ཨ་མེ་ཆ།
————-
གོ་ལའི་ཡང་རྩེ་རུ། ཁྱེད་རང་སྤོབས་པས་འགྲེང་ཆོག
ཉེས་པ་མེད་པའི་ངའི་ཕ་ཡུལ་གྱི་རི་ཆུ་ནགས་གསུམ།
ང་ཚོ་རྒྱང་ཐག་ཇི་ལྟར་རིང་ཡང་ཁྱེད་ཀྱི་ཉེ་སར་བཅར་བཞིན་ཡོད།
མི་ལོ་ལྔ་བཅུར་དམར་གསོད་བྱས་པའི་ཤི་བོ་གྲངས་མེད་ཀྱི་འབོད་པ་སྙེག་གིན་བཅར་བཞིན་ཡོད།
མི་རབས་ནས་མི་རབས་ལ་འཇལ་མ་ཚར་བའི་བརྙས་བཅོས་དང་ཤ་འཁོན་རྩོད་ཀྱིན་ལོག་ཡོང་དུས།
ང་ཚོས་མེས་པོ་ཚོའི་གདངས་སྙན་མ་འགྱུར་བའི་འཚོ་བའི་རོལ་དབྱངས་ཤིག་མཉམ་དུ་དཀྲོལ་དགོས།
གོ་ལའི་ཡང་རྩེ་རུ། ཁྱེད་རང་སྤོབས་པས་འགྲེང་ཆོག
ཉེས་པ་མེད་པའི་ངའི་ཕ་ཡུལ་གྱི་རི་ཆུ་ནགས་གསུམ།
ཡུལ་གྱར་བའི་མིག་ཀོང་ན་མཆི་མར་འཁྱིལ་བའི་མཐོ་སྒང་གི་སྦྲ་ཁྱིམ་སྨུག་པོ།
ཡུལ་གྱར་བའི་སེམས་རྩར་སྐྲན་དུ་གྱུར་བའི་སྡུག་གདུང་གི་ཚོར་འདུ་གྲངས་མེད།
མི་ལོ་ལྔ་བཅུར་ཁྱེད་རང་ཁེར་རྐྱང་དུ་བཞག་ཅིང་འབྲོ་དགོས་པའི་སྡིགས་ཉེས་གླེང་ཐབས་བྲལ་བས།
ངས་ཞེ་བསམ་པའི་གཏིང་ནས་ཕ་ཡུལ་ལགས་ཁྱེད་ལ་དགོངས་དག་ཞུ་དགོས།
གོ་ལའི་ཡང་རྩེ་རུ། ཁྱེད་རང་སྤོབས་པས་འགྲེང་ཆོག
ཉེས་པ་མེད་པའི་ངའི་ཕ་ཡུལ་གྱི་རི་ཆུ་ནགས་གསུམ།
གཏུམ་དྲག་ཅན་གྱི་སྲིད་གཞུང་ཞིག་ཁྱེད་ཀྱི་ཕང་བར་ཨུ་ཚུགས་ཀྱིས་བསྡད་དེ།
བོད་ཀ་གཡག་དྲུག་གི་ས་སྐྱེས་རྡོ་སྐྱེས་ཀྱི་མི་སེར་ཚོ་ཤ་འཐག་འཐག་བྱེད་དུས།
ང་ཚོས་ཡོད་ཚད་གློ་སྙིང་མཆིན་གསུམ་དུ་སྦས་ཤིང་ཁྲག་གི་རྒྱུ་བར་ཞེ་སྡང་གིས་འཕག་གིན་ཡོད།
ང་ཚོས་ཀྲུང་གོའི་དམར་གསོད་ལ་འཇིག་ཞུམ་བྲལ་བའི་དཔའ་བོ་ཁྲི་ཕྲག་གི་སྙིང་སྟོབས་ཀློག་གིན་ཡོད།
གོ་ལའི་ཡང་རྩེ་རུ། ཁྱེད་རང་སྤོབས་པས་འགྲེང་ཆོག
ཉེས་པ་མེད་པའི་ངའི་ཕ་ཡུལ་གྱི་རི་ཆུ་ནགས་གསུམ།
བོད་ས་བྱི་ལོར་ཚད་མེད་པར་བོད་ཞིང་འབྲོག་མི་མང་གི་ཚེ་སྲོག་སྣང་མེད་གསོད་བཞིན།
མིའི་འཚོ་གནས་དང་མིའི་རང་དབང་ལ་རྒོལ་བཞིན་ཐོན་འོངས་པའི།
ཀྲུང་གོའི་སྲིད་གཞུང་དང་། དམག་མི། མེ་སྒྱོགས།
ས་གོ་ལའི་ཞི་བདེ་བརྟན་བརླིང་གི་ཁ་གཏད་དུ་ལངས་པའི་དགྲ་བོ་ངོ་མ་རེད།
༢༠༠༩ ཕྱི་ཟླ༣པའི་ཚེས་༢༤ཉིན་ཕྰ་རེ་སིར།