ཉེར་ལྔའི་དུས་མཆོད་ཚེ་རིང་མ།

སྐྱོ་བྲག་དགའ་དབང་།

ཟླ་བ་བྱུང་ངོ་ཅོག་གི་ཡར་མར་གྱི་ཚེས་པ་བཅུ་ནི། དཔའ་བོ་དང་རྣལ་འབྱོར་མ་མཆོད་པའི་དུས་ཆེན་ཡིན་པར། རྒྱུད་ཀུན་སྤྱོད་ལས། ཟླ་བ་མར་ངོའི་ཚེས་བཅུ་དང་། ། ཟླ་བ་ཡར་ངོའི་དེ་ཉིད་ལ། ། འབད་པས་དཔའ་བོ་ཆང་སོགས་དང་། ། རྡོ་རྗེ་ལྷ་མོ་རབ་མཆོད་ཅིང་། ། ཞེས་གསུངས་ལ། ལྷག་ཏུ་ཚེས་པ་ཉེར་ལྔ་ནི། མཁའ་འགྲོའི་དུས་ཆེན་ཡིན་པར་ཡོངས་སུ་གྲགས་པས་ན། ང་ཚོས་ལྕགས་ཕོ་བྱི་བ་སྣྲོན་ཟླའི་ཚེས་པ་ཉེར་ལྔ་ཉིན། བསྐལ་པ་བཟང་པོའི་སངས་རྒྱས་རྣམས་གང་དུ་འཚང་རྒྱ་བའི་གནས་མཆོག་རྡོ་རྗེ་གདན་ལ། ཞྭ་དམར་དྲུག་པ་གར་དབང་ཆོས་ཀྱི་དབང་ཕྱུག་གིས། གདན་ས་ཐིལ་གྱི་ལུགས་དང་རྗེ་བརྒྱད་པའི་ཞལ་སྔ་ནས་སྩལ་བ་སོགས་ཐམས་ཅད་ནས་ལེགས་ཆ་བསྡུས་ཏེ་གུང་བསྒྲིགས་པ་ཚེ་རིང་མཆེད་ལྔའི་མཆོད་གཏོར་གྱི་རིམ་པ་ཞེས་པ་དེ་བཏོན་ཏེ།

རྒས་མེད་ལང་ཚོ་ལྡན་པའི་ལུས་སྟོབས་རྒྱས། ། མིག་ལ་ཡ་མཚན་ལྟད་མོའི་དགའ་བ་དང༌། ། རྣ་བར་རྟག་ཏུ་སྙན་པའི་གཏམ་ཐོས་ཤིང༌། ། དྲི་ཞིམ་ངད་པ་སྣ་དང་མི་འབྲལ་བར། ། ཟས་སྐོམ་འབྱོར་བས་རོ་འཛིན་ཚིམ་བྱེད་ཅིང༌། ། ལུས་ལ་རེག་བྱ་བདེ་བ་ཁོ་ནས་འཚོ། ། ཡིད་ལ་རྣམ་པར་བཀྲ་བའི་ཤེས་རབ་དང༌། ། ཟག་མེད་བདེ་བས་ནམ་ཡང་ངོམ་པར་མཛོད། ། ཅེས་པ་འགྲོ་བ་ཐུན་མོང་གི་རེ་སྨོན་བྱ་ཡུལ་འདི་ཕྲིན་ལས་སུ་བཅོལ་བ་ཡིན།

སྤྱིར་ཚེ་རིང་མཆེད་ལྔ་ནི། མཁའ་འགྲོ་ཆེན་མོ་ལྔ་པོ་ནི། ། ཕྱི་ལྟར་སྨན་བཙུན་ཆེན་མོ་ལྔ། ། ནང་ལྟར་ཞིང་སྐྱོང་ཆེན་མོ་ལྔ། ། གསང་བ་རིགས་ཀྱི་ཡུམ་ཆེན་ལྔ། ། དུས་གསུམ་སངས་རྒྱས་སྐྱེད་པའི་ཡུམ། ། མཁའ་འགྲོའི་དབང་ཕྱུག་ལྔ་ལ་བསྟོད། ། ཅེས་དུས་གསུམ་སངས་རྒྱས་སྐྱེད་པའི་ཡུམ་ཆེན་ཡིན་ལ། དམིགས་བསལ་ཆགས་མེད་རི་ཆོས་ལས། བཞད་པ་རྡོ་རྗེའི་གསང་ཡུམ་ཚེ་རིང་མ། ། སྒྲུབ་བརྒྱུད་བསྟན་པ་སྤེལ་བའི་གཡར་དམ་ཅན། ། ཞེས་སྒྲུབ་བརྒྱུད་སྙིང་པོའི་བསྟན་པ་ལ་འབྲེལ་བ་ཐུན་མོང་མིན་པ་ཡོད་པའི་ལྷ་མཆོག་ཡིན་ནོ།།