཆོས་ཐོན་པ་བྱ་དགོས་པ་གལ་ཆེན་པོ་རེད་དོ།